Mme Asan̄autom Jehovah Oro Ẹkopde Inemesịt
Mme Asan̄autom Jehovah Oro Ẹkopde Inemesịt
“Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.”—Matthew 5:3, NW.
1. Nso idi ata inemesịt, ndien nso ke enye owụt?
IKỌT Jehovah ẹda inemesịt oro mmọ ẹnyenede nte ata ọsọn̄urua n̄kpọ. David andiwet psalm ọkọdọhọ ete: ‘[“Inemesịt edi eke,” NW] mbon oro Jehovah edide Abasi mmọ!’ (Psalm 144:15) Inemesịt edi idaha mfọnọn̄kpọ. Ntotụn̄ọ inemesịt—emi enen̄erede oto esịtidem nnyịn—oto edifiọk nte ke imenyene edidiọn̄ Jehovah. (Mme N̄ke 10:22) Utọ inemesịt oro owụt ke imenyene n̄kpet n̄kpet itie ebuana ye Ete nnyịn eke heaven onyụn̄ owụt ke imọfiọk ke nnyịn ke inam uduak esie. (Psalm 112:1; 119:1, 2) Nte enemde, Jesus ama asiak ntak usụkkiet oro ẹkemede ndinam nnyịn ikop inemesịt. Ndidụn̄ọde mme ntak emi ke ibuotikọ emi ye enye oro etienede ayan̄wam nnyịn ndifiọk nte ikemede ndikop inemesịt edieke isọn̄ọde ida inam n̄kpọ “Abasi inemesịt,” kpa Jehovah.—1 Timothy 1:11, NW.
Ndifiọk Unana Nnyịn ke N̄kan̄ Eke Spirit
2. Ke ewe idaha ke Jesus eketịn̄ aban̄a inemesịt, ndien nso ikedi ntọn̄ọikọ esie?
2 Ke 31 E.N., Jesus ama ọnọ kiet ke otu mme utịn̄ikọ oro ẹwọrọde etop ẹkan ke mbụk. Ẹkot utịn̄ikọ emi Ukwọrọikọ Oro ke Obot, koro Jesus ọkọnọ enye ke obot oro asakde iso ese Inyan̄ Galilee. Gospel Matthew obụk ete: ‘Ekem ke adan̄aemi [Jesus] okụtde mme otu owo, Enye ọdọk ke akamba obot; ndien ke Enye ama okosụhọde etie, mbet Esie ẹtiene Enye: Enye onyụn̄ atat inua Esie ekpep mmọ ete: ‘[“Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit,” NW]: koro Obio Ubọn̄ Heaven enyene mmọ.’ Ke ẹkabarede ntọn̄ọikọ Jesus ke ata ata usụn̄, enye okot ntem: “Inemesịt edi eke mmọ oro ẹbuenede ke spirit,” m̀mê “Inemesịt edi eke mmọ oro ẹdide mme eben̄e eben̄e eke spirit.” (Matthew 5:1-3) Today’s English Version okot ntem: “Inemesịt edi eke mmọ oro ẹfiọkde ke imebuene ke n̄kan̄ eke spirit.”
3. Didie ke edu nsụhọdeidem etịp esịn ke nnyịn ndinyene inemesịt?
3 Jesus ama owụt ke Ukwọrọikọ esie Oro ke Obot, nte ke owo enen̄ede okop inemesịt edieke enye ọfiọkde ke imebuene ke n̄kan̄ eke spirit. Sia mme Christian oro ẹsụhọrede idem ẹnen̄erede ẹfiọk ke mmimọ idi mme anamidiọk, mmọ ẹsiben̄e Jehovah efen ọnọ mmimọ ke isọn̄ uwa ufak Christ. (1 John 1:9) Ntem, mmọ ẹnyene ifụre ekikere ye ata inemesịt. “[“Inemesịt edi eke,” NW] owo eke ẹfende mme idiọk ido esie, ẹnyụn̄ ẹfụkde ndudue esie.”—Psalm 32:1; 119:165.
4. (a) Ke mme usụn̄ ewe ke nnyịn ikeme ndiwụt ke imọfiọk unana nnyịn ke n̄kan̄ eke spirit inyụn̄ ifiọk eke mbon en̄wen? (b) Nso inam inen̄ede inyene inemesịt ke ini ifiọkde unana nnyịn ke n̄kan̄ eke spirit?
