“Un̄wam Mi Oto Jehovah”

Ini Emi Iwat Edide “Anyanya Ubọn̄”

MURIEL emi edide isua 101 ọkọdọhọ ete: “Emi edi mfọnn̄kan usụn̄ uwem.” Theodoros, emi edide isua 70, ọkọdọhọ esie ntem: “Emi edi ata san̄asan̄a ifet.” Maria, emi edide isua 73, ọkọdọhọ: “Mfọnn̄kan usụn̄ ndidu uwem edi emi.” Kpukpru mmọ ẹkeda ofụri eyouwem mmọ ẹnam n̄kpọ Jehovah Abasi.

N̄kani owo emi ẹbiet ediwak mme andituak ibuot nnọ Jehovah emi ẹdude ke ofụri ererimbot. Kpa ye usọn̄, unana nsọn̄idem, ye mme mfịna eken, mmọ ẹnam n̄kpọ Abasi ke ofụri ukpọn̄. Ẹda mme utọ anam-akpanikọ n̄kani owo emi ke esop Christian nte mme eten̄e-Abasi oro ẹdotde ẹkpebe. Jehovah enen̄ede ada utom n̄kani owo emi ke ọsọn̄urua, okposụkedi idaha mmọ mîyakke mmọ ẹnam se mmọ ẹkpemade ndinam. *—2 Corinth 8:12.

N̄wed Psalm etịn̄ inem inem aban̄a utọ uwem oro mme anam-akpanikọ n̄kani owo ẹkpedoride enyịn ndidu. Mmọ ẹkeme ndibiet akani akamba eto oro osụk on̄wụmde mfri. Andiwet psalm ọkọkwọ aban̄a mme anam-akpanikọ n̄kani owo ete: “[Mmọ] ẹyesụk ẹkọri ke usọn̄, ẹyesehe ẹnyụn̄ ẹsiak ikọn̄.”—Psalm 92:14.

Ndusụk owo ẹkeme ndikere ke ẹyefụmi ẹnyụn̄ ẹkpọn̄ mmimọ ke ini usọn̄ ọbọde mmimọ odudu. David ama eben̄e Abasi ete: “Kûmen mi ke ini usọn̄ uduọk; kûkpọn̄ mi ke ini odudu eyemerede mi.” (Psalm 71:9) Nso ikeme ndinam akani owo esehe utu ke ndiyemede? Ndinyene edinen ido oro Abasi etemede. Andiwet psalm ọkọkwọ ete: “Edinen owo ayasiaha nte eyop.”—Psalm 92:12.

Mbon oro ẹsịnde idem ẹnam akpanikọ ke utom Abasi ẹsika iso ẹn̄wụm mfri idem ke mmọ ẹma ẹkesọn̄. Mmọdo, ediwak n̄kpọ oro mmọ ẹkenamde ẹnọ idemmọ ye mbon en̄wen ẹsida nti utịp ẹdi, ukem nte n̄kpasịp oro ọkọride okpon on̄wụm ekese mfri. (Galatia 6:7-10; Colossae 1:10) Edi mbon oro ẹdude uwem nte idiọk udọ ẹnyụn̄ ẹfụmide item Abasi isinyeneke eti n̄kpọ ndomokiet ke mmọ ẹma ẹkesọn̄.

N̄wed Mme N̄ke n̄ko ọsọn̄ọ owụt ke iwat akani owo oro asan̄ade ke usụn̄ edinen ido edi anyanya. Itien̄wed oro ọdọhọ ete: “Iwat edi anyanya ubọn̄, ke usụn̄ eti ido ke ẹdikụt enye.” (Mme N̄ke 16:31) Ih, edinen ido owụt nte owo eyede ke esịtidem. Ndida anyan isua oro owo odude uwem nnam se inende esinọ owo ukpono. (Leviticus 19:32) Ibuot iwat oro asan̄ade ye ọniọn̄ ye eti ido esinọ owo ukpono.—Job 12:12.

Jehovah esinen̄ede enem esịt ye mbon oro ẹsịnde idem ẹnam utom esie ke anyan ini. N̄wed Abasi ọdọhọ ete: “Tutu esịm usọn̄ ami [Jehovah] ndi enye; ami nyonyụn̄ mbiom enye tutu esịm iwat: edi ami n̄kanam, onyụn̄ edi ami ndimenede, ndinyụn̄ mbiom, nnyụn̄ nnam mbufo ẹbọhọ.” (Isaiah 46:4) Ọnọ ndọn̄esịt didie ntem ndifiọk ke edima Ete nnyịn eke heaven ọn̄wọn̄ọ ndibọk nnyụn̄ ndu ye mbon oro ẹnamde akpanikọ ke mmọ ẹma ẹkesọn̄!—Psalm 48:14.

