Usen Ukụre Ukpep—Usen Idatesịt

“NSO eti usen ke mfịn edi ntem! Utịn ayama. Enyọn̄ an̄wan̄a. N̄kann̄kụk eye. Mme inuen ke ẹnyụn̄ ẹkwọ ikwọ. Usen mfịn eyenem etieti, ndien nnyịn idikwe edikpu. Jehovah Abasi isikpuhu owo. Utu ke oro, enye edi Abasi edidiọn̄.”

Brọda Samuel Herd, owo Otu Ukara eke Mme Ntiense Jehovah, akada ikọ eke enyọn̄ emi ọtọn̄ọ ndutịm ukụre ukpep ọyọhọ otu 117 eke Ufọkn̄wed Enyọn̄-Ukpeme Ukpep Bible eke Gilead. Oro ekedi ke September 11, 2004. Inem inem ndutịm oro ama esịne item Bible oro ọbọpde-bọp ọkọrọ ye mme ifiọkutom nditọ ufọkn̄wed oro ye mme ifiọkutom ẹtode an̄wautom isụn̄utom. Ke akpanikọ, ekedi usen idatesịt ọnọ kpukpru owo 6,974 oro ẹkedụkde edinam emi ke Itie Unọ Ukpep Enyọn̄-Ukpeme ke Patterson, New York. Ndusụk mmọ ẹketie ke Brooklyn ye Wallkill ẹkop ndutịm emi ke urụk ukopikọ, ke ini mbon eken ẹkesede ke ekebe ndise.

Ikọ Nsịnudọn̄ Oro Ẹkenọde Nditọ Ufọkn̄wed

John Kikot, emi edide andibuana ke Kọmiti N̄kọk Itieutom United States, ama ada ibuotikọ emi “Ndika Iso N̄kop Idatesịt nte Isụn̄utom,” ọnọ mme ikọ nsịnudọn̄. Enye ọkọdọhọ ke ẹdiọn̄ọ nditọ ufọkn̄wed Gilead nte mbon oro ẹkopde idatesịt, ndien ke ẹkụt oro ke edinam ukụre ukpep emi. Item N̄wed Abasi oro nditọ ufọkn̄wed emi ẹkebọde ke ini ufọkn̄wed oro ama anam mmọ ẹkop idatesịt, ndien idahaemi mmọ ẹma ẹtịm ẹdot ndinam mbon en̄wen ẹkop idatesịt kpa nte mmọ. Didie ke mmọ ẹdinam oro? Ebe ke ndinyịme ndinam utom isụn̄utom. Jesus ọkọdọhọ ete: “Inemesịt okpon ke ndinọnọ akan ke ndibọbọ.” (Utom 20:35, NW) Nte mbufa isụn̄utom emi ẹkpebede Jehovah Abasi, kpa “Abasi inemesịt” emi ọfọnde ido onyụn̄ anamde mbon en̄wen ẹkụt akpanikọ, mmọ ẹyekeme ndika iso n̄kop idatesịt.—1 Timothy 1:11, NW.

Etịn̄ikọ efen ekedi David Splane, emi edide owo Otu Ukara n̄ko, ndien ibuotikọ esie ekedi: “Nte Afo Eyenyene Eti Itie Ebuana ye Mme Owo ke Efakutom Fo? Eye adan̄a didie ntem ndidu ke edidianakiet ye mbon en̄wen, okposụkedi emi ekemede ndiyom ikabade idi ‘kpukpru n̄kpọ inọ kpukpru owo!’ (1 Corinth 9:22; Psalm 133:1) Brọda Splane ọkọdọhọ ke nditọ ufọkn̄wed oro ẹkụrede ukpep mi ẹyenyene ebuana ye ediwak owo ke utom isụn̄utom—mme owo oro ẹdude ke efakutom, mme ekemmọ isụn̄utom, nditọete ke obufa esop mmọ, ye mbon oro ẹdude ke ọfis n̄kọk itieutom emi ẹsede ẹban̄a utom edikwọrọ ye edinọ ukpep. Enye ama ọnọ nti ekikere oro ẹdinamde mmọ ẹnyene inem inem itie ebuana ye mme owo nte ẹkekeme: Ẹfiọk usem n̄kann̄kụk, ẹben̄e idem ndimehe ye mme ido n̄kann̄kụk, ẹkûnọhọ ke mbubehe mme ekemmọ isụn̄utom, ẹnyụn̄ ẹsụk ibuot ẹnọ mbon oro ẹdade usụn̄.—Mme Hebrew 13:17.

