Ka Iso Kpebe Uwụtn̄kpọ Jesus
Ka Iso Kpebe Uwụtn̄kpọ Jesus
“Mmọnọ mbufo uwụt-n̄kpọ nte, mbufo nde ẹnam kpa nte Ami n̄kanamde [ye] mbufo.”—JOHN 13:15.
1. Ntak emi Jesus edide mfọnn̄kan uwụtn̄kpọ ọnọ mme Christian ndikpebe?
OWO kiet kpọt akanam mînamke idiọkn̄kpọ tọn̄ọ ẹkebot owo. Enye edi Jesus. Ke ẹsiode Jesus ẹfep, idụhe “owo baba kiet eke mîduehe,” m̀mê mînamke idiọkn̄kpọ. (1 Ndidem 8:46; Rome 3:23) Ntak edi oro ata mme Christian ẹdade Jesus nte mfọnn̄kan uwụtn̄kpọ ndikpebe. Ke akpanikọ, esisịt ini mbemiso enye akakpade ke Nisan 14 isua 33 E.N., Jesus ke idemesie ama ọdọhọ mme anditiene imọ ẹkpebe imọ. Enye ọkọdọhọ ete: “Mmọnọ mbufo uwụt-n̄kpọ nte, mbufo nde ẹnam kpa nte Ami n̄kanamde [ye] mbufo.” (John 13:15) Jesus ama ada akpatre okoneyo oro mbemiso enye akakpade etịn̄ ediwak usụn̄ emi mme Christian ẹkpekpebede imọ. Nnyịn iyeneme ndusụk usụn̄ oro ke ibuotikọ emi.
Oyom Nsụhọdeidem
2, 3. Didie ke Jesus ekenịm mfọnn̄kan uwụtn̄kpọ nsụhọdeidem?
2 Ke ini Jesus ekesịnde udọn̄ ọnọ mbet esie ete ẹkpebe uwụtn̄kpọ imọ, enye ekenen̄ede etịn̄ aban̄a uwụtn̄kpọ nsụhọdeidem. Enye ama eteme mme anditiene enye ediwak ini ete ẹsụhọde idem, ndien ke okoneyo Nisan 14, enye ama owụt ke imọ imosụhọde idem ebe ke ndiyet mme apostle esie ukot. Ekem, Jesus ama ọdọhọ ete: “Edieke Ami ndien, emi ndide Ọbọn̄ ye Andikpep, n̄keyetde mbufo ukot, mbufo nde ẹkpeyet kiet eken ukot.” (John 13:14) Ke oro ebede, enye ama ọdọhọ mme apostle esie ẹkpebe uwụtn̄kpọ imọ. Ndien nso eti uwụtn̄kpọ nsụhọdeidem ke oro ekedi ntem!
3 Apostle Paul ọdọhọ ke Jesus ekedi “mbiet Abasi” mbemiso ekedide isọn̄. Kpa ye oro, enye ama an̄wan̄a idemesie onyụn̄ akabade edi owo. Ke akande oro, “Enye [ama] osụhọde idem, akabade osụk ibuot tutu osụn̄ọ ke n̄kpa, kpa n̄kpa [“eto ndutụhọ,” NW].” (Philippi 2:6-8) Kere ban̄a oro. Jesus, kpa udiana n̄kponn̄kan owo ke ekondo, ama enyịme ndikabade n̄kpri n̄kan mme angel, ndidi ndimana nte nsekeyen, ndisụk ibuot nnọ mme anana-mfọnmma ete ye eka nte enye ọkọkọride okpon, nnyụn̄ n̄kpa ke akpatre nte idiọk abiatibet. (Colossae 1:15, 16; Mme Hebrew 2:6, 7) Nso nsụhọdeidem ke emi ekedi ntem! Ndi nnyịn imekeme ndinyene “orụk esịt” oro nnyụn̄ nnyene utọ “nsụhọde-esịt” oro? (Philippi 2:3-5) Ih, edi imemke utom.
