Mme Mbụme Ẹtode Mme Andikot

Ndusụk owo ẹdọhọ ke ubom oro Paul okodụkde ikesịpke ke Isuo Malta, edem usụk Sicily, edi ke ekesịp ke isuo en̄wen. Ubom oro ekesịp ke m̀mọ̀n̄?

Mbụme emi enyene n̄kpọ ndinam ye ekikere eke ndondo emi nte ke ubom oro apostle Paul okodụkde ikesịpke ke Isuo Malta, edi ke ekesịp ke Cephalonia (m̀mê, Kefallinía) ke mbọhọ Corfu ke Inyan̄ Ionia, emi ekperede mbenesụk n̄kan̄ edem usoputịn Greece. N̄wetnnịm n̄kpọ eke odudu spirit asian nnyịn ete ke Paul ye Julius, kpa etubom ekọn̄ Rome oro ekekpemede enye ọkọrọ ye mbonekọn̄ en̄wen ye mme nsan̄a Paul, ẹma ẹsio ẹkpọn̄ Caesarea. Nte ẹwụtde ke ndise obio oro odude mi, mmọ ẹma ẹwat ẹka Sidon ye Myra. Mmọ ẹma ẹdiere ke akamba ubom ibokpot ẹto Alexandria, Egypt, ẹwat ẹka n̄kan̄ edem usoputịn Cnidus. Mmọ ikekemeke  aba ndiwat ke Inyan̄ Aegean mbe Itụn̄ Greece n̄ka Rome. Ọkpọsọn̄ oyobio ama anam mmọ ẹwat ẹka edem usụk emi Crete odude man mbenesụk esie ekwi mmọ. Ke ẹsịmde do, mmọ ẹma ẹdian ke esụk emi ekerede Eti Itie-Uduọk-Ukwak. Ke mmọ ẹma ‘ẹkedianade ẹkpọn̄ Crete,’ “ọkpọsọn̄ oyobio, emi ekerede Euraquilo, oto ke obot abara osụhọde omụm ubom idiọk-idiọk.” Ofụm ama ada akamba ubom ibokpot oro “oduyo ke inyan̄” tutu esịm ọyọhọ okoneyo 14. Ke akpatre, ubom emi ekemende owo 276 mi ama esịp ke isuo oro Edisana N̄wed Abasi Usem Greek okotde Me·liʹte.—Utom 27:1–28:1.

Ke ediwak isua emi ẹbede, ẹnọ nsio nsio ekikere ẹban̄a isuo emi ẹkotde Me·liʹte mi. Ndusụk owo ẹkere ke enye ekedi isuo Melite Illyrica, ẹdiọn̄ọde idahaemi nte Mljet, ke Inyan̄ Adriatic ekperede mbenesụk Croatia. Etie nte emi idịghe akpanikọ, koro Mljet odu ke edem edere ndien ọsọsọn̄ ndikụt ebuana oro Mljet enyenede ye mme ebiet efen oro Paul akakade, utọ nte Syracuse, Sicily, ye mbenesụk edem usoputịn Italy.—Utom 28:11-13.

Ediwak mme akabade Bible ẹsịm ubiere nte ke Me·liʹte edi Isuo Melite Africanus, oro ẹdiọn̄ọde idahaemi nte Malta. Akpatre esụkmbehe oro ubom emi ekemende Paul akadiande ekedi Eti Itie-Uduọk-Ukwak, ke Crete. Ekem ọkpọsọn̄ oyobio ama anam ubom oro awat aka n̄kan̄ edem usoputịn emi Cauda odude. Oyobio ama aka iso eberi ubom emi ke ediwak usen. Enen̄ede owụt ifiọk ndikere ke ubom oro oyobio ekeberide mi edisụk awat aka n̄kan̄ edem usoputịn tutu esịm Malta.

Ke ẹkerede ẹban̄a oyobio oro esiwakde ndifụme ye “unọmmọn̄ ye udomo usọpmmọn̄,” Conybeare ye Howson ẹdọhọ ke n̄wed mmọ oro The Life and Epistles of St. Paul, ẹte: “Tọn̄ọ ke Clauda [m̀mê, Cauda] sịm Malta edi n̄kpọ nte kilomita 770. Mme n̄kpọntịbe oro ẹwụtde ke ubom oro Paul okodụkde ekesịp ke Isuo Malta ẹnen̄ede ẹdi n̄wọrọnda, tutu ọsọn̄ ndinịm ke isọn̄ oro mme awat ubom ẹkewatde ẹkedian ke ọyọhọ okoneyo duopenan̄ ikedịghe Isuo Malta. Mme n̄kpọntịbe emi ẹnen̄ede ẹwụt ke isuo emi ekedi Malta.”

Okposụkedi ẹkemede ndinọ nsio nsio ekikere mban̄a isuo oro ubom emi Paul okodụkde ekesịpde, ndise obio oro odude mi, oro owụtde ubom emi esịpde ke Malta odu ke n̄kemuyo ye n̄wetnnịm n̄kpọ Bible.

[Ndise obio/Ndise ke page 31]

(Ama oyom ndikụt nte enye enen̄erede etie, se n̄wed)

Jerusalem

Caesarea

Sidon

Myra

Cnidus

CRETE

CAUDA

MALTA

SICILY

Syracuse

Rome

MLJET

GREECE

CEPHALONIA