Ẹkọbọ edi Ẹkop Inemesịt
Ẹkọbọ edi Ẹkop Inemesịt
‘[“Inemesịt edi eke,” NW] mbufo ke adan̄aemi owo ẹdisụn̄ide mbufo, ẹnyụn̄ ẹnam mbufo isịn-enyịn [m̀mê, ẹkọbọ mbufo], ẹnyụn̄ ẹtịn̄ kpukpru orụk idiọk-n̄kpọ ke nsu ẹdian mbufo kaban̄a Mi.’—MATTHEW 5:11.
1. Nso ke Jesus ọkọsọn̄ọ etịn̄ ọnọ mme anditiene enye aban̄a inemesịt ye ukọbọ?
KE AKPA ini oro Jesus okosiode mme apostle esie ọdọn̄ ẹkekwọrọ Obio Ubọn̄, enye ama odụri mmọ utọn̄ ete ke ẹyebiọn̄ọ mmọ. Enye akasian mmọ ete: “Kpukpru owo ẹyesua mbufo ke aban̄a enyịn̄ Mi.” (Matthew 10:5-18, 22) Nte ededi, mbemiso oro, ke Ukwọrọikọ esie Oro ke Obot, enye ama ọsọn̄ọ etịn̄ ọnọ mme apostle esie ye mbon en̄wen ete ke utọ ubiọn̄ọ oro idibiatke ntotụn̄ọ inemesịt mmọ. Ke akpanikọ, Jesus akakam abuan mme Christian ndikop inemesịt ye mmọ ndisobo ukọbọ! Didie ke ukọbọ ekpekeme ndinam owo okop inemesịt?
Ndikụt Ndutụhọ Kaban̄a Edinen Ido
2. Nte Jesus ye apostle Peter ẹdọhọde, nso orụk ndutụhọ anam owo okop inemesịt?
2 Jesus ama etịn̄ ọyọhọ ntak itiaita oro anamde owo okop inemesịt ete: ‘[“Inemesịt edi eke,” NW] mmọ eke owo ẹkọbọde mmọ kaban̄a edinen ido: koro Obio Ubọn̄ Heaven enyene mmọ.’ (Matthew 5:10) Ndutụhọ ke idemesie idịghe n̄kpọ ukpono. Apostle Peter ekewet ete: “Nso ukpono odu do, edieke mbufo ẹmede ime ke ini ẹsọn̄de ido ye mbufo ke edidue ndudue? Edi edieke mbufo ẹmede ime ke ini ẹkụtde ndutụhọ ke edinam nti n̄kpọ, oro edi se inemde Abasi esịt.” Enye ama adian do ete: “Edi owo mbufo baba kiet okûbọ ufen nte owot-owo, m̀mê nte inọ, m̀mê nte oburobụt owo, m̀mê nte andinọhọ ke mbubehe owo en̄wen; edi edieke owo okụtde ndutụhọ nte owo Christ, yak enye okûkop bụt, edi akam ọnọ Abasi ubọn̄ ye enyịn̄ emi.” (1 Peter 2:20; 4:15, 16) Nte mme ikọ Jesus ẹwụtde, owo okop inemesịt ke ini enye okụtde ndutụhọ kaban̄a edinen ido.
3. (a) Nso ke ọwọrọ owo ndikụt ndutụhọ kaban̄a edinen ido? (b) Nso utịp ke ukọbọ ekenyene ke idem akpa mme Christian?
3 Ẹnyene ata edinen ido ebe ke ndinam uduak Abasi ye mme ewụhọ esie. Mmọdo, ndikụt ndutụhọ kaban̄a edinen ido ọwọrọ ndikụt ndutụhọ koro owo esịnde ndibiat mme idaha Abasi m̀mê mme n̄kpọ oro enye oyomde. Mme adaiso mme Jew ẹma ẹkọbọ mme apostle koro mmọ mîketreke ndikwọrọ ikọ ke enyịn̄ Jesus. (Utom 4:18-20; 5:27-29, 40) Ndi emi ama abiat idatesịt mmọ m̀mê anam mmọ ẹtre utom ukwọrọikọ mmọ? N̄wan̄ansa-o! “Mmọ oro ẹwọrọ ẹkpọn̄ esop, ẹdara koro ẹbatde ẹte mmọ ẹmedot ndibọ esuene kaban̄a enyịn̄ Jesus. Ndien kpukpru usen, ke temple ye ke ufọk, mmọ idopke uyo ndikpep nnyụn̄ n̄kwọrọ, ẹte Jesus edi Christ.” (Utom 5:41, 42) Ukọbọ emi ama anam mmọ ẹkop idatesịt ẹnyụn̄ ẹnen̄ede ẹsịn ifịk ke utom ukwọrọikọ. Nte ini akakade, mbon Rome ẹma ẹkọbọ akpa mme Christian ke ntak oro mmọ ẹkesịnde ndituak ibuot nnọ akwa edidem.