4. Nso isinam mme owo ẹkohode idem, edi ntak emi n̄kohodeidem mîfọnke?
4 Nsụhọdeidem edi ata isio n̄kpọ ye n̄kohodeidem. (Mme N̄ke 6:16-19) N̄kohodeidem akanam Satan ọduọ. (1 Timothy 3:6) Enye esisọp ọdọn̄ n̄kam ke esịt owo, ndien ke enye ama okodụk owo esịt, isimemke utom ndisio enye mfep. Mme owo ẹsikohode idem ke ntak obio emi mmọ ẹtode, orụk mmọ, inyene mmọ, ifiọkn̄wed mmọ, n̄kpọ oro mmọ ẹnamde, idaha mmọ ke ererimbot, uyai, usọ mbre mbuba, ye ediwak n̄kpọ eken. Edi Jehovah ibatke ndomokiet ke otu emi ke akpan n̄kpọ. (1 Corinth 4:7) Ndien edieke mme n̄kpọ emi ẹnamde nnyịn ikohode idem, mmọ ẹbabiat itie ebuana nnyịn ye Jehovah. “Koro Jehovah okon̄de, ndien enye ese mbon nsụkidem; edi etie nsan-nsan ọdiọn̄ọ mbon iseri.”—Psalm 138:6; Mme N̄ke 8:13.
Ndisụhọde Idem ke Otu Nditọete
5. Ntak emi edide akpan n̄kpọ mbiowo ndisụhọde idem?
5 Nnyịn ikpenyeneke ndikohode idem ke ntak utom oro inamde inọ Jehovah m̀mê ke ntak ifetutom oro inyenede ke esop. (1 Chronicles 29:14; 1 Timothy 6:17, 18) Ke akpanikọ, adan̄a nte nnyịn inyenede mme ifetutom, ntre ke nnyịn ikpenyene ndinen̄ede nsụhọde idem. Apostle Peter eketeme mbiowo ete ẹkûbre “odudu ye mmọ emi ẹkeyakde ẹsịn [mmọ] ke ubọk, edi ẹnịm idem nte uwụt-n̄kpọ ẹnọ mme erọn̄.” (1 Peter 5:3) Ẹmek mbiowo man ẹdi mme asan̄autom ye mbon oro mme erọn̄ ẹkpekpebede, utu ke ndidi mbọn̄ ye mme andikara.—Luke 22:24-26; 2 Corinth 1:24.
6. Ke mme afan̄ ewe ke oyom Christian osụhọde idem?
6 Idịghe mbiowo kpọt ẹkpenyene ndisụhọde idem. Peter eketeme n̄kparawa owo oro ẹkemede ndikohode idem ke ntak ifiọk mmọ m̀mê ke ntak emi mmọ ẹnyenede odudu ẹkan ikpọ owo, ete: “Mbufo n̄kparawa, ẹsụk idem ndien ẹnọ mbiowo. Kpukpru mbufo ẹnyụn̄ ẹbọbọ nsụkidem ke idem nte mbọbọ, ẹnam n̄kpọ ẹnọ kiet eken: koro Abasi an̄wan̄wana ye mbon iseri, edi ọfọn ido ye mbon nsụkidem.” (1 Peter 5:5) Ih, oyom kpukpru owo ẹsụhọde idem nte Christ. Oyom nsụhọdeidem man owo ekeme ndikwọrọ ikọ, akpan akpan ke ini mme owo mîmaha ndikpan̄ utọn̄ m̀mê ke ini isobode ubiọn̄ọ. Nsụhọdeidem anam ibọ item m̀mê idu mmemmem uwem man ikeme ndibuana ọyọhọ ọyọhọ ke utom ukwọrọikọ. Ke adianade do, oyom nnyịn isụhọde idem inyụn̄ inyene uko ye mbuọtidem ke ini ẹsiode nnyịn idiọk etop, ke ini ẹkotde nnyịn ikpe, m̀mê ke ini ẹkọbọde nnyịn idiọk idiọk.—1 Peter 5:6.
