Nte Afo Emenyene Inemesịt Oro Otode Edinọ Enọ?

EYENETE an̄wan kiet ama anam utom Christian ke n̄kpọ nte isua 50. Okposụkedi idem ekememde enye ke ntak usọn̄, enye ama ebiere ndisan̄a nsịm Ufọkmbono Obio Ubọn̄ oro ẹkebọpde obufa. Eyenete kiet ama omụm enye ubọk ada odụk ufọkmbono oro, ndien eyenete an̄wan emi ama asan̄a sụn̄sụn̄ ebe usụn̄ usụn̄ aka ebiet oro enye okoyomde ndika—kpa ebiet oro ekebe etịbe anade. Enye ama esịn ekpri etịbe oro enye akafamde enịm ọnọ obufa Ufọkmbono Obio Ubọn̄ emi. Okposụkedi enye mîkekemeke nditiene mbọp ufọkmbono oro, ama ọdọn̄ enye ndinọ un̄wam.

Eyenete an̄wan emi ekeme ndinam fi eti anam-akpanikọ an̄wan efen—“ubuene ebe-akpa” oro Jesus okokụtde esịnde n̄kpri okudọk iba ke usịnetịbe temple. Owo itịn̄ke inọ nnyịn nte n̄kpọ eketiede ye enye, edi eyedi uwem ama esinen̄ede ọsọn̄ ye iban oro mîkenyeneke ebe ini oro. Mbọm esie ama enen̄ede anam Jesus sia enye ama enen̄ede ọfiọk nnanenyịn ebeakpa oro. Ke ndidọhọ mbet esie ẹkpebe ebeakpa emi, enye ama owụt ke ekpri etịbe oro ebeakpa emi ekesịnde ekedi “ofụri se enye akpadade odu uwem.”—Mark 12:41-44.

Ntak emi ubuene ebeakpa oro odude ke unana akpanamde utọ n̄waidem oro? Nte an̄wan̄ade, ekedi ke ntak ọkpọsọn̄ ima oro enye akamade Jehovah Abasi, emi ẹkesituakde ibuot ẹnọ ke temple Jerusalem. Okposụkedi se enye ọkọnọde mîkawakke, enye okoyom ndimenede edisana utom ke enyọn̄. Ndien enyene ndidi enye ama enen̄ede okop idatesịt ndiketịp se ededi oro enye ekekemede.

Ndinọ Enọ man Ẹnọ Utom Jehovah Ibetedem

Nditịp okụk ye mme n̄kpọ obụkidem eken osụk edi akpan n̄kpọ oro ẹyomde ke edisana utuakibuot, ndien enye esidi n̄kpọ oro ọnọde owo inemesịt. (1 Chronicles 29:9) Ke Israel eset, ke adianade ye edida etịbe oro ẹkesitịpde mbana temple, ẹma ẹsinyụn̄ ẹda enye ẹnam kpukpru ikpehe utuakibuot Jehovah aka iso ke usen ke usen. Ibet ama owụk nditọ Israel ete ẹtịp ọyọhọ mbak duop ke mbun̄wụm mmọ ẹda ẹn̄wam mme Levite, emi ẹkesinamde utom ke temple. Edi mme Levite n̄ko ẹkenyene ndisio ọyọhọ mbak duop ke otu mbak duop oro mmọ ẹkebọde nda nnọ Jehovah.—Numbers 18:21-29.

Okposụkedi mme Christian mîdụhe aba ke  idak Ibet ediomi, edumbet oro oyomde mme asan̄autom Abasi ẹtịp mme n̄kpọ obụkidem ẹda ẹnọ utuakibuot akpanikọ ibetedem ikpụhọkede. (Galatia 5:1) Ke adianade ye oro, mme Christian akpa isua ikie ẹma ẹsidat esịt nditịp n̄kpọ nda n̄n̄wam nditọete mmọ oro ẹkedude ke unana. (Utom 2:45, 46) Apostle Paul ama eti mme Christian ete ke kpa nte Abasi atatde ubọk ọnọ mmọ nti n̄kpọ, mmọ n̄ko ẹkpenyene nditat ubọk nnọ mbon en̄wen n̄kpọ. Enye ekewet ete: “Sọn̄ọ dọhọ mme enyene-n̄kpọ ke eyo emi, ete mmọ ẹkûmenede idem, ẹkûnyụn̄ ẹdori enyịn ke se iyan̄ade owo nte ẹnyene, edi ẹdori enyịn ke Abasi, emi ọnọde nnyịn kpukpru n̄kpọ uwak-uwak, ete idara ke esịt. Dọhọ mmọ ete, ẹfọn ido, ẹnyụn̄ ẹnam nti utom uwak-uwak, ẹnyụn̄ ẹtat ubọk, ẹnyịme ndinọ owo n̄kpọ; ẹn̄wana ẹyom eti isọn̄ ẹnọ idem mmọ ke ini iso, man mmọ ẹkpemụm uwem eke edide ata uwem ẹkama.” (1 Timothy 6:17-19; 2 Corinth 9:11) Ke akpanikọ, ifiọk n̄kpọntịbe Paul ama anam enye ekeme ndisọn̄ọ se Jesus eketịn̄de ete: “Ọfọn ndinọ akan ndibọ.”—Utom 20:35.