4. Nso idi ndusụk ntak oro ẹkọbọde mme Christian?
4 Ke eyomfịn, ẹkọbọ Mme Ntiense Jehovah ke ntak oro mmọ mîtreke ndikwọrọ “gospel Ubọn̄ Abasi.” (Matthew 24:14) Ke ini ẹdoride ukpan ke mme mbono esop mmọ, mmọ ẹnyịme ndikụt ndutụhọ utu ke nditre ndisop idem ọtọkiet nte Bible etemede. (Mme Hebrew 10:24, 25) Ẹkọbọ mmọ ke ntak oro mmọ ẹdade san̄asan̄a nte mme Christian m̀mê ke ntak oro mmọ ẹsịnde ndida iyịp nnam n̄kpọ ke idiọk usụn̄. (John 17:14; Utom 15:28, 29) Kpa ye oro, ikọt Abasi ndida nnọ edinen ido anam mmọ ẹnen̄ede ẹnyene emem ye inemesịt mfịn.—1 Peter 3:14.
Ẹsụn̄i Kaban̄a Christ
5. Nso idi akpan ntak oro ẹkọbọde ikọt Jehovah mfịn?
5 Se Jesus eketịn̄de ke Ukwọrọikọ esie Oro ke Obot nte ọyọhọ ntak usụkkiet emi anamde owo okop inemesịt enyene n̄kpọ ndinam n̄ko ye ukọbọ. Enye ọkọdọhọ ete: ‘[“Inemesịt edi eke,” NW] mbufo ke adan̄aemi owo ẹdisụn̄ide mbufo, ẹnyụn̄ ẹnam mbufo isịn-enyịn [m̀mê, ẹkọbọ mbufo], ẹnyụn̄ ẹtịn̄ kpukpru orụk idiọk-n̄kpọ ke nsu ẹdian mbufo kaban̄a Mi.’ (Matthew 5:11) Akpan ntak oro ẹkọbọde ikọt Jehovah edi koro mmọ mîdịghe ubak idiọk editịm n̄kpọ emi. Jesus ọkọdọhọ mme mbet esie ete: “Edieke mbufo ẹkpedide mbon ererimbot, ererimbot akpama ikọt esie: edi sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo.” (John 15:19) Kpasụk ntre, apostle Peter ọkọdọhọ ete: “Ndien idem akpa mmọ oro, ke emi mbufo mînyịmeke aba ndisan̄a ye mmọ ndụk ke ọkpọsọn̄ etịme uwem oro, mmọ ẹnyụn̄ ẹsụn̄i mbufo.”—1 Peter 4:4.
6. (a) Ntak emi ẹsuenede ẹnyụn̄ ẹkọbọde nsụhọ ye mme nsan̄a mmọ? (b) Ndi utọ esuene oro ọbọ nnyịn inemesịt?
6 Nnyịn imokụt ke ẹkekọbọ akpa mme Christian ke ntak oro mmọ mîketreke ndikwọrọ ikọ ke enyịn̄ Jesus. Christ ama owụk mme anditiene enye ete: “Mbufo ẹyenyụn̄ ẹdi mme ntiense Mi . . . tutu esịm utịt ererimbot.” (Utom 1:8) Mme anam-akpanikọ nsụhọ nditọete Christ oro ẹyetde aran, emi mme anam-akpanikọ “akwa otu owo” oro ẹdide nsan̄a mmọ ẹn̄wamde, ẹnam ewụhọ oro ifịk ifịk. (Ediyarade 7:9) Ke ntre, Satan an̄wana “ye mbon oro ẹsụhọde ke otu mfri esie [mfri “n̄wan” oro, kpa ikpehe esop Abasi eke heaven], emi ẹnịmde ibet Abasi ẹnyụn̄ ẹnyenede utom editie ntiense nnọ Jesus.” (Ediyarade 12:9, 17, NW) Nte Mme Ntiense Jehovah, nnyịn itie ntiense inọ Jesus, kpa Edidem Obio Ubọn̄ oro akarade idahaemi, emi edisobode mme ukara owo oro ẹbiọn̄ọde edinen obufa ererimbot Abasi. (Daniel 2:44; 2 Peter 3:13) Ẹsuene ẹnyụn̄ ẹkọbọ nnyịn ke ntak emi, edi nnyịn imokop inemesịt ndikụt ndutụhọ kaban̄a enyịn̄ Christ.—1 Peter 4:14.
