Mme Mbụme Ẹtode Mme Andikot

Ntak emi ẹkenyịmede iren Israel ẹdọ isen iban oro ẹkemụmde nte mbuotekọn̄ okposụkedi Ibet Moses okowụkde mmọ ete ẹkûdọ ndusụk isen iban?—Deuteronomy 7:1-3; 21:10, 11.

San̄asan̄a idaha akanam ẹnyịme emi. Jehovah ama owụk nditọ Israel ete ẹsobo obio itiaba ke idụt Canaan, ẹnyụn̄ ẹwot kpukpru mbon oro ẹkedụn̄de do. (Deuteronomy 20:15-18) Ke ini mmọ ẹkesobode mme idụt eken, etie nte n̄kukụre mbon oro ẹkebọhọde ẹkedi iban emi mîkọfiọkke erenowo, emi ẹkemụmde nte mbuotekọn̄. (Numbers 31:17, 18; Deuteronomy 20:14) Eren Israel ama ekeme ndidọ utọ an̄wan oro, edieke n̄wan emi akanamde n̄kpọ oro ẹkeyomde.

Bible etịn̄ mme n̄kpọ oro akanade n̄wan oro anam ete: “Yak enye onyụn̄ okporo idet esie, onyụn̄ afat [m̀mê, okpok] mbara esie; ndien yak enye osio ọfọn̄-idem eke enye esịnede ke ini ẹkemụmde enye, efep ke idem esie, onyụn̄ etie ke ufọk fo, onyụn̄ atua ete esie ye eka esie ke ọfiọn̄ kiet: ndien tiene enye, nyụn̄ di ebe esie, enye onyụn̄ edi n̄wan fo.”—Deuteronomy 21:12, 13.

N̄kaiferi oro mîkọfiọkke erenowo, emi ẹkemụmde nte mbuotekọn̄, oro eyen Israel okoyomde ndidọ ekenyene ndikporo idet esie. Edikporo idet ekedi idiọn̄ọ mfụhọ m̀mê nnanenyịn. (Isaiah 3:24) Ke uwụtn̄kpọ, ke ini Job, kpa ete-ekpụk, akatabade inyene ye nditọ esie, enye ama okporo idet esie nte idiọn̄ọ mfụhọ. (Job 1:20) Esen an̄wan oro ekenyene ndikpok mbara esie n̄ko, idem ọkpọkọm enye ama ọdọn̄ n̄kpọ ke mbara, mbak ubọk esie ediye. (Deuteronomy 21:12) Nso ikedi “ọfọn̄-idem eke enye esịnede ke ini ẹkemụmde enye,” oro enye ekenyenede ndisio mfep? Iban oro ẹkeyomde nditan̄ nte mbuotekọn̄ ke mme obio Canaan ẹkesiwak ndisịne nye-n̄kan ọfọn̄ oro mmọ ẹkenyenede. Mmọ ẹkesinam emi man mbonekọn̄ oro ẹkpema mmimọ. N̄wan oro ẹkemụmde nte mbuotekọn̄ ekenyene ndisio utọ ediye ọfọn̄ oro mfep ke ini enye ofụhọde.

N̄wan oro ẹkemụmde nte mbuotekọn̄ emi ekenyịmede ndidọ eren Israel ekenyene ndida ọfiọn̄ enyọn̄ kiet ntua mbonima esie oro ẹkekpan̄ade. Ẹkenyene ndisobo mme obio Canaan fapfap tutu n̄kpọ ndomokiet isụhọke, ọkpọkọm mme ufan m̀mê ọdiọn̄ọ. Mme mbiet oro n̄wan emi ekesituakde ibuot ọnọ ikodụhe aba sia mbonekọn̄ Israel ẹkenyene ndisobo mme mbiet abasi emi taktak. Ini mfụhọ oro ekedi n̄ko ini edinam asana, kpa ini oro enye edidade etre kpukpru edinam akani ido ukpono esie.

Nte ededi, idaha emi ekedi isio ye isen iban ke ofụri ofụri. Ke afan̄ emi, Jehovah okowụk ete: “Kûnyụn̄ unam ndọ ye mmọ; kûda eyen fo an̄wan unọ eyen-eren esie, kûnyụn̄ uda eyen esie an̄wan unọ eyen-eren fo.” (Deuteronomy 7:3) Ntak emi ẹkedoride ukpan emi? Deuteronomy 7:4 ọdọhọ ete: “Koro mmọ ẹyenam eyen-eren fo akabade etre nditiene mi, ndien mmọ ẹyenam n̄kpọ abasi efen.” Ke ntre, ẹkedori ukpan emi mbak mmọ ẹdida ido ukpono ẹsabade idem. Nte ededi, esen an̄wan oro okodude ke idaha oro ẹtịn̄de ẹban̄a ke Deuteronomy 21:10-13 ikakamake utọ n̄kpọndịk oro. Kpukpru mbonubon esie ẹma ẹkpan̄a, ẹma ẹnyụn̄ ẹsobo kpukpru ndisọi mbiet oro enye ekesituakde ibuot ọnọ. Enye ikenyeneke ebuana aba ye mbon nsunsu ido ukpono. Ẹma ẹnyịme eren Israel ọdọ esen an̄wan emi okodude ke utọ idaha oro.