Ndiyom Mfọnn̄kan Item

MME owo ẹnen̄ede ẹma ndidu uwem oro okụtde unen. Ndibọ nti item nnyụn̄ nnyịme ndida mmọ nsịn ke edinam edi ukpọhọde edikụt unen ke awak-n̄kukọhọ ererimbot emi. Nte ededi, mme owo isimaha ndida eti item nsịn ke edinam. Ediwak owo ẹdọhọ ke owo ekpenyene ndidu uwem esie nte enye amade. Ke akpanikọ, Bible ọdọhọ ke Satan, kpa ata akpa asua ukara Abasi, ọkọdọhọ akpa owo iba oro ke mmọ ẹkpenyene ndida ke idem n̄kpọn̄ Abasi. Kop nte Genesis 3:5 obụkde se enye ọkọdọhọde Eve: “Abasi ọmọfiọk ete, ke usen eke mbufo ẹdiade [eto ifiọk eti ye idiọk] ndien enyịn mbufo ẹyetara; mbufo ẹyenyụn̄ ẹtie nte Abasi, ẹfiọk eti ye idiọk.”

Ndi Adam ye Eve ẹma ẹkeme ndidu uwem uforo uforo nte mmọ ẹkekerede, inyụn̄ ibọhọ ndiọi utịp? Baba. Mmọ ẹma ẹsọsọp ẹkụt edikpu ke ndikokohode idem nyom ndifiọk eti ye idiọk. Mmọ ikenyeneke aba unyịme Abasi ẹnyụn̄ ẹtọn̄ọ uwem nsọn̄ọn̄kpọ ye unana mfọnmma, ekem ẹkpan̄a. (Genesis 3:16-19, 23) Oro anam n̄kpa ebe esịm kpukpru nnyịn. Bible ọdọhọ ete: “Nte idiọk-n̄kpọ okotode owo kiet [Adam] odụk ke ererimbot, n̄kpa onyụn̄ otode ke idiọk-n̄kpọ oro odụk; n̄kpa onyụn̄ ebe esịm kpukpru owo, koro kpukpru owo ẹma ẹnam idiọk-n̄kpọ.”—Rome 5:12.

Okposụkedi usụn̄ uwem oro Adam ye Eve ẹkemekde adade ndiọi utịp edi, ediwak owo isụk ikwe ọniọn̄ oro odude ke ndida item oro Andibot owo ọnọde nsịn ke edinam. Nte ededi, Bible ọdọhọ ke ‘ẹkeda odudu Spirit Abasi ẹwet N̄wed Abasi’ ndien ke enye “edi se ifọnde” inyụn̄ ikemede ndin̄wam nnyịn inyene “ọyọhọ ifiọk, [inyụn̄ iben̄e] idem ke kpukpru nde ndinam eti utom ekededi.” (2 Timothy 3:16, 17) Ke akpanikọ, nnyịn iyenen̄ede ikop inemesịt edieke idade item Bible isịn ke edinam. Emi enen̄ede enyene n̄kpọ ndinam ke uwem ubon.

 Edinam Akpanikọ ke Ndọ

Nte Bible ọdọhọde, Abasi okoyom ndọ ebịghi ke nsinsi. (Genesis 2:22-24; Matthew 19:6) N̄ko-n̄ko, N̄wed Abasi ọdọhọ ke owo ikpenyeneke ‘ndisabade bed ndọ,’ emi ọwọrọde ke owo ikpenyeneke ebuana idan̄ ye owo oro mîdịghe nsan̄a ndọ esie. (Mme Hebrew 13:4) Nte ededi, eyedi afo ọmọfiọk ke ediwak ndọ isịmke mme idaha oro ẹyomde mi. Ndusụk owo ẹsiwak ndibre ima ke itieutom ye mbon oro mîdịghe nsan̄a ndọ mmọ. Mbon eken ẹsisu nsu ẹnọ ubon mmọ man ẹkedu ye owo oro mîdịghe nsan̄a ndọ mmọ. Ndusụk owo ẹsikam ẹkpọn̄ nsan̄a ndọ mmọ ẹwọrọ ẹkedụn̄ ye owo oro mîsọn̄ke nte nsan̄a mmọ, ẹdọhọde ke emi esinam mmimọ isụk itie akparawa akparawa inyụn̄ inen̄ede ikop inemesịt, ukem nte ebe Verónica oro iketịn̄de iban̄a ke ibuotikọ oro ekebemde iso.

