“Afo Anam Didie Mmọ Ẹfọn Ntre?”

IDEM ama akpa Muriel, eka nditọ ita, ke ini akanieren kiet okobụpde enye mbụme eke enyọn̄ emi ke itie unyamudia. Muriel ekemen nditọ esie aka ufọkibọk man abiausọbọ ese mmọ idem, ndien enye ama odu do ebịghi akaha. Ini ikodụhe ndika ufọk n̄kadia udia mbubịteyo mbemiso mmọ ẹdụkde mbono esop Christian. Ntre enye ama ada nditọ esie aka itie unyamudia oro okodude ekpere man mmọ ẹkpedia udia.

Nte mmọ ẹkekperede ndidia udia n̄kụre, akanieren kiet ama asan̄a ekpere Muriel onyụn̄ ọdọhọ ete: “Mmese fi tọn̄ọ okodụk edi mi. Ndien mmokụt ke nditọ fo ẹnen̄ede ẹkpụhọde ye nditọwọn̄ oro nsikụtde. Nditọwọn̄ eken ẹsidiọk ndikama okpokoro ye n̄kpọitie. Mmọ ẹsitan̄ ukot ẹdori ke okpokoro, ẹnyụn̄ ẹnụk mme n̄kpọitie ẹtọ. Edi nditọ fo ẹtie sụn̄-n̄ ẹnyụn̄ ẹkama idem ukpono ukpono. Afo anam didie mmọ ẹfọn ntre?”

Muriel ama ọbọrọ ete: “Ami ye ebe mi imesikpep nditọ nnyịn Bible kpukpru ini, nnyịn imesinyụn̄ idomo ndida se ikpepde ke Bible nsịn ke edinam. Nnyịn idi Mme Ntiense Jehovah.” Ekem, akanieren oro ama ọdọhọ ete: “Ami ndi owo Jew oro n̄kọbọhọde Nsobo eke Orụk. Mmeti ke ẹma ẹkọbọ Mme Ntiense Jehovah ke Germany. Idem kpa ye oro, mmọ ẹma ẹkpụhọde ye mbon eken. Mmenen̄ede mma edu uwem nditọ fo. Nyanam ndụn̄ọde mban̄a ido ukpono mbufo.”

Bible edi ata eti n̄wed ndida mbọk nditọwọn̄. Mme Ntiense Jehovah ẹnen̄ede ẹma ndin̄wam mbon en̄wen ẹbọ ufọn ẹto ndausụn̄ oro N̄wed Abasi ọnọde. Nnyịn imesịn udọn̄ inọ fi ite etiene ọbọ ufọn oto ndausụn̄ oro N̄wed Abasi ọnọde mi.