4 Ndifiọk unana nnyịn ke n̄kan̄ eke spirit esinụk nnyịn ndikot Bible kpukpru usen, ndidia udia eke spirit oro “asan̄autom emi anamde akpanikọ, onyụn̄ enyenede ọniọn̄” ọnọde “ke edikem ini,” nnyụn̄ ndụk mme mbono esop Christian kpukpru ini. (Matthew 24:45; Psalm 1:1, 2; 119:111; Mme Hebrew 10:25) Ima oro imade mme mbọhọidụn̄ nnyịn esinam nnyịn ifiọk unana mbon en̄wen ke n̄kan̄ eke spirit, ima emi esinyụn̄ onụk nnyịn ndisịn ifịk n̄kwọrọ nnyụn̄ n̄kpep eti mbụk Obio Ubọn̄. (Mark 13:10; Rome 1:14-16) Ndibuana akpanikọ Bible ye mbon en̄wen esinam nnyịn ikop inemesịt. (Utom 20:20, 35) Inemesịt nnyịn esinen̄ede okpon ke ini itiede ikere utịbe utịbe idotenyịn Obio Ubọn̄ ye mme edidiọn̄ oro Obio Ubọn̄ edidade edi. Idotenyịn Obio Ubọn̄ eke “ekpri otuerọn̄,” oro edi, mme Christian oro ẹyetde aran, edi uwem unana n̄kpa ke heaven nte mme andibuana ke ukara Obio Ubọn̄ Christ. (Luke 12:32; 1 Corinth 15:50, 54) Amaedi “mme erọn̄ en̄wen,” idotenyịn mmọ edi ndidu nsinsi uwem ke Paradise isọn̄ ke ini ukara Obio Ubọn̄ oro.—John 10:16; Psalm 37:11; Matthew 25:34, 46.
Nte Mbon Ntuan̄a Ẹkemede Ndikop Inemesịt
5. (a) Nso ke ikọ emi “mmọ eke ẹtuan̄ade” ọwọrọ? (b) Didie ke utọ mbon ntuan̄a oro ẹbọ ndọn̄esịt?
5 Etie nte ikọ efen oro Jesus eketịn̄de aban̄a edinyene inemesịt enyene ntuaha. Enye ọkọdọhọ ete: ‘[“Inemesịt edi eke,” NW] mmọ oro ẹtuan̄ade: koro ẹyedọn̄ mmọ esịt.’ (Matthew 5:4) Didie ke owo ekeme nditua eyet ndien ke ukem ini oro okop inemesịt? Man ifiọk se ikọ Jesus ọwọrọde, oyom nnyịn ikere iban̄a m̀mê orụk ntuan̄a ewe ke Jesus etịn̄ aban̄a. Mbet oro James ọdọhọ ke nnyịn ikpatua koro idide mme anamidiọk. Enye ekewet ete: “Ẹyet ubọk mbufo ẹsana, mbufo mme anam-idiọk; ẹnyụn̄ ẹnam esịt mbufo ẹsana, mbon esịt iba. Ẹdu ke nnanenyịn, ẹnyụn̄ ẹfụhọ, ẹnyụn̄ ẹtua eyet; ẹyak imam mbufo akabade edi eseme, idara mbufo onyụn̄ akabade edi mfụhọ. Ẹsụhọde idem ke iso Ọbọn̄, ndien Enye eyemen mbufo enịm ke enyọn̄.” (James 4:8-10) Mbon oro ẹfụhọde ẹban̄a idiọkn̄kpọ mmọ ẹkop ndọn̄esịt ke ini mmọ ẹkpepde nte ke ẹkeme ndifen mme idiọkn̄kpọ mmimọ edieke mmimọ ibuọtde idem ke uwa ufak Christ inyụn̄ inen̄erede ikabade esịt ebe ke ndinam uduak Jehovah. (John 3:16; 2 Corinth 7:9, 10) Ntem, mmọ ẹkeme ndinyene ọsọn̄urua itie ebuana ye Jehovah ẹnyụn̄ ẹdori enyịn ndidu uwem ke nsinsi nnam n̄kpọ esie nnyụn̄ ntoro enye. Emi anam mmọ ẹnen̄ede ẹkop inemesịt.—Rome 4:7, 8.
