Anie Edinọ Ererimbot Udia?

NTE ekemde ye Esop Esede Aban̄a Unọ Udia ke Ererimbot, kpa ikpehe Edidiana Mme Idụt emi esede aban̄a editre biọn̄, owo miliọn 800—emi ediwak ẹdide nditọwọn̄—ẹkpere ndikpa biọn̄. Ke ndondo emi, esop oro ọkọdọhọ ke mme idụt uforo ẹkeda okụk ye ifịk oro ẹkpedade ẹse ẹban̄a mfịna emi ẹse ẹban̄a mme mfịna en̄wen, utọ nte edinam oyomonsia. Udọn̄ọ oro ebede-be owo nditara amanam mfịna emi etetịm ọsọn̄ ubọk. N̄wed esop oro, emi ẹkotde Global School Feeding Report, eketịn̄ ntem aban̄a mme idụt Africa emi AIDS awakde etieti: “Mme ete ye eka ẹmọn̄ ẹkpan̄a ẹma. Nditọ oro mmọ ẹkpan̄ade ẹkpọn̄ ẹsiwak ndise mban̄a idemmọ, ndien ediwak mmọ inyeneke ifiọk utọin̄wan̄ ye usọ udu uwem emi nditọ ẹsikpepde ẹto ete ye eka.”

Esop Esede Aban̄a Unọ Udia ke Ererimbot anam ndutịm man ẹsinọ nditọwọn̄ udia ke ufọkn̄wed ke nsụhọde n̄kaha ini kiet ke usen. Uduak ndutịm emi idịghe nditre biọn̄ kpọt, edi n̄ko man ẹfiak ẹtọn̄ọ mme ndutịm eken oro ẹkenamde man ẹka iso ẹkpep mme uyen se mmọ ẹkpenamde mbak ẹdimen HIV ye AIDS.

Ke ebiet ekededi oro ẹtọn̄ọde ndutịm emi, ẹsinọ nditọwọn̄ nti udia, ukpep usanaidem, ye un̄wam eken. Ndien ẹkụt ke ebiet oro mme owo ẹkpụhọde edu mmọ, ibat mbon oro ẹmende HIV ye AIDS osụhọde.

Edi n̄kpọ mfụhọ nte ke mme ukeme oro mme owo ẹsịnde ẹsiwak ndinyene esisịt ufọn, isinyụn̄ ikọkke mfịna emi. Edi Bible ọn̄wọn̄ọ un̄wọn̄ọ oro ọnọde ndọn̄esịt nte ke ẹyetre biọn̄ ke nsinsi. Psalm 72:16 ọdọhọ ete: “Uwak ibokpot ẹyedu ke isọn̄.” Mme owo ẹyetịn̄ ntem ẹban̄a Jehovah Abasi ke Obio Ubọn̄ esie: “Afo emedi edise isọn̄, onyụn̄ ebịt enye eti-eti; . . . afo etịm ibokpot mmọ, koro afo ọdiọn̄de enye (isọn̄) ntem.”—Psalm 65:9.

[Ebiet ẹdade ndise ẹto ke page 32]

WFP/Y. Yuge