Didie ke Jesus Christ Enyene Odudu ke Idemfo?

KE IKEREDE iban̄a se ikenemede ke ibuotikọ oro ekebemde iso, eyịghe idụhe nte ke se Jesus ekekpepde otụk ofụri ererimbot. Nte ededi, mbụme oro nnyịn owo kiet kiet ikpobụpde idem nnyịn edi, “Ndi mme n̄kpọ oro Jesus ekekpepde ẹnyene odudu ke idemmi?”

Mme n̄kpọ oro Jesus ekekpepde ẹma ẹsịne nsio nsio ibuotikọ. Nti n̄kpọ oro mmọ ẹkpepde ẹkeme nditụk ofụri usụn̄ uwem fo. Ẹyak ineme se Jesus ekekpepde aban̄a edimek mme ebeiso n̄kpọ ke uwem, edinam ufan ye Abasi, edinyene eti itie ebuana ye mbon en̄wen, edikọk mme mfịna, ye nte ẹkemede ndifep edinam afai.

Mek Mme Ebeiso N̄kpọ

Ererimbot mfịn emi ẹdude uwem itọk itọk ada ekese ini ye odudu nnyịn tutu anam isifre mme n̄kpọ eke spirit. Da owo emi nnyịn idikotde Jerry, emi odude ke iduọk isua 20, ke uwụtn̄kpọ. Okposụkedi Jerry esimade  ndineme mban̄a mme n̄kpọ eke spirit, esinyụn̄ enen̄erede ama se enye ekpepde oto mme n̄kpọ oro, enye eseme ete: “Nsinyeneke ini ndibuana ke mme n̄kpọ emi kpukpru ini. Nsinam utom usen itiokiet ke urua. Sunday edi n̄kukụre usen nduọkodudu mi. Ndien ke mma n̄kanam mme n̄kpọ oro nnyenede ndinam, mmesikpa mba.” Edieke afo enyenede ukem mfịna emi, afo emekeme ndibọ ufọn nto se Jesus ekekpepde ke Ukwọrọikọ Oro ke Obot.

Jesus ọkọdọhọ otuowo oro ẹkekpan̄de utọn̄ ẹnọ enye ete: “Ke ntak emi ndọhọ mbufo nte: Ẹtre nditịmede esịt mban̄a ukpọn̄ mbufo ẹte ididia nso m̀mê idin̄wọn̄ nso, m̀mê ẹban̄a ikpọkidem mbufo ẹte idisịne nso. Nte ukpọn̄ ikanke udia, ikpọkidem inyụn̄ ikanke edisịnen̄kpọ? Ẹtịm ẹse mme inuen enyọn̄, koro mmọ isuanke n̄kpasịp inyụn̄ idọkke-dọk inyụn̄ itan̄ke ibon ke ubet ubonn̄kpọ; edi Ete mbufo eke heaven ọbọk mmọ. Nte mbufo isọn̄ke urua ikan mmọ? . . . Mmọdo ẹkûtịmede esịt ẹnyụn̄ ẹdọhọ ẹte, ‘Nnyịn ididia nso?’ m̀mê, ‘Nnyịn idin̄wọn̄ nso?’ m̀mê, ‘Nnyịn idisịne nso?’ Sia kpukpru emi ẹdi mme n̄kpọ emi mme idụt ẹbịnede ye ọkpọsọn̄ udọn̄. Koro Ete mbufo eke heaven ọfiọk ke mbufo ẹmeyom kpukpru n̄kpọ emi. Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ eken ẹnọ mbufo.” (Matthew 6:25-34) Nso ke nnyịn ikpep ito emi?

Jesus ikọdọhọke nnyịn ifre enyịn iban̄a mme n̄kpọ obụkidem oro nnyịn ye ubon nnyịn iyomde. Bible ọdọhọ ete: “Edieke owo ekededi mîtịmke n̄kpọ inọ ikọt esie, akpan akpan mbonufọk esie, enye akan̄ mbuọtidem onyụn̄ ọdiọk akan owo eke mînịmke ke akpanikọ.” (1 Timothy 5:8) Nte ededi, Jesus ama ọn̄wọn̄ọ ke edieke nnyịn inịmde mme n̄kpọ eke spirit akpa, ke Abasi ayanam nnyịn inyene mme n̄kpọ eken oro iyomde. N̄kpọ oro ikpepde ito Jesus mi edi ndimek se idide ebeiso n̄kpọ. Ndinam item emi anam owo enyene inemesịt, koro “inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.”—Matthew 5:3.

