Ẹnọ Ukpep man Ẹnọ Ọyọhọ Ikọ Ntiense
Ẹnọ Ukpep man Ẹnọ Ọyọhọ Ikọ Ntiense
“Mbufo ẹyenyụn̄ ẹdi mme ntiense Mi ke Jerusalem, ye ke ofụri Judæa ye Samaria, tutu esịm utịt ererimbot.”—UTOM 1:8.
1, 2. Nso ikedi utom Peter, ndien anie ọkọdọn̄ enye?
“JESUS emi okotode Nazareth . . . ama owụk nnyịn ete ikwọrọ ikọ inọ mme owo inyụn̄ inọ ọyọhọ ikọ ntiense ite ke emi edi Enye emi Abasi ekenịmde ete edi ebiereikpe ọnọ mme odu-uwem ye mme akpan̄kpa.” (Utom 10:38, 42, NW) Apostle Peter eketịn̄ ikọ emi ọnọ Cornelius ye ikọtufọk Cornelius ndinam mmọ ẹfiọk utom ukwọrọikọ oro ẹkenọde imọ ẹte inam.
2 Ini ewe ke Jesus ọkọnọ enye utom emi? Ekeme ndidi se Jesus eketịn̄de esisịt ini mbemiso enye ọkọdọkde aka heaven ke enye ama ekeset, ke Peter ekenyene ke ekikere. Mbemiso enye ọkọdọkde aka heaven, Jesus ọkọdọhọ mme anam-akpanikọ mbet esie ete: “Mbufo ẹyenyụn̄ ẹdi mme ntiense Mi ke Jerusalem, ye ke ofụri Judæa ye Samaria, tutu esịm utịt ererimbot.” (Utom 1:8) Nte ededi, idem mbemiso ini oro, Peter ama ọfọfiọk ke sia imọ idide mbet Jesus, ke ana imọ inam mbon en̄wen ẹfiọk se imọ inịmde ke akpanikọ iban̄a Jesus.
Ukpep Isua Ita
3. Nso utịben̄kpọ ke Jesus akanam, ndien enye okokot Peter ye Andrew ẹdinam nso?
3 Ke ediwak ọfiọn̄ ẹma ẹkebe tọn̄ọ enye akana baptism ke isua 29 E.N., Jesus ama ọkwọrọ ikọ esịm Inyan̄ Galilee oro Peter ye Andrew emi ẹkedide nditọeka ẹkekọde iyak. Mmọ ẹma ẹkpa utom ke ofụri okoneyo inyụn̄ imụmke iyak ndomokiet. Edi Jesus ama ọdọhọ mmọ ete: “Ẹwat ẹwọrọ ke udem, ẹnyụn̄ ẹduọn̄ọ iyịre man ẹmụm iyak.” Ke mmọ ẹma ẹkenam se Jesus ọkọdọhọde, “mmọ ẹkụk ata ediwak iyak ẹmụm, ndien iyịre mmọ ọtọn̄ọ ndiwaha.” Ke okụtde utịben̄kpọ emi, ndịk ama anam Peter, edi Jesus ama ọsọn̄ọ enye esịt onyụn̄ ọdọhọ ete: “Kûfehe ndịk; tọn̄ọ ke emi afo ọyọkọ owo.”—Luke 5:4-10.
4. (a) Didie ke Jesus eketịm mme mbet esie idem ọnọ utom unọ ikọ ntiense? (b) Nso ukpụhọde idu ke utom ukwọrọikọ oro Jesus akanamde ye eke mbet esie?
