Eti Item Ẹnọde Mme Ọdọ Ndọ
Eti Item Ẹnọde Mme Ọdọ Ndọ
“Yak iban ẹdu ke nsụkibuot ẹnọ mme ebe mmọ nte ẹnam ẹnọ Ọbọn̄. Mme ebe, ẹka iso ẹma iban mbufo.”—Ephesus 5:22, 25.
1. Nso idi nnennen usụn̄ oro ẹkpesede ndọ?
JESUS ọkọdọhọ ke ndọ ọwọrọ Abasi ndidian n̄wan ye eren man mmọ mbiba ẹkabade ẹdi “obụk kiet.” (Matthew 19:5, 6) Enye abuana owo iba emi ẹnyenede nsio nsio edu, emi ẹkpepde ndinyene ukem udọn̄ ẹnyụn̄ ẹsịnde ukeme ẹbịne ukem utịtmbuba. Ndọ edi mbọbọ nsinsi, idịghe ikpîkpu n̄kpọ emi ẹkemede ndibiat ini eke ẹmema. Ndọ isọn̄ke ndidianade ke ediwak idụt, edi Christian ada ndọ nte ndutịm Abasi. Ata akpan ntak esinam ẹdianade ndọ.—Matthew 19:9.
2. (a) Nso un̄wam ke mme ọdọ ndọ ẹnyene? (b) Ntak edide akpan n̄kpọ ndisịn ukeme man ẹkụt unen ke ndọ?
2 N̄wan kiet emi esinọde item ndọ ọkọdọhọ ete: “Eti ndọ akaka iso ndikpụhọde nte mbufa n̄kpọ ẹdade itie, nte ẹsede ẹban̄a mme mfịna oro ẹdemerede, ye nte ẹdade inyene oro ẹdude ẹnam n̄kpọ ke idaha kiet kiet ke uwem.” Amaedi ebe ye n̄wan emi ẹdide Christian, inyene oro esịne eti item emi ẹkụtde ke Bible, ibetedem emi ekemmọ mme andinịm ke akpanikọ ẹnọde, ye n̄kpet n̄kpet itie ebuana oro ẹnyenede ye Jehovah ebe ke akam. Ndọ oro okụtde unen esibịghi, ndien enye esinam ebe ye n̄wan ẹkop inemesịt ye uyụhọ ke ediwak isua. Ke edide akpan n̄kpọ akan, enye esida ukpono ọsọk Jehovah Abasi, kpa Anditọn̄ọ ndọ.—Genesis 2:18, 21-24; 1 Corinth 10:31; Ephesus 3:15; 1 Thessalonica 5:17.
Ẹkpebe Jesus ye Esop Esie
3. (a) Tịn̄ akpan n̄kpọ oro esịnede ke item oro Paul ọkọnọde mme ọdọ ndọ. (b) Nso eti uwụtn̄kpọ ke Jesus ekenịm?
3 Ke tọsịn isua iba emi ẹkebede, apostle Paul ama ọnọ mme ọdọ ndọ emi ẹdide Christian eti item ke ini enye ekewetde ete: “Nte esop osụkde ibuot ọnọ Christ, yak iban ẹtie kpasụk ntre n̄ko ye mme ebe mmọ ke kpukpru n̄kpọ. Mme ebe, ẹka iso ẹma iban mbufo, kpa nte Christ n̄ko akamade esop onyụn̄ ayakde idemesie ọnọ ke ibuot esie.” (Ephesus 5:24, 25) Nso eti uwụtn̄kpọ ke emi edi ntem! Iban emi ẹdide Christian, emi ẹsụkde idem ẹnọ mme ebe mmọ ẹkpebe esop ke ndifiọk nnyụn̄ n̄wụt ukpono nnọ ndutịm itieibuot. Mme ebe emi ẹnịmde ke akpanikọ, emi ẹkade iso ndima iban mmọ, edide ke mfọnọn̄kpọ m̀mê ke nsọn̄ọn̄kpọ, ẹwụt ke mmimọ imenen̄ede ikpebe uwụtn̄kpọ Christ ke nte enye amade onyụn̄ esede aban̄a esop.