 Sia Jehovah adade mbon oro ẹsịnde uwem mmọ ofụri ofụri ke utom esie nte ọsọn̄urua, nte nnyịn n̄kọ ikpowụtke ukpono inọ mmọ? Ke ini ikerede nte Abasi adade n̄kani owo, oro anam nnyịn inen̄ede ida mmọ ke ọsọn̄urua. (1 Timothy 5:1, 2) Mmọdo, ẹyak nnyịn ikere iban̄a nti usụn̄ oro ikemede ndiwụt ima Christian ke nte isede iban̄a n̄kani owo.

Ndisan̄a ke Usụn̄ Edinen Ido ke Ini Usọn̄

Solomon ọn̄wọn̄ọ ọnọ nnyịn ete ke “uwem odu ke usụn̄ edinen ido.” (Mme N̄ke 12:28) Usọn̄ ikpanke owo ndisan̄a ke usụn̄ edinen ido. Ke uwụtn̄kpọ, ke Moldova, akanieren kiet emi edide isua 99 ama abiat ofụri ini uyen esie ndisuan ekikere mbon Communist. Esịt ama enem enye ndikenyene ọkpọkpọ nneme ye ọwọrọetop mme adaiso mbon Communist nte V. I. Lenin. Nte ededi, ke ini Ukara Communist ọkọduọde, uwem akanieren emi ikenyeneke se ọwọrọde. Edi ke ini Mme Ntiense Jehovah ẹkewụtde enye ke Obio Ubọn̄ Abasi kpọt edikọk mfịna ubonowo, enye ama ọbọ akpanikọ Bible onyụn̄ akabade edi eti eyen ukpepn̄kpọ Bible. Mîkpedịghe emi enye akakpade, enye akpakakabade edi asan̄autom Jehovah oro anade baptism.

Ke ama ekekpep ọfiọk se Abasi oyomde, akanian̄wan isua 81 ke Hungary ama edikụt ke akpana inam ndọ ye ete oro imọ idụn̄de kiet ke ediwak isua idahaemi. N̄wan emi ama ada uko etịn̄ se enye ekpepde ke Bible ọnọ ete oro enye odụn̄de kiet. Idem ama enen̄ede akpa enye, esịt ama onyụn̄ enen̄ede enem enye ke ini ete oro ekenyịmede ndidọ enye. Ke mmọ ẹma ẹkesịn ndọ mmọ ke n̄wed, enye ama anam n̄kọri usọp usọp ke n̄kan̄ eke spirit. Ke n̄kpọ nte ufan̄ ọfiọn̄ itiaita tọn̄ọ enye ọkọtọn̄ọ ndikpep Bible, enye ama akabade edi asuanetop oro mînaha kan̄a baptism, ndien ikebịghike, enye ama ana baptism. Edi akpanikọ didie ntem nte ke edinen ido ekeme ndinam n̄kani owo ẹnen̄ede ẹye!

Ih, mme anam-akpanikọ Christian oro ẹdide n̄kani owo ẹkpenyene ndidiọn̄ọ ke Abasi ama mmimọ. Jehovah idikpọn̄ke mbon oro ẹnamde akpanikọ ẹnọ enye. Utu ke oro, enye ọn̄wọn̄ọ ke iyekpeme mmọ, inọ mmọ ibetedem, inyụn̄ ibọk mmọ idem ke ini usọn̄. Ndien mmọ ẹkụt ke ikọ andiwet psalm emi edi akpanikọ: “Un̄wam mi oto Jehovah.”—Psalm 121:2, NW.

[Ikọ idakisọn̄]

[Se Ẹwetde ke Ikpọ Abisi ke page 9]

“Iwat edi anyanya ubọn̄, ke usụn̄ eti ido ke ẹdikụt enye.”—MME N̄KE 16:31

[Ekebe ke page 8]

JEHOVAH EKERE ABAN̄A MME ASAN̄AUTOM ESIE EMI ẸDIDE N̄KANI OWO

“Daha da ke iso owo iwat, nyụn̄ kpono ebio-owo iso.” —Leviticus 19:32.

“Tutu esịm usọn̄ ami ndi enye; ami nyonyụn̄ mbiom enye tutu esịm iwat.” —Isaiah 46:4.