N̄kukụt Aban̄ade Obio Ubọn̄ Abasi Osu
N̄kukụt Aban̄ade Obio Ubọn̄ Abasi Osu
“Mbufo ẹyetịm ẹnam, edieke mbufo ẹdibiọn̄de utọn̄ ke [ntịn̄nnịm] ikọ oro, nte owo esese utuenikan̄ eke ayamade ke n̄kịmn̄kịm ebiet.”—2 PETER 1:19.
1. Nso ukpụhọde ke nnyịn ikụt ke ererimbot mfịn?
AFANIKỌN̄ ọyọyọhọ ererimbot mfịn. Ọtọn̄ọde ke oto-obot afanikọn̄ tutu esịm edinam oyomonsia ofụri ererimbot, etie nte mme mfịna ẹkan owo ubọk. Mme ido ukpono ererimbot ikam ikemeke ndin̄wam. Ke nditịm ntịn̄, mmọ ẹsiwak ndinam mme idaha ẹtetịm ẹdiọk ebe ke ndisịn nsọk nnọ ukpọtiọ, usua, ye ufreidụt emi ẹsitọde ubahade ke obio. Ih, nte ẹkebemde iso ẹtịn̄, “ọkpọsọn̄ ekịm” omofụk “mme idụt.” (Isaiah 60:2) Edi, kpa ke ukem ini emi, ata ediwak owo ẹnyene mbuọtidem ke ini iso ọyọfọn. Ntak-a? Koro mmọ ẹbiọn̄de utọn̄ ke ntịn̄nnịm ikọ “nte owo esese utuenikan̄ eke ayamade ke n̄kịmn̄kịm ebiet.” Mmọ ẹyak “ikọ,” m̀mê etop, Abasi emi ẹkụtde idahaemi ke Bible, ada mmimọ usụn̄.—2 Peter 1:19.
2. Nte ntịn̄nnịm ikọ Daniel aban̄ade “utịt ini” owụtde, mmanie kpọt ẹnyene asian eke spirit?
2 Daniel ekewet aban̄a “utịt ini” ete: “Ediwak owo ẹyeyọrọ ẹdi, ẹyọrọ ẹka, ndien ifiọk oyokpon aka iso. Ẹyesion̄o ediwak owo ndek ke idem ẹfep, ẹnyụn̄ ẹnam mmọ ẹdi edisana, ẹnyụn̄ ẹdomo mmọ; edi mme idiọk owo ẹyenam idiọk; baba idiọk owo kiet idinyụn̄ idịghe asian, edi mmọ eke ẹnyenede eti ibuot ẹyedi asian.” (Daniel 12:4, 10) Asian eke spirit enyene mbon oro ‘ẹyọrọrede ẹdi, ẹnyụn̄ ẹyọrọrede ẹka’ ke ofụri esịt, m̀mê oro ẹsịnde ifịk ẹkpep Ikọ Abasi, ẹnịm mme mbet Abasi, ẹnyụn̄ ẹdomode ndinam uduak esie.—Matthew 13:11-15; 1 John 5:20.
3. Ke mme iduọk isua 1870, nso n̄wọrọnda akpanikọ ke nditọ ukpepn̄kpọ Bible ẹkefiọk?
3 Toto ke iduọk isua 1870, mbemiso “ukperedem ini” ọkọtọn̄ọde, Jehovah Abasi ama ọtọn̄ọ ndinam ẹnen̄ede ẹfiọk se “ndịbe n̄kpọ Obio Ubọn̄ Heaven” ọwọrọde. (2 Timothy 3:1-5; Matthew 13:11) Ke edide isio ye se ediwak owo ẹkenịmde ke akpanikọ ini oro, otu nditọ ukpepn̄kpọ Bible ẹma ẹfiọk ke owo idikwe ini Christ afiakde edi. Ke ẹma ẹkedori enye ke ebekpo ke heaven, Jesus ndifiak ndi ediwọrọ enye ndiwọn̄ọde ntịn̄enyịn nse isọn̄ nte Edidem emi akarade isọn̄. Ntan̄ndian idiọn̄ọ oro ẹkụtde ke enyịn edinam mme mbet esie ẹfiọk ke enye emedi.—Matthew 24:3-14.
