Mme Owo Ẹkeme Ndidu Uwem Ebịghi Adan̄a Didie?

KE March 3, 1513, Juan Ponce de León, anam-ndụn̄ọde owo Spain ama ọtọn̄ọ n̄wọrọnda isan̄ ndụn̄ọde. Enye ama awat osio ke Puerto Rico, odoride enyịn ndisịm Isuo Bimini. Mbụk ọdọhọ ke enye okoyom utịbe utịbe idịm—kpa Idịm Nsehe. Edi enye ekedi edibehe ke ebiet emi idahaemi edide Stet Florida, U.S.A. Nte ededi, enye ikekwe Idịm Nsehe, koro utọ idịm oro idụhe.

Mfịn, mme owo ke ofụri ofụri idụhe uwem ibe isua 70 m̀mê 80. Okposụkedi Bible etịn̄de aban̄a mme owo oro ẹkenen̄ede ẹdu uwem ẹbịghi, 2002 Guinness Book of World Records ọdọhọ ke owo oro ọsọn̄de akan oro akanam odude uwem ekedi n̄kpọ nte isua 122, ọfiọn̄ ition ye urua iba. (Genesis 5:3-32) Nte ededi, John Harris oro ekpepde n̄kpọ aban̄a edumbet oro akarade ndụn̄ọde ibọkusọbọ ye usọbọidem ọkọdọhọ ete: “Obufa ndụn̄ọde owụt ke mme owo ẹkeme nditre usọn̄ ye idem n̄kpa.” Ediwak mme anam-ndụn̄ọde eke ọyọhọ isua ikie-21 emi ẹtịn̄ ẹban̄a “ata ata uwem oro owo mîkemeke ndikpa,” “mme owo ndidu uwem oro mînyeneke utịt ọtọn̄ọde ke 2099,” “ukeme ndinyene nsen oro mîkemeke ndikpa, emi osion̄ode mme nsen en̄wen edi,” ye ntre ntre eken.

Mark Benecke ọkọdọhọ ke n̄wed esie oro The Dream of Eternal Life, ete: “Ekpere ndidi kpukpru nsen ke idem owo ẹsifiak ẹkabade obufa ediwak ini ke eyouwem nnyịn. . . . Ke nditịm ntịn̄, ke n̄kpọ nte isua itiaba ẹbede, nnyịn imesifiak inyene obufa idem.” Nte ededi, emi isikaha iso ke nsinsi koro mme nsen ẹnyene udomo ibat nsen emi mmọ ẹkemede ndision̄o ndi. Nte ededi, edieke mme nsen mîkpenyeneke udomo ibat nsen emi mmọ ẹkemede ndision̄o ndi, Benecke ọdọhọ “ke idem owo ekeme ndika iso nsehe ke ata anyan ini—idem ke nsinsi.”

Kere n̄ko ban̄a akpa-owo-idem ukeme oro mfre owo enyenede, emi enen̄ede okpon tutu nnyịn idikemeke ndida kpukpru nnam n̄kpọ ke isua ifan̄ oro idude uwem. Encyclopædia  Britannica ọdọhọ ke mfre owo “enyene ukeme oro enen̄erede okpon tutu owo idikemeke ndida kpukpru nnam n̄kpọ ke ofụri eyouwem esie.” (Nsiondi eke 1976, Eboho 12, page 998) N̄wed oro How the Brain Learns, emi David A. Sousa ewetde, ọdọhọ ete: “Ekpere ndidi ukeme oro mfre enyenede nditịm ntọt mbon inyeneke adan̄a.”—Page 78, Udiana Nsiondi, ẹkesiode ke 2001.

Ntak emi mme anam-ndụn̄ọde mîkemeke ndikụt n̄kpọ ke idem owo oro esinamde nnyịn ikpa? N̄ko ntak emi mfre owo enyenede utọ akaka ukeme oro? Nte ekeme ndidi ẹkebot nnyịn ndika iso n̄kọ ifiọk ke nsinsi? Ntak emi nnyịn isikerede iban̄a nsinsi uwem?

Bible ọdọhọ ete: “[Abasi] ama akam esịn mmọ nsinsi ini ke esịt, man tutu amama ubonowo okûkeme ndifiọk se ata Abasi anamde ọtọn̄ọde ke ntọn̄ọ tutu esịm utịt.” (Ecclesiastes 3:11, NW) Ikọ emi owụt ke Abasi ama esịn nnyịn ekikere edidu uwem nsinsi ke esịt. Ke ntak oro, nnyịn idisụk inyenyene n̄kpọ ndikpep mban̄a Abasi ye mme utom esie. Edieke nnyịn idude uwem ke anana-ibat biliọn isua—ih, ke nsinsi—nnyịn iyenyene ekese ndikpep kpukpru ini mban̄a mme utịbe utịbe utom obot Abasi.

Se Jesus Christ eketịn̄de n̄ko owụt ke mme owo ẹkeme ndidu uwem ke nsinsi. Enye ọkọdọhọ ete: ‘Nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.’ (John 17:3) Nso kaban̄a fi? Nte afo omoyom ndidu uwem ke nsinsi?

[Mme ndise ke page 3]

Juan Ponce de León ama oyom Idịm Nsehe

[Ebiet Ẹdade N̄kpọ Ẹto]

Ponce de León: Harper’s Encyclopædia of United States History