Ntọt Mme Anditan̄a Obio Ubọn̄

Leta Otode Alejandra

UWET LETA edi eti usụn̄ oro ẹdade ẹnọ ikọ ntiense ke anyan ini idahaemi. Okposụkedi ke ndusụk idaha owo mîsifiọkke se ididide utịp, edi mbon oro ẹnọde ikọ ntiense ke usụn̄ emi ẹsinen̄ede ẹbọ edidiọn̄. Mmọ ẹti ọniọn̄ ọniọn̄ item Bible emi: “Suan n̄kpasịp fo ke usenubọk; kûnyụn̄ ufara ubọk fo ke mbubịteyo: koro afo mûfiọkke ubak eke ẹdiwọrọde usụn̄, m̀mê emi, m̀mê oro; unyụn̄ ufiọkke m̀mê mbiba ẹdifọn ukem-ukem.”—Ecclesiastes 11:6.

Alejandra, uyen Ntiense emi akanamde utom ke n̄kpọ nte isua duop ke ọfis n̄kọk itieutom Mme Ntiense Jehovah ke Mexico, ama ọbọ usọbọ kansa oro ẹdade mmọn̄ibọk ẹnọ. Idem esie ama enen̄ede ọdiọk, enye ama onyụn̄ enen̄ede okop mmemidem ndinam utom esie eke usen ke usen. Nte ededi, sia enye mîkoyomke nditre utom ukwọrọikọ esie, Alejandra ama ebiere ndiwet mme leta. Enye ama ewet aban̄a ndutịm ukpepn̄kpọ Bible mfọn onyụn̄ esịn nọmba urụk ukopikọ eka esie ke mme leta oro. Ekem enye ama ayak mme leta oro ọnọ eka esie man obon ke mme ufọk oro mme owo mîkodụhe ke ini enye anamde utom ukwọrọikọ eke enyịnusụn̄ ke enyịnusụn̄.

Kan̄a ke emi, Diojany, ekpri n̄kaiferi otode Guatemala, ama aka Cancún, Mexico ndikedi eyenufọk nnọ owo. Ke adan̄aemi enye okodude do, enye ama osobo ye Mme Ntiense Jehovah onyụn̄ ama nneme Bible oro mmọ ẹkesinyenede ye enye. Ekem, eteufọk ye ekaufọk esie ẹma ẹbiere ndiwọrọ n̄ka Mexico City, mmọ ẹma ẹnyụn̄ ẹyom enye etiene mmimọ. Diojany ama emen̄e nditiene mmọ koro emi ediwọrọ ke enye idikwe aba Mme Ntiense oro.

Eteufọk ye ekaufọk esie ẹma ẹdọhọ enye ẹte: “Kûkere, Mme Ntiense ẹdu ke kpukpru ebiet. Nnyịn iyoyom mmọ ke ndondo oro isịmde do.” Diojany ama enyịme nditiene mmọ, okopde inemesịt ke iyokokụt Mme Ntiense ke Mexico City. Ke ndondo oro mmọ ẹkesịmde Mexico City, eteufọk ye ekaufọk Diojany ẹma ẹsan̄a ẹyom Mme Ntiense. Ke ntak kiet m̀mê eken, mmọ ikekemeke ndikụt Mme Ntiense, okposụkedi se ibede Mme Ntiense 41,000 ye esop 730 ẹkedude ke Mexico City.

Ikebịghike, Diojany ama ọtọn̄ọ ndikop mfụhọ sia enye mîkekemeke ndikụt Mme Ntiense man ẹfiak ẹtọn̄ọ nneme Bible ye enye. Usen kiet, ekaufọk esie ama aka ọkọdọhọ enye ete: “Kamse! Abasi fo omokop akam fo.” Ekaufọk esie ama ayak leta kiet ọnọ enye, onyụn̄ ọdọhọ ete: “Mme Ntiense ẹkenịm leta emi ẹnọ fi.” Leta emi okoto Alejandra.

Diojany ama osobo ye eka Alejandra ye Blanca, eyeneka esie, onyụn̄ enyịme ẹkpep imọ Bible. Ke urua ifan̄ ẹma ẹkebe, enye ama osobo ye Alejandra, mmọ ẹma ẹnen̄ede ẹkop inemesịt ndisobo ye kiet eken. Alejandra ama esịn udọn̄ ọnọ enye ndika iso nsịn ifịk ke ukpepn̄kpọ Bible esie man enye ekpekeme ndinam n̄kọri eke spirit.

Ọfiọn̄ ifan̄ ke ukperedem, ke July 2003, Alejandra ama akpa ọkpọn̄ eti uwụtn̄kpọ mbuọtidem ye uko ọnọ ekemmọ mme andinịm ke akpanikọ. Ama enen̄ede otụk mbon oro ẹkekade n̄kpa Alejandra, ke ini mmọ ẹkesobode ye Diojany ẹnyụn̄ ẹkopde enye ọdọhọde ete: “Alejandra ye ubon mmọ ẹdi n̄wọrọnda uwụtn̄kpọ ẹnọ mi. Ami mmebiere ndinam n̄kpọ Jehovah nnyụn̄ nna baptism ke mîbịghike. Ọdọn̄ mi ndifiak n̄kụt Alejandra ke Paradise!”

Ih, leta ekeme ndidi ekpri n̄kpọ. Edi nso eti utịp oro ebịghide ke enye ekeme ndinyene ntem!