N̄kukụt Edikpụhọde Mbiet Osu
4. Didie ke Jehovah ọsọn̄ọ mbuọtidem mme asan̄autom esie mfịn?
4 N̄kukụt edikpụhọde mbiet ekedi uyama uyama ntabinse ukara Obio Ubọn̄ Christ. (Matthew 17:1-9) N̄kukụt oro ama ọsọn̄ọ mbuọtidem Peter, James, ye John ke ini oro ediwak owo ẹketrede ndisan̄a ye Jesus sia enye mîkanamke n̄kpọ oro mmọ ẹkeyomde enye anam, emi mîkekemke ye N̄wed Abasi. Kpasụk ntre, ke utịt ini emi, Jehovah ọmọsọn̄ọ mbuọtidem mme asan̄autom esie mfịn ebe ke ndinam mmọ ẹnen̄ede ẹfiọk nte enyene-uten̄e n̄kukụt oro osude, ọkọrọ ye mme ntịn̄nnịm ikọ oro ẹnyenede ebuana ye enye. Idahaemi ẹyak ineme ndusụk n̄kpọ eke spirit oro ẹsọn̄ọde mbuọtidem mi.
5. Anie edi Utịn, ndien ini ewe, n̄ko didie ke enye ‘akasiaha’?
5 Ke ini eketịn̄de aban̄a edikpụhọde mbiet, apostle Peter ekewet ete: “Ndien ẹma ẹdọdiọn̄ ẹsọn̄ọ ikọ mme prophet ẹkan ẹnọ nnyịn; ndien mbufo ẹyetịm ẹnam, edieke mbufo ẹdibiọn̄de utọn̄ ke ikọ oro, nte owo esese utuenikan̄ eke ayamade ke n̄kịmn̄kịm ebiet, tutu eyo esiere, utịn onyụn̄ asiaha ke esịt mbufo.” (2 Peter 1:19) Ndamban̄a Utịn oro, m̀mê “ediyama ntantaọfiọn̄ usenubọk,” edi Jesus Christ oro ẹnọde ubọn̄. (Ediyarade 22:16) Enye ‘akasiaha’ ke 1914 ke ini Obio Ubọn̄ Abasi akamanade ke heaven, owụtde ntọn̄ọ obufa eyo. (Ediyarade 11:15) Ke n̄kukụt edikpụhọde mbiet oro, Moses ye Elijah ẹma ẹdidiana ye Jesus, ẹneme nneme ye enye. Mmọ ẹda ẹban̄a mmanie?
6, 7. Mmanie ke Moses ye Elijah ẹda ẹban̄a ke n̄kukụt edikpụhọde mbiet, ndien mme akpan n̄kpọ ewe ke N̄wed Abasi ayarade aban̄a mbon emi mmọ ẹdade ẹban̄a?
6 Sia Moses ye Elijah ẹketienede ẹbọ ubọn̄ oro Christ ọkọbọde, mme anam-akpanikọ ntiense emi ẹnyene ndida mban̄a mbon oro ẹkarade ye Jesus ke Obio Ubọn̄ esie. Ndifiọk ke Jesus enyene mbon oro ẹditienede enye ẹkara odu ke n̄kemuyo ye n̄kukụt oro prọfet Daniel okokụtde nte ẹdoride Messiah ke ebekpo. Daniel ama okụt nte “Andisọn̄ọ usen”—kpa Jehovah Abasi—ọnọde “owo eke ebietde eyen owo” “nsinsi ubọn̄ eke mîdikụreke.” Edi kere ban̄a se ẹwụtde Daniel ke esisịt ini ebede. Enye ewet ete: “Mmọ ẹda itie-edidem, ye ubọn̄, ye ukpono itie-edidem ke idak ofụri enyọn̄ ẹnọ edisana ikọt Ata Edikon̄.” (Daniel 7:13, 14, 27) Ih, ke se ibede isua ikie ition mbemiso n̄kukụt edikpụhọde mbiet akadade itie, Abasi ama ayarade ke ndusụk “edisana ikọt” esie ẹyetiene Christ ẹbọ ukpono itie edidem.
