Akam Ọbọn̄​—Se Enye Ọwọrọde Ọnọ Fi

ẸWET Akam Ọbọn̄ oro Jesus Christ ekekpepde ke Ukwọrọikọ Oro ke Obot ke Matthew ibuot 6, ufan̄ikọ 9 esịm 13. Esisịt ini mbemiso Jesus ekekpepde akam emi, enye ama ọdọhọ ete: “Ke ini ẹbọn̄de akam, ẹkûyịre nditetịn̄ ikpîkpu ikọ, nte mme Gentile ẹnamde: koro etie mmọ nte edikop akam oto ke uwak ikọ eke ẹtịn̄de.”—Matthew 6:7.

Do, nte an̄wan̄ade, Jesus ikoyomke ẹyịre ẹtịn̄ mme ukem ikọ ke Akam Ọbọn̄. Edi akpanikọ, enye ama afiak etịn̄ akam emi ọnọ mbon en̄wen. (Luke 11:2-4) Edi enye ikafiakke itịn̄ mme ikọ akam emi ẹwetde ke Luke ata ukem ukem nte enye eketịn̄de ke Gospel Matthew. Akan oro, Jesus ye mme mbet esie ikeyịreke itịn̄ mme ukem ikọ akam oro ke mme akam oro mmọ ẹkesibọn̄de.

Ntak ndien ẹwetde Akam Ọbọn̄ ke Bible-e? Jesus ada akam uwụtn̄kpọ emi ekpep nnyịn nte ikemede ndibọn̄ akam oro Abasi okpokopde. Nnyịn imokụt n̄ko mme ibọrọ ndusụk akpan mbụme ke uwem ke akam emi. Ntre, ẹyak ikere iban̄a ikpehe kiet kiet ke Akam Ọbọn̄.

Abasi Ekere Didie?

“Ete nnyịn emi odude ke heaven: yak ikpono enyịn̄ Fo.” (Matthew 6:9) Mme ntọn̄ọikọ akam emi ẹn̄wam nnyịn ndisan̄a n̄kpere Abasi nnyụn̄ ntịn̄ ikọ nnọ enye nte “Ete nnyịn.” Ukem nte edide ndammana n̄kpọ eyen ndisan̄a n̄kpere edima ete m̀mê eka oro owụtde edikere mban̄a, nnyịn imekeme ndisan̄a n̄kpere Ete nnyịn eke heaven, inyenede mbuọtidem nte ke enye ayakpan̄ utọn̄ ọnọ nnyịn. Edidem David ọkọkwọ ete: “Afo emi okopde akam, kpukpru obụkidem ẹyetiene fi.”—Psalm 65:2.

Jesus eteme nnyịn ete ibọn̄ akam ite ẹkpono, m̀mê ẹnam enyịn̄ Abasi asana. Edi, Abasi ekere didie? Kop ibọrọ oro Bible ọnọde: “Afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.” (Psalm 83:18) Ndi akanam omokot enyịn̄ oro Jehovah ke Bible?

 Ke akpanikọ, enyịn̄ Abasi, Jehovah, odu n̄kpọ nte utịm ike 7,000 ke mme uwetn̄kpọ Bible eset. Nte ededi, ndusụk mme akabade Bible ẹkam ẹka anyan ẹkesịm edisio enyịn̄ emi mfep ke mme edikabade Bible mmọ. Mmọdo, enen̄ede odot nnyịn ndisibọn̄ akam ndọhọ Andibot anam enyịn̄ esie asana. (Ezekiel 36:23) Usụn̄ kiet ndinam n̄kpọ asan̄a ekekem ye utọ akam oro edi ndisiak enyịn̄ Jehovah ke ini ibọn̄de akam inọ enye.

