Ima Abasi Anam Mmọ Ẹdiana Kiet

KE INI ẹketọn̄ọde esop Christian ke akpa isua ikie Eyo Nnyịn, edidianakiet ekedi kiet ke otu n̄wọrọnda edu esie, okposụkedi mme andibuana ẹketode nsio nsio ebiet. Mbon oro ẹketuakde ibuot ẹnọ ata Abasi do ẹketo mme idụt oro ẹdude ke Asia, Europe, ye Africa. Nsio nsio owo ẹma ẹdu ke esop akpa isua ikie—mme oku, mbonekọn̄, ifịn, mbon itọkekọn̄, mme anamusọ, mme anamutom, ye mme anyamurua. Ndusụk mmọ ẹkedi mme Jew, ke adan̄aemi mbon eken ẹkedide mme Gentile. Ediwak mmọ ẹkedi mme esịn efịbe, mme adan̄ ukemuduot, mme akpammịn, mme inọ, m̀mê mbon n̄kanubọk. Nte ededi, ke ini mmọ ẹkekabarede ẹdi mme Christian, mmọ ẹma ẹkpọn̄ ndiọi edinam mmọ ẹnyụn̄ ẹkabade ẹdiana kiet ke mbuọtidem.

Nso ikanam Ido Ukpono Christ eke akpa isua ikie ekeme ndinam kpukpru mme owo emi ẹdiana kiet? Ntak emi mmọ ẹkedude ke emem ye kiet eken ye kpukpru owo? Ntak emi mmọ mîkabuanake ke nsọn̄ibuot ye en̄wan? Ntak emi Ido Ukpono Christ eke eset ekenen̄erede okpụhọde ye mme akpan ido ukpono eyomfịn?

 Nso Ikanam Mme Andibuana ke Esop Ẹdiana Kiet?

Ima oro mmọ ẹkemade Abasi akanam ekemmọ mme andinịm ke akpanikọ ẹnen̄ede ẹdiana kiet ke akpa isua ikie. Mme Christian oro ẹma ẹdiọn̄ọ ke ama enen̄ede obiomo mmimọ ndima ata Abasi, kpa Jehovah, ke ofụri esịt, ukpọn̄ ye ekikere. Ke uwụtn̄kpọ, ẹma ẹteme apostle Peter emi ekedide owo Jew ẹte aka ufọk owo Gentile kiet, kpa owo emi enye mîkpamaha ndisan̄a n̄kpere. Ima oro enye akamade Jehovah ekenen̄ede onụk enye ndinam item oro. Peter ye akpa mme Christian eken ẹma ẹnyene n̄kpet n̄kpet itie ebuana ye Abasi, itie ebuana emi ọkọkọn̄ọ ke nnennen ifiọk aban̄ade edu Abasi, se enye amade, ye se enye asuade. Nte ini akakade, kpukpru mme andituak ibuot nnọ Abasi ẹma ẹdifiọk ke Jehovah okoyom kpukpru mmọ ẹnyene “esịt kiet ye ekikere kiet.”—1 Corinth 1:10; Matthew 22:37; Utom 10:1-35.

Mbuọtidem oro mme andinịm ke akpanikọ ẹkenyenede ke Jesus Christ ama adian mmọ ọtọkiet n̄ko. Mmọ ẹkeyom nditiene nde ikpat Esie ketket. Enye ama owụk mmọ ete: “Mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:34, 35) Ikanaha ima mmọ edi eke n̄kpọkinua, edi ekenyene ndidi ima n̄waidem. Nso ikedi utịp? Jesus ama ọbọn̄ akam aban̄a mbon oro ẹkebuọtde idem ye enye ete: ‘Mben̄e nte mmọ kpukpru ẹkpakam ẹdi kiet, nte Afo, Ete, odude Mi ke idem, Ami nnyụn̄ ndude ke Afo; man mmọ ẹnyụn̄ ẹdu ke nnyịn.’—John 17:20, 21; 1 Peter 2:21.

Jehovah ama an̄wan̄a edisana spirit, m̀mê anamutom odudu esie, ọduọk ata mme asan̄autom esie. Spirit emi ama anam emem odu ke otu mmọ. Enye ama anam mmọ ẹfiọk mme ukpepn̄kpọ Bible oro ẹkenyịmede ke kpukpru esop. Mme andituak ibuot nnọ Jehovah ẹkekwọrọ ukem etop—edinam enyịn̄ Jehovah asana ebe ke Obio Ubọn̄ Messiah Abasi, kpa ukara eke heaven oro edikarade ofụri ubonowo. Akpa mme Christian ẹma ẹfiọk ke mmimọ inyeneke ndidi “eke ererimbot emi.” Ntem, mme Christian ẹkeda san̄asan̄a ini ekededi oro mme owo ẹken̄wanade ye ukara m̀mê ke ini ekọn̄ akasiahade. Mmọ ẹma ẹdomo ndidu ke emem ye kpukpru owo.—John 14:26; 18:36; Matthew 6:9, 10; Utom 2:1-4; Rome 12:17-21.

