Ndi Nnyịn Iyenyene Ata Ifụre Tutu Amama?

ANIE mîsimaha ndise nte nditọwọn̄ ẹbrede mbre ye ete ye eka mmọ idara idara? Utọ nditọ oro ẹsinen̄ede ẹnyene ifụre ke ini ẹdude ye edima ete ye eka mmọ. Edi, ediwak nditọwọn̄ isinyeneke utọ inem inem idaha oro. Utu ke oro, ndusụk nditọwọn̄ ẹsitịmede esịt kpukpru usen ẹban̄a ebiet emi mmọ ẹdinade ke okoneyo. Ndi idotenyịn odu ọnọ utọ nditọwọn̄ oro mînyeneke ufọkidụn̄ do ye mbon eken emi mînyeneke ifụre?

Okposụkedi ekemede nditie nte ke idotenyịn idụhe, Ikọ Abasi ọnọ idotenyịn. Isaiah prọfet ama etịn̄ ntịn̄nnịm ikọ aban̄a ini emi mme owo ẹdinyenede ọyọhọ ifụre. Enye ekewet ete: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia.”—Isaiah 65:21, 22.

Edi ndi idotenyịn emi enyene nsọn̄ọ? Idem n̄kpọ, ikọ oro “idotenyịn” isiwọrọke kpukpru ini ke n̄kpọ eyetịbe nte ẹkedoride enyịn. Ke uwụtn̄kpọ, ke Brazil, ẹsiwak ndidọhọ: “A esperança é a última que morre.” Ke ata ata usụn̄, enye ọwọrọ ke “Owo isisọpke iduọk idotenyịn.” Emi ọwọrọ ke ediwak owo ẹsisụk ẹnyenyene idotenyịn idem ke ini ata ntak ndinyene idotenyịn mîdụhe. Nte ededi, idotenyịn oro odu-uwem Abasi ọnọde nnyịn itiehe ntre. Apostle Paul ekewet ete: “Owo ekededi eke ọbuọtde idem ye [Abasi] idikwe bụt.” (Rome 10:11) Mme ntịn̄nnịm ikọ Bible oro ẹma ẹkesosu ẹnam nnyịn inyene mbuọtidem nte ke mme un̄wọn̄ọ eken oro Jehovah Abasi ọkọn̄wọn̄ọde ẹyesu. Ke ini mme un̄wọn̄ọ oro ẹsude, mme idaha oro ẹnamde nditọwọn̄ ẹdụn̄ ke efak ẹyebe ẹfep.

Idem idahaemi, eti item oro ẹkụtde ke Bible ekeme ndin̄wam mbon oro mînyeneke idotenyịn ẹfori uwem mmọ ẹnyụn̄ ẹnyene ata ifụre. Oro edisan̄a didie itịbe? Mme Ntiense Jehovah ke edem mbufo ẹyekop inemesịt ndin̄wam fi okụt ibọrọ mbụme emi.