7 Mmanie ẹdi ndisana ikọt oro Daniel okokụtde ke n̄kukụt? Utọ mbon oro ke apostle Paul eketịn̄ aban̄a ke ini enye ọkọdọhọde ete: “Spirit ke Idem Esie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi enịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyonyụn̄ ida ubọn̄ ye Enye.” (Rome 8:16, 17) Ndisana ikọt emi ẹdi mme mbet Jesus oro ẹyetde aran ke spirit. Jesus ọdọhọ ke Ediyarade ete: “Owo eke akande, nyọnọ enye nditie ye Ami ke ebekpo Mi, kpa nte Ami n̄kakande, nnyụn̄ nsụhọde ntie ye Ete Mi ke ebekpo Esie.” Mme ‘andikan’ oro ẹsetde mi, oro ibat mmọ edide 144,000, ẹyediana ye Jesus ẹkara ofụri isọn̄.—Ediyarade 3:21; 5:9, 10; 14:1, 3, 4; 1 Corinth 15:53.
8. Didie ke mme mbet Jesus oro ẹyetde aran ẹnam ukem utom Moses ye Elijah, ndien nso idi utịp?
8 Edi ntak emi Moses ye Elijah ẹdade ẹban̄a mme Christian oro ẹyetde aran? Ntak edi koro mme Christian oro ẹyetde aran, ke adan̄aemi mmọ ẹsụk ẹdude ke isọn̄, ẹnam utom oro ebietde eke Moses ye Elijah. Ke uwụtn̄kpọ, mmọ ẹtie ntiense ẹnọ Jehovah, idem ke ini ẹsobode ukọbọ. (Isaiah 43:10; Utom 8:1-8; Ediyarade 11:2-12) Ukem nte Moses ye Elijah, mmọ ẹnyene uko ndiyarade nsunsu ido ukpono ke adan̄aemi ẹtemede mbon oro ẹnyenede esịt akpanikọ ẹte ẹnọ Abasi san̄asan̄a utuakibuot. (Exodus 32:19, 20; Deuteronomy 4:22-24; 1 Ndidem 18:18-40) Ndi utom mmọ omon̄wụm mfri? Etieti! Ke ẹsiode editiene ntan̄ kpukpru mbon oro ẹyetde aran mbok, mmọ ẹmetiene ẹn̄wam ata ediwak “mme erọn̄ en̄wen” ẹtiene ẹsụk ibuot ẹnọ Christ.—John 10:16; Ediyarade 7:4.
Christ Ọdọdiọn̄ Akan
9. Didie ke Ediyarade 6:2 owụt idaha Jesus mfịn?
9 Sia mîdịghe aba owo emi awatde ke ass, Jesus edi okopodudu Edidem idahaemi. Ẹdọhọ ke enye awat horse m̀mê enan̄-mbakara—kpa n̄kpọ emi adade aban̄a ekọn̄ ke Bible. (Mme N̄ke 21:31) Ediyarade 6:2 ọdọhọ ete: “Ndien n̄kụt, ndien sese, afia enan̄-mbakara; andidoro enye ke edem onyụn̄ enyene utịgha; ẹnyụn̄ ẹnọ enye anyanya; ndien enye ọwọrọ edikan, onyụn̄ ọdọdiọn̄ akan.” Akan oro, David, andiwet psalm ekewet ntem aban̄a Jesus: “Jehovah eyetie ke Zion ọnọ esan̄ odudu fo esọk fi: da ubọn̄ ke otu mme asua fo.”—Psalm 110:2.
10. (a) Didie ke Jesus ọkọtọn̄ọ ubọn̄ ubọn̄ uwat edikan esie? (b) Didie ke akpa ini oro Jesus akakande okotụk ofụri ererimbot?