4 Iwiwa Peter ye Andrew—ọkọrọ ye James ye John, nditọ Zebedee—ẹma ẹkpọn̄ ubom mmọ ẹtiene Jesus. Mmọ ẹma ẹsan̄a ye Jesus ke n̄kpọ nte isua ita emi enye ọkọkwọrọde ikọ ẹnyụn̄ ẹbọ ukpep nte mme ọkwọrọ eti mbụk. (Matthew 10:7; Mark 1:16, 18, 20, 38; Luke 4:43; 10:9) Ke ini ukpep oro ama okokụre ke Nisan 14, 33 E.N., Jesus ama ọdọhọ mmọ ete: “Owo eke ọbuọtde idem ye Ami oyonyụn̄ anam utom eke Ami nnamde; enye oyonyụn̄ anam utom eke okponde akan oro.” (John 14:12) Mme mbet Jesus ẹkenyene ndinọ ọyọhọ ikọ ntiense nte Jesus ọkọnọde, edi ke ata akamba udomo. Nte mmọ ẹkedide ẹdikụt ke mîbịghike, mmọ ye kpukpru mbon oro ẹkekabarede ẹdi mbet ẹkenyene ndinọ ikọ ntiense ke “kpukpru mme idụt . . . tutu esịm utịt ererimbot,” m̀mê utịt editịm n̄kpọ emi.—Matthew 28:19, 20.
5. Didie ke nnyịn ikeme ndibọ ufọn nto ukpep oro Jesus ọkọnọde mme anditiene enye?
5 Nnyịn idu uwem ke “akpatre ini eyo emi.” (Matthew 24:3) Nnyịn ikemeke ndisan̄a ye Jesus, nte mme akpa mbet esie ẹkesan̄ade, nse nte enye ọkwọrọde ikọ ọnọ mme owo. Kpa ye oro, nnyịn imekeme ndibọ ufọn nto ukpep oro enye ọkọnọde edieke ikotde ke Bible iban̄a nte enye ọkọkwọrọde ikọ ye item oro enye ọkọnọde mme anditiene enye. (Luke 10:1-11) Nte ededi, ibuotikọ emi eyeneme ata akpan n̄kpọ efen oro Jesus okowụtde mbet esie—nnennen edu oro ẹkpenyenede ẹban̄a utom ukwọrọikọ.
Kere Ban̄a Mme Owo
6, 7. Ewe edu Jesus akanam ukwọrọikọ esie enyene uforo, ndien didie ke nnyịn ikeme ndikpebe enye ke afan̄ emi?
6 Ntak emi ukwọrọikọ Jesus ekenen̄erede enyene uforo? Ntak kiet ekedi ọkpọsọn̄ udọn̄ oro enye ekenyenede ke idem mme owo. Andiwet psalm ama ebem iso etịn̄ ete ke Jesus “ayatua eyen unana ye ubuene mbọm, onyụn̄ anyan̄a ukpọn̄ mme ubuene.” (Psalm 72:13) Ke akpanikọ, enye ama osu ntịn̄nnịm ikọ oro. Bible etịn̄ se enye akanamde ke idaha kiet ete: “Ke adan̄aemi Enye okụtde mme otu owo, atua mmọ mbọm, koro mmọ ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme.” (Matthew 9:36) Idem ata mme idiọkowo ẹma ẹkụt ke enye enen̄ede ekere aban̄a mme owo ndien emi ama anam mmọ ẹsan̄a ẹkpere enye.—Matthew 9:9-13; Luke 7:36-38; 19:1-10.
7 Mfịn, ukwọrọikọ nnyịn eyenyene uforo edieke nnyịn ikerede iban̄a mme owo ukem nte Jesus ekekerede. Mbemiso ọwọrọde an̄wautom, ntak mûdaha esisịt ini utie ukere adan̄a nte mme owo ẹnen̄erede ẹyom etop oro oyomde ndida nsọk mmọ? Kere ban̄a mme mfịna oro mmọ ẹsobode oro Obio Ubọn̄ Abasi kpọt edikemede ndikọk. Nyene in̄wan̄-in̄wan̄ esịt ye kpukpru owo sia mûfiọkke owo oro edinyịmede etop oro atan̄ade. Ekeme ndidi owo oro afo edisobode akakam ọbọbọn̄ akam oyom owo nte afo edi edin̄wam imọ!
