Mbụkutom Africa

Ibat idụt: 56

Ibat mme andidụn̄: 770,301,093

Ibat mme asuanetop: 983,057

Ibat ukpepn̄kpọ Bible: 1,769,182

NTE afo ama ọfiọk ke ẹkwọrọ eti mbụk ke mme ikpehe desat Africa? Nafissatou edi eyen isua efịteba emi odụn̄de ke obio udọk ukan̄ kiet ke edem edere Niger. Ke ini otu nsan̄a ufọkn̄wed esie ẹketọn̄ọde ndineme nneme mban̄a n̄wed ye ndise idan̄, Nafissatou ama asan̄a adaha. Eyen ufọkn̄wed kiet ama etiene enye onyụn̄ obụp se iketịbede. Nafissatou ama ọbọrọ ete ke imọ ikamaha utọ nneme oro. Ke ntọn̄ọ ntọn̄ọ, n̄kaiferi oro akasasak enye onyụn̄ ọdọhọ ke nditop enyịn nse ndise idan̄ ikemeke ndifịna owo. Nafissatou ama ọdọhọ ke edinam emi ọdiọk etieti koro Andibot imaha mme utọ n̄kpọ ntre. Enye ama osio n̄wed oro Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn ke ekpat ufọkn̄wed esie owụt n̄kaiferi oro itie emi enemede aban̄a mme n̄kpọndịk oro ndise idan̄ akamade. Ekem enye ama osio Bible esie onyụn̄ okot 2 Corinth 7:1 ọnọ n̄kaiferi oro. N̄kaiferi oro ama enyịme ete ke ini imọ ikesede oburobụt vidio, ke ọkpọsọn̄ udọn̄ oro imọ mîkemeke nditịn̄ nte asan̄ade ama edemede imọ ke idem. Enye ama ọdọhọ ẹnọ imọ n̄wed N̄kparawa Owo Ẹbụp. Nafissatou ama ọnọ enye onyụn̄ ọdọhọ ke ukperedem ete: “Ke ini n̄kafiakde n̄kụt enye, enye okodu ikpọn̄, ntre mma mbụp enye m̀mê mme ufan esie ẹkedu m̀mọ̀n̄. Enye ama ọbọrọ ete, ‘N̄wed emi edi ufan mi.’ Mma ntọn̄ọ ndikpep n̄kpọ ye enye ndien enye ama odụk Editi.”

Ke se iwakde ikan isua 15 oro ẹkebede, eyenete an̄wan oro ekedide isụn̄utom ama ekpep Bible ye n̄wan kiet ke Tanzania. Ẹma ẹnịm ukpepn̄kpọ emi ke ediwak isua. N̄wan emi ama emen̄e ndisọn̄ọ nda nnọ akpanikọ ke ntak oro ubon esie ẹkebiọn̄ọde enye, ndien ke akpatre ẹma ẹtre ndikpep enye n̄kpọ. Nte ededi, n̄kpri nditọiban esie iba ẹma ẹsikpan̄ utọn̄ ke ini ẹkesikpepde eka mmọ n̄kpọ. Ke ini adiaha esie ọkọwọrọde ọkpọn̄ ufọk ke ini ekesịmde isua 18, enye ama ọsọsọp aka Ufọkmbono Obio Ubọn̄ ọkọdọhọ ẹkpep imọ n̄kpọ. Enye ama anam usọp usọp n̄kọri onyụn̄ ana baptism. Udun̄wan-eka esie ama ọdọhọ ẹkpep Bible ye imọ n̄ko, ndien enye n̄ko ama ana baptism. Mmọ mbiba ndisọn̄ọ nda nnam akpanikọ ama esịn udọn̄ ọnọ eka mmọ, enye ama onyụn̄ afiak ọtọn̄ọ ndikpep Bible. Isan̄ enye emi, enye ama akan ndịk owo oro mîkayakke enye anam n̄kọri, ndien enye ama ana baptism ke mbono circuit ke May 2004.