10 Jesus ekebem iso akan mme akakan asua esie—Satan ye mme demon. Enye ama ebịn mmọ osion̄o ke heaven ọduọn̄ọ ke isọn̄. Sia ẹfiọkde ke ini mmimọ edi ibio, ndiọi spirit emi ẹn̄wan̄a iyatesịt mmọ ẹfụk ubonowo, ẹsịnde ekese mfụhọ. Iren ita emi ẹwatde enan̄-mbakara ke Ediyarade ẹda ẹban̄a mfụhọ mfụhọ idaha emi. (Ediyarade 6:3-8; 12:7-12) Nte Jesus ekebemde iso etịn̄ ke ntịn̄nnịm ikọ aban̄ade “idiọn̄ọ [edidu Esie],” uwat mbon enan̄-mbakara oro ada ekesịm ekọn̄, akan̄, ye ndiọi udọn̄ọ. (Matthew 24:3, 7; Luke 21:7-11) Ukem nte ata ata ubiak uman, “ubiak uman” emi nte eyịghe mîdụhe edikaka iso ndisọn̄ ubọk tutu Christ “ọdọdiọn̄ akan” ke ndisobo kpukpru ikpehe esop Satan oro ẹkụtde ke enyịn. *—Matthew 24:8.
11. Didie ke mbụk esop Christian ọnọ uyarade aban̄a ubọn̄ ubọn̄ ukara Christ?
11 Ẹmekụt ubọn̄ ubọn̄ ukara Jesus ke emi enye ekpemede esop Christian man ẹkpekwọrọ etop Obio Ubọn̄ ke ofụri ererimbot. Kpa ye ibak ibak ukọbọ Akwa Babylon—ukara ererimbot eke nsunsu ido ukpono—ye eke mme ukara oro mîmaha utom nnyịn, utom ukwọrọikọ ikaha-ka iso kpọt edi emesịm udomo oro akanam mîsịmke ke mbụk ererimbot. (Ediyarade 17:5, 6) Emi edi okopodudu uyarade nte ke Christ ke akara!—Psalm 110:3.
12. Ntak emi ata ediwak owo mîfiọkke ke Christ omodu ke usụn̄ oro enyịn mîkwe?
12 Edi n̄kpọ mfụhọ nditịn̄ ke ata ediwak owo, esịnede ata ediwak mbon oro ẹdọhọde ke idi mme Christian, ifiọkke ke mme akpan n̄kpọntịbe oro ẹdade itie ke isọn̄ ẹwụt mme n̄kpọntịbe oro enyịn mîkwe. Mmọ ẹkam ẹsasak mbon oro ẹtan̄ade Obio Ubọn̄ Abasi. (2 Peter 3:3, 4) Ntak-a? Koro Satan amanam ikike mmọ ekịm. (2 Corinth 4:3, 4) Ke nditịm ntịn̄, enye ọkọtọn̄ọ ndida ekịm eke spirit mfụk mbon oro ẹdọhọde ke idi Christian toto ke ediwak isua ikie emi ẹkebede, akam anamde mmọ ẹkpọn̄ ọsọn̄urua idotenyịn Obio Ubọn̄.
Ẹkpọn̄ Idotenyịn Obio Ubọn̄
13. Ekịm eke spirit akada ekesịm nso?
13 Jesus ama ebem iso etịn̄ ke mbon mfiakedem, emi ẹbietde idiọk n̄kpasịp oro ẹtọde ke otu ibokpot, ẹyedọn̄ ikpat ẹdụk ẹdi esop Christian ẹnyụn̄ ẹtụn ediwak owo usụn̄. (Matthew 13:24-30, 36-43; Utom 20:29-31; Jude 4) Nte ini akakade, inua-okot mme Christian emi ẹma ẹkpebe mme usọrọ, mme edinam, ye mme ukpepn̄kpọ mme okpono ndem, ẹkam ẹdọhọde ke mmọ ẹdi “eke mme Christian.” Ke uwụtn̄kpọ, ẹda Christmas ẹto mme edinam oro ẹbuanade utuakibuot nsunsu abasi Mithra ye Saturn. Edi nso ikanam mme inua-okot Christian ẹkpebe mme usọrọ oro mîdịghe eke mme Christian mi? The New Encyclopædia Britannica (1974) ọdọhọ ete: “Ẹketọn̄ọ Christmas, emi edide usọrọ emana Jesus Christ, ke ntak emi ẹkekerede ke Christ idisọpke ifiak idi.”