Kpukpru mme andinịm ke akpanikọ ẹma ẹsịn ukeme ndinam emem odu. Didie? Ebe ke ndikụt nte ke edu uwem mmimọ ama odu ke n̄kemuyo ye Bible. Ntem, apostle Paul ama ewet ọnọ mme Christian ete: “Ẹsio akani owo ẹduọk, emi ekemde ye ido uwem mbufo ke eyo oko,” ẹnyụn̄ “ẹmen obufa owo ẹsịne.”—Ephesus 4:22-32.

Mmọ Ẹma Ẹka Iso Ndidiana Kiet

Nte ededi, mme andinịm ke akpanikọ eke akpa isua ikie ẹkedi mme anana-mfọnmma owo, ndien mme idaha ẹma ẹdemerede oro ẹkeyomde ndibiat edidianakiet mmọ. Ke uwụtn̄kpọ, Utom 6:1-6 obụk ke eneni ama edemede ke ufọt mme Christian emi ẹkedide mme Jew emi ẹkesemde usem Greek ye mme Christian oro ẹkesemde usem Hebrew. Mbon oro ẹkesemde usem Greek ẹkedọhọ ke ẹfụmi mmimọ. Edi, ke ndondo oro ẹkesiande mme apostle mfịna emi, mmọ ẹma ẹbiere mfịna oro usọp usọp ye unana asari. Ke ukperedem, mbụme aban̄ade ukpepn̄kpọ ama edemede eneni aban̄a se esop Christian oyomde mbon oro mîdịghe mme Jew ẹnam. Ẹma ẹda mme edumbet oro ẹkọn̄ọde ke Bible ẹbiere eneni oro, ndien kpukpru esop ẹma ẹnyịme ye se ẹkebierede.—Utom 15:1-29.

Mme uwụtn̄kpọ emi ẹwụt ke eneni emi ikosụn̄ọke ke ubahade eke ekpụk, owo ikonyụn̄ iyakke edisọn̄ọ nyịre ke ndusụk ukpepn̄kpọ ọtọ  ubahade ke esop Christian akpa isua ikie. Ntak-a? Koro mme n̄kpọ oro ẹkenamde mmọ ẹdiana kiet—ima oro mmọ ẹkemade Jehovah, mbuọtidem ke Jesus Christ, ndinyene ima n̄waidem nnọ kiet eken, ndinyịme ndausụn̄ edisana spirit, ndinyene ukem ifiọk mban̄a mme ukpepn̄kpọ Bible, ye owo ndinyịme ndikpụhọde edu esie—ẹma ẹnen̄ede ẹkop odudu ndinam esop akpa isua ikie aka iso adiana kiet onyụn̄ odu ke emem.

Ndidiana Kiet ke Utuakibuot Akpanikọ Mfịn

Ndi ẹkeme ndidiana kiet ke ukem usụn̄ oro mfịn? Ndi mme n̄kpọ oro ẹkenamde esop akpa isua ikie adiana kiet ẹkeme ndinam ekemmọ mbon ido ukpono ẹdiana kiet ẹnyụn̄ ẹdu ke emem ye mbon oro ẹtode nsio nsio orụk ke ererimbot? Ih, ẹkeme! Mme Ntiense Jehovah ẹdiana kiet ke ofụri ererimbot nte nditọete ke se iwakde ibe idụt ye isuo 230. Mme n̄kpọ oro ẹkenamde mme Christian akpa isua ikie ẹdiana kiet, ẹnam mmọ n̄ko ẹdiana kiet.