6. Ke usụn̄ ewe ke ndusụk owo ẹtuan̄a, ndien didie ke mmọ ẹbọ ndọn̄esịt?
6 Ikọ Jesus abuana n̄ko mbon oro ẹtuan̄ade ẹban̄a mme mbubiam n̄kpọ oro ẹnamde ke isọn̄. Jesus ama owụt ke ntịn̄nnịm ikọ Isaiah 61:1, 2 osu imọ ke idem, emi ọdọhọde ete: “Spirit Ọbọn̄ Jehovah odoro mi: koro, Jehovah emeyet mi aran enịm, man mbụk eti mbụk nnọ mbon nsụk-esịt; ọmọdọn̄ mi, ete mbọp mmọ eke esịt mmọ obụn̄ọde, . . . ndọn̄ kpukpru mme atua-eyet esịt.” Mbon efen oro ẹtienede ẹsu ntịn̄nnịm ikọ emi edi mme Christian oro ẹyetde aran, emi ẹsụk ẹdude ke isọn̄, ndien nsan̄a mmọ ẹdide “mme erọn̄ en̄wen” ẹn̄wam mmọ ndinam utom emi. Kpukpru mmọ ẹbuana ke utom edinịm ndamban̄a idiọn̄ọ ke ọkpọiso “mmọ eke ẹsemede ẹnyụn̄ ẹtuade ẹban̄a kpukpru mbubiam ido emi . . . ẹnamde ke ufọt esie [Jerusalem mbon mfiakedem, adade aban̄a Christendom].” (Ezekiel 9:4) “Gospel Ubọn̄ Abasi” ọdọn̄ mbon oro ẹtuan̄ade mi esịt. (Matthew 24:14) Mmọ ẹnem esịt ndifiọk nte ke ibịghike, edinen obufa ererimbot Jehovah ayada itie idiọk editịm n̄kpọ Satan emi.
Inemesịt Edi Eke Mmọ Eke Ẹnyenede Ifụre Ifụre Ido
7. Nso ke “ifụre-ifụre ido” mîwọrọke?
7 Jesus aka iso ye Ukwọrọikọ esie Oro ke Obot ke ndidọhọ: ‘[“Inemesịt edi eke,” NW] mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.’ (Matthew 5:5) Ndusụk ini ẹsidọhọ ke ifụre ifụre ido edi mmeme. Nte ededi, oro idịghe akpanikọ. Ke anamde an̄wan̄a se ikọ oro ẹkabarede “ifụre-ifụre ido” ọwọrọde, eyen ukpepn̄kpọ Bible kiet ekewet ete: “Akakan edu oro ẹdade ẹdiọn̄ọ owo oro enyenede [ifụre ifụre ido] edi nte ke enye enen̄ede enyene mfara ke idem. Ifụre ifụre ido idịghe edu oro anamde owo okûnyene iwụk, oro ntụk akarade m̀mê oro anamde owo etie ndebe ndebe. Enye edi odudu oro asan̄ade ye mfara ke idem.” Jesus ama etịn̄ aban̄a idemesie ete: “Mmenyene ifụre-ifụre ido nnyụn̄ nsụhọde idem ke esịt.” (Matthew 11:29) Kpa ye oro, Jesus ama enyene uko ndida nnọ ndinen edumbet.—Matthew 21:12, 13; 23:13-33.
8. Ifụre ifụre ido enyene n̄kpet n̄kpet ebuana ye ewe edu, ndien ntak emi nnyịn iyomde edu emi ke itie ebuana nnyịn ye mbon en̄wen?
8 Do, ifụre ifụre ido enyene n̄kpet n̄kpet ebuana ye mfara ke idem. Ke akpanikọ, apostle Paul akasiak ifụre-ifụre ido ye mfara ke idem ọtọkiet ke ini enye eketịn̄de aban̄a “mbun̄wụm spirit.” (Galatia 5:22, 23) Ana ikọri ifụre ifụre ido ye un̄wam edisana spirit. Enye edi edu Christian oro anamde idu ke emem ye mbonan̄wa ọkọrọ ye mbon oro ẹdude ke esop. Paul ekewet ete: “Ẹda ndien esịt mbọm ẹsịne, ye mfọn-ido, ye nsụk-idem, ye ifụre-ifụre ido, ye ime; ẹme ime ye kiet eken, ẹnyụn̄ ẹfen kiet eken.”—Colossae 3:12, 13.
9. (a) Ntak emi mîyomke inyene ifụre ifụre ido n̄kukụre ke ini inamde n̄kpọ ye mme owo? (b) Didie ke mbon oro ẹnyenede ifụre ifụre ido ‘ẹdida isọn̄ ẹnyene’?