Mme Enọ Christian Mfịn

Mfịn, mme asan̄autom Jehovah ẹka iso ndida mme n̄kpọ obụkidem mmọ n̄n̄wam kiet eken nnyụn̄ n̄n̄wam ke utom Abasi. Idem mbon oro mînyeneke ekese ẹsitịp se mmọ ẹkemede. “Asan̄autom emi anamde akpanikọ, onyụn̄ enyenede ọniọn̄” ọdiọn̄ọ ke imenyene mbiomo ke iso Jehovah ndida mme etịbe emi nnam n̄kpọ ke ata eti usụn̄. (Matthew 24:45) Ẹda okụk ẹse ẹban̄a mme ọfis n̄kọk itieutom, ẹkabade ẹnyụn̄ ẹmịn̄ mme Bible ye mme n̄wed Bible, ẹtịm ikpọ mboho Christian, ẹnọ mme esenyịn oro ẹsan̄ade-san̄a ye mme isụn̄utom ukpep man ẹnọ ẹka nsio nsio ebiet, ẹnọ mbon unọmọ un̄wam, ẹnyụn̄ ẹda ẹnam ediwak akpan n̄kpọ eken. Ẹyak nnyịn ineme kiet ke otu akpan n̄kpọ oro ẹdade mme etịbe emi ẹnam—ndin̄wam ke ndibọp mme itie utuakibuot.

Mme Ntiense Jehovah ẹsisop idem ediwak ini kpukpru urua ke mme Ufọkmbono Obio Ubọn̄ mmọ man ẹbọ ukpep eke spirit ẹnyụn̄ ẹnyene eti ebuana ọtọkiet. Nte ededi, ke ediwak idụt, nsọn̄ọn̄kpọ iyakke Mme Ntiense n̄kann̄kụk ẹbọp mme Ufọkmbono Obio Ubọn̄ ye unana edibọ un̄wam okụk. Ke ntre, ke 1999, Mme Ntiense Jehovah ẹma ẹtọn̄ọ ndutịm oro an̄wamde ẹda okụk ẹto mme idụt oro ẹtịmde ẹnyene n̄kpọ ẹbọp mme Ufọkmbono Obio Ubọn̄ ke mme idụt oro mîtịmke inyene n̄kpọ. Ke adianade do, ediwak  tọsịn mme anamutom unyịmesịt ẹmenọ ini ye usọ mmọ, ediwak ini ẹkade ẹkenam utom ke mme nsannsan ebiet ke mme idụt emi. Ke ini ẹbọpde ufọkmbono, Mme Ntiense n̄kann̄kụk ẹsikpep usọ ubọpufọk ye nte ẹkemede nditịm ufọk n̄kama, ndien Okụk Ufọkmbono Obio Ubọn̄ anam ẹkeme ndidep mme n̄kpọutom ye mme n̄kpọ ubọpufọk oro ẹyomde. Mme Ntiense oro ẹsidụkde mbono esop ke mme ufọkmbono emi ẹnen̄ede ẹkop inemesịt ẹban̄a ekemmọ mme andinịm ke akpanikọ ndinọ ini ye okụk oro ẹdade ẹbọp ufọkmbono emi. Mmọ n̄ko ẹsitịp okụk ke ọfiọn̄ ke ọfiọn̄ ndida nse mban̄a obufa Ufọkmbono Obio Ubọn̄ emi ẹnyụn̄ ẹn̄wam nditịp okụk oro ẹkedade ẹbọp ufọkmbono oro, man ẹda ẹbọp mme Ufọkmbono Obio Ubọn̄ efen efen.