7, 8. Nso idi ndusụk usụn̄ oro nnyịn ikemede ndisụhọde idem?
7 Didie ke owo ekeme ndikan n̄kohode idem nnyụn̄ nda “nsụhọde-esịt [mbat nte], owo en̄wen ọfọn akan imọ”? (Philippi 2:3) Enye ekpenyene ndise idemesie nte Jehovah esede enye. Jesus ama owụt nnennen edu oro ẹkpenyenede ke ndidọhọ ete: “Kpa ntre ke mbufo n̄ko, ke adan̄aemi mbufo ẹnamde kpukpru se ẹkedọhọde mbufo, ẹdọhọ ẹte, Nnyịn idi ifịn eke mînamke utom ibe adan̄a; inam kpa se nnyịn ikpanamde.” (Luke 17:10) Ti ke idụhe se inamde oro ekemede ndimen udomo ye se Jesus akanamde. Kpa ye oro, enye ama osụhọde idem.
8 N̄ko-n̄ko, nnyịn imekeme ndiben̄e Jehovah an̄wam nnyịn inyene nnennen ekikere iban̄a idem nnyịn. Nnyịn imekeme ndibọn̄ akam nte andiwet psalm ọkọbọn̄de, ite: “Kpep mi mfọn ibuot ye ifiọk: koro mmenịm mbet fo ke akpanikọ.” (Psalm 119:66) Jehovah ayan̄wam nnyịn inyene eti ekikere oro adade ukem ukem iban̄a idem nnyịn, ndien enye ọyọdiọn̄ nnyịn ke ntak oro isụhọrede idem. (Mme N̄ke 18:12) Jesus ọkọdọhọ ete: “Owo ekededi eke edimenerede idem, ẹyesụhọde enye ẹnịm; edi owo ekededi eke edisụhọrede idem, ẹyemenede enye.”—Matthew 23:12.
Nnennen Ekikere Kaban̄a Se Idide Eti ye Idiọk
9. Didie ke Jesus ekese eti ye idiọk?
9 Kpa ye oro okodụn̄de ye mme anana-mfọnmma owo ke isua 33, Jesus ikenyeneke “idiọk-n̄kpọ.” (Mme Hebrew 4:15) Ke akpanikọ, ke ini eketịn̄de ntịn̄nnịm ikọ aban̄a Messiah, andiwet psalm ọkọdọhọ ete: “Afo ama se inende, onyụn̄ asua se ikwan̄ade.” (Psalm 45:7; Mme Hebrew 1:9) Mme Christian ẹdomo ndikpebe Jesus ke afan̄ emi n̄ko. Ke adianade ye mmọ ndifiọk se idide eti ye idiọk, mmọ ẹsua idiọk ẹnyụn̄ ẹma eti. (Amos 5:15) Emi an̄wam mmọ ndin̄wana mbiọn̄ọ ndammana idiọk udọn̄ mmọ.—Genesis 8:21; Rome 7:21-25.
10. Edieke nnyịn isịnde idem ke “idiọk,” mînyụn̄ ikabakede esịt, nso ke oro ediwụt?
10 Jesus ọkọdọhọ Nicodemus emi ekedide owo Pharisee ete: “Kpukpru owo eke ẹnamde idiọk ẹsasua un̄wana, inyụn̄ iwọrọke idi ke un̄wana, mbak ẹdibiom se mmọ ẹnamde. Edi owo eke anamde se idide akpanikọ ọwọrọ edi ke un̄wana, man ẹyarade utom esie, ẹte, enye etie ke Abasi ananam mmọ.” (John 3:20, 21) Kere ban̄a emi: John ọkọdọhọ ke Jesus edi “ata un̄wana emi anamde enyịn an̄wan̄a kpukpru owo.” (John 1:9, 10) Edi Jesus ọkọdọhọ ke edieke nnyịn isịnde idem ke “idiọk”—kpa mme n̄kpọ oro Abasi mîmaha—oro owụt ke nnyịn isasua un̄wana. Mmọn̄ọ ndi akpasua Jesus ye se enye amade? Edi, oro edi se mbon oro ẹsịnde idem ke idiọkn̄kpọ, mînyụn̄ ikabakede esịt ẹnamde. Ekeme ndidi mmọ ikereke ntre, edi Jesus enen̄ede ekere ntre.
