Ukwọrọikọ Saul Edemede Usua

MME Jew ke Damascus ikekemeke ndinịm se mmọ ẹkekụtde. Nso ikpanam Saul emi ekedide ifịk ifịk andin̄wana nnọ ukpepn̄kpọ ido ukpono akabade edi owo mfiakedem? Ẹkediọn̄ọ Saul nte owo emi ekesikọbọde mbon oro ẹkesemede ẹkot enyịn̄ Jesus ke Jerusalem. Enye ekedi Damascus man edika iso ọkọbọ mme mbet. Edi ke emi, enye ke idemesie ke ọkọkwọrọ ete ke Jesus emi ẹkedade nte oburobụt abiatibet, emi ẹkenyụn̄ ẹkọn̄de ke eto ke ntak emi ẹkedọhọde ke enye osụn̄i Abasi, ekedi Messiah! Mmọn̄ọ, ndi ibuot akabiara Saul?—Utom 9:1, 2, 20-22.

Etie nte ẹma ẹnam se iketịbede an̄wan̄a. Enen̄ede etie nte ke mbon oro ẹkesan̄ade ye Saul ẹto Jerusalem ẹdi ẹma ẹnam ẹfiọk se iketịbede ke usụn̄ isan̄ mmọ. Nte mmọ ẹkekperede Damascus, un̄wana ama oto ke enyọn̄ ke mbuari ayama akanade mmọ okụk, ndien kpukpru mmọ ẹma ẹduọn̄ọ ke isọn̄. N̄ko mmọ ẹma ẹkop nte uyo etịn̄de ikọ. Saul kpọt ke n̄kpọ akanam. Enye ama ọduọ ana ke isọn̄. Ke ini enye akadahade ada ke akpatre, mbon oro ẹkesan̄ade ye enye ẹma ẹmụm enye ubọk ẹda ẹdụk ke Damascus, koro enye ikekwe usụn̄.—Utom 9:3-8; 26:13, 14.

Andibiọn̄ọ Akabade Edi Andida Nnọ Christ

Nso iketịbe inọ Saul ke usụn̄ Damascus? Nte ekeme ndidi anyan isan̄ m̀mê anainai eyo ekemem enye idem? Sia ẹnen̄erede ẹyom ndifiọk se iketịbede inọ Saul, mbon eyịghe eyomfịn ẹsiak mme n̄kpọ oro mmọ ẹkerede nte ẹketịbede ẹnọ enye, utọ nte nyon̄ibuot, ndap ndap ekikere, ọkpọsọn̄ editịmede esịt otode ubieresịt oro okobiomde enye ikpe, mbeibuot, ẹnyụn̄ ẹdọhọ ke eyedi Saul ama esidọn̄ọ ndisi.

Se iketịbede edi nte ke Jesus Christ okowụt Saul idem ke un̄wana oro ekekịmde enye enyịn, anamde Saul enịm ete ke Enye ekedi Messiah. Ndusụk ndise ẹban̄ade n̄kpọntịbe oro ẹwụt nte Saul odororede ke enyọn̄ enan̄-mbakara ọduọ. Okposụkedi oro ekekemede nditịbe, Bible n̄kukụre ọdọhọ ke enye ‘ọkọduọ ke isọn̄.’ (Utom 22:6-11) Iduọ oro Saul ọkọduọde ikemenke udomo ye akwa idaha esie oro enye akatabade. Ke emi enye ekenyene ndinyịme ke se mme anditiene Jesus ẹkekwọrọde ekedi akpanikọ. N̄kukụre n̄kpọ oro akanade Saul anam ekedi nditiene mmọ. Okposụkedi Saul ke mbemiso ekedide ibak ibak andibiọn̄ọ etop Jesus, enye ama akabade edi kiet ke otu mbon oro ẹketan̄ade etop Jesus ifịk ifịk. Ke ama okokụt usụn̄ onyụn̄ ana baptism, “Saul [ama] ọdọdiọn̄ okop odudu akan, etịn̄ ikọ tutu ekikere oyo mme Jew emi ẹdụn̄de ke Damascus, enen̄ede owụt ete Jesus edi Christ.”—Utom 9:22.