4. Didie ke mme ebe ẹkeme ndikpebe uwụtn̄kpọ Jesus?
4 Mme ebe emi ẹdide Christian ẹdi ibuot ufọk mmọ, edi mmọ n̄ko ẹnyene Jesus nte ibuot mmọ. (1 Corinth 11:3) Ntem, kpa nte Jesus ekesede aban̄a esop esie, mme ebe ẹkpenyene ndise mban̄a iban mmọ ke ima ima usụn̄ ke n̄kan̄ eke spirit ye ke n̄kan̄ eke obụk, idem edieke oro oyomde ọkpọkpọ n̄waidem. Mmọ ẹkpenyene ndikere mban̄a mfọnọn̄kpọ ubon mmọ n̄kan mme ọkpọkpọ udọn̄ mmọ ye se mmọ ẹmade. Jesus ọkọdọhọ ete: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” (Matthew 7:12) Item emi enen̄ede enyene ebuana ye ndọ. Paul ama owụt emi ke ini enye ọkọdọhọde ete: “Mme ebe ẹkpema iban mmọ nte idem mmọ. . . . Baba owo kiet isuaha obụkidem esie; edi ọbọbọk onyụn̄ ekpeme enye.” (Ephesus 5:28, 29) Ebe ekpenyene ndinen̄ede mbọk nnyụn̄ n̄kpeme n̄wan esiemmọ kpa nte enye ekpemede onyụn̄ ọbọkde idemesie.
5. Didie ke ibanndọ ẹkeme ndikpebe esop Christian?
5 Iban emi ẹten̄ede Abasi ẹda esop Christian nte uwụtn̄kpọ. Ke ini Jesus okodude ke isọn̄, mme anditiene enye ẹma ẹnyịme ndikpọn̄ akani ubọkọkọ mmọ ntiene enye. Ke enye ama akakpa, mmọ ẹma ẹka iso ẹsụk ibuot ẹnọ enye, ndien ke se ibede n̄kpọ nte isua 2,000, ata esop Christian ke ososụk ibuot ọnọ Jesus onyụn̄ anam kpukpru se enye ọdọhọde. Kpasụk ntre, Christian iban isehe mme ebe mmọ ke ndek, inyụn̄ idomoke ndida ndutịm itieibuot oro N̄wed Abasi owụtde, ke usụhọde. Utu ke oro, mmọ ẹn̄wam ẹnyụn̄ ẹsụhọde idem ẹnọ mme ebe mmọ, ẹbere ye mmọ, ndien ke ntem ẹnọ mme ebe mmọ nsịnudọn̄. Ke ini ebe ye n̄wan ẹnamde n̄kpọ ke ima ima usụn̄ ntem, ndọ mmọ ọyọfọn ndien mmọ mbiba ẹyenyene idatesịt ke ndọ mmọ.
Ẹka Iso Ẹdụn̄ ye Mmọ
6. Ewe item ke Peter ọkọnọ mme ebe, ndien ntak emi edide akpan n̄kpọ?
6 Apostle Peter n̄ko ama etiene ọnọ mme ọdọ ndọ item, ndien enye ama etịn̄ ikọ nnennen nnennen ọnọ mme ebe. Enye ọkọdọhọ ete: “Ẹka iso ẹdụn̄ ye [iban mbufo] kpasụk ntre ke ifiọk, ẹnọde mmọ ukpono nte mmọ eke ẹmemde ẹkan, sia mbufo ye mmọ n̄ko ẹnyenede udeme ke ufọn uwem emi owo mîdotke, mbak n̄kpọ edibiọn̄ọ akam mbufo.” (1 Peter 3:7) Akpatre ikọ oro Peter etịn̄de ke ufan̄ikọ oro owụt nte item esie edide akpan n̄kpọ. Edieke ebe etrede ndikpono n̄wan esie, oro ayabiat itie ebuana esie ye Jehovah. N̄kpọ ọyọbiọn̄ọ akam esie.
7. Didie ke ebe okpokpono n̄wan esie?
7 Do, didie ke ebe ekeme ndinọ n̄wan esie ukpono? Owo ndinọ n̄wan esie ukpono ọwọrọ ndinam n̄kpọ ye enye ke ima ima usụn̄ nnyụn̄ nnọ enye uku. Etie nte ndifọn ido ntre ye n̄wan ekedi obufa n̄kpọ ọnọ ndusụk owo. Eyen ukpepn̄kpọ usem Greek ewet ete: “N̄wan ikenyeneke unen ndomokiet ke idak ibet Rome. Nte ekemde ye ibet, enye ekedi ukem ye eyenọwọn̄. . . . Enye ekenyene ndisụk idem ofụri ofụri nnọ ebe esie, ebe okonyụn̄ enyene ndibiere kpukpru n̄kpọ nnọ enye.” Emi okpụhọrede didie ntem ye ukpepn̄kpọ mme Christian! Edi ebe emi ekedide Christian ama esikpono n̄wan esie. Ikedịghe ekikere idemesie, edi mme edumbet Christian ẹkekara nte enye akanamde n̄kpọ ye n̄wan esie. Akan oro, enye ama ‘esida ifiọk’ odu uwem ye n̄wan esie, sia ọkọdiọn̄ọde ke enye emem akan.
