Ndi Emekeme Ndibiere Ini Iso Fo?

NDI ẹma ẹbebiere se nnyịn ididide? Ndi ọwọrọ ke se nnyịn imekde ndinam inyeneke n̄kpọ ndinam ye ini iso nnyịn?

Yak idọhọ ke owo esibiere ini iso esie ke idemesie. Ke edide ntre, ndi odu owo ekededi oro ẹma ẹkebebiere se enye edinamde m̀mê akpan ifetutom oro enye edinyenede? N̄ko didie ke Abasi ekpekeme ndinam uduak esie ke isọn̄ edieke mme owo ẹkpenyenede ukeme ndibiere ini iso mmọ? Bible ọbọrọ mme mbụme emi ke usụn̄ oro ọnọde uyụhọ.

Akan̄a ye Ifụre Edimek—Ndi Mbiba Ẹnen?

Kere nte Jehovah Abasi okobotde nnyịn. Bible ọdọhọ ‘ke ẹkebot owo ke mbiet Abasi; eren ye n̄wan ke ẹkebot mmọ.’ (Genesis 1:27) Sia ẹkebotde nnyịn ke mbiet Abasi, nnyịn imekeme nditiene nnyene mme edu esie, utọ nte ima, unenikpe, ọniọn̄, ye odudu. Abasi ama onyụn̄ ọnọ nnyịn ifụre ndimek se iyomde ndinam. Emi anam nnyịn ikpụhọde ye mme edibotn̄kpọ esie eken ke isọn̄. Nnyịn imekeme ndimek ndidu uwem nte Abasi etemede imonyụn̄ ikeme nditre ndidu. Ntak edi oro prọfet Moses ọkọdọhọde ete: “Mmowụk enyọn̄ ye isọn̄, nte ẹdi ntiense ẹban̄a mbufo mfịn emi; mmada uwem ye n̄kpa, edidiọn̄ ye isụni, nnịm fi ke iso; mek uwem, ndien, man afo ye nditọ fo ẹdu uwem: man afo ama Jehovah Abasi fo onyụn̄ okop uyo esie, onyụn̄ eyịre ye enye.”—Deuteronomy 30:19, 20.

 Nte ededi, ifụre oro ẹnọde nnyịn enyene adan̄a. Ifụre emi iwọrọke ke nnyịn idụhe aba ke idak ibet obot ye ibet ido uwem oro Abasi enịmde man ekondo odu ke itie esie onyụn̄ ana sụn̄-n̄. Ẹkenịm mme ibet emi ke ufọn nnyịn, ntre edieke ẹbiatde kiet ke otu ibet emi, oro ekeme ndisụn̄ọ ke afanikọn̄. Kam kere se ikpetịbede edieke nnyịn ikpofụmide ibet emi akarade odudu oro odụride n̄kpọ aka isọn̄ inyụn̄ ito ke ufọkenyọn̄ ifrọ iduọ ke isọn̄!—Galatia 6:7.

Ifụre emi n̄ko iyakke owo anam kpukpru se enye okpoyomde ndinam, edi mme edibotn̄kpọ eken oro mînyeneke orụk ifụre emi ẹkeme ndinam se mmọ ẹmama. Ewet n̄wed kiet, Corliss Lamont obụp ete: “Didie ke nnyịn ikeme ndiduọhọ mme owo nnyụn̄ nnọ mmọ ufen ke ntak idiọkn̄kpọ mmọ edieke nnyịn idọhọde . . . ke ẹma ẹbebiere se mmọ ẹdinamde?” Ke akpanikọ, nnyịn ikemeke ndinam oro. Owo isiduọhọke mme unam oro ẹdude uwem ke ntụk ke se mmọ ẹnamde, m̀mê ndiduọhọ kọmputa ke ndinam se ẹkeyomde enye anam. Do, ifụre edimek se iyomde ndinam anam nnyịn inyene nduduọhọ ke se nnyịn inamde.