Ke Ntak Ima
8. Ukem nte Jesus, nso inam mme anditiene enye ẹkwọrọ eti mbụk?
8 Eti mbụk oro Jesus akatan̄ade akaban̄a edinam uduak Jehovah, edinam enyịn̄ Esie asana, ye ediwụt ke Abasi enyene unen ndikara—kpa ata mme akpan eneni oro ẹnade ubonowo ke iso. (Matthew 6:9, 10) Ima oro Jesus akamade Ete esie akanam enye ọsọn̄ọ ada tutu esịm utịt onyụn̄ ọnọ ọyọhọ ikọ ntiense aban̄a Obio Ubọn̄ Abasi, emi edibierede mme eneni oro. (John 14:31) Ukem ima emi anam mme anditiene Jesus mfịn ẹsịn ifịk ẹkwọrọ ikọ. Apostle John ọkọdọhọ ete: “Ndima Abasi edi emi, ete, nnyịn inịm mbet Esie; ndien mbet Esie ibiakke owo idem.”—1 John 5:3; Matthew 28:19, 20.
9, 10. Ke ẹsiode ima Abasi ẹfep, ewe ima anam nnyịn inọ ọyọhọ ikọ ntiense?
9 Jesus ọkọdọhọ mme anditiene enye ete: “Mbufo ẹma ẹma Mi, ẹyenịm mbet Mi. Owo eke enyenede mbet Mi, onyụn̄ enịmde mmọ, enye edi owo eke amade Mi.” (John 14:15, 21) Ntre, ima oro imade Jesus ekpenyene ndinam nnyịn inọ ikọ ntiense iban̄a akpanikọ inyụn̄ inam mme n̄kpọ eken oro Jesus eketemede. Ke kiet ke otu ini oro enye okowụtde mbet esie idem ke enye ama ekeset ke n̄kpa, Jesus ama ọdọhọ Peter ete: “Bọk nditọ-erọn̄ Mi. . . . Kpeme mme erọn̄ Mi. . . . Bọk mme erọn̄ Mi.” Nso ikponụk Peter anam emi? Jesus ama ọnọ ibọrọ mbụme emi ke ini enye okobụpde Peter ediwak ini ete: “Nte ama Mi . . . Nte ama Mi? . . . Nte amama Mi?” Ih, ima oro Peter akamade Jesus ama anam enye ọnọ ọyọhọ ikọ ntiense, oyom “mme erọn̄” Jesus, ndien ekem ekpeme mmọ ke n̄kan̄ eke spirit.—John 21:15-17.
10 Mfịn, nnyịn idụhe ye Jesus ke ata ata usụn̄ nte Peter okodude. Edi, nnyịn imenen̄ede ifiọk se enye akanamde ọnọ nnyịn. Esịt enen̄ede enem nnyịn ke utọ akwa ima oro akanamde enye ‘atabi n̄kpa ke ibuot kpukpru owo.’ (Mme Hebrew 2:9; John 15:13) Etie nnyịn ke idem nte eketiede Paul ke ini enye ekewetde ete: “Ima Christ efefịk nnyịn; . . . Enye okonyụn̄ akpa aban̄a kpukpru owo, man mme odu-uwem ẹkûdu uwem aba ẹnọ idem mmọ, edi ẹdu ẹnọ Enye.” (2 Corinth 5:14, 15) Nnyịn idiwụt ke imada ima Jesus ke akpan n̄kpọ inyụn̄ ima enye n̄ko ke ndinen̄ede nsịn ifịk nnọ ọyọhọ ikọ ntiense oro ẹkedọn̄de nnyịn. (1 John 2:3-5) Nnyịn ididehede ida utom ukwọrọikọ didie didie nte n̄kpọ eke idade uwa Jesus ke n̄kpọ ndek.—Mme Hebrew 10:29.
Wụk Enyịn ke Akpan N̄kpọ
11, 12. Ntak emi Jesus ekedide ererimbot, ndien didie ke enye okowụt ke ekikere imọ okowụhọ ke se ikadade imọ idi ererimbot?