Nam Ufan ye Abasi

Mbon oro ẹkerede ẹban̄a unana mmọ ke n̄kan̄ eke spirit ẹdiọn̄ọ ufọn edinam ufan ye Abasi. Didie ke nnyịn ikeme ndinyene eti itie ebuana ye owo ekededi? Ndi idịghe nnyịn ndidomo nditịm mfiọk owo oro? Ana ida ini ikpep iban̄a mme ekikere, edu, ukeme, se enye anamde, se enye amade, ye se enye mîmaha. Ukem oro ke edi ye edinam ufan ye Abasi. Oyom itịm ifiọk enye. Ke ini ọkọbọn̄de akam ọnọ Abasi aban̄a mme mbet esie, Jesus ọkọdọhọ ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Ih, oyom nnyịn ifiọk Abasi man inam ufan ye enye. Ikọ Abasi, kpa Bible, edi n̄kukụre n̄wed emi ifiọk oro odude. (2 Timothy 3:16) Ana nnyịn isio ini inịm inọ edikpep N̄wed Abasi.

Nte ededi, ifiọk kpọt ikemke. Kpa ke akam oro, Jesus ọkọdọhọ ete: “Mmọ [mme mbet esie] ẹmenịm ikọ fo.” (John 17:6) Inaha nnyịn inyene ifiọk Abasi kpọt edi oyom inam n̄kpọ ekekem ye ifiọk oro. Ndi idịghe nte nnyịn ikpakabarede idi ufan Abasi edi oro? Nte nnyịn ikpenịm ke itie ufan nnyịn ye owo ọyọsọn̄ edieke nnyịn ikoide-koi inam n̄kpọ ke usụn̄ oro atuahade ye ekikere ye mme edumbet owo oro? Do, akpana ekikere ye mme edumbet Abasi ẹda nnyịn usụn̄ ke nte idude  uwem. Kere ban̄a nte edumbet esie iba ẹnyenede n̄kpọ ndinam ye itie ebuana nnyịn ye mbon en̄wen.

Nyene Eti Itie Ebuana ye Mbon En̄wen

Isan̄ kiet, Jesus ama obụk ibio ibio mbụk ndida nnọ eti ukpep ke nte ẹkpenyenede eti itie ebuana. Enye ama etịn̄ aban̄a edidem oro okoyomde ndinam ibat ye mme asan̄autom esie. Ndien owo kiet ke otu mmọ ama akama akamba isọn emi enye mîkenyeneke usụn̄ nte osiode. Edidem oro ama ọnọ uyo ete ẹnyam owo oro, n̄wan esie, ye nditọ esie ẹda ẹkpe isọn oro. Akama-isọn ama ọduọ ke isọn̄ ekpe ubọk ete: “Nyene ime ye ami nyekpe fi kpukpru.” Edidem ama atua enye mbọm onyụn̄ abiat isọn oro efep. Ke ama akadaha ọkpọn̄ edidem, ofụn oro ama okụt ekemmọ ofụn oro akakamade enye esisịt okụk, onyụn̄ ọdọhọ enye ekpe imọ okụk imọ. Okposụkedi ekemmọ ofụn ekekpede enye ubọk ete atua imọ mbọm, akpa ofụn oro ama anam ẹsịn enye ke ufọk-n̄kpọkọbi tutu enye ekpe ofụri isọn oro enye akakamade. Ke ini edidem okokopde emi, enye ama ayat esịt onyụn̄ obụp ete: “Nte afo . . . ukpatuaha ekemmọ ofụn mbọm, kpa nte ami n̄katuade fi mbọm?” Ntem enye ama ọdọhọ ẹkọbi ofụn oro mîkefenke inọ ekemmọ ofụn do tutu enye osio kpukpru se enye akakamade. Jesus ama etịn̄ se mbụk oro ekpepde, ke ndidọhọ: “Kpasụk ntre ke Ete mi eke heaven edinam ye mbufo edieke mbufo mîfenke eyenete mbufo ito esịt.”—Matthew 18:23-35.

Nnyịn imesinam ediwak ndudue sia nnyịn idide mme anana-mfọnmma owo. Nnyịn ikemeke ndikpe Abasi akamba isọn oro ikamade enye ke ntak oro iduede enye. N̄kukụre n̄kpọ oro ikemede ndinam edi ndikpe enye ubọk efen ọnọ nnyịn. Jehovah Abasi n̄ko eben̄e idem ndifen ofụri ndudue nnyịn, amakam edi nnyịn imefen inọ nditọete nnyịn. Nso okopodudu ukpepn̄kpọ ke emi edi ntem! Jesus ekekpep mme anditiene enye ete ẹbọn̄ akam ntem: “Fen nọ nnyịn ke isọn eke nnyịn ikamade, kpa nte nnyịn n̄ko ifende inọ mmọ eke ẹkamade nnyịn isọn.”—Matthew 6:12.

Kọk Mme Mfịna ke Nditre Ntak Mmọ

Jesus ama enen̄ede ọfiọk nte obot-owo etiede. Item oro enye ọkọnọde aban̄a edikọk mme mfịna ama aka anyan ekesịm editre mme ntak mfịna. Kere ban̄a uwụtn̄kpọ iba oro ẹtienede mi.