Nte Ẹkpesede Eti ye Idiọk Ukem nte Jesus Esede
11. Nso ke oyom man ise eti ye idiọk nte Jesus esede?
11 Ana nnyịn itịm ifiọk se Jehovah adade nte eti ye idiọk. Ndikpep Ikọ Abasi, kpa Bible, edi n̄kukụre se ikemede ndinam nnyịn ifiọk se Jehovah adade nte eti ye idiọk. Nte ikade iso ndikpep Bible, oyom nnyịn ibọn̄ akam nte andiwet psalm ọkọbọn̄de ete: “Wụt mi usụn̄ fo, O Jehovah; teme mi ido fo.” (Psalm 25:4) Nte ededi, ti ete ke Satan edi owo abian̄a. (2 Corinth 11:14) Enye ekeme ndinam se idiọkde akabade etie nte se itịmde ifọn ke enyịn Christian oro mîdụhe ke edidemede. Ntem, oyom nnyịn inen̄ede itie ikere se ikpepde inyụn̄ inen̄ede inam item oro “asan̄autom emi anamde akpanikọ, onyụn̄ enyenede ọniọn” ọnọde. (Matthew 24:45-47) Ukpepn̄kpọ, akam, ye editie n̄kere se ikpepde ẹyen̄wam nnyịn ikọri isịm ọyọhọ idaha inyụn̄ idu ke otu mbon emi “otode ke nnam-mehe mmọ ẹma ẹkọ ifiọk ndidiọn̄ọ se ifọnde ye se idiọkde.” (Mme Hebrew 5:14) Ke inamde emi, eyenen̄ede ọdọn̄ nnyịn ndisua se idiọkde nnyụn̄ mma se inende.
12. Ewe item Bible an̄wam nnyịn ikûsịn idem ke idiọk?
12 Edieke nnyịn isuade se idiọkde, nnyịn idiyakke ndiọi udọn̄ ẹkọri nnyịn ke esịt. Ediwak isua ke Jesus ama akakpa, apostle John ekewet ete: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. Koro ofụri-ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot.”—1 John 2:15, 16.
13, 14. (a) Ntak emi mîfọnke mme Christian ẹma se idude ke ererimbot? (b) Didie ke nnyịn ikeme ndifep ndima se idude ke ererimbot?
13 Ndusụk owo ẹkeme ndikere ke idịghe kpukpru n̄kpọ ke ererimbot ẹdiọk. Kpa ye edide ntre, ererimbot ye mme n̄kpọ ẹtabi esie ẹkeme ndisọsọp n̄n̄wọn̄ọde nnyịn n̄kpọn̄ utom Jehovah. Inyụn̄ idụhe n̄kpọ ndomokiet ke ererimbot oro ekemede ndinam nnyịn inen̄ede ikpere Abasi. Ntre, edieke nnyịn imade se idude ke ererimbot, idem edieke imade mme n̄kpọ oro ẹkemede ndidi idiọkke ke idemmọ, nnyịn idụk idiọk afan̄. (1 Timothy 6:9, 10) Akan oro, ediwak se idude ke ererimbot ẹdi ata ndiọi n̄kpọ emi ẹkemede ndibiat nnyịn. Edieke isede edinam emi owụtde afai, uma-inyene, m̀mê oburobụt ido idan̄ ke vidio m̀mê ke ekebe ndise, nnyịn imekeme nditọn̄ọ ndima mme n̄kpọ emi, ndien mmọ ẹkeme ndikọk afia nnọ nnyịn. Edieke nnyịn idụkde ndụk ye mbon oro akpan udọn̄ mmọ edide ndifori idaha mmọ ke uwem m̀mê nditat mbubehe mmọ, mme n̄kpọ oro ẹkeme ndikabade ndi mme ata akpan n̄kpọ nnọ nnyịn n̄ko.—Matthew 6:24; 1 Corinth 15:33.