Ẹda mme n̄kpọ ubọpufọk ye usụn̄ ubọpufọk n̄kann̄kụk ẹbọp mme Ufọkmbono Obio Ubọn̄. Okposụkedi mme ufọkmbono emi mîwakke n̄kukọhọ, mmọ ẹye, ẹkem ye se ẹyomde, ẹnyụn̄ ẹnem owo ke idem. Ke ini ẹketọn̄ọde ndutịm ubọp ufọkmbono emi ke 1999, ẹkesịn n̄kpọ nte idụt 40 oro mîtịmke inyene okụk ke ndutịm emi. Toto ke ini oro, ndutịm emi amatara esịm utọ idụt oro 116, emi edide n̄kpọ nte mbahade iba ke otu ofụri esop Mme Ntiense Jehovah ke ofụri ererimbot. Ke isua ition emi ẹbede, ẹda ndutịm emi ẹbọp se iwakde ibe Ufọkmbono Obio Ubọn̄ 9,000, oro ọwọrọde ndibọp se iwakde ibe mbufa ufọkmbono 5 kpukpru usen ke ẹbaharede ukem ukem! Kpa ye oro, ke idụt 116 emi, ke ẹyeyom mbufa Ufọkmbono Obio Ubọn̄ 14,500. Ye un̄wam Jehovah ọkọrọ ye enọ imaesịt Mme Ntiense ke ofụri ererimbot, ẹdori enyịn ke okụk oyodu ndika iso mbọp Ufọkmbono Obio Ubọn̄.—Psalm 127:1.

Mme Ufọkmbono Obio Ubọn̄ Ẹnam N̄kọri Ẹdu

Nso utịp ke ọkpọsọn̄ ukeme oro ẹsịnde mi enyene ke idem Mme Ntiense n̄kann̄kụk ye ke utom ukwọrọikọ Obio Ubọn̄? Ke ediwak itie, n̄kọri esinen̄ede odu ke ibat mbon oro ẹdụkde mbono esop ke ẹma ẹkebọp obufa Ufọkmbono Obio Ubọn̄. Uwụtn̄kpọ kiet edi ntọt otode Burundi mi: “Ke ndondo oro ẹbọpde Ufọkmbono Obio Ubọn̄ ẹkụre, mme owo ẹsiyọhọ. Ke uwụtn̄kpọ, ẹkebọp Ufọkmbono Obio Ubọn̄ kiet ẹnọ esop oro n̄kpọ nte owo 100 ẹsidụkde mme mbono esop. Obufa Ufọkmbono Obio Ubọn̄ mmọ ekekeme ndidụk owo 150 ediye ediye. Ke ẹma ẹkebọp enye ẹkụre, owo 250 ẹkesidụk mme mbono esop.”

 Ntak emi utọ n̄kọri oro odude? Ntak kiet edi koro mme owo ẹsiwak ndinyene eyịghe mban̄a mme asuanetop Obio Ubọn̄ oro mînyeneke ata ata ebiet usopidem, edi emi ẹsisopde idem ke idak eto m̀mê ke an̄wa. Ke idụt kiet, ẹsiwak ndida utọ n̄kpri otu ido ukpono oro nte mbon oro ẹsidemerede afai ekpụk, ndien ibet oyom ẹsinịm kpukpru mbono ido ukpono ke esịtufọk oro edide itie utuakibuot.

Ndinyene ufọkmbono mmọ onyụn̄ an̄wam Mme Ntiense Jehovah ndiwụt mbio obio nte ke mmimọ idịghe mbet pastọ. Ọfis n̄kọk itieutom Mme Ntiense Jehovah ke Zimbabwe ewet ete: “Ke ini edem, nditọete mi ẹkesisop idem ke mme ufọk owo, ndien mme mbọhọidụn̄ mmọ ẹkesiwak ndikot mmọ ndian andinyene ufọk oro mmọ ẹsisopde idem. Ẹkesidọhọ ke nditọete emi ẹka ufọkabasi Ete ntem ye ntem. Emi ke okpụhọde idahaemi sia mme owo ẹkeme ndikụt in̄wan̄-in̄wan̄ idiọn̄ọ oro owụtde ufọkmbono kiet kiet nte ‘Kingdom Hall of Jehovah’s Witnesses.’”

Mme Andinọ Oro Ẹkopde Idatesịt

Apostle Paul ekewet ete: “Abasi amama owo eke ọnọde ke inemesịt.” (2 Corinth  9:7) Ke akpanikọ, ikpọ etịbe esinen̄ede enyene ufọn. Edi ẹsinyene ekese etịbe oro ẹdade ẹnam utom Mme Ntiense Jehovah ke mme ekebe etịbe Ufọkmbono Obio Ubọn̄. Kpukpru etịbe ẹnyene ufọn edide ediwak m̀mê ekpri, owo inyụn̄ ifụmike etịbe ndomokiet. Ti ete ke Jesus eketie ke ebiet oro enye ekekemede ndikụt nte ubuene ebeakpa etịpde n̄kpri okudọk iba. Mme angel ye Jehovah ẹma ẹkụt ebeakpa oro n̄ko. Nnyịn ikam ifiọkke enyịn̄ esie, edi Jehovah ama okụt ete ke ẹwet edu n̄waidem esie ẹsịn ke Bible ke nsinsi.