14. Didie ke ukpepn̄kpọ Origen ye eke Augustine ẹkeyụt akpanikọ aban̄ade Obio Ubọn̄?
14 Kere n̄ko ban̄a nte ẹkekpụhọrede se ikọ oro “obio ubọn̄” ọwọrọde. N̄wed oro The Kingdom of God in 20th-Century Interpretation ọdọhọ ete: “Origen [ekpep ukpepn̄kpọ ido ukpono ọyọhọ isua ikie ita] okokpụhọ nte mme Christian ẹkesidade ikọ oro ‘obio ubọn̄’ ete ke ọwọrọ ukara Abasi oro odude owo ke esịt.” Origen akada ukpepn̄kpọ esie ke m̀mọ̀n̄? Ikadaha ito N̄wed Abasi, edi akada oto “ukpepn̄kpọ akwaifiọk ye ekikere ererimbot emi enen̄erede okpụhọde ye ekikere Jesus ye eke akpa ufọkabasi.” Ke n̄wed esie oro De Civitate Dei (Obio Abasi), Augustine eke Hippo (354-430 E.N.) ọkọdọhọ ke ufọkabasi ke idemesie edi Obio Ubọn̄ Abasi. Utọ ekikere oro mîkemke ye N̄wed Abasi do ama ọnọ mme ufọkabasi Christendom isọn̄ ndida ukpepn̄kpọ ido ukpono nyom odudu ukaraidem. Ndien mmọ ẹma ẹkama utọ odudu oro ke ediwak isua ikie, ẹwakde ndinam ntre ke ibak ibak usụn̄.—Ediyarade 17:5, 18.
15. Didie ke Galatia 6:7 osu ediwak ufọkabasi Christendom ke idem?
15 Mfịn, mme ufọkabasi ke ẹdọk se mmọ ẹketọde. (Galatia 6:7) Etie nte ediwak mmọ inyeneke aba odudu, mme owo inyụn̄ ikaha aba ufọkabasi. Emi enen̄ede etịbe ke Europe. Nte n̄wedmbụk oro Christianity Today ọdọhọde, “idahaemi ata ikpọ ufọkabasi ke Europe [idịghe] aba ufọk utuakibuot edi ẹyedi itie ubon n̄kpọeset, emi mme akaisan̄ kpọt ẹsikade ẹkese.” Ẹkeme ndikụt orụk n̄kpọ emi ke mme ikpehe en̄wen ke ererimbot. Emi owụt ke nso iditịbe inọ nsunsu ido ukpono? Ndi enye ọyọduọ ke ntak emi mme owo ẹwọn̄ọde, okụk mînyụn̄ idụhe ndida nnọ enye ibetedem? Ndien didie ke emi editụk ido ukpono akpanikọ?
Ben̄e Idem Nọ Akwa Usen Abasi
16. Ntak emi edidọdiọn̄ nsua Akwa Babylon edide akpan n̄kpọ?
16 Kpa nte nsụn̄ikan̄ ye ntọn̄ oro ẹwọn̄ọde ke obot nsụn̄ikan̄ emi akanade sụn̄ ekemede ndiwụt ke obot oro ọmọn̄ obomo, edidọdiọn̄ nsua ido ukpono ke ediwak ikpehe ererimbot edi uyarade ke nsunsu ido ukpono ọmọn̄ ebe efep. Ke mîbịghike, Jehovah ọmọn̄ anam mme n̄ka ukaraidem ke ofụri ererimbot ẹdiana kiet ẹyarade ẹnyụn̄ ẹsobo Akwa Babylon, kpa akpara eke spirit. (Ediyarade 17:15-17; 18:21) Ndi ata mme Christian ẹkpenyene ndikop ndịk mban̄a n̄kpọ emi ye mme ikpehe “akwa ukụt” eken oro ẹditienede? (Matthew 24:21) N̄wan̄ansa-o! Utu ke oro, mmọ ẹdikam ẹdadara ke ini Abasi edisobode ndiọi owo. (Ediyarade 18:20; 19:1, 2) Kere ban̄a uwụtn̄kpọ Jerusalem akpa isua ikie ye mme Christian emi ẹkedụn̄ọde do.