Okpowụt unana ima onyụn̄ ọdiọk didie ntem edieke Jehovah Abasi ekpekebierede se nnyịn ididide idem mbemiso nnyịn imanade, ndien ekem obiom nnyịn ikpe ke se nnyịn inamde! Abasi inamke orụk n̄kpọ oro sia enye “edi ima,” ndien ‘kpukpru usụn̄ esie ẹnen.’ (1 John 4:8; Deuteronomy 32:4) Ke ama ọkọnọ nnyịn ifụre ndimek se imade ndinam, enye ikebemke iso ‘ibiere owo oro enye edinyan̄ade ye enye oro enye edisobode,’ nte mbon oro ẹnịmde akan̄a ke akpanikọ ẹkerede. Ifụre oro owo enyenede ndimek se enye amade owụt ke akan̄a inenke.

Bible owụt in̄wan̄-in̄wan̄ ke se nnyịn imekde ndinam ekeme ndikpụhọde ini iso nnyịn. Ke uwụtn̄kpọ, Abasi ekpek mme anamidiọk ete: “Mbọk mbufo kiet kiet ẹkabade ẹkpọn̄ mme idiọk usụn̄ mbufo, ye mme idiọk ido mbufo . . . ndien ndidiọkke ye mbufo.” (Jeremiah 25:5, 6) Ufọn mbukpek emi ikpodụhe edieke edide Abasi ama ebebiere se owo kiet kiet edidide. Akan oro, Ikọ Abasi ọdọhọ ete: “Ẹkabade esịt ndien, ẹnyụn̄ ẹfiak edem, man ẹsọhi mme idiọk-n̄kpọ mbufo ẹfep; man oto do ini edidemede edito ke iso Jehovah esịm mbufo.” (Utom 3:19) Ntak emi Jehovah ọkpọdọhọde mme owo ẹkabade esịt ẹnyụn̄ ẹfiak ẹtiene imọ edieke edide enye ama ọfọfiọk ke idụhe n̄kpọ ndomokiet oro mmọ ẹdinamde man okpụhọde se mmọ ẹdidide?

N̄wed Abasi etịn̄ aban̄a mbon oro Abasi emekde ndikara ye Jesus Christ nte ndidem ke heaven. (Matthew 22:14; Luke 12:32) Nte  ededi, Bible ọdọhọ ke mmọ ẹkeme ndiduọk ifet emi edieke mmọ mîmehe ime isịm akpatre. (Ediyarade 2:10) Ntak emi Abasi okpokotde mmọ ke akpa ifet edieke edide enye ama ebebiere ke owo idimekke mmọ? Kere n̄ko ban̄a se apostle Paul eketịn̄de ọnọ ekemmọ mme andinịm ke akpanikọ. Enye ekewet ete: “Edieke nnyịn iduede ke n̄koi-nnam, ke ini nnyịn ima ikọbọ ifiọk akpanikọ, uwa idụhe aba inọ idiọk-n̄kpọ.” (Mme Hebrew 10:26) Utọ item oro ikpenyeneke ufọn edieke edide Abasi ama ebebiere se mmọ ẹdidide. Edi nte Abasi ikebemke iso imek, ke nsụhọde n̄kaha, ndusụk mbon oro ẹdikarade ye Jesus Christ?

Ndi Ẹkebem Iso Ẹmek Owo Kiet Kiet m̀mê Otu?

Apostle Paul ekewet ete: “[Abasi akada] kpukpru n̄kpọ mfọn eke spirit ke mme itie heaven ọdiọn̄ nnyịn ke Christ. Abasi ekemek nnyịn ke Enye ndien ediwụk adaha ererimbot . . . Enye ekebem iso ebiere enịm ndida nnyịn nsịn ke ubon Esie nte nditọ Esie oto ke Jesus Christ.” (Ephesus 1:3-5) Nso ke Abasi ekebiere enịm, ndien nso ke ọwọrọ ndidọhọ ke ‘ekemek nnyịn ndien ediwụk adaha ererimbot’?

