Ndi Imoyom Nti Item?

MFỊN, ediwak owo ẹkere ke mmimọ imọfiọk eti ye idiọk ye nte ke mmimọ imenyene unen ndinam se ededi oro imade. Mbon eken ẹdọhọ ke afo emekeme ndinam se ededi oro ekerede ke ọyọnọ fi inemesịt. Ekikere emi enen̄ede otụk ndọ ye uwem ubon oro ẹkesidade nte akpan adaha n̄kaowo.—Genesis 3:5.

Kere ban̄a Verónica * oro odụn̄de ke Mexico. Enye ọdọhọ ete: “Esisịt ini mbemiso esịmde isua 15 tọn̄ọ ikọdọ ndọ, ebe mi ama ọdọhọ ke imọ imesinyene ebuana idan̄ ye n̄wan efen. Enye ama ọdọhọ ke imọ idikemeke ndikpọn̄ n̄wan emi sia enye edide n̄kaiferi esinyụn̄ enen̄erede anam imọ ikop inemesịt. Ibuot ama oyon̄ mi ndifiọk ke ata edima ufan mi ididụhe aba ye ami. N̄kesikere ke idụhe se ikpabiakde owo nte n̄kpa owo ima. Edi efịbe abiak mi akan, sia ke adianade ye editaba owo oro nnen̄erede mma, enye ke aka iso anam se idiọkde mi esịt.”

Odu eren isua 22 n̄ko emi okosiode n̄wan esie ndọ onyụn̄ enyenede eyeneren kiet oro enye mîmaha ndise enyịn. Enye oyom eka esie esise imọ ye eyen imọ enyịn. Edieke eka esie mînọhọ kpukpru se enye oyomde, enye ayayat esịt onyụn̄ ọtọk eka nte idiọk eyen esinamde. Idem esimem eka esie ke ini enye anamde n̄kpọ ntem.

Mme utọ idaha oro ẹdi ọsọ n̄kpọ. Edidian̄ade ntie ye usion̄o ndọ ẹyọyọhọ kpukpru ebiet. Ediwak nditọ ẹkụt nte ete m̀mê eka ọkpọn̄de ufọk ọkọtọn̄ọ uwem obufa. Ndusụk uyen ikponoke owo ndomokiet aba, ọkọrọ ye mme ete ye eka mmọ, ẹnyụn̄ ẹnam mme n̄kpọ oro owo  mîkpekereke-kere ke eset nte ke nditọ ẹkpenam. Editabi idan̄ nse, edida n̄kpọsọn̄ ibọk ke idiọk usụn̄, en̄wan mme uyen, ye nditọ ndiwot mme andikpep m̀mê mme ete ye eka ẹnen̄ede ẹdi ọsọ n̄kpọ ke ediwak idụt. Ndien anaedi afo ọmọfiọk ke idịghe ndọ ye ubọk nditọ kpọt ẹkama mfịna ke ererimbot mfịn.

Nte nnyịn ikụtde nte mme n̄kpọ emi ẹtịbede, nnyịn imekeme ndikere se ikpanamde n̄kaowo etie ntem. Edieke mme owo ẹnen̄erede ẹfiọk se idide eti ye idiọk, ntak emi owo mîkemeke ndikọk ekese mfịna? Ndi imoyom nti item? Ndi odu ebiet oro ikpenyenede utọ nti item oro, emi ẹkemede ndiberi edem? Okposụkedi ediwak owo ẹdọhọde ke imenịm Abasi ke akpanikọ inyụn̄ inịm Ikọ esie oro ẹwetde-wet, etie nte mme ubiere mmọ isiwakke ndiwụt emi. Edi nso ufọn ke idinyene edieke iyomde inyụn̄ ibọde item Abasi? Ẹyak ineme oro ke ibuotikọ oro etienede.

[Ikọ idakisọn̄]