“Ẹkedep Mbufo ke Ekọmurua”
“Ẹkedep Mbufo ke Ekọmurua”
“Ẹkedep mbufo ke ekọmurua. Ntre ndien, ẹnọ Abasi ubọn̄.”—1 CORINTH 6:20.
1, 2. (a) Ibet Moses ọkọdọhọ ẹnam n̄kpọ didie ye nditọ Israel oro ẹkedide ifịn? (b) Nso ke ofụn oro akamade eteufọk esie ekenyene ndimek?
N̄WED oro, Holman Illustrated Bible Dictionary ọdọhọ ke “edisịn owo ke ufụn ekedi ọsọ edinam oro ẹkenyịmede ntatara ntatara ke eset.” N̄wed oro adian do ete: “Utom oro ifịn ẹkenamde okofori Egypt, Greece, ye Rome. Ke eyo mme Christian akpa isua ikie, owo kiet ke otu owo ita ke Italy ye owo kiet ke otu owo ition ke mme idụt en̄wen ẹkedi ifịn.”
2 Okposụkedi ifịn ẹkedude ke Israel n̄ko, Ibet Moses ama anam ẹkụt ẹte ke ẹkpeme nditọ Israel oro ẹkedide ifịn. Ke uwụtn̄kpọ, Ibet ama owụk ete eyen Israel okûnam utom nte ofụn ebe isua itiokiet. Enye ekenyene ‘ndiwọrọ ufụn ke ikpîkpu’ ke ọyọhọ isua itiaba. Mme ewụhọ oro ẹkekarade nte ẹkpenamde n̄kpọ ye ifịn ẹma ẹnen̄ede ẹfọn ẹnyụn̄ ẹwụt esịtmbọm tutu Ibet Moses ama anam ndutịm oro etienede mi: “Edieke ofụn oro ọdọhọde ke akpanikọ, ete, Mmama ete mi, ye n̄wan mi, ye nditọ mi; nyomke ndiwọrọ ufụn: ndien ete esie ada enye ọsọk mme ebiereikpe; onyụn̄ ada enye aka ke itịm, m̀mê obubọk enyịn-usụn̄; ndien ete esie ada utịbi-n̄kpọ etịbi enye utọn̄; ndien enye edidi ofụn esie ke nsinsi.”—Exodus 21:2-6; Leviticus 25:42, 43; Deuteronomy 15:12-18.
3. (a) Nso orụk ufụn ke mme Christian akpa isua ikie ẹkenyịme ndidụk? (b) Nso inụk nnyịn ndinam n̄kpọ Abasi?
3 Ndutịm oro ẹkenamde ẹnọ owo oro ekenyịmede ndika iso ndi ofụn okowụt orụk ufụn oro ata mme Christian ẹdidụkde. Ke uwụtn̄kpọ, Paul, James, Peter, ye Jude emi ẹketienede ẹwet Bible ẹkedọhọ ke mmimọ idi ifịn Abasi ye ifịn Christ. (Titus 1:1; James 1:1; 2 Peter 1:1; Jude 1) Paul ama eti mme Christian ke Thessalonica ete ke mmọ ẹma ‘ẹkpọn̄ ndem mmọ ẹwọn̄ọde ẹtiene Abasi man ẹdụk ufụn ẹnọ odu-uwem ye Abasi akpanikọ.’ (1 Thessalonica 1:9) Nso ikanam mme Christian oro ẹnyịme ndidi ifịn Abasi? Ọfọn, nso ikanam eyen Israel oro ekedide ofụn esịn ndiwọrọ ufụn? Nte idịghe ima oro enye akamade eteufọk esie? Ima oro mme Christian ẹmade Abasi anam mmọ ẹdụk ufụn ẹnọ enye. Ke ini nnyịn idide idifiọk inyụn̄ imade ata odu-uwem Abasi, emi esinụk nnyịn ndinam n̄kpọ esie ke ‘ofụri esịt, ye ke ofụri ukpọn̄ nnyịn.’ (Deuteronomy 10:12, 13) Nte ededi, nso ke ndidi ifịn Abasi ye ifịn Christ abuana? Didie ke emi otụk uwem nnyịn eke usen ke usen?