Odu Ndiwot Saul Okpu

M̀mọ̀n̄ ke Saul, emi ẹkekotde ke ukperedem Paul, akaka ke ama okokpụhọde ido ukpono esie? Ke ini enye ekewetde n̄wed ọnọ ẹsọk mbon Galatia, enye ọkọdọhọ ete: “[N̄kadaha] n̄ka Arabia; ndien ntọn̄ọ ntak mfiak ndi ke Damascus.” (Galatia 1:17) Ndidọhọ, n̄kadaha n̄ka “Arabia” ekeme ndiwọrọ ndika ikpehe Ekpri Isuo Arabia ekededi. Ndusụk nditọ ukpepn̄kpọ ẹdọhọ ke ekeme ndidi Paul akaka Desat Syria m̀mê ebiet efen ke Nabataea, kpa obio ubọn̄ Edidem Aretas IV. Enen̄ede etie nte ke Saul akaka  ndobo ndobo ebiet ke ama akana baptism man eketie ekere se iketịbede, kpa nte Jesus akakade desat ke ama akana baptism.—Luke 4:1.

Ke ini Saul akafiakde aka Damascus, “mme Jew [ẹma] ẹdụk odu ẹte iwot enye.” (Utom 9:23) Andikara emi akadade ke ibuot Edidem Aretas ke Damascus ama enịm mbon-ukpeme ke obio ete ẹmụm Saul. (2 Corinth 11:32) Edi ke adan̄aemi mme asua ẹkedụkde odu ndiwot Saul, mme mbet Jesus ẹma ẹdiomi nte enye edifehede ibọhọ.

Ananias ye mme mbet oro ẹkedude ye Saul ke ndondo oro enye okokpụhọde ido ukpono ẹma ẹsịne ke otu mbon oro ẹken̄wamde enye efehe ọbọhọ. * (Utom 9:17-19) Eyedi ndusụk mbon oro ẹkekabarede ẹdi mme andinịm ke akpanikọ ke ntak ukwọrọikọ Saul ke Damascus ẹma ẹn̄wam enye n̄ko, koro Utom 9:25 ọdọhọ ete: “Mbet esie ẹda enye ke okoneyo ẹsịn ke akpasa, ẹsụhọde ke ibibene.” Ekeme ndidi Ikọ oro “mbet esie,” ada aban̄a mbon oro Saul ekekpepde n̄kpọ. Ke idaha ekededi, etie nte unen oro Saul okokụtde ke utom ukwọrọikọ esie ama anam mme asua esie ẹdọdiọn̄ ẹsua enye.

Se Ikpepde

Ke ini idụn̄ọrede ndusụk n̄kpọ oro ẹkedade itie ke ini Saul okokpụhọde ido ukpono onyụn̄ ana baptism, nnyịn imenen̄ede ikụt ke enye ikọdọn̄ke enyịn ke se mbon en̄wen ẹketịn̄de ẹban̄a enye; ọkpọsọn̄ ubiọn̄ọ ikonyụn̄ inamke enye akpa mba. Ata akpan n̄kpọ oro ekebehede Saul ekedi utom ukwọrọikọ oro ẹkeyakde ẹsịn enye ke ubọk.—Utom 22:14, 15.

Ndi ndondo emi ke afo edifiọk ke edi akpan n̄kpọ ndikwọrọ eti mbụk? Ke edide ntre, ọwọrọ ke afo ọmọfiọk ke ana kpukpru ata mme Christian ẹdi mme andikwọrọ Obio Ubọn̄. Ikpanaha idem akpa fi edieke mme owo mîmaha utom ukwọrọikọ fo ndusụk ini. (Matthew 24:9; Luke 21:12; 1 Peter 2:20) Nte Saul ọkọyọde ubiọn̄ọ edi uwụtn̄kpọ oro odotde ẹkpebe. Mme Christian oro ẹyọde idomo ye unana edikpa mba ẹyenyene mfọn Abasi. Jesus ọkọdọhọ mme mbet esie ete: “Kpukpru owo ẹyesua mbufo kaban̄a enyịn̄ Mi.” Kpa ye oro, enye ama ọn̄wọn̄ọ ọnọ mmọ ete: “Ẹdida edime ime ke ukụt ẹbọ ukpọn̄ mbufo ẹda ẹnyene.”—Luke 21:17-19.

[Ikọ idakisọn̄]

[Ndise ke page 28]

Saul ama ‘ọduọ ke isọn̄’ ke ini Jesus okowụtde enye idem

[Ndise ke page 29]

Saul ama efehe ọbọhọ ke ini ẹkedụkde odu ndiwot enye ke Damascus