7, 8. Mme ikọ ewe ke mme andibiọn̄ọ ẹkedori akpa mme Christian?
7 Jesus ọkọdọhọ ke mme anditiene imọ ẹkpenyene ndikop inemesịt idem ke ini mme owo ẹtịn̄de ‘kpukpru orụk idiọk-n̄kpọ ke nsu’ ẹdian mmọ ke ntak imọ. (Matthew 5:11) Se iketịbede inọ akpa mme Christian edi oro. Kop se mme adaiso mme Jew ẹketịn̄de ẹban̄a mme Christian ke ini ẹkesịnde apostle Paul ke ufọk-n̄kpọkọbi ke Rome ke n̄kpọ nte 59 esịm 61 E.N.: “Ama edi n̄ka emi, nnyịn imọfiọk ite mme owo ẹtịn̄ n̄kpọ ẹbiat enye ke kpukpru ebiet.” (Utom 28:22) Ẹma ẹdori Paul ye Silas ikọ ẹte ke mmọ ẹdi “mme anditịmerede ererimbot,” emi ẹbiatde “mme ewụhọ Caesar.”—Utom 17:6, 7.
8 Ewetmbụk oro K. S. Latourette ama ewet aban̄a mme Christian oro ẹkedude ke ini Ukara Rome ete: “Ẹma ẹdori mmọ nsio nsio ikọ. Sia mme Christian ẹkesịnde ndibuana ke mme edinam mme okpono ndem, ẹkekot mmọ mbon oro mînịmke ke Abasi odu. Sia mmọ mîkabuanake ke ediwak edinam obio—usọrọ mme okpono ndem, an̄wan̄wa unọ idem inemesịt . . .—ẹma ẹsak mmọ nsahi ẹnyụn̄ ẹkot mmọ mme asua owo. . . . Ẹkedọhọ ke mme Christian iren ye iban ẹma ẹsisobo okoneyo . . . ye nte ke mmọ ẹma ẹsinyene oburobụt ebuana idan̄. . . . Sia mme Christian ẹkesinịmde usọrọ [Editi n̄kpa Christ] ke itie emi mmọ kpọt ẹdude, mme owo ẹma ẹsuan ufụmikọ ẹte ke mme Christian ẹsiwa nsekeyen kpukpru ini, ẹn̄wọn̄ iyịp ẹnyụn̄ ẹta obụkidem esie.” Ke adianade do, sia mme Christian ẹkesịnde ndituak ibuot nnọ akwa edidem, ẹkedọhọ ke mmọ ẹdi mme asua Ukara.
9. Didie ke akpa mme Christian ẹkenam n̄kpọ ẹban̄a ikọ oro ẹkedoride mmọ, ndien n̄kpọ etie didie mfịn?
9 Mme edori ikọ oro ikakpanke akpa mme Christian ndinam utom edikwọrọ eti mbụk Obio Ubọn̄. Ke 60 esịm 61 E.N., Paul ama ọdọhọ ke “gospel” ama ‘on̄wụm mfri onyụn̄ ọdọdiọn̄ ọkọri ke ofụri ererimbot’ ye nte ke ẹma ẹkwọrọ gospel emi “ẹnọ kpukpru owo ke idak ikpa-enyọn̄.” (Colossae 1:5, 6, 23) Ukem oro ke edi mfịn. Ẹdori Mme Ntiense Jehovah ikọ, idem kpa nte ẹkedoride akpa mme Christian. Nte ededi, mfịn, utom edikwọrọ etop Obio Ubọn̄ ke ọkọri onyụn̄ ada inemesịt ọsọk mbon oro ẹkwọrọde.
Ẹkop Inemesịt ke Ini Ẹkọbọde Ukem nte Mme Prọfet
10, 11. (a) Didie ke Jesus eketre nneme esie aban̄ade ọyọhọ n̄kpọ usụkkiet oro anamde owo okop inemesịt? (b) Ntak emi ẹkekọbọde mme prọfet? Nọ mme uwụtn̄kpọ.