“Ẹnam Kpukpru Ẹnọ Abasi Ubọn̄”
4. Nnyịn isan̄a didie idi ifịn Abasi ye ifịn Christ?
4 Ẹkabade ofụn nte “owo emi owo efen adade nte ata ata inyene esie m̀mê emi mbon en̄wen ẹdade nte ata ata inyene mmọ, emi anade osụk ibuot ọyọhọ ọyọhọ ọnọ mme andinyene enye.” Nnyịn ikabade idi ata ata inyene Jehovah ke ini iyakde idem nnyịn inọ enye inyụn̄ ina baptism. Apostle Paul anam an̄wan̄a ete: “Idịghe mbufo ẹnyene idem mbufo, koro ẹkedep mbufo ke ekọmurua.” (1 Corinth 6:19, 20) Ekọmurua oro edi uwa ufak Jesus Christ, koro uwa ufak Christ anam Abasi enyịme nnyịn nte mme asan̄autom esie, edide nnyịn idi mme Christian oro ẹyetde aran, m̀mê idi nsan̄a mmọ oro ẹnyenede idotenyịn edidu uwem ke isọn̄. (Ephesus 1:7; 2:13; Ediyarade 5:9) Ntem, “nnyịn idi eke Jehovah” ọtọn̄ọde ke ini oro ikanade baptism. (Rome 14:8) Sia ẹdade ọsọn̄urua iyịp Jesus Christ ẹdep nnyịn, nnyịn n̄ko idi ifịn esie onyụn̄ obiomo nnyịn ndinịm ibet esie.—1 Peter 1:18, 19.
5. Nte ifịn Jehovah, nso akpan mbiomo ke nnyịn inyene, ndien didie ke nnyịn ikeme ndise mban̄a emi?
5 Ifịn ẹnyene ndikop item nnọ mme eteufọk mmọ. Nnyịn inyịme ndidi ifịn sia imade Eteufọk nnyịn. Akpa N̄wed John 5:3 ọdọhọ ete: “Emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” Do, ima oro imade Abasi anam nnyịn ikop item esie inyụn̄ isụk ibuot inọ enye. Ẹkụt emi ke kpukpru n̄kpọ oro nnyịn inamde. Paul ọkọdọhọ ete: “Edide mbufo ẹdia n̄kpọ m̀mê ẹn̄wọn̄ n̄kpọ m̀mê ẹnam n̄kpọ ekededi, ẹnam kpukpru n̄kpọ ẹnọ Abasi ubọn̄.” (1 Corinth 10:31) Nnyịn iyom ndiwụt ke uwem nnyịn eke usen ke usen, idem ke n̄kpri n̄kpọ, nte ke nnyịn “idụk ufụn inọ Jehovah.”—Rome 12:11.
6. Didie ke nnyịn ndidi ifịn Abasi otụk ubiere oro inamde? Nọ uwụtn̄kpọ.
6 Ke uwụtn̄kpọ, ke ini inamde ubiere, oyom nnyịn inen̄ede ikere iban̄a uduak Andinyene nnyịn emi odude ke heaven, kpa Jehovah. (Malachi 1:6) Ke ini iyomde ndinam ubiere oro ẹsọn̄de, ekeme ndisọn̄ nnyịn ndisụk ibuot nnọ Abasi. Do, nte nnyịn iyanam item esie utu ke nditiene mme udọn̄ ‘abian̄a abian̄a’ esịt nnyịn oro ‘abiarade fap?’ (Jeremiah 17:9) Esisịt ini ke Melisa, n̄kaiferi Christian emi mîdọhọ ndọ, ama akana baptism, akparawa kiet ama ọtọn̄ọ ndinyene udọn̄ ke idem esie. Eketie nte ke akparawa emi edi eti owo, n̄ko enye ke ekekpep Bible ye Mme Ntiense Jehovah. Nte ededi, ebiowo kiet ama enyene nneme ye Melisa aban̄a nte owụtde eti ibuot ndinam ewụhọ Jehovah oro ọdọhọde idọ “ke Ọbọn̄ ikpọn̄-ikpọn̄.” (1 Corinth 7:39; 2 Corinth 6:14) Melisa ọdọhọ ete: ‘Ikememke utom ndinam item emi. Edi mma mbiere ke sia mma n̄kayak idemmi nnọ Abasi man nnam uduak esie, ke nyanam in̄wan̄-in̄wan̄ item esie.’ Ke Melisa ama eketie ekere se iketịbede, enye ọdọhọ ete: “Esịt enen̄ede adat mi ndikanam item oro. Ikebịghike, akparawa oro ama etre ndikpep Bible. Edieke mmen̄kpeketreke itie ebuana oro, ọwọrọ ke idahaemi n̄kpọdọ owo oro mînịmke ke akpanikọ.”
