“Ata Eti” Edikabade

NTE ndụn̄ọde kiet owụtde, ẹma ẹmịn̄ n̄kpọ nte mbufa edikabade N̄wed Abasi Christian Usem Greek eke Ikọmbakara 55 ke ufọt isua 1952 ye 1990. Idụhe edikabade ndomokiet oro akakabarede mme ikọ ukem ukem. Man ọfiọk m̀mê ẹkeme ndiberi edem ke utom mme akabade n̄wed emi, Jason BeDuhn, udiana akwa andikpep ukpepn̄kpọ ido ukpono ke Ufọkn̄wed Ntaifiọk Northern Arizona, ke Flagstaff, Arizona, U.S.A., ama odụn̄ọde onyụn̄ emen akpan edikabade itiaita odomo ye kiet eken man ese m̀mê mmọ ẹnen, esịnede New World Translation of the Holy Scriptures, emi Mme Ntiense Jehovah ẹsiode. Nso ke enye okokụt?

Okposụkedi BeDuhn mîkamaha nte ẹkabarede ndusụk ikọ, enye okokot New World Translation “ata eti” edikabade, oro “ọfọnde akan,” emi “enen̄erede enen ke kpukpru usụn̄” akan ndusụk edikabade eken oro enye ekemende odomo. Ke ofụri ofụri, BeDuhn ọkọdọhọ ke New World Translation “edi kiet ke otu mme edikabade Ikọmbakara eke Obufa Testament oro ẹnende ẹkan mfịn” onyụn̄ edi “edikabade oro enende akan ke otu mme edikabade oro imọ ikemende idomo.”—Truth in Translation: Accuracy and Bias in English Translations of the New Testament.

BeDuhn ama ọdọhọ n̄ko ke ediwak mme akabade n̄wed ẹma “ẹda mme ikọ en̄wen m̀mê ẹtat se Bible etịn̄de man ekem ye udọn̄ mme okotn̄wed eyomfịn ye se mmọ ẹyomde Bible etịn̄.” Ke n̄kan̄ eken, BeDuhn ọkọdọhọ ke New World Translation itiehe ntre, koro “NW enen̄ede enen nte edikabade oro akabarede ikọ ke ata ata usụn̄, emi etienede mme akpasarade ikọ mme andiwet Obufa Testament ketket.”

Nte Kọmiti Ukabade Bible New World ọdọhọde ke mbemiso ikọ edikabade esie, edi “ndodobi mbiomo” ndikabade Edisana N̄wed Abasi nto mme akpasarade usem nsịn ke mme usem eyomfịn. Kọmiti oro aka iso ete: “Sia mme andikabade n̄wed emi ẹmade Abasi emi edide Andinyene Edisana N̄wed Abasi, mmọ ẹda nte ke mmimọ imenyene san̄asan̄a mbiomo ke iso Esie ndikabade mme ekikere ye ikọ esie ata nnennen nte ẹkekeme.”

Toto ke akpa ini oro ẹkemịn̄de enye ke 1961, New World Translation of the Holy Scriptures odu idahaemi ke usem 32, adianade ye usem 2 ke n̄wed mme nnan. N̄wed Abasi Christian Usem Greek m̀mê “Obufa Testament,” eke New World Translation, odu ke usem 18 efen efen ọkọrọ ye usem kiet ke n̄wed mme nnan. Nnyịn imesịn udọn̄ inọ fi ite okot Ikọ Abasi ke “ata eti” edikabade eyomfịn emi, iso-ọfọn ke usem emana fo.