Se Inen̄erede Inam Owo Okop Inemesịt

JEHOVAH, kpa “Abasi inemesịt,” ye Jesus Christ, “n̄kukụre Andinyene Akwa Odudu emi okopde inemesịt,” ẹfiọk se inamde owo okop inemesịt ẹkan owo efen ekededi. (1 Timothy 1:11, NW; 6:15, NW) Ke ntem, idịghe n̄kpọ n̄kpaidem ẹkụtde ukpọhọde inemesịt ke Ikọ Abasi, kpa Bible.—Ediyarade 1:3; 22:7.

Ke ọwọrọetop Ukwọrọikọ esie Oro ke Obot, Jesus etịn̄ se inamde owo okop inemesịt. Enye ọdọhọ ete: “Inemesịt edi eke” (NW) mbon oro (1) ẹbuenede ke spirit, (2) ẹtuan̄ade, (3) ẹnyenede ifụre-ifụre ido, (4) ẹkopde biọn̄ ye nsat-itọn̄ edinen ido, (5) ẹtuade owo mbọm, (6) esịt mmọ asanade, (7) ẹdide mme anam emem, (8) ẹkọbọde mmọ kaban̄a edinen ido, ye (9) ẹsụn̄ide ẹnyụn̄ ẹnamde mmọ isịn-enyịn ke ntak esie.—Matthew 5:3-11. *

Ndi Ikọ Jesus Ẹnen?

Ndusụk ikọ Jesus iyomke ẹtetịn̄ ẹnọ owo nte ẹdide akpanikọ. Anie edifan̄a nte ke owo emi enyenede ifụre ifụre ido, atuade owo mbọm, onyụn̄ edide anam emem ke ntak edisana esịt, isikopke inemesịt ikan owo iyatesịt, emi amade utọk, emi mîsinyụn̄ ituaha owo mbọm?

 Nte ededi, nnyịn imekeme ndikere nte mbon oro ẹkopde biọn̄ ye nsat-itọn̄ edinen ido m̀mê mbon oro ẹtuan̄ade ẹkpekopde inemesịt. Mme utọ owo oro ẹnen̄ede ẹfiọk nte mme idaha ererimbot ẹtiede. ‘Mmọ ẹseme ẹnyụn̄ ẹtua ẹban̄a kpukpru mbubiam ido emi ẹnamde ke’ eyo nnyịn. (Ezekiel 9:4) Oro inamke mmọ ẹkop inemesịt. Nte ededi, ke ini mmọ ẹkpepde ẹban̄a uduak Abasi ndida ndinen idaha ndi ke isọn̄ nnyụn̄ nnọ mmọ eke mme owo ẹfịkde unenikpe, mmọ ẹnen̄ede ẹkop idatesịt.—Isaiah 11:4.

Ima oro ẹmade edinen ido esinam mme owo ẹtua n̄ko ẹban̄a ndudue oro mmọ ẹsiwakde ndinam. Ke ntem mmọ ẹfiọk ke mmimọ imebuene ke spirit. Mme utọ owo oro ẹma ndiyom ndausụn̄ Abasi koro mmọ ẹfiọk ke enye ikpọn̄ ekeme ndin̄wam mme owo ẹkan mme mmeme mmọ.—Mme N̄ke 16:3, 9; 20:24.

Mbon oro ẹtuan̄ade, ẹkopde biọn̄ ye nsatitọn̄ edinen ido, emi ẹnyụn̄ ẹfiọkde ke imebuene ke spirit, ẹfiọk ufọn edinyene eti itie ebuana ye Andibot. Ndinyene eti itie ebuana ye mme owo esinam owo okop inemesịt, edi ndinyene eti itie ebuana ye Abasi akam anam owo okop inemesịt oro okponde akan. Ih, mbon oro ẹnen̄erede ẹma se inende, ẹnyụn̄ ẹnyịmede nditiene ndausụn̄ Abasi, ẹkeme ndinen̄ede n̄kop inemesịt.

Nte ededi, ekeme ndisọn̄ fi ndinịm nte ke owo emi ẹkọbọde ẹnyụn̄ ẹsụn̄ide ekeme ndikop inemesịt. Edi, oro edi akpanikọ sia edide Jesus ke idemesie eketịn̄. Ntem didie ke ikọ esie akpan̄wan̄a nnyịn?

Ẹkọbọ edi Ẹkop Inemesịt —Didie ke Oro Ekeme Nditịbe?

Tịm fiọk ete ke Jesus ikọdọhọke ke isụn̄i ye ukọbọ ke idemmọ ẹnam owo okop inemesịt. Enye ọkọdọhọ ete: “[“Inemesịt edi eke mmọ oro,” NW] ẹkọbọde mmọ kaban̄a edinen ido: . . . ke adan̄aemi owo ẹdisụn̄ide mbufo, ẹnyụn̄ ẹnam mbufo isịn-enyịn, . . . kaban̄a Mi.” (Matthew 5:10, 11) Ntre, owo okop inemesịt edieke ẹsụn̄ide enye ke ntak emi enye edide anditiene Christ ye ke ntak emi enye odude uwem ekekem ye ndinen edumbet oro Jesus ekekpepde.