7, 8. (a) Ntak emi ofụri ekikere nnyịn mîkpedịghe ndinem owo esịt? (b) Nọ uwụtn̄kpọ ke nte ẹkemede ndikan ndịk owo.
7 Sia idide ifịn Abasi, inaha nnyịn ikabade idi ifịn owo. (1 Corinth 7:23) Ke nditịn̄ akpanikọ, idụhe owo nnyịn ndomokiet oro mîyomke ẹma imọ, edi ana nnyịn iti ke mme idaha Christian ẹkpụhọde ye eke ererimbot. Paul okobụp ete: “Nte nyom ndinem owo esịt?” Enye ama ọbọrọ ete: “Edieke n̄kposụk nnemde owo esịt, n̄kpedịghe ofụn Christ.” (Galatia 1:10) Nnyịn ikpoyomke ndikpebe ubọkn̄ka man inem mmọ esịt. Nso ndien ke nnyịn ikpanam ke ini ubọkn̄ka nnyịn ẹyomde nnyịn ikpebe mmọ?
8 Kere ban̄a uwụtn̄kpọ Elena, n̄kaiferi Christian ke Spain. Ediwak nsan̄a ubet ukpepn̄kpọ esie ẹma ẹsision̄o iyịp mmọ ẹnọ ẹda ẹkịm ẹsịn owo ke idem. Mmọ ẹma ẹfiọk ke sia Elena edide kiet ke otu Mme Ntiense Jehovah, ke enye idisioho iyịp esie inọ ẹda ẹkịm ẹsịn owo ke idem idinyụn̄ inyịmeke ẹkịm iyịp ẹsịn imọ ke idem. Ntre ke ini ifet ekebererede ọnọ Elena ndinam idaha esie kaban̄a n̄kpọ emi an̄wan̄a nditọ ubet ukpepn̄kpọ esie, enye ama enyịme ndinọ utịn̄ikọ mban̄a emi. Elena ọdọhọ ete: ‘Ke nditịn̄ akpanikọ, idem ama enen̄ede enyek mi ndinọ utịn̄ikọ emi. Edi mma ntịm idem edifọn edifọn, ndien utịp oro n̄kenyenede ama akpa mi idem. Ediwak ekemmọ nditọ ufọkn̄wed ẹma ẹkpono mi, andikpep ama onyụn̄ asian mi ete ke imama utom oro n̄kanamde. Ke akande kpukpru, mma n̄kop inemesịt ndin̄wana nnọ enyịn̄ Jehovah, mma nnyụn̄ n̄keme ndinam mme owo ẹnen̄ede ẹfiọk ntak oro n̄ketienede mme edumbet N̄wed Abasi.’ (Genesis 9:3, 4; Utom 15:28, 29) Ih, nte ifịn Abasi ye ifịn Christ, nnyịn idi isio. Nte ededi, mme owo ẹkeme ndikpono nnyịn edieke nnyịn iben̄ede idem ndida edu ukpono nnam se nnyịn inịmde ke akpanikọ an̄wan̄a.—1 Peter 3:15.