Didie ke Iban Ẹdi “Mmọ Eke Ẹmemde Ẹkan”?
8, 9. Ke mme usụn̄ ewe ke iren ye iban ẹdi ukem?
8 Peter ndikọdọhọ ke iban ẹdi “mmọ eke ẹmemde ẹkan” iwọrọke ke iban inyeneke ifiọk nte iren m̀mê ke mmọ ẹmem ẹkan iren ke n̄kan̄ eke spirit. Edi akpanikọ ke ediwak irenowo ke esop ẹnyene ifetutom emi iban mîdorike enyịn ndinyene, iban ẹnyụn̄ ẹsụk ibuot ẹnọ mme ebe mmọ ke ubon. (1 Corinth 14:35; 1 Timothy 2:12) Kpa ye oro, ukem mbuọtidem, ime, ye n̄kokon̄ idaha ido uwem ke ẹyom ẹto iren ye iban. Ndien nte Peter ọkọdọhọde, mme ebe ye iban ẹdi mmọ emi “ẹnyenede udeme ke ufọn uwem emi owo mîdotke.” Amaedi n̄kpọ aban̄ade edinyan̄a, ebe ye n̄wan ẹdi ukem ukem ke iso Abasi. (Galatia 3:28) Peter ekewet n̄wed esie ọnọ mme Christian akpa isua ikie. Ntem, ikọ esie ama eti mme ebe emi ẹdide Christian ete ke sia mmọ ‘ẹtienede Christ ẹnyene udeme,’ ke mmọ ye iban mmọ ẹkenyene idotenyịn heaven kiet. (Rome 8:17) Usen kiet, iren ye iban ẹyenam utom nte mme oku ye ndidem ke Obio Ubọn̄ Abasi eke heaven!—Ediyarade 5:10.
9 Ke akpanikọ, itie mme Christian iban oro ẹkeyetde aran ikosụhọkede ikan eke mme ebe mmọ oro ẹkeyetde aran n̄ko. Ndien osụk edi ntre ye mbon oro ẹnyenede idotenyịn ndidụn̄ ke isọn̄. Iren ye iban emi ẹnamde “akwa otuowo” ẹyet ekụra mmọ ẹnam afia ke iyịp Eyenerọn̄. Iren ye iban ẹtoro Jehovah “uwemeyo ye okoneyo” ke ofụri ererimbot. (Ediyarade 7:9, 10, 14, 15) Iren ye iban ẹdori enyịn ndinyene “ubọn̄ ubọn̄ ifụre eke nditọ Abasi,” ke ini mmọ ẹdidude “ata uwem.” (Rome 8:21; 1 Timothy 6:19) Edide mmọ ẹsịne ke otu mbon oro ẹyetde aran m̀mê mme erọn̄ en̄wen, kpukpru Christian ẹnam n̄kpọ Jehovah ọtọkiet nte “otuerọn̄ kiet” ke idak “ekpemerọn̄ kiet.” (John 10:16) Nso akwa ntak ke ebe ye n̄wan emi ẹdide Christian ẹnyene ntem ndinọ kiet eken ukpono!
10. Ke usụn̄ ewe ke iban ẹdi “mmọ eke ẹmemde ẹkan”?
10 Sia edide ntre, ke usụn̄ ewe ke iban ẹdi “mmọ eke ẹmemde ẹkan”? Etie nte se Peter eketịn̄de ekedi ke iban isiwakke ndikponi nte irenowo, isinyụn̄ inyeneke odudu nte irenowo. Ke adianade do, sia nnyịn idide mme anana-mfọnmma owo, iban ndinyene utịbe utịbe ifet ediman nditọ esibọ mmọ odudu. Iban emi ẹdude ke isua uman-eyen ẹkeme ndinyene mfịna kpukpru ini. Enen̄ede oyom ẹtịm ẹse mmọ enyịn ẹnyụn̄ ẹkere ẹban̄a mmọ ke ini mmọ ẹsobode mme utọ mfịna oro ẹtode uyomo idịbi mi m̀mê ke ini ẹkopde ubiak uman. Ke ini ebe emi ọnọde n̄wan esie ukpono ọfiọkde nsịnudọn̄ emi n̄wan esie oyomde, oro eyetịp ekese esịn ke ndọ mmọ ndikụt unen.
