Ini Udia Idịghe Ini Ndidia Udia Kpọt!

KPUKPRU owo ẹsima ndidia inem inem udia. Inem inem nneme ye ufiop ufiop ebuana oro afo enyenede ye mbon oro amade, esinam ini udia enen̄ede enem akan ikpîkpu edidia udia nyụhọ kpọt. Ediwak ubon ẹnam edi ido mmọ ndisidia udia ọtọkiet, ke nsụhọde n̄kaha, ini kiet ke usen. Ini udia esinọ ubon ifet ndineme mban̄a mme edinam m̀mê ndutịm usen oro. Mme ete ye eka oro ẹsikpan̄de utọn̄ ẹnọ se nditọ mmọ ẹtịn̄de ẹsifiọk ekikere nditọ ye nte etiede mmọ ke idem. Nte ini akade, inem inem ye ufan ufan itie ebuana oro ẹsidude ke ini udia esinam mbonubon ẹnyene ifụre, ẹkeme ndiberi edem ye kiet eken, ẹnyụn̄ ẹnyene ima emi anamde ubon ọsọn̄ idem.

Mfịn, sia ediwak mbonubon ẹsinyenede ekese ndinam kpukpru ini, esisọn̄ mmọ nditie ọtọkiet ndia udia. Ke ndusụk ikpehe ererimbot, ido n̄kann̄kụk akpan ubon ndidia udia ọtọkiet m̀mê ndikam nneme nneme ke ini udia. Mme ubon en̄wen ẹnyene edu edise TV ke ini udia, ẹtabade ifet edinyene inem inem nneme.

Nte ededi, mme ete ye eka oro ẹdide Christian ẹsidu ke edidemede kpukpru ini ndida mme ifet oro ẹbererede nsọn̄ọ ubon mmọ idem. (Mme N̄ke 24:27) Ẹma ẹsian mme ete ye eka anyan ini ko ẹte ke kiet ke otu mfọnn̄kan ini oro mmọ ẹkemede ndineme ikọ Abasi ye nditọ mmọ edi ‘ke ini mmọ ẹtiede ke ufọk mmọ.’ (Deuteronomy 6:7) Mme ete ye eka nditie ye nditọ mmọ kpukpru ini ndia udia ọtọkiet anam mmọ ẹnyene n̄wọrọnda ifet ndikpep nditọ mmọ ndinen̄ede mma Jehovah ye ndinen edumbet esie. Ebe ke ndinam inem inem ye ufan ufan idaha odu, afo n̄ko emekeme ndinam ubon fo ẹnen̄ede ẹma ẹnyụn̄ ẹkop inemesịt ndidia udia ọtọkiet. Ih, nam ini udia okûdi sụk ini ndidia udia kpọt!