9. Nso ke nnyịn ikpep ito angel oro okowụtde apostle John idem?
9 Nditi nte ke nnyịn idi ifịn Abasi ekeme ndin̄wam nnyịn n̄ko isụhọde idem. Ini kiet, n̄wọrọnda n̄kukụt oro apostle John okokụtde aban̄a Jerusalem eke heaven ama enen̄ede otụk enye tutu enye ọduọ ke isọn̄ oyom ndituak ibuot ke ukot angel emi eketịn̄de ikọ ke ibuot Abasi. Angel oro ama ọdọhọ enye ete: “Kpeme idemfo! Kûnam oro! Ami ndi sụk ekemmọ ofụn nte afo ye nditọete fo emi ẹdide mme prọfet ye mmọ eke ẹnịmde mme ikọ n̄wed emi. Tuak ibuot nọ Abasi.” (Ediyarade 22:8, 9) Nso eti uwụtn̄kpọ ke angel oro ekenịm ntem ọnọ kpukpru ifịn Abasi! Ndusụk Christian ẹkeme ndinyene akpan ifetutom ke esop. Kpa ye oro, Jesus ọkọdọhọ ete: “Owo ekededi eke oyomde ndikabade ndi akwa owo ke otu mbufo ana edi asan̄autom mbufo, owo ekededi eke onyụn̄ oyomde ndidi akpa ke otu mbufo ana edi ofụn mbufo.” (Matthew 20:26, 27) Kpukpru nnyịn oro itienede Jesus idi ifịn.
“Se Inamde Edi kpa Se Nnyịn Ikpanamde”
10. Nọ mme uwụtn̄kpọ N̄wed Abasi oro ẹwụtde ke isidịghe mmemmem n̄kpọ kpukpru ini inọ mme anam-akpanikọ asan̄autom Abasi ndinam uduak esie.
10 Isidịghe mmemmem n̄kpọ kpukpru ini inọ mme anana-mfọnmma owo ndinam uduak Abasi. Prọfet Moses ama emen̄e ke ini Jehovah ọkọdọhọde enye aka okosio nditọ Israel ke ufụn Egypt. (Exodus 3:10, 11; 4:1, 10) Ke ini ẹkedọhọde Jonah aka akatan̄a etop ubiereikpe ọnọ mbon Nineveh, enye ama “adaha ke enyọn̄, ete ifehe ika Tarshish, ikpọn̄ iso Jehovah.” (Jonah 1:2, 3) Baruch emi ekedide ewetn̄wed Jeremiah, ama eseme ke imakpa mba. (Jeremiah 45:2, 3) Didie ke nnyịn ikpanam n̄kpọ ke ini n̄kpọ oro nnyịn imade atuahade ye edinam uduak Abasi? Uwụtn̄kpọ oro Jesus ọkọnọde ọbọrọ mbụme emi.
11, 12. (a) Bụk uwụtn̄kpọ Jesus oro ẹwetde ke Luke 17:7-10, ibio ibio. (b) Nso ke nnyịn ikpep ito uwụtn̄kpọ Jesus?
11 Jesus ama etịn̄ aban̄a ofụn oro ekekpemede otuerọn̄ eteufọk esie ke in̄wan̄ toto ke usenubọk tutu esịm mbubịteyo. Ke ofụn emi ama ọkọnyọn̄ in̄wan̄ edi, akpade mba ke ntak ọkpọsọn̄ utom oro enye akanamde ke n̄kpọ nte hour 12, eteufọk esie ikọdọhọke enye osụhọde etetie adia udia mbubịteyo. Utu ke oro, eteufọk esie ọkọdọhọ ete: “Nam udia mbubịteyo nọ mi ndia, nyụn̄ bọbọ mbọbọ san̄a utom nọ mi tutu ndia nnyụn̄ n̄n̄wọn̄ n̄kpọ mma, ekem afo ayadia onyụn̄ ọn̄wọn̄ okwo.” Ofụn oro ekekeme ndise mban̄a idemesie n̄kukụre ke ama ọkọnọ eteufọk esie udia. Jesus eketre uwụtn̄kpọ oro ke ndidọhọ: “Ntre mbufo, n̄ko, ke ini mbufo ẹnamde kpukpru se ẹnọde mbufo ẹnam, ẹdọhọ ẹte, ‘Nnyịn idi ifịn eke mînyeneke ufọn. Se inamde edi kpa se nnyịn ikpanamde.’”—Luke 17:7-10.