10 Jesus eketre nneme esie aban̄ade ọyọhọ n̄kpọ usụkkiet oro anamde owo okop inemesịt ke ndidọhọ: ‘Ẹdat esịt, koro kpa ntre ke mmọ ẹkenam mme prophet emi ẹkebemde mbufo iso ẹdu.’ (Matthew 5:12) Israel oro mîkanamke akpanikọ ẹma ẹsinam n̄kpọ idiọk idiọk ye mme prọfet oro Jehovah okosiode ọdọn̄ ke ọtọ mmọ, ẹma ẹnyụn̄ ẹkọbọ mmọ ediwak ini. (Jeremiah 7:25, 26) Apostle Paul ama ọsọn̄ọ ke emi ekedi akpanikọ, ke ini enye ekewetde ete: “Nso ke ndidọhọ mbe emi? Koro ini ididụhe ami ndibụk mbụk . . . mme prophet; emi ẹkedade mbuọtidem . . . ẹkụt idomo oto nsahi ye ufen ye n̄kpọkọbi ye ufọk-n̄kpọkọbi n̄ko.”—Mme Hebrew 11:32-38.
11 Ẹma ẹwot ediwak prọfet Jehovah ke ofụt ke ini ukara idiọk Edidem Ahab ye Jezebel, n̄wan esie. (1 Ndidem 18:4, 13; 19:10) Ẹma ẹsịn prọfet Jeremiah ke ebuka ndien ekem ẹtop enye ẹsịn ke obube mbat. (Jeremiah 20:1, 2; 38:6) Ẹma ẹtop prọfet Daniel ẹsịn ke obube mme lion. (Daniel 6:16, 17) Ẹkekọbọ kpukpru mme prọfet oro ẹkedude mbemiso eyo mme Christian mi ke ntak oro mmọ ẹkedade ẹnọ edisana utuakibuot Jehovah. Mme adaiso ido ukpono mme Jew ẹma ẹkọbọ ediwak prọfet. Jesus okokot mme scribe ye mme Pharisee “nditọ mmọ emi ẹkewotde mme prophet.”—Matthew 23:31.
12. Ntak emi nnyịn Mme Ntiense Jehovah ibatde ke edi akwa ifet ndisobo ukọbọ ukem nte mme prọfet eset ẹkesobode?
12 Mfịn, ẹsiwak ndikọbọ nnyịn Mme Ntiense Jehovah ke ntak isịnde ifịk ikwọrọ eti mbụk Obio Ubọn̄. Mme asua nnyịn ẹdori nnyịn ikọ ẹte ke ‘inyenyịk mme owo ikabade esịt,’ edi nnyịn imọfiọk ke ẹma ẹdori mme anam-akpanikọ andituak ibuot nnọ Jehovah oro ẹkebemde nnyịn iso ukem ikọ emi. (Jeremiah 11:21; 20:8, 11) Nnyịn ibat ke edi akwa ifet ndikụt ukụt ke ukem ntak oro akanamde mme anam-akpanikọ prọfet eset ẹkụt ukụt. Mbet oro James ekewet ete: “Nditọ-ete, ẹda mme prophet, emi ẹketịn̄de n̄kpọ ke enyịn̄ Jehovah, nte uwụt-n̄kpọ ke edisọn̄ esịt mbiom ukụt. Sese, nnyịn idọhọ ite, [inemesịt edi eke] mmọ emi ẹma ẹbiom ukụt.”—James 5:10, 11.
Akakan Ntak Ndikop Inemesịt
13. (a) Ntak emi ukọbọ mînamke idem emem nnyịn? (b) Nso inam nnyịn ikeme ndisọn̄ọ nda, ndien nso ke emi owụt?
13 Utu ke ukọbọ ndinam nnyịn ikop mmemidem, nnyịn imọbọ ndọn̄esịt ke ndifiọk nte ke itiene nde ikpat mme prọfet, akpa mme Christian, ye Christ Jesus ke idemesie. (1 Peter 2:21) Mme ikọ N̄wed Abasi ẹnam nnyịn inen̄ede ikop inemesịt, utọ nte enye oro apostle Peter eketịn̄de mi ete: “Ndima, ẹkûyịk ikan̄-ikan̄ idomo eke odude ke otu mbufo, eke etienede mbufo man ẹdomo mbufo ẹfiọk, nte edide utịbe n̄kpọ ọwọrọ mbufo. Edieke ẹsuenede mbufo kaban̄a enyịn̄ Christ, ọfọfọn ọnọ mbufo [m̀mê, mbufo ẹkop inemesịt]; koro Spirit ubọn̄ ye Spirit Abasi odoro mbufo ke idem.” (1 Peter 4:12, 14) Mme n̄kpọ oro isobode anam nnyịn ifiọk ke spirit Jehovah oro odorode nnyịn onyụn̄ ọsọn̄ọde nnyịn idem anam nnyịn ikeme ndisọn̄ọ nda nyọ ukọbọ. Un̄wam oro edisana spirit ọnọde nnyịn edi uyarade nte ke imenyene edidiọn̄ Jehovah, ndien emi anam nnyịn inen̄ede ikop inemesịt.—Psalm 5:12; Philippi 1:27-29.