Ke Ubon Oro Ẹkade Nsio Nsio Ido Ukpono
11. Ke usụn̄ ewe ke ndọ ekeme ndikụt unen idem ke ini ebe ye n̄wan ẹkade nsio nsio ido ukpono?
11 Nte ededi, nso edieke ebe ye n̄wan mîkaha ukem ido ukpono, koro owo kiet ke otu mmọ ọkọbọde akpanikọ ke mmọ ẹma ẹkedọ ndọ edi enye eken ibọhọ? Ndi utọ ndọ oro ekeme ndikụt unen? Ediwak utọ ndọ oro ẹkụt unen. Ebe ye n̄wan oro ẹkade nsio nsio ido ukpono ẹkeme ndikụt unen ke ndọ mmọ, sia ndọ oro osụk ekeme ndibịghi onyụn̄ ọnọ mmọ mbiba inemesịt. Akande oro, ndọ oro osụk enenen ke enyịn Jehovah ndien mmọ ẹsụk ẹdi “obụk kiet.” Mmọdo, ẹteme ebe m̀mê n̄wan emi edide Christian ẹte odụn̄ ye nsan̄a ndọ esie edieke nsan̄a oro enyịmede. Edieke mmọ ẹnyenede nditọ, nditọ oro ẹyebọ ufọn ẹto nsọn̄ọnda ete m̀mê eka oro edide Christian.—1 Corinth 7:12-14.
12, 13. Didie ke Christian iban ẹkeme ndida item Peter nsịn ke edinam man ẹn̄wam mme ebe oro mînịmke ke akpanikọ?
12 Peter ewet inem inem item ọnọ Christian iban emi mme ebe mmọ mînịmke ke akpanikọ. Mme ebe emi iban mmọ mînịmke ke akpanikọ ẹkeme nditiene nda item emi nsịn ke edinam n̄ko. Peter ewet ete: “Mbufo iban, ẹsụk idem ẹnọ mme ebe mbufo, man, edieke owo mmọ ekededi mîsụkke ibuot inọ ikọ Abasi, ẹkpedụri mmọ ẹda itoho ke ikọ edi oto ke edu uwem iban mmọ, koro ẹkụtde edisana edu uwem mbufo ọkọrọ ye ntotụn̄ọ ukpono.”—1 Peter 3:1, 2.
13 Edieke n̄wan ekemede ndida usọ nsian ebe esie se enye enịmde ke akpanikọ, oro ọkpọfọn etieti. Nte ededi, nso edieke ebe mîyomke ndikop? Se enye emekde edi oro. Edi, iwọrọke ke idotenyịn idụhe, sia eti edu uwem Christian ekeme ndinọ okopodudu ikọ ntiense. Ediwak ebe oro mîkenyeneke udọn̄ m̀mê oro ẹkekam ẹbiọn̄ọde-biọn̄ọ ido ukpono iban mmọ ẹma ẹkabade ẹdi “mbon oro ẹnyenede eti esịt ndinyene nsinsi uwem” ke ẹma ẹkekụt eti uwem iban mmọ. (Utom 13:48) Idem edieke ebe mîbọhọ akpanikọ, enye ekeme ndinen̄ede mma edu n̄wan esie, ke ntem anamde ndọ mmọ okụt unen. Ebe kiet emi n̄wan esie edide Ntiense Jehovah ama ọdọhọ ke tutu amama imọ idikemeke ndisịm n̄kokon̄ idaha Mme Ntiense Jehovah. Kpa ye oro, enye okokot idemesie “okop-inemesịt ebe ediye n̄wan,” onyụn̄ enen̄ede otoro n̄wan esie ye Mme Ntiense eken ke leta oro enye ekewetde ọnọ ẹsọk mme ewet n̄wedmbụk n̄kpọntịbe.