11 Ke ini Jesus akadade ke iso Pontius Pilate, enye ọkọdọhọ ete: “N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ.” (John 18:37) Jesus ikayakke n̄kpọ ndomokiet ọwọn̄ọde ntịn̄enyịn esie ọkpọn̄ editie ntiense mban̄a akpanikọ. Se Abasi okoyomde enye anam edi oro.
12 Satan ama enen̄ede odomo Jesus ke afan̄ emi. Esisịt ini ke Jesus ama akana baptism, Satan ama ọnọ enye ifet ndidi ata ọwọrọiso owo ke ererimbot, ọnọde enye “kpukpru mme obio ererimbot ye ubọn̄ mmọ.” (Matthew 4:8, 9) Nte ini akakade, mme Jew ẹma ẹdomo ndinịm enye ke edidem. (John 6:15) Ndusụk owo ẹkeme ndikere ke n̄kpọ ekpenen̄ede ọfọn ye ubonowo edieke Jesus ekpekenyịmede ndidi edidem, ẹkerede ke Jesus akpakanam ekese nti n̄kpọ ọnọ ubonowo. Edi Jesus ikayakke utọ ekikere oro odụk enye esịt. Ekikere esie okowụhọ ke nditie ntiense mban̄a akpanikọ.
13, 14. (a) Nso mîkekemeke ndiwọn̄ọde ntịn̄enyịn Jesus n̄kpọn̄ akpan utom esie? (b) Okposụkedi Jesus mîkenyeneke inyene obụkidem, nso ke enye akanam?
13 Ke adianade do, Jesus ikayakke ukọ inyene ọwọn̄ọde ntịn̄enyịn esie. Ntak edi oro enye mîkenyeneke n̄kpọ. Enye ikakam inyeneke ufọk. Enye ama ọdọhọ ini kiet ete: “Ebua-ikọt ẹnyene ndudu, inuen enyọn̄ ẹnyụn̄ ẹnyene mme efọk; edi Eyen Owo inyeneke ọtọ eke odoride ibuot Esie.” (Matthew 8:20) Ke ini Jesus akakpade, n̄kukụre n̄kpọ oro Bible ọdọhọde nte enye ekenyenede ekedi ọfọn̄idem oro mbonekọn̄ Rome ẹkesịnde afia ẹda ẹnyene. (John 19:23, 24) Ndi emi ọwọrọ ke Jesus ikenyeneke n̄kpọ ndomokiet emi enye akanamde? Baba!
14 Se Jesus akanamde akam akan se ata imọ owo ekededi oro esifọnde mfọn ye mme owo akpanamde. Paul ọkọdọhọ ete: “Mbufo ẹmefiọk mfọn Ọbọn̄ nnyịn Jesus Christ, ẹte, okposụk edi nte Enye ekedide enyene-n̄kpọ, ke ntak mbufo Enye akabade edi ubuene, man oto ke ubuene Esie mbufo ẹkabade ẹdi mme enyene-n̄kpọ.” (2 Corinth 8:9; Philippi 2:5-8) Okposụkedi enye mîkenyeneke inyene obụkidem, Jesus ama eberede usụn̄ ọnọ mbon nsụhọdeidem ndidu nsinsi uwem nte mme mfọnmma owo. Nnyịn imenen̄ede iwụt esịtekọm iban̄a se enye akanamde! Esịt onyụn̄ enen̄ede enem nnyịn didie ntem ke utịp oro enye ọkọbọde ke enye ndikesịn idem nnam uduak Abasi!—Psalm 40:8; Utom 2:32, 33, 36.