14 Ke n̄kan̄ eken, edieke imade Ikọ Jehovah, “mbumek obụkidem, ye mbumek enyịn, ye ikpîkpu ubọn̄ uwem emi” ididemekede nnyịn udọn̄. Ke adianade do, edieke nnyịn isan̄ade ye mbon oro ẹnịmde n̄kpọ Obio Ubọn̄ Abasi akpa ke uwem mmọ, nnyịn iditie nte mmọ, ima se mmọ ẹmade inyụn̄ isua se mmọ ẹsuade.—Psalm 15:4; Mme N̄ke 13:20.
15. Ukem nte Jesus, didie ke nnyịn ndima se inende nnyụn̄ nsua se ikwan̄ade ekeme ndisọn̄ọ nnyịn idem?
15 Ndisua se ikwan̄ade nnyụn̄ mma se inende ama an̄wam Jesus ndiwụk enyịn ke “idatesịt eke anade Enye ke iso.” (Mme Hebrew 12:2) Nnyịn imekeme ndinam kpasụk ntre. Nnyịn imọfiọk ke “ererimbot ke ebebe efep, ye mbumek esie.” Inemesịt ekededi oro odude ke ererimbot emi edi ke ekpri ini kpọt. “Edi owo eke anamde se Abasi amade ododu ke nsinsi.” (1 John 2:17) Sia Jesus akanamde uduak Abasi, enye ama eberede usụn̄ ọnọ ubonowo ndinyene nsinsi uwem. (1 John 5:13) Kpukpru nnyịn ikpakam ikpebe enye inyụn̄ ibọ ufọn ito nsọn̄ọnda esie.
Ndiyọ Ukọbọ
16. Ntak emi Jesus eketemede mme anditiene enye ete ẹma kiet eken?
16 Jesus ama owụt usụn̄ efen oro mme mbet esie ẹkpekpebede imọ ke ndidọhọ ete: “Ibet Mi edi ntem, ete, mbufo ẹma kiet eken, kpa nte n̄kamade mbufo.” (John 15:12, 13, 17) Ediwak ntak ẹdu emi ẹnamde mme Christian ẹma nditọete mmọ. Ke ini Jesus eketịn̄de ikọ emi, se enye ekenen̄erede etịn̄ aban̄a ekedi usua emi ererimbot edisuade mme mbet esie. Enye ọkọdọhọ ete: “Edieke ererimbot asuade mbufo, mbufo ẹmefiọk ẹte, enye ama ebem iso asua Mi, ndien edisua mbufo. . . . Asan̄autom ikponke ikan ete-ufọk. Edieke mmọ ẹkesịnde Mi enyịn, ẹyesịn mbufo enyịn n̄ko.” (John 15:18, 20) Ih, ẹkọbọ mme Christian nte ẹkekọbọde Jesus. Ntre, ana mmọ ẹnen̄ede ẹma kiet eken man ẹkeme ndiyọ usua emi.
