‘Ebiet Ọsọn̄urua Ndatndat Itiat’

APOSTLE John ama okụt n̄kukụt ubọn̄ ubọn̄ ebekpo ke heaven. Enye emi etiede ke ebekpo oro ekebiet “itiat jasper.” Enye ekebiet n̄ko “ọsọn̄urua ndatndat itiat.” (Ediyarade 4:2, 3) Nso orụk itiat ke mmọ ẹkedi?

Mmọ ikedịghe ndisọn̄ itiat emi enyọn̄ enyọn̄ mmọ kpọt ẹyamade. Ke eset, ẹkesida ikọ Greek oro ẹkabarede “jasper” ndiwọrọ itiat emi ẹnyenede nsio nsio uduot, esịnede mme ọsọn̄urua itiat emi ẹtiede nte akrasi. Ke n̄wed esie oro Word Pictures in the New Testament, A. T. Robertson ọdọhọ ke “itiat jasper” ke Ediyarade 4:3 ‘ikedịghe mmemurua jasper eyomfịn.’ Akan oro, ke utịt utịt n̄wed Ediyarade, John etịn̄ nte Jerusalem eke heaven etiede, ete: “Uyama esie ekebiet ata ọsọn̄urua itiat, nte itiat jasper emi ayamade nte crystal.” (Ediyarade 21:10, 11) Etie nte mme itiat oro John etịn̄de aban̄a ẹketie nte akrasi.

Enye oro ẹdọhọde ke etie ke ebekpo ke n̄kukụt oro John okokụtde edi Owo oro enyenede ubọn̄ akan ke ekondo, kpa Jehovah Abasi. Enye enen̄ede asana onyụn̄ eden̄i ke mfọnmma usụn̄. Man ekekem ye emi, apostle John ekewet ete: “Abasi edi un̄wana ndien ekịm baba kiet inyeneke ebuana ye enye.” (1 John 1:5) Ntem, John ama ọdọhọ ekemmọ mme andinịm ke akpanikọ ete ‘ẹnam idemmọ ẹsana kpa nte Jehovah edide edisana.’—1 John 3:3.

Nso ke ana nnyịn inam man Abasi abat nnyịn ke edisana? Enen̄ede oyom nnyịn inyene mbuọtidem ke iyịp Christ oro ẹkeduọkde man ẹfen mme idiọkn̄kpọ nnyịn. Ana nnyịn ika iso n̄ko ‘isan̄a ke un̄wana’ ebe ke ndikpep Bible kpukpru ini nnyụn̄ ndu uwem ekekem ye mme n̄kpọ oro Bible ekpepde.—1 John 1:7.