12 Jesus ikọnọhọ uwụtn̄kpọ emi man owụt ke Jehovah iwụtke esịtekọm iban̄a ukeme oro nnyịn isịnde ke utom esie. Bible etịn̄ in̄wan̄-in̄wan̄ ete: “Abasi ikwan̄ake nte efrede utom ye ima eke mbufo ẹwụtde ẹban̄a enyịn̄ esie.” (Mme Hebrew 6:10) Akpan n̄kpọ oro uwụtn̄kpọ Jesus owụtde edi ke ofụn ikemeke ndinem idemesie esịt m̀mê ndiwụk ntịn̄enyịn ke nte enye okpokopde inemesịt. Ke ini ikayakde idem inọ Abasi inyụn̄ imek ndidi ifịn esie, nnyịn ima inyịme ke iyanam uduak esie ebem eke nnyịn iso. Ntre, nnyịn inyene ndinam uduak Abasi ebem eke nnyịn iso.
13, 14. (a) Ke mme idaha ewe ke nnyịn ikeme ndiyak mme n̄kpọ oro imade ẹtak? (b) Ntak emi ikpayakde edinam uduak Abasi edi ebeiso n̄kpọ?
13 Ekeme ndiyom isịn ọkpọsọn̄ ukeme man ika iso ikpep Ikọ Abasi ye mme n̄wed oro “ofụn emi anamde akpanikọ onyụn̄ enyenede ọniọn̄” osion̄ode. (Matthew 24:45) Oyoyom isịn ọkpọsọn̄ ukeme emi, akpan akpan edieke esisọn̄de nnyịn ndikot n̄wed mîdịghe edieke n̄wed oro nnyịn ikotde enemede “mme ntotụn̄ọ n̄kpọ Abasi.” (1 Corinth 2:10) Do, nte nnyịn ikposioho ini inịm inọ ọkpọkpọ ukpepn̄kpọ? Ekeme ndiyom inọ idem nnyịn ntụnọ man ikeme ndinen̄ede nda ini n̄kpep n̄kpọ. Edi, edieke nnyịn mînamke ntre, didie ke edidọn̄ nnyịn ndidia ‘ọkpọsọn̄ udia emi enyenede mbon oro ẹkọride ẹsịm ọyọhọ idaha’?—Mme Hebrew 5:14.
14 Nso kaban̄a mme usen oro isikpade mba ke ntak ọkpọsọn̄ utom? Ekeme ndiyom isịn ọkpọsọn̄ ukeme man idụk mme mbono esop Christian. Mîdịghe ekeme ndidi isidọn̄ke nnyịn ndikwọrọ ikọ nnọ isenowo. Paul ke idemesie ama ọfiọk ke mme ini ẹkeme ndidu oro nnyịn itan̄ade eti mbụk ke ‘ini emi nnyịn mîkpamaha ndinam ntre.’ (1 Corinth 9:17, The New English Bible) Nte ededi, nnyịn inam mme n̄kpọ emi koro Jehovah—edima Eteufọk nnyịn eke heaven—ọdọhọ nnyịn inam ntre. Ndi nnyịn isikopke uyụhọ inyụn̄ ikop idem inem ke ima ikesịn ukeme ndikpep n̄kpọ, ndidụk mme mbono esop, nnyụn̄ n̄kwọrọ ikọ?—Psalm 1:1, 2; 122:1; 145:10-13.
‘Ẹkûse Edem’
15. Didie ke Jesus ekenịm uwụtn̄kpọ ke ndisụk ibuot nnọ Abasi?
15 Jesus Christ ama owụt ke ata n̄wọrọnda usụn̄ ke imosụk ibuot inọ Ete imọ eke heaven. Enye akasian mme mbet esie ete: “N̄kotoho ke heaven nsụhọde ndi ndinam uduak idemmi, edi ndinam uduak enye emi ọkọdọn̄de mi.” (John 6:38) Ke ini enye okodude ke ọkpọsọn̄ ubiak ke In̄wan̄ Gethsemane, enye ama ọbọn̄ akam ete: “Ete mi, edieke usụn̄ odude, yak cup emi ebe ọkpọn̄ mi. Edi, okûdi nte ami nduakde, edi yak edi nte afo aduakde.”—Matthew 26:39.