9 Nte ededi, iyomke inyene ifụre ifụre ido n̄kukụre ke ini inamde n̄kpọ ye mme owo. Nnyịn iwụt ke imenyene ifụre ifụre ido ebe ke ndinyịme ndisụk idem nnọ itie edikara Jehovah. Jesus Christ edi n̄wọrọnda uwụtn̄kpọ ke afan̄ emi, koro enye ama enyene ifụre ifụre ido ke ini okodude ke isọn̄ onyụn̄ osụk idem ọyọhọ ọyọhọ ọnọ uduak Ete esie. (John 5:19, 30) Jesus edi akpa ye akakan owo oro ẹnọde isọn̄ ada enyene, koro ẹmek enye ndidi Andikara isọn̄. (Psalm 2:6-8; Daniel 7:13, 14) Enye abuana isọn̄ ye ‘nsan̄a mme ada udeme nnyene’ ẹdide owo 144,000, emi ẹmekde “ẹsio ke otu owo” ndikara “isọn̄ nte ndidem.” (Rome 8:17; Ediyarade 5:9, 10, NW; 14:1, 3, 4; Daniel 7:27) Christ ye nsan̄a mme andikara esie ẹyekara ediwak miliọn mbon mbieterọn̄ oro ntịn̄nnịm ikọ psalm emi edisude mmọ ke idem inem inem: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”—Psalm 37:11; Matthew 25:33, 34, 46.
Inemesịt Edi Eke Mmọ Eke Ẹkopde Biọn̄ Edinen Ido
10. Nso idi usụn̄ kiet emi mbon oro “ẹkopde biọn̄ ye nsat-itọn̄ edinen ido” ẹkemede ndiyụhọ?
10 Jesus ama asiak ntak efen oro anamde owo okop inemesịt ke ini enye eketịn̄de ikọ ke Obot Galilee ete: ‘[“Inemesịt edi eke,” NW] mmọ eke ẹkopde biọn̄ ye nsat-itọn̄ edinen ido: koro mmọ ẹyeyụhọ.’ (Matthew 5:6) Jehovah enịm idaha kaban̄a edinen ido ọnọ mme Christian. Ntem, mbon oro ẹkopde biọn̄ ye nsatitọn̄ edinen ido, ke nditịm ntịn̄, ẹkop biọn̄ ye nsatitọn̄ ndausụn̄ Abasi. Utọ mbon oro ẹnen̄ede ẹfiọk ke idi mme anamidiọk ye mme anana-mfọnmma owo onyụn̄ ọdọn̄ mmọ ndinyene eti idaha ke iso Jehovah. Mmọ ẹsikop inemesịt didie ntem ke ini ẹkpepde Ikọ Abasi ẹnyụn̄ ẹdide ẹdifiọk ke edieke mmimọ ikabarede esịt inyụn̄ iyom edifen nnọ ọkọn̄ọde ke uwa ufak Christ, ke mmimọ iyenyene edinen idaha ke iso Abasi!—Utom 2:38; 10:43; 13:38, 39; Rome 5:19.
11, 12. (a) Didie ke ẹbat mme Christian oro ẹyetde aran ke edinen? (b) Didie ke ẹbịt nsan̄a mbon oro ẹyetde aran itọn̄ kaban̄a edinen ido?
11 Jesus ọkọdọhọ ke utọ mbon oro ẹyekop inemesịt, koro mmọ “ẹyeyụhọ.” (Matthew 5:6) Ẹbat mme Christian oro ẹyetde aran emi ẹmekde ‘ndikara nte ndidem’ ye Christ ke heaven ke “edinen ndinyene uwem.” (Rome 5:1, 9, 16-18, NW) Jehovah obon mmọ, ntem adade mmọ enyene nte nditọ esie eke spirit. Mmọ ẹkabade ẹdi nsan̄a mme ada udeme nnyene ye Christ, ẹnyụn̄ ẹmek mmọ ndidi ndidem ye mme oku ke ukara Obio Ubọn̄ Christ eke heaven.—John 3:3; 1 Peter 2:9.