17. Ntak emi ererimbot asuade ata mme Christian?
17 Ntak emi ererimbot akpasuade mme Christian? Koro mmọ “idịghe eke ererimbot,” kpa nte Jesus mîkedịghe eke ererimbot. (John 17:14, 16) Mmọ ibuanake ke ekọn̄ ye ke mbubehe ukaraidem, ẹnịm mme edumbet Bible, ẹda uwem ke edisana, ẹnyụn̄ ẹda ata nti edumbet ẹdu uwem. (Utom 15:28, 29; 1 Corinth 6:9-11) Mme akpan utịtmbuba mmọ ẹdi mme utịtmbuba eke spirit, idịghe eke obụk. Mmọ ẹdu ke ererimbot, edi nte Paul ọkọdọhọde, mmọ “ẹdu uwem nte mmọ emi mînọhọke ke esịt.” (1 Corinth 7:31) Edi akpanikọ, ndusụk owo ẹma n̄kokon̄ edumbet oro Mme Ntiense Jehovah ẹdade ẹdu uwem. Edi Mme Ntiense Jehovah idụhe uwem nte enemde mme owo esịt, man mme owo ẹma mmọ. Ntak edi oro ediwak owo ke ererimbot mîtịmke idiọn̄ọ mmọ, anamde ediwak owo ẹsua mmọ.
18, 19. Ke ndikpebe uwụtn̄kpọ Jesus, didie ke mme Christian ẹsinam n̄kpọ ke ini ẹbiọn̄ọde ẹnyụn̄ ẹkọbọde mmọ?
18 Mme apostle Jesus ẹma ẹkụt ọkpọsọn̄ usua oro ererimbot ekenyenede ke ini ẹkemụmde enyụn̄ ẹwotde Jesus, mmọ ẹma ẹnyụn̄ ẹkụt nte Jesus akanamde n̄kpọ. Mbon ido ukpono oro ẹkebiọn̄ọde Jesus ẹma ẹdi ndimụm enye ke In̄wan̄ Gethsemane. Peter ama odomo ndida ofụt n̄n̄wana nnọ enye, edi Jesus ama ọdọhọ Peter ete: “Sịn ofụt fo ke efọk: koro kpukpru owo eke ẹmende ofụt ẹyekpan̄a ke ofụt.” (Matthew 26:52; Luke 22:50, 51) Ke eset, nditọ Israel ẹma ẹsida ofụt ẹn̄wana ye mme asua mmọ. Nte ededi, ke emi, n̄kpọ ẹma ẹkpụhọde. Sia Obio Ubọn̄ Abasi mîkedịghe “eke ererimbot emi,” enye ikenyeneke adan̄a obio oro anade ẹkpeme. (John 18:36) Ikebịghike, Peter ekenyene ndikabade ndi ubak idụt eke spirit emi obio mmọ odude ke heaven. (Galatia 6:16; Philippi 3:20, 21) Mmọdo, ọtọn̄ọde ke ini oro, mme anditiene Jesus ẹkenyene ndinam n̄kpọ uko uko ye emem emem—ukem nte Jesus akanamde—ke ini ẹdisuade ẹnyụn̄ ẹkọbọ mmọ. Mbuọtidem mmọ ekenyene ndinam mmọ ẹyak se ededi oro eketịbede ẹsịn Jehovah ke ubọk ẹnyụn̄ ẹnyene mbuọtidem ke enye ọyọnọ mmimọ odudu ndiyọ.—Luke 22:42.
19 Ediwak isua ke ukperedem, Peter ama ewet ete: “Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụt-n̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ. . . . Ke ini owo osụn̄ịde Enye, Enye isụn̄ike mmọ usiene: ke ini Enye ebede ke ndutụhọ, Enye itịn̄ke ikọ ndịghe; edi ayak ikọ Esie esịn ke ubọk Andikpe edinen ikpe.” (1 Peter 2:21-23) Kpa nte Jesus okodụride mmọ utọn̄ ete ke ẹyekọbọ mmọ, ẹkọbọ mme Christian idiọk idiọk ke anyan ini idahaemi. Ukem nte ekedide ke akpa isua ikie, mme Christian mfịn n̄ko ẹkpebe uwụtn̄kpọ Jesus ẹnyụn̄ ẹnịm ata n̄wọrọnda uwụtn̄kpọ edime ime, ẹwụtde ke mmimọ idi mbon nsọn̄ọnda oro ẹtiede emem emem. (Ediyarade 2:9, 10) Kpukpru nnyịn ikpakam inam ntre ke ini isobode mme idaha oro oyomde ime.—2 Timothy 3:12.