Nte ededi, ndisịn ofụri ukeme nyom inemesịt ye unana edikere se iditịbede isidaha inemesịt oro ebịghide idi. Ronald ekeme ndisọn̄ọ emi. Sia ekenịmde ke oyofori uwem imọ, enye ama ọkpọn̄ n̄wan esie onyụn̄ ọtọn̄ọ obufa ubon ye n̄wan oro enye ekesidịbede anam ima ke ofụri isua itiokiet, emi okonyụn̄ amande nditọ iba ọnọ enye. Nte ededi, esisịt ini ke enye ama okosio n̄wan esie ndọ, obufa n̄wan emi ama efehe ọkpọn̄ enye! Ke akpatre, Ronald ama ọnyọn̄ okodụn̄ ye ete ye eka esie. Enye ọkọdọhọ ke se iketịbede inọ imọ ekedi “ata n̄kpọ esuene.” Uwụtn̄kpọ kiet kpọt edi oro. Mme utọ ibụk ibụk edu uwem ntre ẹsitịp ẹsịn ke anana-ibat usion̄o ndọ ye n̄wụre ubon, adade ndutụhọ ọsọk ediwak owo—ikpọ ye n̄kpri ukem ukem.

Ke n̄kan̄ eken, ndinam item Bible esida ata inemesịt edi. Se iketịbede inọ Roberto edi oro, enye ọdọhọ ete: “Item Bible ikayakke ntaba n̄wan mi. Ndinyene ebuana ye owo oro mîdịghe nsan̄a ndọ nnyịn isinọhọ owo ata inemesịt ọkpọkọm owo oro eye didie. Ukpepn̄kpọ Bible an̄wam mi ndikpono n̄wan mi, emi eberede ye ami ke ediwak isua idahaemi.” Item Bible oro ọdọhọde “owo baba kiet okûnyụn̄ abian̄a n̄wan uyen esiemmọ” ama enen̄ede an̄wam Roberto. (Malachi 2:15) Ke nso usụn̄ en̄wen ke item Abasi ekeme ndin̄wam nnyịn?

Ndibọk Nditọ Nnyịn

Ke ediwak isua oro ẹkebede, ọsọ ekikere oro mme owo ẹkenyenede kaban̄a edibọk nditọ ekedi ke mme ete ye eka ikpenyeneke ndidori nditọ ukpan n̄kaha. Eketie nte esịne ifiọk ndiyak nditọ ẹbiere se mmọ ẹkerede ke enen ye nte mmọ ẹkpedude uwem. Ntak ekedi mbak ẹdibiọn̄ọ n̄kọri mmọ. Ndusụk ebiet ikakam inyeneke akpan ndutịm ke ufọkn̄wed man ayak nditọ ufọkn̄wed ẹbiere  ediwak n̄kpọ ke idemmọ, esịnede m̀mê iyọbọ ukpep m̀mê idibọhọ, ẹnyụn̄ ẹmek udomo ini oro mmọ ẹdidade ẹbre mbre ẹnyụn̄ ẹkpep n̄kpọ. Ndutịm ukpepn̄kpọ utọ ufọkn̄wed oro kiet ekedi “ndiyak nditọwọn̄ ẹnyene ifụre ndikere nnyụn̄ nnam n̄kpọ ye unana ikpọ owo ndisịbe ndụk m̀mê ndinọ ekikere mmọ.” Mfịn, ndusụk mme ọnọitem ke nte ẹkpedude uwem ẹsụk ẹkere ke owo ikpenyeneke ndida ikpa ntụnọ nditọ, idem ke ini mme ete ye eka ẹkerede ke akpana ẹda ikpa ẹtụnọ nditọ ke ima ima usụn̄.

Nso idi utịp? Odu ediwak owo oro ẹdọhọde ke ndiyak nditọwọn̄ nnọ usụn̄ mmọ anam mmọ ẹnyene ifụre ẹkaha. Mmọ ẹkere ke emi edi ntak akpakịp ubiatibet ye mbumehe uda n̄kpọsọn̄ ibọk. Ndụn̄ọde oro ẹkenamde ke United States owụt ke n̄kpọ nte mbahade 70 eke ikie ke otu mbon oro ẹkedade ẹnam ndụn̄ọde emi ẹkedọhọ ke mme ete ye eka inọhọ nditọwọn̄ ye n̄kparawa owo udomo ndausụn̄ oro ẹkpenọde mmọ. Ke ini ẹkedomode nditịn̄ ntak emi mme uyen ẹsitopde ikan̄ ke ufọkn̄wed ye mme enyene-ndịk ubiatibet eken, ediwak owo ẹdọhọ ke “mme ete ye eka ndiyak nditọ nnọ usụn̄ idemmọ” edi ntak. Ndien idem ke ini mme utịp mîdiọkke ntre, mme ete ye eka ọkọrọ ye nditọ ẹsibọ ndiọi utịp ke ndikayak eyen nnọ usụn̄ esie.