16, 17. (a) Didie ke nnyịn ikpese mme n̄kpọ oro ikọkpọn̄de ke edem? (b) Wụt nte Paul akabatde mme n̄kpọ oro enye ekpenyenede ke ererimbot nte “mbio.”
16 Jesus Christ oyom nnyịn isọn̄ọ ida ke ubiere oro inamde ndidi ifịn Abasi. Enye ọkọdọhọ ete: “Baba owo kiet emi akabarede ese edem ke enye ama ekesịn ubọk ke ufụn̄isọn̄ ikemeke ndinam utom obio ubọn̄ Abasi.” (Luke 9:62) Ke akpanikọ, ifọnke ndika iso n̄kere mban̄a mme n̄kpọ oro ikọkpọn̄de ke edem ke ima ikakabarede idi ifịn Abasi. Utu ke oro, nnyịn ikpenyene ndinen̄ede n̄wụt esịtekọm mban̄a ufọn oro ibọde ke ntak imekde ndidi ifịn Abasi. Paul ekewet ọnọ ẹsọk mbon Philippi ete: “Ami ke akpanikọ n̄ko mbat kpukpru n̄kpọ ke ntakurua ke ntak akakan ifiọk Christ Jesus Ọbọn̄ mi. Ke ntak esie mmenyịme kpukpru n̄kpọ ke ntakurua nnyụn̄ mbat mmọ ke mbio, man n̄kpenyene Christ.”—Philippi 3:8.
17 Kere ban̄a kpukpru n̄kpọ oro Paul akabatde ke mbio onyụn̄ ayakde atak man enyene inyene eke spirit nte ofụn Abasi. Enye ama ọkpọn̄ uwem inemesịt oro okodude ke ererimbot onyụn̄ efre aban̄a ifet oro enye ekpekenyenede ndikabade ndi adausụn̄ Ido Ukpono Mme Jew. Edieke Paul akpakakade iso ke Ido Ukpono Mme Jew, eyedi enye ekpekenyene ukem akamba itie oro Simeon emi ekedide eyen Gamaliel—kpa andikpep Paul—ekenyenede. (Utom 22:3; Galatia 1:14) Simeon ama akabade edi adausụn̄ mme Pharisee onyụn̄ enen̄ede enyene ubọk ke en̄wan oro mme Jew ẹken̄wanade ye ukara Rome ke 66-70 E.N., okposụkedi enye ekenyenede eyịghe aban̄a en̄wan oro. Eyedi n̄ka ukpọtiọ mme Jew m̀mê mbonekọn̄ Rome ẹkewot enye ke en̄wan oro.
18. Nọ uwụtn̄kpọ oro owụtde nte edibịne mme n̄kpọ eke spirit asan̄ade ye edidiọn̄?
18 Ediwak Mme Ntiense Jehovah ẹkpebe uwụtn̄kpọ Paul. Akparawa oro ekerede Jean ọdọhọ ete: ‘Ke ufan̄ isua ifan̄ ke mma n̄kokụre n̄wed, mma nnyene utom nte andiwet n̄wed nnọ ọwọrọetop ekpeibet kiet ke London. Mma mma utom mi, ẹma ẹnyụn̄ ẹkpe mi ediwak okụk, edi ke esịt mi mma mfiọk ke mmekeme ndinam ekese ke utom Jehovah. Ke akpatre, mma nsịn n̄wed n̄kpọn̄ utom nnyụn̄ ntọn̄ọ usiakusụn̄. Mmenen̄ede n̄kop inemesịt ke n̄kanam oro ke n̄kpọ nte isua 20 emi ẹkebede! Utom uyọhọ ini oro nnamde enen̄ede ofori uwem mi akan nte utom ewetn̄wed ekededi okpoforide. Idụhe n̄kpọ ndomokiet oro enen̄erede ọnọ uyụhọ nte edikụt nte Ikọ Jehovah okpụhọrede uwem mme owo. Edi n̄kpọ inemesịt nditiene mbuana ke ndinam mme owo ẹkpụhọde edu mmọ. Nnyịn ikemeke ndimen se nnyịn inọde Jehovah ndomo ye se enye ọnọde nnyịn.”