Ke ini esop ẹnamde ewụhọ “ndise mban̄a nditọakpa ye mme ebeakpa ke ukụt mmọ,” Jehovah isitreke ndinọ edidiọn̄ esie. (James 1:27) Ntre ke ekedi ke esop kiet ke Lesotho. Owo kiet oro ama akana baptism ke esop oro ekekere Mapolo. Enye ekedi n̄wan emi ọbọkde n̄kpri nditọiren inan̄ ikpọn̄. Mapolo ama ọfiọk ke udọn̄ọ oro imọ idọn̄ọde oyowot imọ; ke ntre, enye ama ekpep nditọ esie ndise mban̄a idemmọ. Enye ama ekpep Bible ye mmọ, esida mmọ aka mme mbono esop, onyụn̄ ekpep mmọ ndikwat ayan̄, oro mmọ ẹkesinyamde ke mbenusụn̄. Ke ini Mapolo akakpade ke 1998, ekaeka nditọ emi ekese aban̄a mmọ. Eyenete an̄wan kiet oro edide isụn̄utom, emi akan̄wamde Mapolo akabade edi Ntiense oro ama akana baptism ama okosobo ye itieutom use n̄kpọ mban̄a mfọnọn̄kpọ nditọakpa ke ibuot nditọ emi onyụn̄ esibọ okụk ufọkn̄wed ọnọ mmọ. Mme Ntiense eken ẹma esinọ nditọiren emi ọfọn̄. Ekem eka eka mmọ ama akpa. Eyenete eren kiet ke esop ama ekpep Bible ye mmọ onyụn̄ ekpe okụk ufọk mmọ. Nditọiren mbinan̄ ẹsidụk mme mbono esop kpukpru ini. Iba ke otu mmọ edi mme asuanetop oro mînaha baptism, ndien Rantso, akpaneka mmọ, emi edide isua 20 idahaemi ama ana baptism ke mbono circuit ke March 2004. Enye ama enịm ukpepn̄kpọ Bible ye Retselisitsoe emi edide eyen eyeneka eka esie, oro akanade baptism  ke usen oro n̄ko. Rantso ọdọhọ ke imọ imenen̄ede iwụt esịtekọm iban̄a ima ima edikere mban̄a oro nditọete ẹkewụtde imọ ye nditọeka imọ ke ediwak isua.

Isụn̄utom kiet ke Cameroon obụk ete: “Nte n̄kesikpepde Bible ye akparawa kiet kpukpru urua, mma nsikop nte owo esịnede ke ufọk ọkwọ ikwọ ido ukpono. Mma mbụp eyen ukpepn̄kpọ mi nte, ‘Anie edi ọkwọ ikwọ emi owo mîsikwe mi?’ Ekedi Stephen eyeneka esie emi edide nnan. Mma mbre kaset ediye uduot ekpri n̄wed Nso ke Abasi Oyom Oto Nnyịn? nda ntọn̄ọ ukpepn̄kpọ Bible ye Stephen. Utịtmbuba nnyịn ekedi ndimụm itie Bible kiet ndọn̄ ke ibuot ke ukpepn̄kpọ kiet kiet oro inịmde. Stephen esinen̄ede eti n̄kpọ onyụn̄ esimụm ediwak itie Bible ọdọn̄ ke ibuot. Enye esidụk mme mbono esop n̄ko esinyụn̄ awak ndinọ mme ibọrọ. Ke ndondo emi, enye ama ọnọ akpa utịn̄ikọ esie ke Ufọkn̄wed Utom Ukara Abasi. Edikot Bible ke ekedi, ndien sia Stephen mîfiọkke ndikot n̄wed mme nnan, akana enye omụm ọdọn̄ ke ibuot. Mmodori enyịn ndimụm Stephen ubọk nsan̄a ke an̄wautom ke mîbịghike. Kiet ke otu itie N̄wed Bible oro Stephen amade akan edi Isaiah 35:5, emi ọdọhọde ete: ‘Enyịn ayan̄wan̄a mme nnan.’ Stephen adat esịt sia enyịn eke spirit esie ama an̄wan̄wan̄a, ndien idahaemi enye ọkwọ itoro ọnọ Jehovah, ọkọm enye nte ke ini iso ke ata enyịn imọ ayan̄wan̄a.”