Nso ke Bible etịn̄ ke afan̄ emi? N̄wed Abasi eteme ke ẹkpenyene ndida odudu oro ẹnọde mme ete ye eka nnam n̄kpọ ke ima ye ke usụn̄ oro enyenede iwụk. Bible ọdọhọ ete: “Ndisịme ido eyịre ke esịt eyenọwọn̄: eto item eyebịn enye efep ọkpọn̄ enye anyan usụn̄.” (Mme N̄ke 22:15) Nte ededi, kpukpru ntụnọ oro mme ete ye eka ẹnọde ẹkpenyene ndikem ye se eyen akanamde. Ẹkpenyene ndida sụn̄sụn̄ ido, mfara ke idem, ye edikere mban̄a nnọ ntụnọ ekededi. Ntụnọ oro ẹnọde ke utọ usụn̄ emi edi uyarade ima. Ẹkeme ndikụt akakan unen edieke mme ete ye eka ẹdade odudu mmọ ẹtụnọ nditọ mmọ ke ima idịghe ndida mfiomo mmọ.

Ẹkụt nti utịp oro edida item emi nsịn ke edinam adade edi. Arturo, eren isua 30 ke Mexico emi ọdọde ndọ obufa ọdọhọ ete: “Papa ama asian mi ye nditọeka mi ete ke imọ ye Mama inyene odudu ke ufọk. Mmọ ikesimen̄eke ndinọ nnyịn ntụnọ. Edi, mmọ ẹma ẹsida ini ẹneme nneme ye nnyịn. Idahaemi ndide akwa owo mi, enem mi ndidu uwem oro enyenede iwụk, ndien mmọfiọk ke emi enen̄ede oto eti item oro n̄kọbọde.”

 Da Mfọnn̄kan Item Du Uwem

Ikọ Abasi, kpa Bible, ọdọn̄ọ mfọnn̄kan item ọnọ ubonowo. Item esie iban̄ake uwem ubon kpọt. Enye etịm nnyịn idem ke ediwak usụn̄ koro enye ekpep nnyịn nte ikpanamde n̄kpọ ke ererimbot oro ediwak owo mîmaha ndida mfọnn̄kan ọniọn̄ Abasi ndu uwem ke ufọn idemmọ.

Jehovah Abasi, kpa Andibot owo, akada David andiwet psalm ọn̄wọn̄ọ ọnọ nnyịn ete: “Nyeteme fi, nnyụn̄ n̄wụt fi usụn̄ eke afo edisan̄ade: nyeteme fi, nyetịn̄ fi enyịn mi ke idem.” (Psalm 32:8) Ndi afo emekere se akam ọwọrọde Andibot ndikpeme nnyịn nsio ke n̄kpọndịk? Nte ededi, se nnyịn owo kiet kiet ikpobụpde idem nnyịn edi: ‘Ndi ami nyosụhọde idem nnyịme item Jehovah oro ekpemede owo?’ Ikọ esie ọdọhọ nnyịn ke ima ima usụn̄ ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”—Mme N̄ke 3:5, 6.

Oyom ifịk ye ukeme man ikeme ndifiọk Jehovah, ndien Bible ekeme ndin̄wam ubonowo ndifiọk enye. Usụn̄ uwem oro enye ọdọhọde nnyịn idụk asan̄a ye “un̄wọn̄ọ uwem emi odude ke emi ye eke uwem emi edidide.” Enye enen̄ede asan̄a ye akwa udori ke ikerede iban̄a mme ufọn oro enye ọnọde.—1 Timothy 4:8; 6:6.

Edieke afo amade ọniọn̄ oro Bible ọnọde onyụn̄ amade mme edidiọn̄ oro ẹtode edidu uwem ọniọn̄ oro enye etemede, nam edikot Ikọ Abasi ye editie n̄kere se okotde edi ebeiso n̄kpọ ke uwem fo. Ndinam ntre ayan̄wam fi ndikan mme n̄kpọ-ata oro osobode idahaemi ye ekededi oro edisobode ke ini iso. Ke adianade do, afo eyekpep aban̄a idotenyịn edidu ke obufa ererimbot Abasi, emi Jehovah edinọde kpukpru owo ukpep onyụn̄ anam emem mmọ okpon.—Isaiah 54:13.

[Ndise ke page 5]

Item Bible ekeme ndisọn̄ọ mbọbọ ndọ

[Mme ndise ke page 6]

Item Bible ekeme ndinọ eti ndausụn̄ onyụn̄ ọnọ owo ifet ndikop inem uwem

[Mme ndise ke page 7]

Mbon oro ẹdade item Bible ẹsịn ke edinam ẹkeme ndidu inem inem uwem oro adade ukem ukem