Se iketịbede inọ akpa mme Christian ọsọn̄ọ emi. Mbon Sanhedrin, kpa akwa esop mme Jew, ẹma “ẹkot mme apostle ẹdi, ẹnyụn̄ ẹmia mmọ, ẹnyụn̄ ẹwụk mmọ ẹte, ẹkûtịn̄ ikọ ke enyịn̄ Jesus, ẹnyụn̄ ẹyak mmọ ẹnyọn̄ọ.” Mme apostle ẹkenam n̄kpọ didie? ‘Ntre ke mmọ oro ẹwọrọ ẹkpọn̄ esop, ẹdara koro ẹbatde ẹte mmimọ imodot ndibọ esuene kaban̄a enyịn̄ Jesus. Ndien kpukpru usen, ke temple ye ke ufọk, mmọ idopke uyo ndikpep nnyụn̄ n̄kwọrọ, ẹte Jesus edi Christ.’—Utom 5:40-42; 13:50-52.

Apostle Peter ama anam ebuana oro isụn̄i ye inemesịt ẹnyenede etịm an̄wan̄a. Enye ekewet ete: “Edieke ẹsuenede mbufo kaban̄a enyịn̄ Christ, ọfọfọn ọnọ mbufo; koro Spirit ubọn̄ ye Spirit Abasi odoro mbufo ke idem.” (1 Peter 4:14) Ih, ndikụt ndutụhọ nte Christian ke ntak oro inamde se inende, idem okposụkedi utọ ndutụhọ oro mînemke-nem, esinam owo okop inemesịt oro otode edifiọk ke imenyene edisana spirit Abasi. Nso ebuana ke edisana spirit Abasi ye inemesịt ẹnyene?

Ubọkutom Obụkidem m̀mê Mbun̄wụm Spirit?

Sụk mbon oro ẹkopde uyo Abasi nte andikara ẹnyene edisana spirit Abasi. (Utom 5:32) Jehovah isinọhọ mbon oro ẹsịnde idem ke “ubọk-utom obụkidem” spirit esie. Ubọkutom oro ẹdi “use, ye mbubiam ido, ye obukpo ido, ye edikpono-ndem, ye edibre-idiọn̄, ye usua, ye utọk, ye ufụp, ye iyatesịt, ye ndomo-idem, ye ubahade, ye edisiak isio n̄ka, ye udu, ye ediyụhọ mmịn, ye etịme-etịme ido, ye mme ido eke ẹtiede ntre.” (Galatia 5:19-21) Edi akpanikọ, “ubọk-utom obụkidem” ẹyọyọhọ ererimbot mfịn. Kpa ye oro, mbon oro ẹsịnde idem ke mmọ ikopke ata inemesịt ndien inemesịt mmọ isibịghike. Utu ke oro, ndinam mme n̄kpọ oro ababiat itie ebuana owo ye mme iman, mme ufan, ye mme ọdiọn̄ọ. Akan  oro, Ikọ Abasi ọdọhọ ke mbon oro “ẹnamde orụk ido eke ẹtiede ntem ididaha Obio Ubọn̄ Abasi inyene.”

Ke edide isio ye oro, mbon oro ẹsion̄ode “mbun̄wụm Spirit” ke Abasi esinọ spirit esie. Mme edu emi ẹnamde mbun̄wụm emi ẹdi “ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre-ifụre ido, ye mfara ke idem.” (Galatia 5:22, 23) Ke ini nnyịn iwụtde mme edu emi, eyedi mmemmem ndinyene emem emem itie ebuana ye mbon en̄wen ọkọrọ ye Abasi, emi esinam ẹkop ata inemesịt. (Se ekebe.) Ke edide akpan n̄kpọ akan, ebede ke ndiwụt ima, mfọnido, eti ido, ye mme edu Abasi eken, nnyịn imenem Jehovah esịt inyụn̄ inyene inem inem idotenyịn nsinsi uwem ke obufa ererimbot Abasi oro edinen ido edidude.