Etịn̄ikọ efen, Lawrence  Bowen, andikpep ke Gilead ama obụp ete, “Nso ke Afo Ekere?” Enye ama eti nditọ ufọkn̄wed oro ete ke mbon oro ẹkekpede “ikpe nte etiede owo ke enyịn” ikenyịmeke Jesus nte Messiah. (John 7:24) Sia idide mme anana-mfọnmma owo, oyom kpukpru owo ẹkpeme mbak ‘ẹdikere n̄kpọ owo’ utu ke ‘edikere n̄kpọ Abasi.’ (Matthew 16:22, 23) Ana mbon oro ẹmade n̄kpọ eke spirit ẹka iso ẹnen̄ede ekikere mmọ n̄ko. Ukem nte nsụn̄ikan̄ oro odude ke akpa, edinen̄ede oro nnyịn inamde idahaemi ekeme ndinam nnyịn isịm utịtmbuba nnyịn mîdịghe osụn̄ọ ke afanikọn̄ eke spirit. Ndika iso n̄kpep Bible an̄wam nnyịn ndikere “n̄kpọ Abasi.”

Wallace Liverance, andikpep efen ke Ufọkn̄wed Gilead, ama ada ikpehe ndutịm enye emi ekesịm utịt. Ibuotikọ esie oro ọkọkọn̄ọde ke Isaiah 55:1, ekedi: “Nso ke Afo Edidep?” Enye ama esịn udọn̄ ọnọ nditọ ufọkn̄wed oro ete “ẹdep” nduọkodudu, idatesịt, ye n̄kpọ udu uwem oro ntịn̄nnịm ikọ Abasi kaban̄a eyo nnyịn ọnọde. Ntịn̄nnịm ikọ Isaiah ekemen ikọ Abasi odomo ye mmọn̄, wine, ye mmọn̄eba. Didie ke ẹkeme ndidep Ikọ Abasi “idịghe ke okụk, inyụn̄ idịghe ke ekọm-urua”? Brọda Liverance ọkọdọhọ ke edi ke ndikpan̄ utọn̄ nnọ ntịn̄nnịm ikọ Bible nnyụn̄ n̄kpọn̄ ndiọi ekikere ye ndiọi usụn̄ uwem man inyene ekikere  Abasi inyụn̄ isan̄a ke usụn̄ esie. (Isaiah 55:2, 3, 6, 7) Ke ndinam emi, mbufa isụn̄utom emi ẹyekeme ndisọn̄ọ nda nnam utom oro ẹnọde mmọ ke esenidụt. Mme anana-mfọnmma owo ẹsiwak ndikere ke inemesịt ọkọn̄ọ ke edisịn idem mbịne inyene obụkidem. Etịn̄ikọ oro ama ọdọhọ ete: “Ẹkûnịm oro ke akpanikọ. Ẹkûdede ẹyak utọ ekikere oro ọnyọni odụk mbufo esịt. Ẹkụt ẹte ke ẹmesio ini ẹnịm ẹnọ edinen̄ede n̄kpep ntịn̄nnịm Ikọ Abasi. Enye ekeme ndinam mbufo ẹkop idem, ẹkop odudu, ẹnyụn̄ ẹkop idatesịt ke utom isụn̄utom mbufo.”

Inem Inem Ifiọkutom Nditọ Ufọkn̄wed ye Mme Ndụn̄ọde

Nditọ ufọkn̄wed oro ẹma ẹsibuana kpukpru ini ke utom ukwọrọikọ. Mark Noumair, andikpep efen ke Gilead, akada usụn̄ ke ikpehe oro akabuanade nditọ ufọkn̄wed, ediwak mmọ ẹma ẹfiak ẹnam mme ifiọkutom oro mmọ ẹkenyenede ẹwụt, ndien mmọ ẹkekọn̄ọ ke ibuotikọ emi: “Bụt Inamke Mmọ Iban̄a Gospel.” (Rome 1:16) Ama enem otuowo ndikop usụn̄ nte mme asan̄autom oro ẹnyenede mbufiọk mi ẹkenọde ikọ ntiense ke ufọk ke ufọk, ke efak, ye ke mme ufọkurua. Nditọ ufọkn̄wed oro ẹkefiọkde mme usem efen ẹma ẹdomo ndinyene nneme ye mme owo oro ẹsemde mme usem oro ke efakutom esop oro ẹkedemede mmọ ẹsịn. Mbon en̄wen ẹma ẹda mme n̄wed oro ẹkọn̄ọde ke Bible emi Mme Ntiense Jehovah ẹsiode ẹnam n̄kpọ nte ọfọnde, ke ini ẹkenamde mfiakn̄ka ye ke ini ẹketọn̄ọde mme ukpepn̄kpọ Bible. ‘Bụt ikanamke’ mmọ ndikwọrọ eti mbụk.

