Mbre Idịghe Ikpîkpu Edinam

NDITỌWỌN̄ ẹma ndibre mbre. Edi, n̄wed oro The Developing Child ọdọhọ ke “emi idịghe ikpîkpu edinam. Enye edi akpan edinam oro an̄wamde nditọwọn̄ ndikpep ekese n̄kpọ mban̄a n̄kann̄kụk mmọ nte mmọ ẹkọride.” Ke ndibre mbre, nditọwọn̄ ẹkpep ndida ukeme ukere n̄kpọ mmọ nnam n̄kpọ, ndimehe ye n̄kann̄kụk mmọ, nnyụn̄ nnyene ebuana ye mbon en̄wen.

Ọtọn̄ọde ke isua inan̄ m̀mê ition, ke ini nditọwọn̄ ẹbrede mbre, mmọ ẹsitọn̄ọ ndikpebe mme n̄kpọ oro ikpọ owo ẹsinamde. Jesus ama etịn̄ ini kiet ko aban̄a nditọwọn̄ oro ẹbrede mbre. Ndusụk mmọ ẹma ẹbre mbre oro owụtde ke inịm “usọrọ ndọ,” mbon eken ẹnyụn̄ ẹbre mbre emi owụtde ke inam edinam “ubụkowo,” ndien nte ido nditọwọn̄ edide, mmọ ẹma ẹtọhọ ke otu idemmọ ke ntak emi ndusụk mmọ mîkamaha nditiene mbuana. (Matthew 11:16, 17) Utọ mbre emi ekeme ndin̄wam ndisịn akpan n̄kpọ ke esịt eyenọwọn̄ oro ọkọride.

Nditọwọn̄ oro ẹdude ke ndise emi ẹbre mbre oro owụtde ke idi andikpep Bible ye eyen ukpepn̄kpọ. Mmọ inịmke ata ata ukpepn̄kpọ Bible, edi se inen̄ede idu mmọ ke ekikere edi edibuana etop Bible ye mme owo. Ndien emi edi ata akpan ukpepn̄kpọ, koro Jesus ama owụk kpukpru mme anditiene enye ete ẹnam mme mbet ẹnyụn̄ ẹkpep mme owo ẹnam kpukpru se imọ iketemede mmọ.—Matthew 28:19, 20.

Mme ete ye eka oro nditọ mmọ ẹsimade ndinam nte ke inịm ukpepn̄kpọ Bible, inọ utịn̄ikọ, m̀mê ke ikwọrọ ikọ ke ufọk ke ufọk ẹkeme ndinen̄ede n̄kop inemesịt. Edi ndammana n̄kpọ nditọwọn̄ ndikpebe se mmọ ẹkụtde nte ikpọ owo oro ẹdude ye mmọ ẹnamde. Mme mbre Bible oro nditọwọn̄ ẹbrede ẹwụt ke ẹda “orụk ukpep ye item oro Ọbọn̄ enyịmede” ẹbọk mmọ.—Ephesus 6:4, Charles B. Williams.

Jehovah oyom nditọwọn̄ ẹnyene udeme ke utuakibuot akpanikọ. Enye ama ọdọhọ Moses anam “nditọwọn̄” ẹtiene ẹdu ke ini ẹkekotde Ibet. (Deuteronomy 31:12) Edieke n̄kpri nditọwọn̄ ẹtienede ẹbuana ke utuakibuot akpanikọ, mbre oro mmọ ẹbrede oyowụt emi. Ndien eyenọwọn̄ emi ebrede mbre emi owụtde ke idi asan̄autom Abasi anam akpa usio-ukot ndikabade ndi asan̄autom Abasi.