Ẹkebọk n̄wan kiet oro ekerede Patricia nte owo Catholic, ndien enye ama enen̄ede emehe ye Akam Ọbọn̄. Didie ke enye akanam n̄kpọ ke ini kiet ke otu Mme Ntiense Jehovah okowụtde enye enyịn̄ Abasi ke Bible? Enye ama ofiori ete: “Etịn̄ akpanikọ!” Enye ama aka iso ete: “Ntre mma nse n̄ko ke Bible mi, nnyụn̄ n̄kụt kpa ntre. Ekem, Ntiense oro ama owụt mi Matthew 6:9, 10, onyụn̄ ọdọhọ ke ẹtịn̄ ẹban̄a enyịn̄ Abasi ke Akam Ọbọn̄. Mma nnen̄ede n̄kop nduaidem nnyụn̄ ndọhọ enye ekpep mi Bible.”

Uduak Abasi Ayada Itie ke Isọn̄

“Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Didie ke ikpehe Akam Ọbọn̄ emi edisu? Ata ediwak owo ẹkere ke heaven edi ebiet emem ye ifụre. N̄wed Abasi ọdọhọ ke heaven edi ‘edisana ebiet idụn̄ ye idụn̄ ubọn̄’ Jehovah. (Isaiah 63:15) Ntak edi oro nnyịn isibọn̄de akam ite ẹnam uduak Abasi ke isọn̄ kpa nte “ẹnamde ke heaven.” Edi, nte emi eyetịbe?

Prọfet Jehovah oro, Daniel, ama ebem iso etịn̄ ete: “Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.” (Daniel 2:44) Ke mîbịghike, Obio Ubọn̄ m̀mê ukara eke heaven emi ayanam n̄kpọ man edinen ukara ada emem edi ke ofụri isọn̄.—2 Peter 3:13.

Ndibọn̄ akam mben̄e Obio Ubọn̄ Abasi edi nnyụn̄ mben̄e ẹnam uduak esie ke isọn̄ owụt ke imenyene mbuọtidem oro mîdikpụhu. Apostle John ekewet ete: “Ndien n̄kop ọkpọsọn̄ uyo nte otode ke ebekpo ọwọrọ ete, Sese, ebiet idụn̄ Abasi omodu ye owo. Enye oyonyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie oyonyụn̄ odu ye mmọ, onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” Ekem apostle John ama adian do ete: “Anditie ke ebekpo onyụn̄ ọdọhọ ete, . . . Wet: koro  mme ikọ emi ẹdi akpanikọ ye se owo ekpenịmde.”—Ediyarade 21:3-5.

Ndibọn̄ Akam Mben̄e Mme N̄kpọ eke Obụk

Ke itienede se Jesus eketịn̄de ke akam uwụtn̄kpọ oro, enye okowụt ke akpan n̄kpọ oro ikpekerede iban̄a ke ini ibọn̄de akam ekpedi enyịn̄ ye uduak Abasi. Edi, akam uwụtn̄kpọ oro esịne mme ọkpọkpọ eben̄e oro odotde ẹnịm Jehovah ke iso.

Akpa ke otu emi edi:“Nọ nnyịn udia eke ekemde nnyịn ke usen mfịn.” (Matthew 6:11) Emi idịghe eben̄e inyene obụkidem. Jesus ekesịn udọn̄ ọnọ nnyịn ndibọn̄ akam mben̄e “udia eke ekemde nnyịn ke usen ke usen.” (Luke 11:3) Ke n̄kemuyo ye Akam Ọbọn̄, nnyịn imekeme ndibọn̄ akam ye mbuọtidem nte ke Abasi ọyọnọ nnyịn mme n̄kpọ oro iyomde ke usen ke usen edieke imade enye inyụn̄ ikopde uyo esie.

Nditịmede esịt nte mîdotke mban̄a mfịna ndutịm uforo ekeme ndinam nnyịn ifụmi mme udọn̄ n̄kpọ eke spirit nnyịn ndien ke ntem ikpude ndinam se Abasi oyomde oto nnyịn. Edi edieke inịmde utuakibuot Abasi akpa ke uwem, nnyịn imekeme nditịm nnịm nte ke enye eyenen̄ede akpan̄ utọn̄ ke ini nnyịn iben̄ede mme n̄kpọ eke obụk, utọ nte udia ye ọfọn̄. Jesus ọkọdọhọ ete: “Ẹkam ẹbem iso ẹyom Obio Ubọn̄ [ye edinen ido Abasi]; ndien ẹyedian kpukpru n̄kpọ emi ẹnọ mbufo.” (Matthew 6:26-33) Ndiyom edinen ido Abasi imemke utom, sia kpukpru nnyịn idide mme anamidiọk inyụn̄ iyomde edifen nnọ. (Rome 5:12) Akam Ọbọn̄ esịne n̄ko eben̄e edifen mme idiọkn̄kpọ.