Itie N̄wed Abasi oro ọdọhọ ke Abasi ama emek ndusụk nditọ akpa owo oro, Adam, ndikara ye Christ ke heaven. (Rome 8:14-17, 28-30; Ediyarade 5:9, 10) Nte ededi, ndikere ke Jehovah Abasi ama ememek akpan owo kiet kiet nditiene n̄kara ke tọsịn isua idem mbemiso mmọ ẹkemanade atuaha ye ifụre oro Abasi ọkọnọde owo ndimek se enye amade ndinam. Abasi ekemek otuowo, idịghe owo kiet kiet.

Ke ndinam an̄wan̄a: Yak idọhọ ke ukara ebiere ndisiak akpan esop. Enye ebiere utom oro esop oro edinamde, udomo odudu oro enye edinyenede ye idaha esie. Esop oro ọtọn̄ọ utom ke akpatre, ekem ke n̄kpọ nte isua ifan̄ ẹma ẹkebe tọn̄ọ ẹkesiak esop oro, ẹkop mbon esop oro ẹdọhọde ẹte: “Ukara ama ebebiere ke ediwak isua emi ẹkebede se nnyịn idinamde. Nnyịn imọtọn̄ọ ndinam se ẹkedọhọde nnyịn inam.” Ndi ọkpọdọhọ ke enyene ndidi ukara ama ebebiere mme owo kiet kiet oro ẹdinamde esop emi ediwak isua ko ke edem? Ke akpanikọ ukpọdọhọke. Kpasụk ntre, Jehovah ama ebebiere ke anyan ini ke imọ iyọtọn̄ọ akpan esop oro edisiode utịp idiọkn̄kpọ Adam ifep. Enye ama ebiere otu mme owo oro ẹdinamde utom ke esop oro—edi ikemekke owo mmọ kiet kiet. Ẹkenyene ndimek mmọ nte ini akakade, ndien nte mmọ ẹdude uwem ekenyene ndibiere m̀mê mmọ ẹyedot m̀mê ididotke.

Ewe ererimbot ke apostle Paul ekenyene ke ekikere ke ini enye ọkọdọhọde ete: “Abasi ekemek nnyịn ke Enye ndien ediwụk adaha ererimbot”? Ererimbot oro Paul eketịn̄de aban̄a mi idịghe ererimbot oro ọkọtọn̄ọde ke ini ẹkebotde Adam ye Eve. Ererimbot enye oro ama ‘ọfọn eti eti’—idiọkn̄kpọ ye mbiara ndomokiet ikodụhe. (Genesis 1:31) Ufọn ikodụhe ‘ndisio enye ke ufụn’ idiọkn̄kpọ mfep.—Ephesus 1:7.

Ererimbot oro Paul eketịn̄de aban̄a ekedi enye oro ọkọtọn̄ọde ke Adam ye Eve ẹma ẹkesọn̄ ibuot ke Eden—ererimbot enye emi ama enen̄ede okpụhọde ye nte Abasi okoyomde ererimbot etie. Ẹkeda nditọ Adam ye Eve ẹtọn̄ọ ererimbot emi. Mbon oro ẹkedian̄arede ẹkpọn̄ Abasi ẹkenyụn̄ ẹnyamde ẹsịn ke ufụn idiọkn̄kpọ ye mbiara ẹkenam ererimbot emi. Ke mîbietke Adam ye Eve oro ẹkekoide-koi ẹnam idiọkn̄kpọ, usụn̄ ama odu ndinyan̄a ererimbot enye emi.—Rome 5:12; 8:18-21.

Ke ini ẹkesọn̄de ibuot ke Eden, Jehovah Abasi ama ekeme ndise mban̄a idaha oro nsọn̄ibuot emi akadade edi ke ebe oro. Enye ama emek akpan esop ke ndondo oro enye okokụtde ke odot ẹnam oro—oro edi Obio Ubọn̄ Messiah emi Jesus Christ edikarade—esop emi ke Enye edida afak ubonowo osio ke idiọkn̄kpọ Adam. (Matthew 6:10) Abasi ama ananam emi “ndien ediwụk adaha ererimbot” ubonowo oro ẹkemede ndifak, oro edi, mbemiso mbon nsọn̄ibuot oro, Adam ye Eve, ẹkenyenede nditọ.