Brọda William Nonkes, emi anamde utom ke Itieutom Utịmutom ama anam ndụn̄ọde ye mme isụn̄utom oro ẹnamde utom ẹbịghi, emi ẹdude ke Burkina Faso, Latvia, ye Russia. Mmọ ẹma ẹnọ nti item oro ẹkekọn̄ọde ke ibuotikọ emi: “Jehovah Esinọ Mme Anam-Akpanikọ Utịp ke Ima Ima Usụn̄.” Kiet ke otu nditọete oro ẹkedade ẹnam ndụn̄ọde ama esịn udọn̄ ọnọ nditọ ufọkn̄wed oro ete ẹti Gideon ye mbonekọn̄ esie 300. Owoekọn̄ kiet kiet ama etịp esịn ke ndinam Gideon akan ke ekọn̄. (Judges 7:19-21) Kpasụk ntre, mme isụn̄utom oro ẹsọn̄ọde ẹda ẹnam utom ẹsibọ utịp.

Ndụn̄ọde oro Samuel Roberson, andikpep efen ke Gilead, akanamde ọkọkọn̄ọ ke ibuotikọ emi: ‘Kabade Di Kpukpru N̄kpọ Nọ Kpukpru Owo.’ Enye ama anam ndụn̄ọde ye nditọete inan̄ oro ẹbuanade ke Kọmiti N̄kọk Itieutom ke Senegal, Guam, Liberia ye Madagascar. Isụn̄utom 170 ẹnam utom ke mme idụt emi. Ndụn̄ọde oro ama anam nditọ ufọkn̄wed oro ẹkụrede ukpep do ẹfiọk nte mme Kọmiti N̄kọk Itieutom ẹsin̄wamde mbufa isụn̄utom ẹmehe ye utom mmọ. Oro esiwak ndibuana edikpep mme ido unam n̄kpọ oro ẹkemede nditie mbon oro ẹdụn̄de ke N̄kan̄ Edem Usoputịn, esen esen. Ke uwụtn̄kpọ, edi ọsọ n̄kpọ ke ndusụk idụt ndikụt iren, esịnede iren ke esop Christian, ẹmụmde ubọk ẹsan̄a nte mme ufan. Ke ndusụk ebiet oro n̄kọk itieutom Guam esede aban̄a, ẹsidia esen esen udia. Edi n̄kani isụn̄utom ẹmemehe ye ido unam n̄kpọ emi, owụtde ke mbufa isụn̄utom emi ẹkeme ndinam ntre n̄ko.

Guy Pierce, owo Otu Ukara, ekeneme ibuotikọ emi: “Sọn̄ọ Da Nam Akpanikọ Nọ ‘Obio Ubọn̄ Ọbọn̄ Nnyịn.’” Enye ama eti otuowo ete: “Jehovah okobot mme n̄kpọ ye uduak. Uduak esie kaban̄a ekondo emi ikpụhọkede. Uduak emi enyene ndisu ye unana n̄kpọ ndibiọn̄ọ enye. N̄kpọ ndomokiet ikemeke ndikpụhọde uduak oro.” (Genesis 1:28) Brọda Pierce ama esịn udọn̄ ọnọ kpukpru owo ete ẹsụk ibuot ọyọhọ ọyọhọ ẹnọ ukara Abasi kpa ye nsọn̄ọn̄kpọ oro otode idiọkn̄kpọ akpa owo oro, Adam. Ntre, Brọda Pierce ama ọdọhọ ete: “Nnyịn idu uwem ke ini ubiereikpe. Nnyịn inyene esisịt ini ndisịm mbon oro ẹnyenede esịt akpanikọ man in̄wam mmọ ẹfiọk akpanikọ. Ẹda ini ẹnam n̄kpọ nte ọfọnde man ẹda eti mbụk Obio Ubọn̄ ẹsọk mbon en̄wen.” Mbon oro ẹsọn̄ọde ẹda ẹnọ Obio Ubọn̄ Abasi ibetedem ẹkeme nditịm nnịm ke Abasi eyebere ye mmimọ.—Psalm 18:25.

Mbemiso ndutịm oro ekesịmde utịt, etieibuot okpokoro ama okot mme etop ekọm ẹtode mme n̄kọk itieutom ke ofụri ererimbot. Ekem, enye ama ọnọ nditọ ufọkn̄wed oro ẹkụrede ukpep mi n̄weditoro, ndien kiet ke otu mme andikụre ukpep ama okot leta emi nditọ ufọkn̄wed oro ẹkewetde ndiwụt ntotụn̄ọ esịtekọm mban̄a ukpep oro mmọ ẹkebọde. Emi ama ada inem inem ndutịm oro kpukpru mme andidụk mîdifreke mi ekesịm utịt.

[Ekebe ke page 23]

IDAHA OTU

Ibat idụt ẹtode: 11

Ibat idụt ẹnọde ẹka: 22

Ibat nditọ ufọkn̄wed: 48

Isua emana ke ẹbaharede ukem ukem: 34.8

Isua ẹdude ke akpanikọ ke ẹbaharede ukem ukem: 18.3

Isua ẹdude ke utom uyọhọ ini ke ẹbaharede ukem ukem: 13.4

[Ndise ke page 24]

Ọyọhọ Otu 117 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.