17. Ntak emi mme asan̄autom Jehovah oro ẹnamde akpanikọ ẹkemede ndisak iso nse utịt editịm n̄kpọ emi ye mbuọtidem?
17 Ke ini udịmekọn̄ Rome ẹkekande Jerusalem ẹkụk ke 66 E.N., idem ikakpaha mme Christian oro ẹkedude ke edidemede ke n̄kan̄ eke spirit, nsia ikonyụn̄ iyomoke mmọ. Sia mmọ ẹkesịnde ifịk ẹkpep Ikọ Abasi, mmọ ẹma ẹfiọk ke ‘n̄wụre Jerusalem ama ekpere.’ (Luke 21:20) Mmọ ẹma ẹfiọk n̄ko ke Abasi eyeberede usụn̄ ọnọ mmimọ man ifehe ibọhọ. Ke ini Abasi ekeberede usụn̄ ọnọ mmọ, mme Christian ẹma ẹfen̄e. (Daniel 9:26; Matthew 24:15-19; Luke 21:21) Kpasụk ntre mfịn, mbon oro ẹfiọkde Abasi ẹnyụn̄ ẹsụkde ibuot ẹnọ Eyen esie ẹkeme ndisak iso nse utịt editịm n̄kpọ emi ye mbuọtidem. (2 Thessalonica 1:6-9) Ke nditịm ntịn̄, ke ini akwa ukụt editọn̄ọde, mmọ ẹyedat esịt ‘ndimenede enyịn ke enyọn̄, nnyụn̄ mmenede ibuot mmọ ke enyọn̄, koro edifak mmọ ke asan̄a ekpere.’—Luke 21:28.
18. Nso ididi utịp akpatre en̄wan oro Gog edin̄wanade ye mme asan̄autom Jehovah?
18 Ke ẹma ẹkesobo Akwa Babylon, Satan, emi ẹdidiọn̄ọde ini oro nte Gog eke Magog, ayan̄wana akpatre en̄wan ye Mme Ntiense Jehovah oro ẹtiede emem emem. Ikọt Gog emi ẹdidide nte ‘obubịt enyọn̄ ndifụk isọn̄,’ ẹdikere ke iyakan mmemmem mmemmem. Edi idem edikpa mmọ didie ntem! (Ezekiel 38:14-16, 18-23) Apostle John ewet ete: “N̄kụt nte ẹbererede heaven; ndien sese, afia enan̄-mbakara, Andidoro enye ke edem ekere Anam-akpanikọ ye Ata Akpanikọ . . . Edisọp ofụt onyụn̄ oto Enye ke inua ọwọrọ, man Enye ada ekpen̄e mme idụt.” “Edidem Ndidem” emi owo mîkemeke ndikan mi ayanyan̄a mme anam-akpanikọ andituak ibuot nnọ Jehovah onyụn̄ osobo kpukpru mme asua mmọ. (Ediyarade 19:11-21) Emi edidi ini oro n̄kukụt edikpụhọde mbiet edisude ofụri ofụri.
19. Didie ke Christ ndidọdiọn̄ n̄kan editụk mme anam-akpanikọ mbet esie, ndien nso ke mmọ ẹkpedomo ndinam idahaemi?
19 Jesus ‘eyenyene kpukpru mmọ emi ẹnịmde ke akpanikọ ndyọ, ke usen oro.’ (2 Thessalonica 1:10) Ndi ọdọn̄ fi ndisịne ke otu mbon oro ubọn̄ ubọn̄ Eyen Abasi edinyenede mmọ ndyọ? Do, ka iso sọn̄ọ mbuọtidem fo nyụn̄ ‘ben̄e idem; koro ke ini eke afo mûdorike enyịn, Eyen Owo eyedi.’—Matthew 24:43, 44.
Mụm Idem Kama
20. (a) Didie ke nnyịn ikeme ndiwụt esịtekọm nnọ Abasi ke ndinọ nnyịn “asan̄autom emi anamde akpanikọ, onyụn̄ enyenede ọniọn̄”? (b) Mme mbụme ewe ke nnyịn ikpobụp idem nnyịn?