Mme owo ẹsiwak nditịm idem mbemiso ẹkemede ndinam se mmọ ẹkeduakde. Akan̄a asan̄a ye ekikere oro owụtde ke anaedi Abasi ama ewet kpukpru n̄kpọ ke nde ke nde nte ekondo ekpetiede enịm onyụn̄ ebiere nte kpukpru n̄kpọ ke  ekondo ẹditiede. Roy Weatherford ewet ete: “Ediwak mme ekpep ukpepn̄kpọ akwaifiọk ẹkere ke ndidọhọ ke owo ikewetke kpukpru n̄kpọ oro ẹditịbede ke nde ke nde inịm isan̄ake ikekem ye ndidọhọ ke Abasi enyene Akwa Ubom Odudu.” Ndi enen̄ede oyom Abasi ebebem iso ewet kpukpru se enye aduakde ndinam mbemiso enye anamde mmọ?

Sia odudu ye ọniọn̄ esie mînyeneke adan̄a, Jehovah ekeme ndise mban̄a mbabuat n̄kpọntịbe ekededi oro otode usụn̄ oro mme edibotn̄kpọ esie ẹdade ifụre mmọ ẹnam n̄kpọ. (Isaiah 40:25, 26; Rome 11:33) Enye ekeme ndinam oro inikiet inikiet ye unana edibem iso nnam ndutịm mban̄a oro. Ata Ọkpọsọn̄ Abasi itiehe nte mme anana-mfọnmma owo oro ukeme mmọ enyenede-nyene adan̄a, ntre inaha enye ewewet n̄kpọ ke nde ke nde enịm ndida n̄wụt se owo kiet kiet ke isọn̄ edidide. (Mme N̄ke 19:21) Ediwak edikabade Bible ẹdọhọ ke Ephesus 3:11 nte ke Abasi enyene “nsinsi uduak,” idọhọke ke enye enyene ndutịm oro ẹma ẹkebebiere ẹnịm.

Nte Afo Ekemede Ndibiere Ini Iso Fo

Abasi aduak n̄kpọ ọnọ isọn̄, ndien enye ama ebebiere uduak oro enịm. Ediyarade 21:3, 4 ọdọhọ ete: “Sese, ebiet idụn̄ Abasi omodu ye owo. Enye oyonyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie oyonyụn̄ odu ye mmọ, onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” Ih, isọn̄ emi ayakabade edi Paradise nte Jehovah okoyomde enye etie ke ntọn̄ọ. (Genesis 1:27, 28) Mbụme edi, Ndi afo oyodu do? Oro edikọn̄ọ ke se afo emekde ndinam idahaemi. Jehovah ikebemke iso ibiere se afo edidide.

Uwa ufak Eyen Abasi, Jesus Christ, anam owo ekededi oro ọbuọtde idem ye enye ekeme ndinyene nsinsi uwem. (John 3:16, 17; Utom 10:34, 35) Bible ọdọhọ ete: “Owo eke ọbuọtde idem ye Eyen enyene nsinsi uwem; edi owo eke mîbuọtke idem ye Eyen idikwe uwem.” (John 3:36) Afo emekeme ndimek uwem ke ndikpep n̄kpọ mban̄a Abasi, Eyen esie, ye uduak Esie ke Bible nnyụn̄ nda se afo ekpepde nsịn ke edinam. Ẹn̄wọn̄ọ ẹnọ owo ekededi oro odude uwem ekekem ye eti ibuot oro odude ke Ikọ Abasi ẹte ke enye “oyodụn̄ ke ifụre, oyonyụn̄ etie sụn̄ anana ndịk idiọk n̄kpọ.”—Mme N̄ke 1:20, 33.

[Mme ndise ke page 5]

Ke mîbietke unam, owo enyene ndibọ utịp n̄kpọ oro enye anamde

[Ebiet Ẹdade N̄kpọ Ẹto]

Ntrukpom: Foto: Cortesía de GREFA