Ndibọn̄ Akam Mben̄e Edifen Nnọ

“Nyụn̄ dahado ke isọn eke ikamade Fi, nte emi nnyịn ikadahadedo inọ mmọ emi ẹkamade nnyịn isọn.” (Matthew 6:12) Ke Akam Ọbọn̄ oro Luke ewetde, ẹkot “isọn” emi “mme idiọk-n̄kpọ.” (Luke 11:3b, 4) Ndi Jehovah Abasi eyenen̄ede efen mme idiọkn̄kpọ nnyịn?

Okposụkedi Edidem David eke Israel eset akanamde ikpọ idiọkn̄kpọ, enye ama atua n̄kpọfiọk onyụn̄ ọbọn̄ akam ke mbuọtidem ete: “Afo, Ọbọn̄, ọmọfọn, omonyụn̄ ama ndidahado; omonyụn̄ awak ima ye kpukpru mmọ eke ẹsemede ẹnọ fi.” (Psalm 86:5) Nso ikọ ndọn̄esịt ke emi edi ntem! Ete nnyịn eke heaven “ama ndidahado” ke idiọkn̄kpọ mbon oro ẹtuade n̄kpọfiọk ẹseme ẹkot enye. Kpa nte ẹkemede ndibiat isọn mfep ofụri ofụri, kpasụk ntre n̄ko, Jehovah Abasi ekeme ndifen mme idiọkn̄kpọ nnyịn ofụri ofụri.

Nte ededi, Jesus ama etịn̄ se anade inam: Man Abasi efen ọnọ nnyịn, ana nnyịn idahadedo inọ mbon en̄wen. (Matthew 6:14, 15) Okposụkedi ufan esiemmọ ita ẹketụhọrede edinen owo oro Job, enye ama efen ọnọ mmọ, akam ekpede Abasi ubọk ke ibuot mmọ. (Job 42:10) Edieke ifende inọ mbon oro ẹnamde nnyịn idiọk, nnyịn iyenem Abasi esịt enye oyonyụn̄ atua nnyịn mbọm.

Abasi ndinyịme ndikop eben̄e nnyịn ekpenyene ndinụk nnyịn ndiyom unyịme esie. Ndien nnyịn imekeme ndinam oro kpa ye idide mme anana-mfọnmma owo. (Matthew 26:41) Jehovah ekeme ndin̄wam nnyịn ke afan̄ emi n̄ko, nte akpan eben̄e oro Jesus adade etre akam uwụtn̄kpọ esie owụtde.

Eben̄e Kaban̄a Edika Iso Nsan̄a ke Edinen Usụn̄

“Kûnyụn̄ uda nnyịn usịn ke idomo; edi sio nnyịn ke ubọk andidiọk.” (Matthew 6:13) Jehovah isisanake nnyịn iyak ke ini idomo, m̀mê ndinam nnyịn inam idiọkn̄kpọ. Ikọ Esie ọdọhọ ete: “Idomo iduọ ikemeke ndisịm Abasi, Enye ke Idem Esie inyụn̄ idomoke owo man enye ọduọ.” (James 1:13) Abasi esiyak ẹdomo nnyịn, edi enye ekeme ndinyan̄a nnyịn nsio ke ubọk Akwa Andidomo—“andidiọk” oro ẹdiọn̄ọde nte Satan kpa Devil.

