Mme Mbụme Ẹtode Mme Andikot

Didie ke Samson ekpekeme nditụk okpo mme owo oro enye okowotde ndien osụk aka iso edi Nazirite?

Ke Israel eset, owo ama ekeme ndikan̄a akan̄a ke unyịmesịt nnyụn̄ n̄kabade ndi Nazirite ke ibio ini. * Kiet ke otu mme n̄kpọ oro ẹkekpande owo oro akakan̄ade akan̄a ndidi Nazirite ekedi: “Enye okûtụk okpo ke ofụri ini emi enye adianarede idem esie ọnọ Jehovah. Enye okûsabade idem esie aban̄a ete esie, m̀mê eka esie, m̀mê eyeneka esie eren, m̀mê eyen-eka esie an̄wan, ke ini mmọ ẹkpade.” Nso edieke “owo akpade ndisi n̄kpa ke n̄kan̄ esie”? Nazirite ndidue ntụk okpo ama asabade enye inyụn̄ iyakke enye odot ndidi Nazirite. Ntem, ẹma ẹnam an̄wan̄a ẹte: ‘Mme usen edem oro enye ekedide Nazirite ẹyetak.’ Ama oyom Nazirite oro okotụkde okpo anam idemesie asana onyụn̄ afafiak ọtọn̄ọ utom Nazirite.—Numbers 6:6-12.

Nte ededi, Nazirite oro Samson ekedide ama okpụhọde. Mbemiso Samson akamanade, angel Jehovah ama asian eka esie ete: “Sese, afo oyoyomo, onyụn̄ aman eyen-eren; baba akadan̄ kiet okûnyụn̄ otụk enye ibuot: koro eyen oro eyedi Nazirite Abasi toto ke emana esie: ndien enye ọyọtọn̄ọ ndinyan̄a Israel nsio mme Philistine ke ubọk.” (Judges 13:5) Samson ikakan̄ake akan̄a ndidi Nazirite. Abasi ekemek enye ete edi Nazirite, ndien enye ekenyene ndidi Nazirite ke ofụri eyouwem esie. Ibet oro ọkọdọhọde Nazirite okûtụk okpo ikọbọpke enye. Edieke ibet oro ọkpọkọbọpde enye, ndien enye edue otụk okpo, didie ke enye akpakafiak ọtọn̄ọ utom Nazirite esie oro ọkọtọn̄ọde ke emana? Do, nte an̄wan̄ade, se ẹkeyomde ẹto mbon oro ẹkedide Nazirite toto ke emana ama okpụhọde ye mbon oro ẹkekan̄ade akan̄a ndidi Nazirite ibio ini.

Kere ban̄a mme ewụhọ oro Jehovah ọkọnọde owo ita oro ẹsiakde ke Bible, emi ẹkedide Nazirite ke ofụri eyouwem mmọ—Samson, Samuel, ye John Andinịm Owo Baptism. Nte ima iketetịn̄ ke ntọn̄ọ, ẹma ẹwụk Samson ẹte okûfat idet ibuot esie. Idem mbemiso Hannah akasan̄ade ye idịbi Samuel, enye ama akan̄a akan̄a emi: “Nyada enye nnọ Jehovah kpukpru usen uwem esie, ndien akadan̄  iditụkke enye ibuot.” (1 Samuel 1:11) Angel Jehovah ama etịn̄ aban̄a John Andinịm Owo Baptism ete: “[Enye] idin̄wọn̄ke wine ye ọkpọsọn̄ mmịn.” (Luke 1:15) Akan oro, John ekesịne “edisịne-n̄kpọ eke ẹdade idet camel ẹnam, onyụn̄ ọbọbọ mbọbọ ikpa-unam ke isịn; udia esie onyụn̄ edi n̄kukun̄kpọyọriyọ ye aran ọkwọk-ikọt.” (Matthew 3:4) Owo ikọdọhọke owo ita emi ẹkûtụk okpo.

Okposụkedi Samson ekedide Nazirite, enye ama esịne ke otu mme ebiereikpe oro Jehovah akanamde ẹdaha ẹda ẹnyan̄a nditọ Israel ẹsio ke ubọk mmọ eke ẹfịkde mmọ. (Judges 2:16) Ndien enye ama esitụk okpo ke ini akanyan̄ade nditọ Israel. Isan̄ kiet, Samson ama owot Philistine 30 onyụn̄ osion̄o mmọ edisịnen̄kpọ ke idem. Ekem, enye ama aka akan̄wana ye mme asua, “okpok mmọ ukot ye ifụhi edehe.” Enye ama ada n̄ko obufa mban̄ ass owot tọsịn owo. (Judges 14:19; 15:8, 15) Jehovah akan̄wam Samson anam kpukpru emi. N̄wed Abasi ọdọhọ ke enye edi owo oro ẹkpekpebede mbuọtidem esie.—Mme Hebrew 11:32; 12:1.

Ndi Bible ndidọhọ ke Samson akawai lion “nte akpawaide eyen ebot” owụt ke ekedi ọsọ n̄kpọ ke eyo esie mme owo ndiwai nditọ ebot?

Uyarade ndomokiet idụhe ndiwụt ke mme owo ẹma ẹsiwai nditọ ebot ke eyo mme ebiereikpe. Judges 14:6 ọdọhọ ete: “Spirit Jehovah odụk [Samson] ke idem, ndien enye awai lion nte akpawaide eyen ebot, n̄kpọ inyụn̄ idụhe enye ke ubọk.” Etie nte emi edi ndamban̄a ikọ.

Ikọ oro enye “awai lion” ekeme ndiwọrọ n̄kpọ iba. Ekeme ndidi Samson okobom ekpe oro mban̄ mîdịghe etie nte akawai enye mbai mbai. Edieke ediwai ekpe ọkọwọrọde ke enye okobom ekpe oro mban̄, oro owụt ke enye akanam se owo akpakam anamde ye eyen ebot. Ikọ emi owụt nte ekedide mmemmem n̄kpọ ọnọ Samson ndida ubọk n̄wai ekpe ukem nte owo akpadade ubọk awai eyen ebot. Nte ededi, nso edieke Samson akawaide ekpe oro mbai mbai? Do, ẹkeme ndida ikọ oro nte ndamban̄a ikọ. Se ndamban̄a ikọ emi owụtde edi nte ke spirit Jehovah ọkọnọ Samson odudu ndinam n̄kpọ oro akakande ukeme owo. Ke idaha mbiba emi, Judges 14:6 owụt ke ntak un̄wam Jehovah, okopodudu ekpe ikanamke Samson ndịk kpa nte eyen ebot mîsinamke owo ndịk.

[Ikọ idakisọn̄]