Ke adianade ye edibọp Ufọkmbono Obio Ubọn̄, etịbe oro nnyịn itịpde an̄wam ke ndise mban̄a mme akpan ikpehe efen ke utom Obio Ubọn̄. Nditiene ntịp etịbe anam nnyịn idat esịt inyụn̄ ‘inọ Abasi ediwak ekọm.’ (2 Corinth 9:12) Nditọete nnyịn ke Benin ẹtọt ẹte: “Kpukpru usen, uwak akam ekọm ẹsidọk ẹbịne Jehovah ke un̄wam okụk oro nditọete nnyịn ke ofụri ererimbot ẹnọde.” Ke ukem ini oro, kpukpru nnyịn oro itienede itịp okụk ida in̄wam utom Obio Ubọn̄ imenyene inemesịt otode edinọ enọ Christian!

[Ekebe/Ndise ke page 22, 23]

Mme Usụn̄ Emi Ndusụk Owo Ẹmekde Ndinọ Enọ

MME ETỊBE KABAN̄A UTOM OFỤRI ERERIMBOT

Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke mme ekebe etịbe oro ẹdiande idiọn̄ọ emi: “Contributions for the Worldwide Work—Matthew 24:14.”

Ke ọfiọn̄ kiet kiet, mme esop ẹsinọ okụk emi aka n̄kọk itieutom Mme Ntiense Jehovah emi esede aban̄a idụt mmọ. Ẹkeme ndinọ okụk imaesịt nnennen ẹsọk Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, m̀mê n̄kọk itieutom oro esede aban̄a idụt mbufo. Ẹkpenyene ndiwet “Watch Tower” ke babru okụk ban̄k. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.

NDUTỊM ẸNAMDE ẸNỌ SE ẸNỊMDE KE UBIỌN̄

Owo ekeme ndiyak okụk esie nnọ Watch Tower ada anam utom. Nte ededi, ẹyefiak ẹyak okụk emi ẹnọ andinyene ini ekededi oro enye oyomde. Kaban̄a ntọt efen efen, mbọk nnyene nneme ye Office of the Secretary and Treasurer ke adres ẹwụtde ke enyọn̄ emi.

ENỌ EMI ẸDIOMIDE-DIOMI

Ke adianade ye edinọ okụk nte enọ, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọ emi ẹsịne:

Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.

Inyene ye Mbubehe: Ẹkeme ndinọ Watch Tower inyene ye mbubehe nte ata enọ.

Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte ata enọ m̀mê, edieke edide ufọk emi owo odụn̄de, ke ndimụm isọn̄ ye ufọk oro n̄kama nnọ andinọ, emi ekemede ndisụk n̄ka iso ndụn̄ do ke eyouwem esie. Tọt ọfis n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinam ẹsụhọde urua tax andinọ.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm. Man ẹn̄wam mme owo oro ẹnyenede udọn̄ ndin̄wam utom ofụri ererimbot eke Mme Ntiense Jehovah ebe ke ndusụk orụk enọ emi ẹdiomide-diomi, ẹtịm ediye uduot ekpri n̄wed ẹkotde Charitable Planning to Benefit Kingdom Service Worldwide, ke Ikọmbakara ye ke usem Spanish. Ẹkewet ediye uduot ekpri n̄wed emi man an̄wam mme owo ẹfiọk nsio nsio usụn̄ oro ẹkemede ndinọ enọ idahaemi m̀mê ndikpọn̄ n̄kpọ-akpa nnọ ke ini owo akpade. Ke ẹma ẹkekot ediye uduot ekpri n̄wed emi ẹnyụn̄ ẹnyene nneme ye mme ekpeibet mmọ m̀mê mbon oro ẹsinọde mmọ item ẹban̄a tax, ediwak owo ẹma ẹkeme ndinọ utom Mme Ntiense Jehovah ke ofụri ererimbot ibetedem, ndien emi esinam urua tax oro mmọ ẹkpede osụhọde. Ẹkeme ndinyene ediye uduot ekpri n̄wed emi ke ndiben̄e idem esie kiet nnennen nnennen nto Charitable Planning Office (Itieutom Esede Aban̄a Enọ Emi Ẹdiomide-Diomi).

Kaban̄a ntọt efen efen, afo emekeme ndinyene nneme ye Charitable Planning Office, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi m̀mê ke ọfis Mme Ntiense Jehovah emi esede aban̄a idụt mbufo.

Charitable Planning Office

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telephone: (845) 306-0707

[Mme ndise ke page 20, 21]

N̄kani ye mbufa itie usopidem Mme Ntiense Jehovah

Zambia

Central African Republic