12 Owo ibatke nsan̄a mbon oro ẹyetde aran kan̄a ke edinen ndinyene uwem. Nte ededi, Jehovah abat mmọ ke edinen ke ukeuke udomo ke ntak mbuọtidem oro mmọ ẹnyenede ke iyịp Christ oro ẹkeduọkde. (James 2:22-25; Ediyarade 7:9, 10) Ẹbat mmọ ke edinen nte mme ufan Jehovah oro ẹdinyan̄ade ke ini “akwa ukụt.” (Ediyarade 7:14) Ẹyebịt mmọ itọn̄ kaban̄a edinen ido ke ini “obufa enyọn̄,” emi mmọ ẹdikabarede ẹdi ubak obufa isọn̄ emi ‘edinen ido edidụn̄de.’—2 Peter 3:13; Psalm 37:29.
Inemesịt Edi Eke Mmọ Eke Ẹtuade Owo Mbọm
13, 14. Mme usụn̄ ewe ke nnyịn ikeme nditua mme owo mbọm, ndien ye nso utịp?
13 Ke akade iso ye Ukwọrọikọ esie Oro ke Obot, Jesus ọkọdọhọ ete: ‘[“Inemesịt edi eke,” NW] mmọ eke ẹtuade owo mbọm: koro ẹyetua mmọ mbọm.’ (Matthew 5:7) Ke ini mbọm enyenede ebuana ye ikpe, ẹdọhọ ke enye ọwọrọ mbọm oro anamde ebiereikpe etre ndinọ anamidiọk ọyọhọ ufen oro ibet enịmde. Nte ededi, nte ẹdade ẹtịn̄ ikọ ke Bible, mme akpasarade ikọ oro ẹkabarede “mbọm” ẹsinen̄ede ẹda ẹban̄a edifọn ido nnyụn̄ ntua mbon unana mbọm man mmọ ẹkop inemesịt. Ntem, mbon oro ẹtuade owo mbọm ẹnen̄ede ẹnyene esịtmbọm. N̄ke Jesus aban̄ade owo Samaria oro ekenyenede edu mbọhọidụn̄ edi eti uwụtn̄kpọ owo emi ‘akatuade owo oro odude ke unana, mbọm.’—Luke 10:29-37.
14 Man ikop inemesịt oro otode editua owo mbọm, oyom inam nti utom mfọnido inọ mbon unana. (Galatia 6:10) Jesus ama atua otuowo oro enye okokụtde mbọm, “koro mmọ [ẹkebiet] mme erọn̄ eke mînyeneke andikpeme: Enye onyụn̄ ọtọn̄ọ ndikpep mmọ ediwak n̄kpọ.” (Mark 6:34) Jesus ama ọfiọk ke ubonowo enen̄ede oyom n̄kpọ eke spirit. Nnyịn n̄ko imekeme ndiwụt ke imenyene esịtmbọm ebe ke ndibuana ye mbon en̄wen se mmọ ẹnen̄erede ẹyom—“gospel Ubọn̄ Abasi.” (Matthew 24:14) Nnyịn imekeme n̄ko ndin̄wam ekemmọ mme Christian oro ẹsọn̄de, mme ebeakpa, ye nditọakpa inyụn̄ ‘isọn̄ọ mbon iduọ-esịt idem.’ (1 Thessalonica 5:14; Mme N̄ke 12:25; James 1:27) Emi ayanam nnyịn ikop inemesịt inyụn̄ idi mbon oro Jehovah atuade mbọm.—Utom 20:35; James 2:13.
Mmọ Eke Esịt Asanade ye Mme Anam Emem
15. Didie ke nnyịn ikeme ndinyene edisana esịt nnyụn̄ ndi mme anam emem?
15 Jesus ama etịn̄ ọyọhọ ntak itiokiet ye itiaba oro ẹnamde owo okop inemesịt ete: “Inemesịt edi eke mmọ oro esịt asanade, koro mmọ ẹyekụt Abasi. Inemesịt edi eke mme anam emem, koro ẹyekot mmọ ‘nditọ Abasi.’” (Matthew 5:8, 9, NW) Edisana esịt edi esịt oro asanade ke n̄kan̄ ido uwem ye eke spirit onyụn̄ eten̄ede Jehovah ọyọhọ ọyọhọ. (1 Chronicles 28:9; Psalm 86:11) Mme anam emem ẹsidu ke emem ye nditọete Christian mmọ ẹnyụn̄ ẹn̄wana nte ẹkekeme ndidu ke emem ye mbọhọidụn̄ mmọ. (Rome 12:17-21) Mmọ ‘ẹyom emem, ẹnyụn̄ ẹbịne enye.’—1 Peter 3:11.