Utuakibuot oro Mme Ntiense Jehovah ẹtuakde ẹnọ Jehovah Abasi edi akakan n̄kpọ oro anamde mmọ ẹdiana kiet. Emi ọwọrọ ke mmọ ẹdomo ndinam akpanikọ nnọ enye ke kpukpru idaha. Mme Ntiense Jehovah ẹbuọt idem n̄ko ke Jesus Christ ye ke mme ukpepn̄kpọ esie. Mme Christian emi ẹwụt ima n̄waidem ẹnọ ekemmọ mme andinịm ke akpanikọ ẹnyụn̄ ẹkwọrọ ukem eti mbụk Obio Ubọn̄ Abasi ke kpukpru idụt oro mmọ ẹdude. Mmọ ẹkop inemesịt nditan̄a Obio Ubọn̄ emi nnọ mme owo eke kpukpru ido ukpono, orụk, idụt, ye idaha ke uwem. Mme Ntiense Jehovah n̄ko ẹda san̄asan̄a ke mme mbubehe ererimbot, ndien emi an̄wam mmọ ndibiọn̄ọ mfịghe ukaraidem, obio, n̄kaowo, ye ndutịm unyamurua oro ẹnen̄erede ẹtọ ubahade ke otu mme owo. Kpukpru Mme Ntiense ẹfiọk ke edi mbiomo mmimọ ndisịn emem ebe ke ndidu uwem ekekem ye mme idaha Bible.

Edidianakiet Odụri Mme Owo Ada

Edidianakiet emi esiwak ndidemede udọn̄ mme owo oro mîdịghe Mme Ntiense. Ke uwụtn̄kpọ, Ilse * ini kiet ko ekedi owo n̄ka nun Catholic emi okodụn̄de ke ufọkidụn̄ n̄ka nun ke Germany. Nso ikanam enye ama Mme Ntiense Jehovah? Ilse ọkọdọhọ ete: “Mmọ ẹfọn ẹkan ke otu mme owo oro akanam nsobode. Mmọ isin̄wanake ekọn̄ isinyụn̄ inamke n̄kpọ ndomokiet ndinọ owo unan. Mmọ ẹyom ndin̄wam mme owo ẹdu inem inem uwem ke Obio Ubọn̄ Abasi ke Paradise isọn̄.”

Uwụtn̄kpọ efen edi Günther, owoekọn̄ Germany emi ẹkenọde akan̄wana ekọn̄ ke France ke ọyọhọ ekọn̄ ererimbot iba. Usen kiet oku Protestant kiet ama enịm akam ọnọ mbonekọn̄ emi ẹkedude ke udịmekọn̄ oro Günther okodude. Oku oro ama ọbọn̄ akam eben̄e edidiọn̄, ukpeme, ye edikan. Ke akam oro ama akasuana, Günther ama aka itieutom esie nte owo uyep. Ke ini enye akadade ukwak usen̄kpọ eyep mme asua, enye ama okụt udịmekọn̄ mme asua ẹdụkde akam oro oku efen ekenịmde. Günther ama etịn̄ ke ukperedem ete: “Eyedi oku oro n̄ko ama ọbọn̄ akam eben̄e edidiọn̄, ukpeme, ye edikan. Mma n̄kere ntak emi mme ufọkabasi Christian ẹkpenọde ekọn̄ ibetedem.” Günther ikefreke mme n̄kpọ emi. Ke ini enye ke ukperedem okosobode ye Mme Ntiense Jehovah, emi mîsibuanake ke ekọn̄, Günther ama akabade edi kiet ke otu mmọ.

Ashok ye Feema ẹkesibuana ke ido ukpono Edem Usiahautịn. Mmọ ẹma ẹnam itieuwa ke ufọk mmọ ẹnọ abasi mmọ. Edi ke ini mbonubon mmọ ẹkedọn̄ọde idiọk idiọk, mmọ ẹma ẹfiak ẹdụn̄ọde ido ukpono mmọ. Ke nneme oro mmọ ẹkenyenede ye Mme Ntiense Jehovah, Ashok ye Feema ẹma ẹkop inemesịt ẹban̄a mme ukpepn̄kpọ Bible ye ima oro Mme Ntiense ẹnyenede ke otu idemmọ. Idahaemi mmọ ẹdi ifịk ifịk mme asuanetop eti mbụk Obio Ubọn̄ Jehovah.

Ilse, Günther, Ashok, ye Feema ẹdiana kiet ye ediwak miliọn Mme Ntiense Jehovah oro ẹnamde otu nditọete eke ofụri ererimbot. Mmọ ẹnịm un̄wọn̄ọ Bible oro owụtde ke mme n̄kpọ oro ẹnamde mmọ ẹdiana kiet mfịn ke utuakibuot ẹyedian kpukpru okopitem ubonowo ọtọkiet ke mîbịghike. Ke ini oro, ibak, unana edidianakiet, ye ubahade ke ntak ido ukpono ididụhe aba. Ofụri ererimbot ayadiana kiet ke utuakibuot ata Abasi, kpa Jehovah.—Ediyarade 21:4, 5.

[Ikọ idakisọn̄]

[Mme ndise ke page 4, 5]

Kpa ye oro ẹkenyenede nsio nsio idaha ke uwem, akpa mme Christian ẹma ẹdiana kiet