Ke Liberia oro ekọn̄ an̄wanade, n̄wan kiet oro ekerede Nancy ama osobo ye Ntiense kiet onyụn̄ ọdọhọ enye ekpep imọ Bible. Pastọ ufọkabasi mmọ ọkọdọhọ enye ke Abasi edinọ Mme Ntiense Jehovah ẹka hell sia mmọ ẹdide mme Christian nsu. Nte ededi, enye odụn̄ ekpere ndusụk Mme Ntiense, ndien enye esikụt nte ke ini ekededi oro ẹtrede nditop ikan̄ ke esisịt ini, ke mbiowo n̄kann̄kụk ẹsisan̄a ẹse nte n̄kpọ etiede ye nditọete mmọ. Enye ama okụt n̄ko ke Mme Ntiense ẹsida ini oro ekpri emem odude ẹkwọrọ ikọ ẹnọ mbon efen. Nancy ye ediwak mbon eken ke obio ẹma ẹkop inemesịt ke ini ubomisọn̄ otode n̄kọk itieutom ekedide akpa ubomisọn̄ ndibe ndụk edem oro mmọ ẹkedude. Ubomisọn̄ emi akada mme n̄kpọ un̄wam oro ẹkenen̄erede ẹyom edi, emi Mme Ntiense ke France ye Belgium ẹketịpde. N̄wan emi ama ọdọhọ ete: “N̄kere ke mbufo ẹnyene akpanikọ.” Enye ama enen̄ede anam n̄kọri ke ukpepn̄kpọ esie.

Akparawa kiet ama edi ekpri obio kiet ke Uganda ndidiọn̄ ufọk emi nditọete ẹkesinịmde mme mbono esop. Kiet ke otu mme asiakusụn̄ ama ada ifet oro ọnọ ọbọpufọk emi ikọ ntiense, ndien akparawa emi ama ama se enye okokopde. Nte ededi, ikebịghike enye ama afiak ọnyọn̄ ekpri obio mmọ emi okodude nsannsan ke enyọn̄ obot. Sia Mme Ntiense mîkodụhe ke ebiet oro eren emi okodụn̄de, asiakusụn̄ emi ama asian enye ebiet emi enye edikemede ndikụt Ufọkmbono Obio Ubọn̄ oro ekperede akan. Akparawa emi ama awat enan̄ukwak esie ke n̄kpọ nte kilomita 30 ke mfafaha usụn̄ emi owo mîsịnke itai osụhọde obot oro man okoyom nditọete. Sia enye mîkekwe owo ndomokiet ke Ufọkmbono Obio Ubọn̄ oro, enye ama ewet n̄kpọ afak ke idak enyịnusụn̄ ete ẹdikpep Bible ye imọ. Ke ini asiakusụn̄ akakade ndisobo ye enye ke obio mmọ, idem ama akpa enye ndikụt nte owo 200 ẹtiede ẹbet ndikop etop Bible! Ediwak mmọ ẹma ẹnyene ata udọn̄ ndikpep Bible. Ẹsinịm mme mbono esop idahaemi ke nsannsan ikpehe emi.

Ke ekpri obio kiet emi n̄kpọ nte owo 600 ẹdụn̄de ke n̄kan̄ ufọt edem usụk ye edem usiahautịn Nigeria, mme andidụn̄ ekpri obio emi ẹma ẹkụt un̄wana ke ikpaenyọn̄ ke mfụn̄mfụn̄ mbubịteyo nte ayamade ke akpammọn̄. Eketie nte un̄wana emi akasasan̄a ebịne mmọ, ke ntre mmọ ẹma ẹfen̄e ẹyom ebiet ubọhọ. Ediwak owo ẹkekere ke emi ekedi nsobo oro Mme Ntiense Jehovah ẹsikwọrọde ẹban̄a, ke ntre mmọ ẹma ẹfen̄e ẹka Ufọkmbono Obio Ubọn̄, ẹdọhọde ẹte, “Armageddon idisoboke ufọk enye emi.” Ke akpatre, ke n̄kpọ nte n̄kanika duop okoneyo, mmọ ẹma ẹdifiọk ke un̄wana emi okoto akwa ikan̄ oro akasakde ke ikọt. Ke ini nditọete ẹkebụpde mme andidụn̄ ekpri obio oro ntak emi mmọ mîkefeheke ika mme ufọkabasi oro ẹkedude ẹkpere, eren kiet ama ọbọrọ ete: “Mme ufọkabasi eken iwọrọke n̄kpọ. Armageddon mbufo oyosobo mmọ edi idisoboke Ufọkmbono Obio Ubọn̄.”