19. Nso ikpedi ubiere nnyịn, ndien ntak-a?
19 Mme idaha nnyịn ẹkeme ndikpụhọde nte ini akade. Edi uyakidem nnyịn nnọ Abasi ikpụhọkede. Nnyịn isụk idi ifịn Jehovah, ndien enye oyom nnyịn ibiere mfọnn̄kan usụn̄ oro ididade ini, odudu, usọ, ye mme inyene nnyịn eken inam n̄kpọ. Ntem, ubiere oro nnyịn inamde ke afan̄ emi ekeme ndiwụt ima oro nnyịn imade Abasi. Ubiere emi ekeme ndiwụt n̄ko adan̄a nte nnyịn inyịmede ndinam n̄waidem. (Matthew 6:33) Inamke n̄kpọ m̀mê nso idaha ke nnyịn idu, ndi nnyịn ikpebiereke ndisịn ofụri ukeme nnam utom Jehovah? Paul ekewet ete: “Edieke unyịme akam odude, etịm odot ẹbọ nte ekemde ye se owo enyenede, idịghe se owo mînyeneke.”—2 Corinth 8:12.
“Mbufo Ẹmenyene Mfri Mbufo”
20, 21. (a) Nso mfri ke ifịn Abasi ẹn̄wụm? (b) Didie ke Jehovah esidiọn̄ mbon oro ẹsịnde ofụri ukeme mmọ ẹnam utom esie?
20 Ndidi ifịn Abasi idịghe mbiomo. Utu ke oro, enye anam nnyịn iwọrọ ke ibak ibak ufụn oro mîyakke nnyịn ikop inemesịt. Paul ekewet ntem ete: “Sia ẹma ẹkenam mbufo ẹwọrọ ufụn idiọkn̄kpọ edi ẹkabade ẹdi ifịn Abasi, mbufo ẹmenyene mfri mbufo ke usụn̄ edisana ido, ndien utịt edi nsinsi uwem.” (Rome 6:22) Nnyịn ndidụk ufụn nnọ Abasi anam nnyịn in̄wụm mfri ke usụn̄ edisana ido, ọwọrọde ke nnyịn imọbọ ufọn ke ndinyene edisana ido m̀mê ndidu edisana uwem. Akan oro, emi ayanam nnyịn inyene nsinsi uwem ke ini iso.
21 Jehovah esitat ubọk ọnọ ifịn esie n̄kpọ. Ke ini isịnde ofụri ukeme inam utom esie, enye eyeberede “window heaven” onyụn̄ an̄wan̄a ‘nti n̄kpọ ọnọ nnyịn tutu akaha.’ (Malachi 3:10) Nso idatesịt ke edidi ntem ndika iso nnam n̄kpọ Jehovah nte ifịn esie ke nsinsi nsinsi!
Nte Afo Emeti?
• Ntak emi nnyịn ikabarede idi ifịn Abasi?
• Didie ke nnyịn iwụt ke imenyịme ndinam uduak Abasi?
• Ntak emi nnyịn ikpeben̄ede idem ndinam uduak Jehovah ebem eke nnyịn iso?
• Ntak emi nnyịn ‘mîkpesehe mme n̄kpọ oro ikọkpọn̄de ke edem’?
[Mme Mbụme Ukpepn̄kpọ]
[Ndise ke page 16, 17]
Ndutịm oro ẹkenamde ke Israel ẹnọ owo oro ekenyịmede ndika iso ndi ofụn okowụt orụk ufụn oro mme Christian ẹdidụkde
[Ndise ke page 17]
Nnyịn ikabade idi ifịn Abasi ke ini inade baptism
[Ndise ke page 17]
Mme Christian ẹda edinam uduak Abasi ke ebeiso n̄kpọ
[Ndise ke page 18]
Moses ama emen̄e ndika utom oro ẹkedọn̄de enye