“Ẹmen Ọbọn̄ Jesus Christ Ẹsịne”
20-22. Ke usụn̄ ewe ke mme Christian “ẹmen Ọbọn̄ Jesus Christ ẹsịne”?
20 Paul ekewet ọnọ esop ke Rome ete: “Ẹmen Ọbọn̄ Jesus Christ ẹsịne, ẹkûnyụn̄ ẹben̄e n̄kpọ ẹnịm ẹnọ idiọk udọn̄ obụkidem.” (Rome 13:14) Mme Christian ẹmen Jesus ẹsịne nte ọfọn̄. Okposụkedi mmọ ẹdide mme anana-mfọnmma owo, mmọ ẹnen̄ede ẹdomo ndikpebe mme edu ye mme edinam Eteufọk mmọ tutu anam mmọ ẹbiet enye.—1 Thessalonica 1:6.
21 Nnyịn imekeme ‘ndimen Ọbọn̄ Jesus Christ nsịne’ edieke nnyịn itịmde imehe ye usụn̄ uwem esie inyụn̄ idomo ndidu uwem nte enye okodude. Nnyịn inyene ndikpebe nsụhọdeidem esie, ikpebe nte enye akamade se inende, nte enye akasuade se ikwan̄ade, nte enye akamade nditọete esie, nte enye mîkedịghe eke ererimbot, ye nte enye ọkọyọde ndutụhọ. Nnyịn ‘iben̄eke n̄kpọ inịm inọ idiọk udọn̄ obụkidem—oro edi, nnyịn ididehede iyak mme utịtmbuba ererimbot m̀mê ediyụhọ udọn̄ obụkidem edi ata akpan n̄kpọ ke uwem nnyịn. Utu ke oro, ke ini inamde ubiere m̀mê iyomde ndikọk mfịna, nnyịn owo kiet kiet ikpenyene ndibụp idem nnyịn ite: ‘Nso ke Jesus akpanam ke utọ idaha emi? Nso ke enye okpoyom mi nnam?’
22 Ke akpatre, nnyịn ikpebe Jesus ke ndiyọhọ kpukpru ini ke utom ‘ukwọrọ gospel.’ (Matthew 4:23; 1 Corinth 15:58) Ke usụn̄ emi, n̄ko, mme Christian ẹkpebe uwụtn̄kpọ oro Jesus ekenịmde, ndien ibuotikọ oro etienede oyowụt nte mmọ ẹnamde oro.
Nte Afo Emekeme Ndinam An̄wan̄a?
• Ntak emi edide akpan n̄kpọ Christian ndisụhọde idem?
• Didie ke nnyịn ikeme ndinyene nnennen ekikere aban̄ade eti ye idiọk?
• Didie ke mme Christian ẹkpebe Jesus ke ini ẹyọde ubiọn̄ọ ye ukọbọ?
• Didie ke ẹkeme ‘ndimen Ọbọn̄ Jesus Christ nsịne’?
[Mme Mbụme Ukpepn̄kpọ]
[Ndise ke page 7]
Jesus ama enịm mfọnn̄kan uwụtn̄kpọ nsụhọdeidem
[Ndise ke page 8]
Kpukpru usụn̄ uwem Christian, esịnede edikwọrọ ikọ, oyom nsụhọdeidem
[Ndise ke page 9]
Satan ekeme ndinam idiọk unọ idem inemesịt etie Christian nte se ifọnde
[Ndise ke page 10]
Ima oro imade nditọete nnyịn ọyọsọn̄ọ nnyịn idem ndiyọ ubiọn̄ọ