15. Nso isọn̄ urua ikan inyene?
15 Mfịn, mme Christian oro ẹdomode ndikpebe Jesus n̄ko iyakke ukọ inyene ọwọn̄ọde ntịn̄enyịn mmọ. (1 Timothy 6:9, 10) Mmọ ẹfiọk ke inyene ekeme ndinam owo okop inem uwem, edi mmọ ẹfiọk n̄ko ke inyene ikemeke ndinọ mmimọ nsinsi uwem. Ke ini Christian akpade, inyene esie inyeneke ufọn ndomokiet inọ enye ukem nte ọfọn̄idem Jesus mîkenyeneke ufọn inọ enye ke enye ama akakpa. (Ecclesiastes 2:10, 11, 17-19; 7:12) Ke ini Christian akpade, n̄kukụre eti n̄kpọ oro enye enyenede edi itie ebuana esie ye Jehovah ye Jesus Christ.—Matthew 6:19-21; Luke 16:9.
Ubiọn̄ọ Ikakpanke Enye
16. Jesus akanam n̄kpọ didie aban̄a ubiọn̄ọ oro enye okosobode?
16 Ubiọn̄ọ ikanamke Jesus etre nditie ntiense mban̄a akpanikọ. Idem ikememke enye okposụkedi enye ọkọfiọkde ke utom imọ ke isọn̄ edisụn̄ọ ke n̄kpa nte uwa. Paul eketịn̄ ntem aban̄a Jesus: “Koro ke ntak idatesịt oro ẹkenịmde enye ke iso enye ama ọyọ ndutụhọ ke eto, ibatke esuene ke n̄kpọ, onyụn̄ osụhọde etetie ke ubọk nnasia ebekpo Abasi.” (Mme Hebrew 12:2, NW) Fiọk ete ke Jesus ikabatke “esuene ke n̄kpọ.” Enye ikayakke se mme asua ẹketịn̄de ẹfịna enye. Enye okowụk ekikere ke ndinam uduak Abasi.
17. Nso ke nnyịn ikeme ndikpep nto ime Jesus?
17 Ke etịn̄de se ime Jesus ekpepde nnyịn, Paul ama esịn udọn̄ ọnọ mme Christian ete: “Ẹse Enye emi okobiomde orụk idiọk ndutịn̄ oro mme idiọk owo ẹtịn̄de ẹdian Idem Esie, mbak mbufo ẹdikpa mba, ẹkop mmemidem ke ukpọn̄.” (Mme Hebrew 12:3) Ke akpanikọ, isimemke utom ndiyọ ubiọn̄ọ m̀mê nsahi kpukpru ini. Imemke utom ndin̄wana mbiọn̄ọ mme etabi ererimbot kpukpru ini, akpan akpan ke ini mme iman nnyịn ẹtịn̄de n̄kpọ ẹbiat nnyịn sia nnyịn mîmaha ndikọ inyene ke udomo oro mmọ ẹyomde nnyịn ikọ. Nte ededi, nnyịn iberi edem ke Jehovah kpa nte Jesus ekeberide, inyụn̄ ibiere ndibem iso nyom n̄kpọ Obio Ubọn̄.—Matthew 6:33; Rome 15:13; 1 Corinth 2:4.
18. Nso akpan n̄kpọ ke nnyịn ikeme ndikpep nto se Jesus eketịn̄de ye Peter?
18 Jesus ama owụt ke imọ ikayakke n̄kpọ ndomokiet ọwọn̄ọde ntịn̄enyịn imọ ke ini enye akasiande mme mbet esie ete ke imọ imọn̄ ikpa. Peter ama ọdọhọ enye ete “idiọk n̄kpọ aka nsan-nsan ye Afo,” onyụn̄ ọdọn̄ enye esịt ete ke “utọ n̄kpọ emi idiwọrọke” enye. Jesus ikakpan̄ke utọn̄ inọ n̄kpọ ekededi oro akpakanamde ubiere esie ndinam uduak Jehovah emem. Ntre, Jesus ama ọwọn̄ọde ada ọdọhọ Peter ete: “Da ke edem Mi, Satan. Afo edi n̄kpọ iduọ ọnọ Mi; koro afo ukereke n̄kpọ Abasi, edi ekere n̄kpọ owo.” (Matthew 16:21-23) Nnyịn n̄ko ikpakam ibiere ndisịn ekikere owo kpukpru ini. Edi, ikam iyak ekikere Abasi ada nnyịn usụn̄ kpukpru ini.