14. Mme ntak ewe ke nnyịn inyene ndidat esịt ke ini ẹkọbọde nnyịn kaban̄a edinen ido?
14 Ntak en̄wen oro anamde nnyịn ikop inemesịt ke ini ẹbiọn̄ọde ẹnyụn̄ ẹkọbọde nnyịn kaban̄a edinen ido edi nte ke emi owụt ke nnyịn imodu eti uwem nte ata mme Christian. Apostle Paul ekewet ete: “Kpukpru owo eke ẹyomde ndidu eti uwem ke Christ Jesus ẹnyene ndibiom isịn-enyịn [m̀mê, ndisobo ukọbọ].” (2 Timothy 3:12) Akakan inemesịt nnyịn edi ndifiọk nte ke nsọn̄ọnda nnyịn ke ini idomo aka iso ndibọrọ ata oro Satan akamiade nte ke kpukpru mme edibotn̄kpọ Jehovah ẹnam n̄kpọ ẹnọ Enye ke ntak ibụk. (Job 1:9-11; 2:3, 4) Nnyịn imokop inemesịt ke imetiene inyene udeme, ọkpọkọm ekpri adan̄a didie, ke ndiwụt ke Jehovah enyene unen ndikara.—Mme N̄ke 27:11.
Ẹdara Etieti Koro Ẹmenyene Utịp
15, 16. (a) Nso ntak ke Jesus ọkọnọ nnyịn ‘ndidat esịt, nnyụn̄ ndara eti-eti’? (b) Nso utịp ke ẹnịm ke heaven ẹnọ mme Christian oro ẹyetde aran, ndien didie ke ẹdinọ mme nsan̄a mmọ ẹdide “mme erọn̄ en̄wen” utịp n̄ko?
15 Jesus ama etịn̄ ntak efen oro nnyịn ikpokopde inemesịt ke ini ẹtịn̄de idiọk ẹdian nnyịn, ẹnyụn̄ ẹkọbọde nnyịn nte ẹkenamde ye mme prọfet eset. Enye ama etịn̄ ke utịt utịt ọyọhọ ntak usụkkiet oro anamde owo okop inemesịt ete: ‘Ẹdat esịt, ẹdara eti-eti: koro utịp mbufo ke Heaven omokpon.’ (Matthew 5:12) Apostle Paul ekewet ete: “N̄kpọ-eyen-utom idiọk-n̄kpọ edi n̄kpa, edi enọ Abasi edi nsinsi uwem ke Christ Jesus Ọbọn̄ nnyịn.” (Rome 6:23) Ih, ‘akwa utịp’ oro edi uwem, ndien enye idịghe n̄kpọ eyenutom oro nnyịn ikemede ndinam utom mbọ. Enye edi enọ mfọn. Jesus ọkọdọhọ ke ‘utịp oro odu ke heaven’ koro Jehovah ọnọ enye.
16 Mbon oro ẹyetde aran ẹbọ “anyanya uwem,” oro edi, mmọ ẹyedu uwem unana n̄kpa ke heaven ye Christ. (James 1:12, 17) Mbon oro ẹnyenede idotenyịn eke isọn̄, oro edi, “mme erọn̄ en̄wen,” ẹdori enyịn ndidu nsinsi uwem ke Paradise isọn̄. (John 10:16; Ediyarade 21:3-5) Otu mbiba emi ibọhọ “utịp” emi ke ntak utom mmọ. Mbon oro ẹyetde aran ye “mme erọn̄ en̄wen” ẹbọ utịp mmọ ke ntak “akakan mfọnido [Jehovah] oro owo mîdotke” (NW), emi okonụkde apostle Paul ndidọhọ ete: “Ekọm enyene Abasi ke enọ Esie emi ayan̄ade edeme.”—2 Corinth 9:14, 15.
