Mme Mbụme Ẹtode Mme Andikot

Ntak emi Mme Ntiense Jehovah ẹdade ibat 144,000 oro ẹsiakde ke n̄wed Ediyarade nte ata ata ibat oro mîdịghe ndamban̄a ibat?

Apostle John ekewet ete: “N̄kop ibat mmọ emi ẹfịkde mmọ idiọn̄ọ; thousand owo ikie ye aba ye inan̄.” (Ediyarade 7:4) Ke Bible, ikọ emi “mmọ emi ẹfịkde mmọ idiọn̄ọ,” ada aban̄a mbon oro ẹmekde ke otu ubonowo man ẹkediana ye Christ ke heaven ẹkara Paradise isọn̄ oro edide ke ini iso. (2 Corinth 1:21, 22; Ediyarade 5:9, 10; 20:6) Ediwak ntak ẹdu oro ẹdade ibat emi, 144,000, ke ata ata ibat. Udọn̄ikọ n̄wed Ediyarade 7:4 anam ẹfiọk ntak kiet.

Ke ẹma ẹkenọ apostle John ntọt ke n̄kukụt ẹban̄a otu emi edide owo 144,000, ẹma ẹnyụn̄ ẹwụt enye otu efen. John okokot ọyọhọ otu iba emi ‘akwa otu owo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem.’ Akwa otuowo emi ẹdi mbon oro ẹdibọhọde “akwa ukụt” emi ẹdidade ẹsobo idiọk ererimbot emi.—Ediyarade 7:9, 14.

Nte ededi, tịm fiọk ete ikọ oro John adade ke Ediyarade ibuot 7, ufan̄ikọ 4 ye 9 okpụhọde ye kiet eken. Enye ọdọhọ ke akpa otu oro, “mmọ emi ẹfịkde mmọ idiọn̄ọ,” enyene akpan ibat. Edi ọyọhọ otu iba, “akwa otu owo,” inyeneke akpan ibat. Ye emi ke ekikere, owụt ifiọk ndida 144,000 nte ata ata ibat. Edieke ibat oro 144,000 ekpedide ndamban̄a ibat oro adade aban̄a otu oro owo mîkemeke ndibat, ufọn ukpụhọde oro odude ke ufan̄ikọ iba oro ikpodụhe. Ntre, udọn̄ikọ oro enen̄ede owụt ke ẹkpenyene ndida ibat oro 144,000 nte ata ata ibat.

Nsio nsio nditọ ukpepn̄kpọ Bible eke eset ye eke eyomfịn ẹnyene ukem ekikere emi—nte ke ibat oro edi ata ata ibat. Ke uwụtn̄kpọ, ke enemede Ediyarade 7:4, 9, Dr. Ethelbert W. Bullinger, owo Britain oro edide ewetn̄wed ukabadeikọ, ọkọdọhọ ke n̄kpọ nte isua 100 emi ẹkebede ete: “Emi edi mmemmem ikọ akpanikọ: akpan ibat emi edide isio ye anana-ibat owo oro ẹtịn̄de ẹban̄a kpa ke ibuot emi.” (The Apocalypse or “The Day of the Lord,” page 282) Ke ata ndondo emi, Robert L. Thomas, Jr., prọfesọ Obufa Testament ke The Master’s Seminary ke United States ekewet ete: “Nsọn̄ọ ndomokiet idụhe ndiwụt ke enye edi ndamban̄a ibat.” Enye ama adian do ete: “Ibat emi [ke Ediyarade 7:4] edi akpan ibat emi edide isio ye anana-ibat owo oro ẹtịn̄de ẹban̄a ke [Ediyarade] 7:9. Edieke ẹdade enye nte ndamban̄a ibat, oro ọkpọwọrọ ke owo ikpenyeneke ndida ibat ndomokiet ke Ediyarade nte ata ata ibat.”—Revelation: An Exegetical Commentary, Eboho 1, page 474.

Ndusụk owo ẹdọhọ ke sia Ediyarade ọdọn̄ọde ekese ndamban̄a ikọ, kpukpru ibat oro ẹdude ke Ediyarade, esịnede 144,000, ẹnyene ndidi ndamban̄a ibat. (Ediyarade 1:4; 2: 10) Nte ededi, utọ ekikere oro inenke. Edi akpanikọ, Ediyarade ọdọn̄ọ ekese ndamban̄a ibat, edi enye n̄ko ọdọn̄ọ mme ata ata ibat. Ke uwụtn̄kpọ, John etịn̄ aban̄a “enyịn̄ mme apostle Eyen-erọn̄ duopeba.” (Ediyarade 21:14) Ana in̄wan̄-in̄wan̄ nte ke 12 oro ẹsiakde ke ufan̄ikọ emi edi ata ata ibat, idịghe ndamban̄a ibat. Ke adianade do, apostle John ewet aban̄a “thousand isua” ukara Christ. Nditịn̄ enyịn n̄kpep Bible owụt ke ibat enye emi n̄ko edi ata ata ibat. * (Ediyarade 20:3, 5-7) Ntem, udọn̄ikọ ufan̄ikọ emi ẹsiakde ibat edin̄wam owo ọfiọk m̀mê ibat oro ẹsiakde ke Ediyarade edi ata ata ibat m̀mê idịghe.

Ndida ibat oro 144,000 nte ata ata ibat oro owụtde ibat ibat mme owo oro mîwakke nte “akwa otu owo,” ekem ye se mme itien̄wed eken ke Bible ẹtịn̄de. Ke uwụtn̄kpọ, ke utịt utịt n̄kukụt oro apostle John okokụtde mi, ẹdọhọ ke ‘ẹkefak owo 144,000 ẹsio ke otu owo, ẹte mmọ ẹdi akpa mbun̄wụm.’ (Ediyarade 14:1, 4) Ikọ oro “akpa mbun̄wụm” ada aban̄a ekpri ibat owo oro ẹmekde man ẹda ke ibuot mbon en̄wen. N̄ko-n̄ko, ke ini Jesus okodude ke isọn̄, enye okokot mbon oro ẹdikarade ye enye ke Obio Ubọn̄ heaven ‘ekpri otu erọn̄.’ (Luke 12:32; 22:29, 30) Ke akpanikọ, mbon oro ẹfakde ẹsio ke isọn̄ man ẹkekara ke heaven iwakke nte mbon oro ẹdidude ke Paradise isọn̄ oro edide ke ini iso.

Ntem, udọn̄ikọ Ediyarade 7:4 ye se ima iketetịn̄ ke enyọn̄ emi ẹwụt ke ibat oro 144,000 edi ata ata ibat. Enye edi ibat mbon oro ẹditiede ke heaven ye Christ ikara Paradise isọn̄, emi anana-ibat mbon oro ẹkopde inemesịt ẹdidụn̄de ituak ibuot inọ Jehovah Abasi.—Psalm 37:29.

[Ikọ idakisọn̄]

[Se Ẹwetde ke Ikpọ Abisi ke page 31]

Ibat mbon oro ẹdikarade ke heaven edi 144,000 kpọt

[Ndise ke page 31]

“Akwa otu owo” inyeneke ibat

[Ebiet Ẹdade Ndise Ẹto ke page 31]

Mme ntantaọfiọn̄: Ẹbọ ẹto Anglo-Australian Observatory, David Malin okosio ndise emi