Obio Ubọn̄ Ayada Ata Ufọn Edi
19. Okposụkedi enye akanamde utịben̄kpọ, nso ikedi akpan utom oro Jesus akanamde?
19 Jesus ama anam ekese utịben̄kpọ ndiwụt ke imọ idi Messiah. Enye ama akam anam mme akpan̄kpa ẹset. Mme utịben̄kpọ oro ẹma ẹnam akwa otuowo ẹbụn̄ọ nte ifian̄ ẹbịne enye, edi Jesus ikedịghe isọn̄ akpan akpan man edinam mme utịben̄kpọ. Enye ekedi man editie ntiense aban̄a akpanikọ. Enye ama ọfiọk ke ufọn obụkidem ekededi oro imọ ikọnọde mme owo ẹkedi ke ekpri ini. Idem mbon oro enye akanamde ẹset ẹma ẹfiak ẹkpan̄a. N̄kukụre se ikekemede ndin̄wam ndusụk mmọ ẹnyene nsinsi uwem ekedi ikọ ntiense akpanikọ oro enye ọkọnọde.—Luke 18:28-30.
20, 21. Didie ke ata mme Christian ẹda ukem ukem ke se iban̄ade edifọn mfọn ye mme owo?
20 Mfịn, ndusụk owo ẹdomo ndikpebe eti utom oro Jesus akanamde ke ndisiak mme ufọkibọk m̀mê ke ndinam nti utom en̄wen nda n̄n̄wam mme ubuene. Ke ndusụk idaha, emi esinen̄ede atak mmọ n̄kpọ, ndien enen̄ede odot ẹtoro mmọ ke utom ofụri esịt oro mmọ ẹnamde; edi ufọn oro emi adade ọsọk mme owo esidi ke ekpri ini. Obio Ubọn̄ Abasi kpọt edida nsinsi usọbọ isọk ubonowo. Ntak edi oro Mme Ntiense Jehovah ẹsịnde idem ẹtie ntiense ẹban̄a akpanikọ Obio Ubọn̄ oro, kpa nte Jesus akanamde.
21 Emi iwọrọke ke ata mme Christian isifọnke mfọn ye mme owo. Paul ekewet ete: “Adan̄a nte ikụtde ifet, ẹyak nnyịn ifọn ido ye kpukpru owo, akpan-akpan ye mmọ emi ẹtode ke ufọk mme andinịm ke akpanikọ.” (Galatia 6:10) Ke ini afanikọn̄ m̀mê ke ini owo odude ke unana, nnyịn isitreke ‘ndifọn ido’ ye mbọhọidụn̄ nnyịn m̀mê nditọete nnyịn. Kpa ye oro, nnyịn ika iso ndinen̄ede nsịn idem ke se Jesus akadade ke ata akpan n̄kpọ—nditie ntiense mban̄a akpanikọ.
Kpep N̄kpọ to Uwụtn̄kpọ Jesus
22. Ntak emi mme Christian ẹsikwọrọde ikọ ẹnọ mbọhọidụn̄ mmọ?
22 Paul ekewet ete: “Idifọnke fọn inọ mi edieke mmen̄kwọrọke gospel.” (1 Corinth 9:16) Enye ikadaha edikwọrọ gospel didie didie sia oro akabuanade uwem esie ye eke mme andikakpan̄ utọn̄ nnọ enye. (1 Timothy 4:16) Nnyịn ida utom ukwọrọikọ nnyịn kpasụk ntre. Nnyịn iyom ndin̄wam mme mbọhọidụn̄ nnyịn. Iyom ndiwụt ke imama Jehovah. Nnyịn iyom ndiwụt ke imama Jesus inyụn̄ iwụt esịtekọm iban̄a akwa ima oro enye amade nnyịn. Oro anam nnyịn ikwọrọ eti mbụk inyụn̄ idehede idu “uwem ke mme idiọk itọn̄ esịt owo, edi [isan̄a] nte uduak Abasi edide.”—1 Peter 4:1, 2.
