Edida Ikọ Ntop Ekọn̄—Ntak Emi Esibiakde Owo?

“Ekọn̄ ẹto m̀mọ̀n̄, en̄wan ẹnyụn̄ ẹto m̀mọ̀n̄ ẹdu ke otu mbufo?”—JAMES 4:1.

 IDỊGHE mbonekọn̄ Rome oro ẹkesụk ẹn̄wanade ekọn̄ ini oro man ẹda mme obio ẹnyene ke James, emi eketienede ewet Bible, okobụp mbụme emi. Inyụn̄ idịghe mbon Jew oro ẹkediọn̄ọde nte Mbon Emi Ẹkamade Afaka ẹn̄wana ndedịbe en̄wan ye ukara Rome ke akpa isua ikie E.N. ke enye okobụp. Se James ekenyenede ke ekikere ekedi utọk ke ufọt owo iba. Ntak-a? Koro utọk ekeme ndiwot owo ukem nte ekọn̄ esiwotde. Se se mme mbụk Bible ẹwụtde.

Nditọ Jacob ẹma ẹsua Joseph eyenete mmọ tutu ẹnyam enye nte ofụn. (Genesis 37:4-28) Ke ukperedem, Edidem Saul eke Israel ama odomo ndiwot David. Ntak-a? Ke ntak ufụp. (1 Samuel 18:7-11; 23:14, 15) Ke akpa isua ikie, nditọete iban iba, Euodia ye Syntyche, ẹma ẹtọhọ, ndien utọk mmọ ikayakke esop enyene emem.—Philippi 4:2.

Ke mme isua emi ẹsụk ẹbede, utọk owo iba ẹkesiwak ndisụn̄ọ ke en̄wan oro ẹkamade akan̄kan̄ m̀mê n̄kpri ikan̄. Ẹma ẹsiwak ndiwot owo kiet, mîdịghe ẹbiom enye nsinsi ndo. Mfịn, mme owo ẹsiwak ndida uyat uyat ikọ ntọk mme asua mmọ. Okposụkedi owo mîsiduọkke iyịp, edida ikọ ntop ekọn̄ ekeme ndiyat owo esịt onyụn̄ abiat owo enyịn̄. Ekese ini, “ekọn̄” emi esikam abiat enyịn̄ mbon oro mîduehe.

Kere ban̄a se iketịbede n̄kpọ nte isua ifan̄ emi ẹkebede ke ini oku kiet ke Ufọkabasi Anglican ọkọtọkde oku efen ete ke enye adia okụk ufọkabasi. Utọk mmọ ama ọwọrọ ke eferife tutu ubahade odu ke ufọkabasi. Ndusụk mbon ufọkabasi oro ikesidụkke edinam ufọkabasi edieke ọkwọrọikọ usen oro ekedide owo oro mmọ mîmaha. Usua emi ama enen̄ede ọsọn̄ ubọk tutu mme owo ẹtre ndisioro kiet eken uyo ke esịt ufọkabasi. Ke ini ẹkedọhọde ke oku enye eken ama anam oburobụt ido idan̄, utọk emi ama etetịm ọsọn̄ ubọk.

Akwa Bishop eke Canterbury ama asua ọnọ  mmọ, onyụn̄ ọdọhọ ke utọk mmọ etie nte “udọn̄ọ kansa,” n̄ko nte ke enye edi “idiọk edinam oro esuenede enyịn̄ Ọbọn̄ Nnyịn.” Kiet ke otu mme oku emi ama enyịme ndisịn n̄wed n̄kpọn̄ utom oku ke 1997. Oku enye eken ikamaha ndisịn n̄wed n̄kpọn̄ utom oku edi ama aka iso anam tutu enye esịm isua oro akanade enye ọkpọn̄ utom, oro ekedi ke August 7, 2001, ke usen emi enye ekedide isua 70. N̄wedmbụk oro The Church of England Newspaper ọkọdọhọ ke usen oro enye ọkọkpọn̄de utom ekedi usen usọrọ “Edisana” Victricius. Anie ekedi “Edisana” Victricius? Enye ekedi bishop ọyọhọ isua ikie inan̄ emi ẹdọhọde nte ẹkemiade ke ntak emi enye mîkenyịmeke nditiene n̄n̄wana ekọn̄. N̄wedmbụk oro etịn̄ nte edu uwem bishop enye emi okokpụhọrede ye eke oku oro ọkọkpọn̄de utom ke esịmde isua 70, ete: ‘Oku oro ama enen̄ede eben̄e idem ndin̄wana ye oku enye eken, utu ke ndidọhọ ke imọ idin̄wanake nte “Edisana” Victricius ọkọdọhọde.’

Edieke mme oku emi ẹkpekedade item oro ẹkụtde ke Rome 12:17, 18 ẹsịn ke edinam, mmọ ẹkpekefep afanikọn̄ oro mmọ ẹkedade ẹsọk idemmọ ye mbon en̄wen. Itie N̄wed oro okot ete: “Ẹkûda idiọk ẹsio owo usiene idiọk. Ẹnọ se ifọnde ke enyịn kpukpru owo. Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.”

Afo akpanam n̄kpọ didie? Edieke owo eduede fi, ndi iyatesịt esinam fi ọtọn̄ọ utọk? Mîdịghe, ndi afo emesifep uyat uyat ikọ man emem odu? Edieke afo eduede owo, ndi afo emesidomo ndifep owo oro nnyụn̄ n̄kere ke esisịt ini ama ebe ke owo oro eyefre se iketịbede? Mîdịghe, ndi emesika ekekpe ubọk? Edide afo oyom owo efen ọnọ fi m̀mê afo efen ọnọ owo, ndidomo ndinam emem ọyọnọ fi inemesịt onyụn̄ ọnọ fi nsọn̄idem. Item Bible ekeme ndin̄wam nnyịn ikọk idem mme mfịna oro ẹbịghide, nte idikụtde ke ibuotikọ oro etienede.