Mme Mbụme Ẹtode Mme Andikot

Didie ke esop Christian ese uma udia?

Ikọ Abasi abat ukpammịn ye uma udia nte mme edu oro mîdotke ye mbon oro ẹkponode Abasi. Ke ntre, esop Christian ese ama udia ukem nte esede akpammịn. Akpammịn m̀mê ama udia ikemeke ndidu ke esop Christian.

Mme N̄ke 23:20, 21 ọdọhọ ete: “Kûda ke otu mme ofobo wine, emi ẹtade unam ke en̄weme: koro mbon mmịn ye mbon udia ẹyekabade ẹdi ubuene: ifem oyonyụn̄ esịne owo ntaha ọfọn̄ idem.” Ke Deuteronomy 21:20, nnyịn imokot iban̄a owo emi edide “itụn, onyụn̄ ọsọn̄ọ enyịn,” emi akanade ẹwowot ke idak Ibet Moses. Nte ufan̄ikọ emi owụtde, edu iba emi owo itụn oro mîkakabakede esịt do ekenyenede ẹdi ke enye ekedi “owo ndion [m̀mê, ama udia] ye owo mmịn.” Nte an̄wan̄ade, ẹkeda uma udia ke Israel eset nte edinam oro mîdotke ye mbon oro ẹyomde ndikpono Abasi.

Nte ededi, anie edi ama udia, ndien nso ke N̄wed Abasi Christian Usem Greek etịn̄ aban̄a n̄kpọ emi? Ẹkabade ama udia nte “owo emi adiade udia onyụn̄ ọn̄wọn̄de n̄kpọ ke idiọkitọn̄.” Mmọdo, n̄kpọ kiet oro odude edi ke uma udia edi idiọkitọn̄, ndien Ikọ Abasi asian nnyịn ke “mme esịn esịt ke n̄kpọ owo [“mbon idiọkitọn̄,” NW]” ẹdi mme orụk owo oro mîdidaha  Obio Ubọn̄ Abasi inyene. (1 Corinth 6:9, 10; Philippi 3:18, 19; 1 Peter 4:3) Ke adianade do, ke ini apostle Paul okodụride mme Christian utọn̄ aban̄a edisịn idem ke “ubọk-utom obụkidem,” enye ama asiak “ediyụhọ mmịn, ye etịme-etịme ido, ye mme ido eke ẹtiede ntre.” (Galatia 5:19-21) Edidia udia mbe ubọk esiwak ndisan̄a ye ediyụhọ mmịn ye etịme etịme ido. Akan oro, ke akpanikọ, uma udia esịne ke ikọ Paul emi, “ye mme ido eke ẹtiede ntre.” Ukem nte edide ye mme “ubọk-utom obụkidem” eken, ẹkpenyene ndisio eyenete oro ẹnen̄erede ẹfiọk ke ama udia, emi mînyụn̄ imaha ndikpọn̄ edu idiọkitọn̄ emi, mfep ke esop.—1 Corinth 5:11, 13. *

Okposụkedi Ikọ Abasi adade akpammịn ye ama udia ukem ukem, emem utom ndisọp mfiọk akpammịn n̄kan ama udia. Ẹsisọp ẹkụt mme n̄kpọ oro ẹnamde ẹfiọk ke owo akpa mmịn. Nte ededi, imemke utom ndifiọk ini emi owo edide ama udia koro owo ikemeke ndida nte owo etiede mfiọk. Mmọdo, enen̄ede oyom mbiowo esop ẹwụt ntịn̄enyịn ye mbufiọk ke ini ẹsede ẹban̄a mfịna emi.

Ke uwụtn̄kpọ, edikpon ubom n̄kaha ekeme ndidi idiọn̄ọ uma udia, edi idịghe kpukpru ubom edi ntre. Udọn̄ọ ekeme ndinam owo okpon ubom akaha. Owo ekeme ndidada ubom mmana. Nnyịn inyene nditi n̄ko ke ubom etiene idem owo, ke adan̄aemi uma udia otode ekikere owo. Ẹkabade edikpon ubom n̄kaha nte “ikpọn̄ ndiwak owo ke idem n̄kaha,” ke adan̄aemi uma udia edide “edidia udia ke idiọkitọn̄ m̀mê ke en̄weme.” Ke ntem, idịghe idaha idem owo ke ẹda ẹbiere uma udia edi ẹda ekikere owo kaban̄a udia ẹbiere. Owo ekeme ndinyene ukeuke idem mîdịghe akam ekeme ndinyene esan̄ esan̄ idem, edi edi ama udia. N̄ko-n̄ko, se ẹdade nte nnennen idaha idem owo okpụhọde ke nsio nsio ebiet.

Nso idi mme idiọn̄ọ uma udia? Ama udia esinana mfara ke idem kpukpru ini, esikam adia udia tutu ọdọn̄ọ. Unana mfara ke idem esie owụt ke enye ikereke iban̄a esuene oro enye esuenede Jehovah ye eti enyịn̄ ikọt Esie. (1 Corinth 10:31) Ke n̄kan̄ eken, owo ikpadaha owo emi esidiade n̄kpọ ebe ubọk ke ini ke ini nte “esịn esịt ke n̄kpọ owo,” oro edi, owo idiọkitọn̄. (Ephesus 5:5) Kpa ye oro, nte ekemde ye Galatia 6:1, ẹkeme ndinọ utọ eyenete oro un̄wam. Paul ọdọhọ ete: “Nditọ-ete, edieke ẹkụtde owo ke ndudue ekededi, mbufo, emi ẹdide mbon spirit, ẹsan̄a ke spirit ifụre-ifụre ido, [“ẹdomo ndinen̄ede utọ owo oro,” NW].”

Ntak emi item Bible oro akpande edidia n̄kpọ ke en̄weme edide ata akpan n̄kpọ mfịn? Koro Jesus ama enen̄ede odụri owo utọn̄ aban̄a eyo nnyịn ete: “Edi ẹkpeme idem mbufo, mbak uyụhọ udia ye mmịn ye ekikere uwem emi edinam esịt mbufo odobi, ndien usen oro edibuat mbufo nte ekpọ.” (Luke 21:34) Nditre ndidia n̄kpọ mbe ubọk edi akpan usụn̄ kiet ndifep usụn̄ uwem oro ọnọde owo unan ke n̄kan̄ eke spirit.

Mfara ke idem edi edu Christian. (1 Timothy 3:2, 11) Ke ntre, Jehovah eyenen̄ede an̄wam mbon oro ẹsịnde ukeme ofụri esịt ndinam item Bible aban̄ade edifara ke idem ke ini ẹdiade udia ẹnyụn̄ ẹn̄wọn̄de n̄kpọ.—Mme Hebrew 4:16.

[Ikọ idakisọn̄]