Apostle Peter eketeme ekemmọ mme Christian ete: “Ẹfara ke idem ẹnyụn̄ ẹkpeme; asua mbufo, kpa Satan, ke oyoyo nte lion eke okụnide, oyom se editade.” (1 Peter 5:8) Kamse, Satan ama akam odomo mfọnmma owo oro Jesus Christ! Nso ikedi uduak esie? Enye okoyom ndinam Jesus ọwọn̄ọde ọkpọn̄ edisana utuakibuot Jehovah Abasi. (Matthew 4:1-11) Edieke afo oyomde ndinam n̄kpọ Abasi, uduak Satan  edi ndinam fi n̄ko ọwọn̄ọde ọkpọn̄ edisana utuakibuot!

Devil ekeme ndida ererimbot emi esịnede enye ke ubọk mi nnam nnyịn inam mme n̄kpọ oro Abasi mîmaha. (1 John 5:19) Ntre, edi akpan n̄kpọ nnyịn ndiyom un̄wam nto Abasi kpukpru ini, akpan akpan ke ini isobode uyịre uyịre idomo. Ndien edieke ituakde ibuot inọ Jehovah nte ekemde ye Ikọ esie eke odudu spirit, kpa Bible, enye ayanyan̄a nnyịn ebe ke ndin̄wam nnyịn isọn̄ọ ida ibiọn̄ọ Devil. Bible asian nnyịn ete: “Abasi edi akpanikọ, idinyụn̄ iyakke ẹdomo mbufo ẹbe se ukeme mbufo edide.”—1 Corinth 10:13.

Edi Akpan N̄kpọ Ndibuọt Idem ke Abasi

Enem didie ntem ndifiọk ke Ete nnyịn eke heaven enyene udọn̄ ke idem nnyịn owo kiet kiet! Enye ama akam anam Eyen esie, Jesus Christ, ekpep nnyịn nte ikpọbọn̄de akam. Ke akpanikọ, emi anam nnyịn iyom ndinem Jehovah Abasi esịt. Didie ke ikeme ndinam oro?

Bible ọdọhọ ete: “Ke mbuọtidem mîdụhe, owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ emi ẹyomde Enye utịp.” (Mme Hebrew 11:6) Ikeme ndisan̄a didie nnyene utọ mbuọtidem oro? Bible asian nnyịn ete: “Mbuọtidem oto ke edikop.” (Rome 10:17) Mme Ntiense Jehovah ẹsikop inemesịt ndinyene nneme N̄wed Abasi ye kpukpru mbon oro ẹyomde ndinam n̄kpọ Abasi ye ata mbuọtidem.

Nnyịn imodori enyịn ke nneme Akam Ọbọn̄ emi anam fi etịm ọfiọk se enye ọwọrọde. Afo emekeme ndisọn̄ọ mbuọtidem oro afo enyenede ke Abasi ebe ke ndika iso n̄kọ ifiọk mban̄a Jehovah ye utịp oro enye edinọde “mmọ emi ẹyomde Enye.” Afo akpakam ekpep n̄kpọ efen efen aban̄a Abasi ye mme uduak esie man ekeme ndinyene n̄kpet n̄kpet itie ebuana ye Ete fo eke heaven ke nsinsi.—John 17:3.

[Se Ẹwetde ke Ikpọ Abisi ke page 5]

“Ete nnyịn emi odude ke heaven: yak ikpono enyịn̄ Fo, yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre; nọ nnyịn udia eke ekemde nnyịn ke usen mfịn; nyụn̄ dahado ke isọn eke ikamade Fi, nte emi nnyịn ikadahadedo inọ mmọ emi ẹkamade nnyịn isọn; kûnyụn̄ uda nnyịn usịn ke idomo; edi sio nnyịn ke ubọk andidiọk.”—Matthew 6:9-13

[Ndise ke page 7]

Jehovah esinọ se inanade mbon oro ẹmade enye

[Ndise ke page 7]

Abasi esin̄wam nnyịn n̄ko ndibiọn̄ọ Devil

[Ndise ke page 7]

Edieke ifende inọ mbon oro ẹnamde nnyịn idiọk, ukem nte Job, Abasi ekeme nditua nnyịn mbọm