14. Didie ke mme ebe ẹkeme ndin̄wam iban mmọ oro mînịmke ke akpanikọ?
14 Mme ebe emi ẹdade item Peter ẹsịn ke edinam ẹmeda edu uwem mmọ ẹdụri iban mmọ ẹda n̄ko. Iban emi mînịmke ke akpanikọ ẹmekụt nte ebe mmọ ẹnen̄erede ẹdiọn̄ọ idem, ẹtre ndibiat okụk ke sika, mmịn, ye mbre mfọniso, inyụn̄ isụn̄ike aba owo. Ndusụk iban oro mînịmke ke akpanikọ mi ẹmemehe ye mme owo ke esop Christian. Ima ima itie nditọete enen̄ede akpa mmọ idem, ndien se mmọ ẹkụtde ke otu nditọete anam mmọ ẹsan̄a ẹkpere Jehovah.—John 13:34, 35.
“Ndedịbe Owo eke Esịt”
15, 16. Nso orụk edu ke Christian an̄wan ekeme ndida ndụri ebe oro mînịmke ke akpanikọ nda?
15 Nso orụk edu ekeme ndidụri ebe nda? Enen̄ede edi orụk edu oro Christian iban ẹkọride ke ndammana usụn̄. Peter ọdọhọ ete: “Ẹkûyak mbanaidem mbufo edi eke enyọn̄ enyọn̄ edidọk idet ye edisịne n̄kpọmbana gold m̀mê edisịne ekụra, edi ẹyak edi ndedịbe owo eke esịt eke odude ke edisịnen̄kpọ emi mîkemeke ndibiara emi edide sụn̄sụn̄ ye ifụre ifụre edu, emi ọsọn̄de urua ke enyịn Abasi. Koro ntem, n̄ko, ke ndisana iban emi ẹkedoride enyịn ke Abasi ẹkesikama idem ke eyo oko, ẹsụkde idem ẹnọ mme ebe mmọ, nte Sarah ekesikopde uyo ọnọ Abraham, okotde enye ‘ọbọn̄.’ Ndien mbufo ẹmekabade ẹdi nditọ esie, edieke mbufo ẹkam ẹkade iso ẹnam se ifọnde mînyụn̄ ifeheke baba n̄kpọ kiet eke esịnde owo ndịk ke idem.”—1 Peter 3:3-6.
16 Peter eketeme Christian an̄wan ete okûyak nte enye etiede ke enyọn̄ idem enen̄ede edi akpan n̄kpọ. Utu ke oro, ke enye ekpenyene ndiyak ebe esie okụt nte mme ukpepn̄kpọ Bible ẹkpụhọrede edu esịtidem esie. Ebe enyene ndikụt ke enye emen obufa owo esịne etiene nte enye anamde n̄kpọ. Ekeme ndidi enye oyokụt nte n̄wan okpụhọrede n̄kani edu oro enye ekenyenede. (Ephesus 4:22-24) Ke akpanikọ, ebe esie ayama “sụn̄sụn̄ ye ifụre ifụre edu” esie. Idịghe ebe esie kpọt edima orụk edu oro, edi edu emi ọsọn̄ “urua ke enyịn Abasi.”—Colossae 3:12.
17. Didie ke Sarah edi eti uwụtn̄kpọ ọnọ Christian iban?
17 Ẹsiak Sarah nte uwụtn̄kpọ, ndien enye edi eti uwụtn̄kpọ ọnọ Christian iban emi ẹdọde ndọ, edide mme ebe mmọ ẹnịm ke akpanikọ m̀mê inịmke. Sarah ekenen̄ede ada Abraham nte ibuot esie. Idem ke ọwọn̄esịt esie, enye okokot Abraham “ọbọn̄.” (Genesis 18:12) Edi oro ikosụhọkede enye itie. Enye ekenen̄ede edi ata owo Abasi emi ekenyenede ọkpọsọn̄ mbuọtidem ke Jehovah. Ke akpanikọ, enye edi ubak “akwa otu ntiense” emi akpanade uwụtn̄kpọ mbuọtidem mmọ ẹsịn udọn̄ ẹnọ nnyịn “ifehe mbuba eke ẹnịmde nnyịn ke iso.” (Mme Hebrew 11:11; 12:1) Christian an̄wan isụhọkede idemesie itie edieke enye etiede nte Sarah.