17. Ntak emi nnyịn ikemede ndikop inemesịt nnyụn̄ ‘ndara eti-eti’ ke ini ẹkọbọde nnyịn?
17 Apostle Paul ama ewet n̄wed ọnọ mme Christian, emi Akwa Edidem Nero ekenyenede ndikọbọ ndusụk mmọ ibak ibak ke mîbịghike, ete: “Nnyịn imobụre mbụre ke ukụt nnyịn n̄ko, sia ifiọkde ite ukụt ọwọrọ ime, ime onyụn̄ ọwọrọ eti edu, eti edu onyụn̄ ọwọrọ idori-enyịn: ndien idori-enyịn emi iyakke nnyịn ikụt bụt.” Enye ama ọdọhọ n̄ko ete: “Ẹdat esịt ke idotenyịn; ẹnyene ime ke ukụt.” (Rome 5:3-5; 12:12) Edide idotenyịn nnyịn edi eke heaven m̀mê eke isọn̄, utịp oro idibọde ke ndinam akpanikọ ke ini idomo enen̄ede okpon akan n̄kpọ ekededi oro nnyịn ikemede ndinyene. Idatesịt oro nnyịn inyenede ke ndidori enyịn ndidu uwem ke nsinsi nnam n̄kpọ nnyụn̄ ntoro edima Ete nnyịn, Jehovah, ke idak ndausụn̄ Edidem Jesus Christ, inyeneke mbiet. Nnyịn ‘imadat esịt eti-eti.’
18. Nso ke ẹkeme ndidori enyịn mme idụt ndinam nte utịt asan̄ade ekpere, ndien nso ke Jehovah edinam?
18 Ẹmekọbọ, ke ẹnyụn̄ ẹka iso ndikọbọ Mme Ntiense Jehovah ke ndusụk idụt. Jesus ama ada ntịn̄nnịm ikọ esie aban̄ade akpatre ini eyo emi odụri mme ata Christian utọn̄ ete: ‘Kpukpru mme idụt ẹyenyụn̄ ẹsua mbufo kaban̄a enyịn̄ Mi.’ (Matthew 24:9) Nte nnyịn isan̄ade ikpere utịt, Satan ayanam mme idụt ẹsua ikọt Jehovah. (Ezekiel 38:10-12, 14-16) Emi edidi ini Jehovah ndinam n̄kpọ. Jehovah ọdọhọ ete: “Ami nyonyụn̄ nnịm idem mi ke akwa ye ke edisana, nnyụn̄ nnam mmọ ẹfiọk mi ke enyịn ediwak mme idụt. Ndien mmọ ẹyefiọk ẹte ke ami ndi Jehovah.” (Ezekiel 38:23) Ntem, Jehovah ayanam akwa enyịn̄ esie asana onyụn̄ anyan̄a ikọt esie osio ke ukọbọ. Mmọdo, ‘Inemesịt edi eke owo emi ọsọn̄ọde ada ke idomo.’—James 1:12.
19. Nso ke ikpanam ke adan̄aemi itiede ibet akwa ‘usen Jehovah’?
19 Nte ‘usen Jehovah’ enen̄ede asan̄a ekpere, ẹyak nnyịn idara koro ‘ibat ite ke nnyịn imodot ndibọ esuene’ kaban̄a enyịn̄ Jesus. (2 Peter 3:10-13; Utom 5:41) Ukem nte akpa mme Christian, nnyịn ikpakam ika iso ye unana edikpa mba “ndikpep nnyụn̄ n̄kwọrọ” eti mbụk aban̄ade Christ Jesus ye ukara Obio Ubọn̄ esie ke adan̄aemi itiede ibet utịp nnyịn ke edinen obufa ererimbot Jehovah.—Utom 5:42; James 5:11.
Ke Ndidụn̄ọde
• Nso ke ọwọrọ ndikụt ndutụhọ kaban̄a edinen ido?
• Nso utịp ke ukọbọ ekenyene ke idem akpa mme Christian?
• Ntak emi ẹkemede ndidọhọ ke ẹkọbọ Mme Ntiense Jehovah ukem nte ẹkekọbọde mme prọfet eset?
• Ntak emi nnyịn ikemede ‘ndidat esịt nnyụn̄ ndara eti-eti’ ke ini ẹkọbọde nnyịn?
[Mme Mbụme Ukpepn̄kpọ]
[Mme ndise ke page 16, 17]
‘Inemesịt edi eke mbufo ke ini mme owo ẹsụn̄ide mbufo ẹnyụn̄ ẹkọbọde mbufo’
[Ebiet Ẹdade N̄kpọ Ẹto]
Mme owo ke ufọk n̄kpọkọbi: Chicago Herald-American