Jesus ọkọdọhọ ete: “Mbufo ẹma ẹkop ẹte ẹkedọhọ mbon eset ẹte, ‘Kûwot owo; edi owo ekededi eke owotde owo ẹyekot enye ẹte edinam ibat ke esopikpe.’ Nte ededi, ndọhọ mbufo nte owo ekededi eke akade iso ndiyat esịt ye eyenete esie ẹyekot enye ẹte edinam ibat ke esopikpe.” (Matthew 5:21, 22) Mi Jesus ọkọdọhọ ke idịghe afai esinen̄ede anam ẹwot owo. Edi ke se owotowo oro ekerede ke esịt esie esidi ntak. Edieke mme owo mîkpayakke iyatesịt ọkọri mmọ ke esịt, mmọ ikpokohokoi inam afai. Ẹkpetre ekese uduọkiyịp didie ntem edieke ẹkpedade ukpepn̄kpọ emi ẹsịn ke edinam!

Tịm fiọk nte Jesus eketịn̄de ntak mfịna efen oro esidade akwa mfụhọ edi. Enye ọkọdọhọ otuowo ete: “Mbufo ẹma ẹkop ẹte ẹkedọhọ ẹte, ‘Kûsịn efịbe.’ Edi ndọhọ mbufo nte owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ama ke esịt esie ye enye. Ndien edieke enyịn nnasia fo oro anamde fi atuak ukot ọduọ, wụbede enye top duọk.” (Matthew 5:27-29) Jesus ekekpep ke mfịna oro aka anyan akan oburobụt ido oro ke idemesie. Oburobụt udọn̄ esidi ntak oburobụt edinam. Edieke owo etrede ndikere mme n̄kpọ oro mîdotke onyụn̄ osion̄ode mmọ efep ke ekikere esie, do enye ekeme ndifep oburobụt ido.

“Sịn Akan̄kan̄ Fo ke Itie Esie”

Ke okoneyo oro ẹketapde Jesus ẹnọ, kiet ke otu mbet esie ama osio akakan̄ ndinyan̄a Jesus. Edi Jesus ama akpan enye ete: “Sịn akan̄kan̄ fo ke itie esie, koro kpukpru owo eke ẹmende akan̄kan̄ ẹdikpa ke akan̄kan̄.” (Matthew 26:52) Ke ndan̄nsiere, Jesus ama ọdọhọ  Pontius Pilate ete: “Obio ubọn̄ mi idịghe ubak ererimbot emi. Edieke obio ubọn̄ mi ekpedide ubak ererimbot emi, mme asan̄autom mi ẹkpen̄wana mbak ẹdiyak mi ẹsịn mme Jew ke ubọk. Edi, obio ubọn̄ mi itoho ebiet emi.” (John 18:36) Nte ukpepn̄kpọ emi isịneke ifiọk?

Akpa mme Christian ẹkenam n̄kpọ didie ẹban̄a ukpep oro Jesus ọkọnọde ete ẹtre afai? N̄wed oro The Early Christian Attitude to War ọdọhọ ete: “Sia mmọ [mme ukpepn̄kpọ Jesus] ẹkedọhọde ke kpukpru edinam afai ye edinọ mbon en̄wen unan ẹdi idiọkn̄kpọ, ana in̄wan̄-in̄wan̄ nte ke ẹma ẹkpan edibuana ke ekọn̄ . . . Akpa mme Christian ẹma ẹnam se Jesus eketịn̄de ketket, mmọ ẹma ẹnyụn̄ ẹfiọk ke Jesus ekekpep mmimọ ndinyene sụn̄sụn̄ ido nnyụn̄ mfep afai afai unyan̄a-idem. Mmọ ẹma ẹnen̄ede ẹnyene emem ke ido ukpono mmọ; mmọ ẹma ẹnen̄ede ẹsịn ekọn̄ sia enye esisan̄ade ye uduọkiyịp.” N̄kpọ okpokpụhọde didie ntem edieke kpukpru owo oro ẹdọhọde ke idi Christian ẹkpenen̄erede ẹda ukpepn̄kpọ emi ẹsịn ke edinam!

Afo Emekeme Ndibọ Ufọn nto Kpukpru N̄kpọ Oro Jesus Ekekpepde

Mme n̄kpọ oro Jesus ekekpepde oro nnyịn inemede mi ẹfọn, ẹmem, ẹnyụn̄ ẹkop odudu. Ubonowo ekeme ndibọ ufọn nto edimehe ye mme n̄kpọ oro enye ekekpepde nnyụn̄ nda mmọ nsịn ke edinam. *

Mme Ntiense Jehovah oro ẹdude ke mbọhọ mbufo ẹyenem esịt ndin̄wam fi okụt nte ekemede ndibọ ufọn nto ata nti n̄kpọ oro akanam ẹkpepde. Nnyịn imenen̄ede isịn udọn̄ inọ fi ite osobo ye mmọ mîdịghe wet n̄wed nọ ẹsọk adres oro odude ke page 2 ke magazine emi.

[Ikọ idakisọn̄]

[Ndise ke page 5]

“Ete mbufo eke heaven ọbọk mmọ”

[Ndise ke page 7]

Mme n̄kpọ oro Jesus ekekpepde ẹkeme ndinen̄ede ntụk uwem fo