18. Mme edumbet ewe ke ẹkpeda ẹsịn ke edinam ke ufọk oro ebe ye n̄wan ẹkade nsio nsio ido ukpono?
18 Ebe osụk edi ibuot ke ufọk emi ebe ye n̄wan ẹkade nsio nsio ido ukpono. Edieke edide ebe enịm ke akpanikọ, enye oyokpono ido ukpono n̄wan esie okposụkedi enye mîdinamke n̄kpọ oro atuahade ye mbuọtidem esie nte Christian. Edieke edide n̄wan enịm ke akpanikọ, enye n̄ko idinamke n̄kpọ oro atuahade ye mbuọtidem esie. (Utom 5:29) Kpa ye oro, enye ididomoke ndinyan̄a itieibuot ye ebe esie. Enye enyene ndikpono itieibuot ebe esie nnyụn̄ nnịm “ibet ebe esie.”—Rome 7:2.
Ọniọn̄ Ọniọn̄ Item Bible
19. Nso idi ndusụk n̄kpọ oro ẹsịn̄ede ndọ, edi didie ke ẹkeme ndikan mme orụk n̄kpọ oro?
19 Ediwak n̄kpọ ẹkeme ndisịn̄ede ndọ mfịn. Ndusụk ebe imaha ndinam utom mmọ. Ndusụk iban imaha ndinyịme ke ebe mmimọ edi ibuot. Ndusụk mme ọdọ ndọ ẹsidiọk ndikama kiet eken. Akan oro, mfịna okụk, unana mfọnmma, ye edu ererimbot emi asan̄ade ye oburobụt ido ye ukwan̄ ekikere aban̄ade ido uwem ẹkeme ndisịn nsọn̄ọnda mme Christian ke udomo. Edi, iren ye iban emi ẹdide Christian emi ẹdade mme edumbet Bible ẹsịn ke edinam, inamke n̄kpọ m̀mê idaha mmọ etie didie, ẹsibọ edidiọn̄ Jehovah. Idem ọkpọkọm nsan̄a kiet kpọt ada mme edumbet Bible esịn ke edinam, n̄kpọ esifọn ke ubon akan emi owo ndomokiet mîkpadaha isịn. N̄ko-n̄ko, Jehovah enen̄ede ama onyụn̄ an̄wam mme asan̄autom esie oro ẹsọn̄ọde ẹda ẹnam akpanikọ ke ndọ mmọ idem ke ini ẹsobode mme mfịna. Enye ifreke nsọn̄ọnda mmọ.—Psalm 18:25; Mme Hebrew 6:10; 1 Peter 3:12.
20. Nso item ke Peter ọnọ kpukpru Christian?
20 Ke ama ọkọnọ iren ye iban oro ẹdọde ndọ item, apostle Peter ekeberi ye inem inem ikọ nsịnudọn̄ emi: “Ke akpatre, kpukpru mbufo ẹnyene ekikere kiet, ẹwụt edikere mban̄a, ẹnyene ima nditọete, ẹtua owo mbọm, ẹsụhọde idem, ẹkûda idiọk ẹsio owo usiene idiọk, m̀mê ndisụn̄i owo eke osụn̄ide mbufo, edi, utu ke oro, ẹnọ edidiọn̄, koro ẹkekot mbufo ke ntak emi, man mbufo ẹkpekeme ndibọ edidiọn̄.” (1 Peter 3:8, 9) Ke akpanikọ, emi edi ata eti item oro ẹnọde kpukpru nnyịn, akpan akpan mme ọdọ ndọ!
Nte Afo Emeti?
• Didie ke mme ebe emi ẹdide Christian ẹkpekpebe Jesus?
• Didie ke iban emi ẹdide Christian ẹkpekpebe esop?
• Ke mme usụn̄ ewe ke mme ebe ẹkeme ndikpono iban mmọ?
• Nso idi mfọnn̄kan n̄kpọ oro n̄wan emi ebe esie mîdịghe Christian akpanamde?
[Mme Mbụme Ukpepn̄kpọ]
[Ndise ke page 16]
Ebe emi edide Christian enyene ndima nnyụn̄ nse mban̄a n̄wan esie
N̄wan emi edide Christian enyene ndikpono nnyụn̄ nten̄e ebe esie
[Ndise ke page 17]
Sia mîbietke ibet Rome, mme ukpepn̄kpọ Christian ẹyom ebe okpono n̄wan esie
[Ndise ke page 18]
Iren ye iban emi ẹnamde “akwa otuowo” ẹdori enyịn ndidu nsinsi uwem ke Paradise
[Ndise ke page 20]
Sarah akada Abraham nte ọbọn̄ esie