Inemesịt Edi N̄kpọ Oro Ẹmekde-Mek

Ke ini Wolfgang ye Brigitte, ebe ye n̄wan emi ẹdụn̄de ke Germany ẹketọn̄ọde ndikpep Bible ke ofụri esịt, mmọ ẹma ẹnyene ekese inyene obụkidem oro mme owo ẹsede nte se ẹyomde man owo okop inemesịt. Mmọ ẹkedi n̄kparawa ẹnyụn̄ ẹkop nsọn̄idem. Mmọ ẹkesisịne ọsọn̄urua ọfọn̄, ẹdụn̄ ke ufọk oro ẹnen̄erede ẹbana, ẹnyụn̄ ẹnyene uforo uforo mbubehe. Mmọ ẹkeda ekese ini mmọ ẹkọ n̄kpọ obụkidem efen efen, edi oro ikanamke mmọ ẹkop ata inemesịt. Nte ededi, nte ini akakade, Wolfgang ye Brigitte ẹma ẹnam akpan ubiere. Mmọ ẹma ẹtọn̄ọ ndida ekese ini ye ukeme mbịne mme n̄kpọ eke spirit ẹnyụn̄ ẹyom mme usụn̄ ndinen̄ede nsan̄a n̄kpere Jehovah. Ikebịghike ubiere oro mmọ ẹkenamde ama okpụhọde edu mmọ, ndien emi ama esịn udọn̄ ọnọ mmọ ndidu mmemmem uwem nnyụn̄ nnam utom nte mme asiakusụn̄, m̀mê mme ọkwọrọ Obio Ubọn̄ uyọhọ ini. Mmọ ẹnam utom unyịmesịt idahaemi ke ọfis n̄kọk itieutom Mme Ntiense Jehovah ke Germany. Ke adianade do, mmọ ke ẹkpep usem mbon Asia man ẹkpen̄wam isenowo ẹkpep akpanikọ oro ẹkụtde ke Ikọ Abasi, kpa Bible.

Ndi n̄wan ye ebe emi ẹma ẹnyene ata inemesịt? Wolfgang ọdọhọ ete: “Toto ke ini emi ikọtọn̄ọde ndinen̄ede nsịn idem mbịne mme n̄kpọ eke spirit, nnyịn imenen̄ede ikop inemesịt ye uyụhọ. Ndinam n̄kpọ Jehovah ke ofụri esịt ọmọsọn̄ọ mbọbọ ndọ nnyịn n̄ko. Ndọ nnyịn ama enem, edi nnyịn ikenyene mme utom ye mme udọn̄ oro ẹkenamde nnyịn inyene nsio nsio utịtmbuba. Idahaemi  nnyịn idiana kiet ibịne ukem utịtmbuba.”

Nso Inam Owo Okop Inemesịt?

Ke nditịn̄ ata ibio ibio: Fep “ubọk-utom obụkidem” nyụn̄ sion̄o “mbun̄wụm Spirit” Abasi. Man owo okop inemesịt, ana ọdọn̄ enye ndinyene n̄kpet n̄kpet itie ebuana ye Abasi. Owo emi odomode ndinam emi editie nte owo oro okopde inemesịt oro Jesus eketịn̄de aban̄a.

Mmọdo, kûdue ukere ute ke imọ ikemeke ndikop inemesịt. Edi akpanikọ, ekeme ndidi idem isọn̄ke fi idahaemi, mîdịghe ekeme ndidi afo emenyene mme mfịna ke ndọ fo. Eyedi afo unyeneke aba idotenyịn ndinyene eyen, mîdịghe ekeme ndidi afo an̄wan̄wana ndinyene uforo uforo ubọkọkọ. Ekeme ndidi afo unyeneke aba okụk nte ekesinyenede. Nte ededi, sọn̄ esịt; ufọn idụhe afo ndiduọk idotenyịn! Ukara Obio Ubọn̄ Abasi ọyọkọk mme mfịna emi ye ediwak mfịna eken. Ke akpanikọ, ke mîbịghike Jehovah Abasi oyosu un̄wọn̄ọ emi enye akadade andiwet psalm ewet mi: “Ubọn̄ fo edi ata nsinsi ubọn̄ . . . Afo atat ubọk fo, onyụn̄ ọnọ kpukpru mme andidu uwem se mmọ ẹmade, ẹyụhọ.” (Psalm 145:13, 16) Nte ata ediwak mme asan̄autom Jehovah ke ofụri ererimbot ẹkemede ndisọn̄ọ, nditi un̄wọn̄ọ Jehovah emi ọnọde ndọn̄esịt mi eyenen̄ede anam fi okop inemesịt idahaemi.—Ediyarade 21:3.

[Ikọ idakisọn̄]

[Ekebe/Ndise ke page 6]

Mme N̄kpọ Oro Ẹnamde Owo Okop Inemesịt

Ima ayanam mbon en̄wen ẹma fi n̄ko.

Idatesịt ọnọ fi odudu ndikan mme n̄kpọ-ata.

Emem idiyakke fi ọtọhọ ye mbon en̄wen.

Anyanime anam fi okop inemesịt idem ke ini osobode idomo.

Mfọnido anam mbon en̄wen ẹma ndisan̄a n̄kpere fi.

Eti Ido fo anam mbon en̄wen ẹma ndin̄wam fi ke ini oyomde un̄wam.

Mbuọtidem ayanam fi enen̄ede enịm ke Abasi ọyọnọ fi ima ima ndausụn̄.

Ifụre Ifụre Ido ayanam fi osụk esịt, ekikere, ye idem.

Mfara ke Idem ọwọrọ ke udunamke ediwak ndudue.

[Mme ndise ke page 7]

Man okop inemesịt, ana afo oyụhọ mme udọn̄ n̄kpọ eke spirit fo