23, 24. (a) Nso ke nnyịn ikpep ito utịben̄kpọ aban̄ade iyak? (b) Mmanie mfịn ẹnọ ọyọhọ ikọ ntiense?
23 Ukem nte Jesus akanamde, nnyịn iyakke nsahi m̀mê mme owo ndiyat esịt nsịn etop nnyịn anam nnyịn itre akpan utom emi. Nnyịn imekpep n̄kpọ ito utịben̄kpọ oro Jesus akanamde ke ini enye ọkọdọhọde Peter ye Andrew ẹtiene imọ. Nnyịn imokụt ke edieke ikopde uyo Jesus inyụn̄ iduọn̄ọ ndamban̄a iyịre nnyịn idem ke akpa oro etiede nte iyak idụhe, nnyịn imekeme ndimụm ekese iyak. Ediwak Christian ẹmụm ekese ndamban̄a iyak ke ẹma ẹkekpa utom ke ediwak isua ke akpa oro etiede nte iyak idụhe. Ndusụk owo ẹmewọrọ ẹka akpa oro iyak ẹwakde ẹnyụn̄ ẹmụm ekese iyak do. Se ededi oro inamde, nnyịn iditreke ndiduọn̄ọ iyịre nnyịn ke akpa. Nnyịn imọfiọk ke Jesus idọhọke kan̄a ite ẹtre utom ukwọrọikọ ke ebiet ekededi ke isọn̄.—Matthew 24:14.
24 Mme Ntiense Jehovah oro ẹwakde ẹbe miliọn itiokiet ke ẹnam utom idahaemi ke se ibede idụt 230. Ibatutom ofụri ererimbot aban̄ade se mmọ ẹkenamde ke isua utom 2004 edidu ke nsiondi Enyọn̄-Ukpeme eke February 1, 2005. Ibatutom oro oyowụt nte Jehovah ekenen̄erede ọdiọn̄ utom ukwọrọikọ mmọ. Nnyịn ikpakam ida ini oro osụhọde ọnọ editịm n̄kpọ emi inam edemede-owo-udọn̄ ikọ Paul emi: “Kwọrọ ikọ Abasi; sịn ifịk nam emi.” (2 Timothy 4:1, 2) Nnyịn ikpakam ika iso inọ ọyọhọ ikọ ntiense tutu Jehovah ọdọhọ ke ekem.
Ọtọn̄ọde ke isua emi, Ibatutom Isua Utom eke Mme Ntiense Jehovah ke Ofụri Ererimbot idisịneke aba ke nsiondi Enyọn̄-Ukpeme eke January 1, edi edisisịne ke nsiondi eke February 1.
Nte Afo Emekeme Ndibọrọ?
• Didie ke nnyịn ikeme ndibọ ufọn nto ukpep oro Jesus ọkọnọde mme mbet esie?
• Didie ke Jesus ekese mbon oro enye ọkọkwọrọde ikọ ọnọ?
• Nso inam nnyịn inọ ọyọhọ ikọ ntiense?
• Didie ke nnyịn ikeme ndiwụk ntịn̄enyịn ke ndinam uduak Abasi nte Jesus okowụkde?
[Mme Mbụme Ukpepn̄kpọ]
[Ndise ke page 15]
Ukwọrọikọ nnyịn eyetịm enyene uforo edieke ikerede iban̄a mme owo nte Jesus ekekerede
[Ndise ke page 16, 17]
Akpan ntak oro akadade Jesus edi isọn̄ ekedi nditie ntiense mban̄a akpanikọ
[Mme ndise ke page 17]
Mme Ntiense Jehovah ẹsịn idem ke ndinọ ọyọhọ ikọ ntiense