20 “Asan̄autom emi anamde akpanikọ, onyụn̄ enyenede ọniọn̄” esịn udọn̄ ọnọ ikọt Abasi kpukpru ini ete ẹtaba idap ke n̄kan̄ eke spirit ẹnyụn̄ ẹmụm idem ẹkama. (Matthew 24:45, 46; 1 Thessalonica 5:6) Nte afo omowụt esịtekọm aban̄a ekemini item emi? Nte afo amada mmọ ebiere se idide mme ebeiso n̄kpọ? Ntak mûbụpke idemfo ute: ‘Nte enyịn eke spirit mi enen̄ede an̄wan̄a, anamde mi n̄keme ndikụt nte Eyen Abasi akarade ke heaven? Ndi ami mmokụt nte enye eben̄ede idem ndibiere ikpe oro Abasi ọdọn̄de enye ebiere ọnọ Akwa Babylon ye ikpehe editịm n̄kpọ Satan eken?’
21. Nso ikeme ndidi ntak emi ndusụk owo ẹyakde enyịn eke spirit mmọ ẹkịm, ndien nso ke mmọ ẹkpenam iwiwa?
21 Ndusụk owo oro ẹbuanade ye ikọt Jehovah idahaemi ẹmeyak enyịn eke spirit mmọ ẹkịm. Ndi ekeme ndidi mmọ inyeneke ime, nte ndusụk mme akpa mbet Jesus mîkenyeneke? Ndi ekikere uwem emi, uma-inyene, m̀mê ukọbọ afịna mmọ? (Matthew 13:3-8, 18-23; Luke 21:34-36) Eyedi ndusụk n̄kpọ oro “asan̄autom emi anamde akpanikọ, onyụn̄ enyenede ọniọn̄” ewetde in̄wan̄ake ndusụk mmọ. Edieke ndomokiet ke otu emi etịbede ọnọ fi, nnyịn isịn udọn̄ inọ fi ite enen̄ede esịn ifịk ekpep Ikọ Abasi onyụn̄ ekpe Jehovah ubọk man otodo afo ekpekeme nditọn̄ọ ntak nnyene ata eti n̄kpet n̄kpet itie ebuana ye enye.—2 Peter 3:11-15.
22. Didie ke edineme n̄kukụt edikpụhọde mbiet ye mme ntịn̄nnịm ikọ oro ẹnyenede ebuana ye enye otụk fi?
22 Ẹkewụt mme mbet Jesus n̄kukụt edikpụhọde mbiet ke ini mmọ ẹkeyomde nsịnudọn̄. Mfịn, nnyịn imenyene n̄kpọ oro ekemede ndinen̄ede nsịn udọn̄ nnọ nnyịn—edikpụhọde mbiet oro ye ediwak ntịn̄nnịm ikọ eken oro ẹnyenede ebuana ye enye ẹsu. Nte nnyịn ikerede iban̄a mme ubọn̄ ubọn̄ ata idem n̄kpọ emi ye se mmọ ẹdiwọrọde ke ini iso, nnyịn n̄ko ikpakam itiene ida ofụri esịt itịn̄ ikọ oro apostle John eketịn̄de, ete: “Amen. Di, Ọbọn̄ Jesus.”—Ediyarade 22:20.
[Ikọ idakisọn̄]
^ ikp. 10 Emi ọwọrọ ke ukem nte ata ata ubiak uman, mme mfịna ererimbot ẹditetịm ẹwak, ẹsọn̄ ubọk, ẹnyụn̄ ẹkaka iso, ẹdade ẹkesịm akwa ukụt.
Nte Afo Emeti?
• Ke mme iduọk isua 1870, nso ke ekpri otu nditọ ukpepn̄kpọ Bible ẹkedi ẹdifiọk ẹban̄a Christ ndifiak ndi?
• Didie ke n̄kukụt edikpụhọde mbiet osu?
• Didie ke uwat edikan Jesus otụk ererimbot ye esop Christian?
• Nso ke ana nnyịn inam man isịne ke otu mbon oro ẹdibọhọde ke ini Jesus ọdiọn̄de-diọn̄ akan?
[Mme Mbụme Ukpepn̄kpọ]
[Mme ndise ke page 16, 17]
N̄kukụt edikpụhọde mbiet osu
[Mme ndise ke page 18]
Ndi ọmọfiọk se iketịbede ke ini Christ ọkọtọn̄ọde ndikan?