Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ntak mûdomoke use m̀mê afo emekeme ndibọrọ mme mbụme oro ẹtienede mi-e?

• Nso ikedi Complutensian Polyglot, ndien ntak emi enye ekedide n̄wọrọnda?

Enye ekedi Bible ediwak usem, esịnede ata nti uwetn̄kpọ ke usem Hebrew, Greek, ye Latin, ọkọrọ ye ndusụk ikpehe ke Aramaic. Bible polyglot m̀mê ediwak usem emi ekedi ata akpan usio-ukot ke ndisio eti uwetn̄kpọ ke mme akpasarade usem oro ẹkedade ẹwet Bible.—4/15, page 28-31.

• Didie ke mme owo ẹkeme ndidat Abasi esịt?

Nte ata odu-uwem owo, Jehovah esikere n̄kpọ, anam n̄kpọ, onyụn̄ enyene ntụk. Enye edi “Abasi inemesịt” onyụn̄ esidat esịt ndinam uduak esiemmọ. (1 Timothy 1:11, NW; Psalm 104:31) Adan̄a nte nnyịn ifiọkde ekikere Abasi, ntre ke iditịm ifiọk se ikemede ndinam man idat enye esịt.—5/15, page 4-7.

• Ntak emi David ekenyịmede Michal n̄wan esie enyene owo eto, m̀mê teraphim?

Ke ini Edidem Saul okoyomde ndiwot David, Michal ama an̄wam enye ndifehe mbọhọ, emende owo eto enịm ke bed. Eyedi enye ekenyene owo eto, m̀mê, teraphim koro esịt esie mîkekemke ye Abasi. Ekeme ndidi David ikenyeneke ifiọk iban̄a teraphim emi mîdịghe ekeme ndidi ekenyịme enye sia Michal ekedide eyen Edidem Saul. (1 Chronicles 16:25, 26)—6/1, page 29.

• Nso akpan n̄kpọ ke ewụhọ Abasi kaban̄a iyịp akanyan ubọk owụt?

Etienede se Enye eketịn̄de ke Ukwọ ama ekebe, ke Ibet Moses, ye ke ewụhọ oro ẹkụtde ke Utom 15:28, 29, Abasi akanyan ubọk owụt uwa oro abuanade iyịp Jesus oro ẹkeduọkde. Iyịp oro kpọt ke ẹkeme ndida mfen mme idiọkn̄kpọ nnyịn nnyụn̄ nnam nnyịn itie ke emem ye Abasi. (Colossae 1:20)—6/15, page 14-19.

• Mme utịben̄kpọ Jesus ifan̄ ke ẹsiak ke Bible?

Mbụk Gospel ẹtịn̄ ẹban̄a utịben̄kpọ 35 oro Jesus akanamde. Edi owo isiakke ofụri ibat utịben̄kpọ oro Jesus akanamde. (Matthew 14:14)—7/15, page 5.