16, 17. (a) Ntak emi ẹkotde mbon oro ẹyetde aran “nditọ Abasi,” ndien didie ke mmọ ‘ẹkụt Abasi’? (b) Didie ke “mme erọn̄ en̄wen” ‘ẹkụt Abasi’? (c) Didie ke “mme erọn̄ en̄wen” ẹdikabarede ẹdi ata ata “nditọ Abasi,” ndien ini ewe ke emi editịbe?
16 Ẹn̄wọn̄ọ ẹnọ mme anam emem oro esịt asanade ẹte ke “ẹyekot mmọ nditọ Abasi,” ndien mmọ “ẹyekụt Abasi.” Ẹda spirit ẹbon mme Christian oro ẹyetde aran ndien Jehovah ada mmọ enyene nte “nditọ” ke adan̄aemi mmọ ẹsụk ẹdude ke isọn̄. (Rome 8:14-17) Ke ini ẹnamde mmọ ẹset ẹkedu ye Christ ke heaven, mmọ ẹnam n̄kpọ ke iso Jehovah ẹnyụn̄ ẹkụt Enye ata ata edikụt.—1 John 3:1, 2; Ediyarade 4:9-11.
17 Mme “erọn̄ en̄wen” oro ẹdide mme anam emem, ẹnam n̄kpọ Jehovah ke idak ndausụn̄ Eti Ekpemerọn̄, Christ Jesus, emi akabarede edi “Nsinsi Ete” mmọ. (John 10:14, 16; Isaiah 9:6) Jehovah ayada mbon oro ẹdibede akpatre udomo ke Tọsịn Isua Ukara Christ ama okokụre enyene nte nditọ esie eke isọn̄, ndien mmọ ‘ẹyenyene ubọn̄ eke nditọ Abasi.’ (Rome 8:21; Ediyarade 20:7, 9) Ke adan̄aemi mmọ ẹtiede ẹbet emi nditịbe, mmọ ẹda Jehovah nte Ete mmọ, sia mmọ ẹyakde uwem mmọ ẹnọ enye, ẹfiọkde ke enye edi Andinọ mmimọ uwem. (Isaiah 64:8) Ukem nte Job ye Moses eke eset, mmọ ẹkeme ndida enyịn mbuọtidem ‘n̄kụt Abasi.’ (Job 42:5; Mme Hebrew 11:27) ‘Enyịn esịt mmọ’ ye nnennen ifiọk Abasi ẹn̄wam mmọ ndikụt mme utịbe utịbe edu Jehovah ẹnyụn̄ ẹnam mmọ ẹdomo ndikpebe enye ebe ke ndinam uduak esie.—Ephesus 1:18; Rome 1:19, 20; 3 John 11.
18. Nte ekemde ye ntak itiaba oro Jesus akasiakde oro ẹsinamde owo okop inemesịt, mmanie ẹkop ata inemesịt mfịn?
18 Nnyịn imokụt ke mbon oro ẹfiọkde unana mmọ ke n̄kan̄ eke spirit, mbon oro ẹtuan̄ade, mbon oro ẹnyenede ifụre ifụre ido, mbon oro ẹkopde biọn̄ ye nsatitọn̄ edinen ido, mbon oro ẹtuade owo mbọm, mbon oro esịt asanade, ye mme anam emem ẹkop ata inemesịt ndinam n̄kpọ Jehovah. Kpa ye oro, utọ mbon oro ẹsiwak ndisobo ubiọn̄ọ, idem ye ukọbọ. Ndi emi anam mmọ ẹkûkop inemesịt? Ẹyeneme mbụme emi ke ibuotikọ oro etienede.
Ke Ndidụn̄ọde
• Nso inemesịt ke mbon oro ẹkerede ẹban̄a unana mmọ ke n̄kan̄ eke spirit ẹnyene?
• Ke mme usụn̄ ewe ke ẹdọn̄ mbon oro ẹtuan̄ade, esịt?
• Didie ke nnyịn iwụt ke imenyene ifụre ifụre ido?
• Ntak emi nnyịn ikpedide mbon oro ẹtuade owo mbọm, oro esịt asanade, ye mme anam emem?
[Mme Mbụme Ukpepn̄kpọ]
[Ndise ke page 10]
“Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit”
[Mme ndise ke page 10]
‘Inemesịt edi eke mmọ eke ẹtuade owo mbọm’
[Ndise ke page 10]
‘Inemesịt edi eke mmọ eke ẹkopde biọn̄ ye nsat-itọn̄ edinen ido’