“Un̄wam Mi Oto Jehovah”

Mme Uyen Oro Ẹtorode Jehovah Ẹfori Uwem Mmọ

“NYOM ndinyene mfọnn̄kan n̄kpọ ke uwem!” Ntre ke uyen kiet emi edide n̄kpọ nte isua 15 eketịn̄ aban̄a se enye oyomde. Edi didie ke uyen ekeme ndinyene mfọnn̄kan n̄kpọ ke uwem? Bible ọbọrọ nnennen nnennen ete: “Ti Andibot fi ke ini afo edide uyen!”—Ecclesiastes 12:1, Contemporary English Version.

Nditoro nnyụn̄ nnam n̄kpọ Jehovah idịghe n̄kpọ ikpọ owo kpọt. Samuel eyen Elkanah ye Hannah, ekedi ata ekpri ke ini enye akanamde utom Jehovah ke ataya. (1 Samuel 1:19, 20, 24; 2:11) Ekpri eyenan̄wan Hebrew kiet ama owụt ke imenyene mbuọtidem ke Jehovah ke ini enye eketemede Naaman, akwa owoekọn̄ Syria, ete ebịne Elisha man ẹkọk akpamfia esie. (2 Ndidem 5:2, 3) Ke Psalm 148:7, 12, ẹteme n̄kparawa ye nditọiban ẹte ẹtoro Jehovah. * Ke ini enye ekedide isua 12 kpọt, Jesus ama enen̄ede enyene ifịk ke utom Ete esie. (Luke 2:41-49) Ke ntak ukpep oro ẹkedade N̄wed Abasi ẹnọ mmọ, nditọiren emi ẹkekụtde Jesus ke temple ẹma ẹfiori ẹte: “Mbọk, nyan̄a Eyen David!”—Matthew 21:15, 16.

Nditoro Jehovah Mfịn

Mfịn, ediwak uyen ke otu Mme Ntiense Jehovah ẹkop inemesịt ẹban̄a se mmọ ẹnịmde ke akpanikọ ẹnyụn̄ ẹda uko ẹsian mbon en̄wen ke ufọkn̄wed ye ke mme ebiet en̄wen se mmọ ẹnịmde ke akpanikọ. Kere ban̄a uwụtn̄kpọ iba emi.

Ke Britain, otu nditọ ubet ukpepn̄kpọ mme Stephanie emi edide isua 18 ẹkeneme usion̄o idịbi ye mme n̄kpọ eken ẹban̄ade eti ido uwem. Andikpep ama ọsọn̄ọ etịn̄ ke ẹnyịme usion̄o idịbi idahaemi ntatara ntatara, ndien ke ntre ke n̄kaiferi ndomokiet inyeneke ntak ndisịn ndision̄o idịbi. Ke ini kpukpru owo ke ubet ukpepn̄kpọ oro ẹkenyịmede ekikere emi, ama ọdọn̄ Stephanie nditịn̄ mban̄a se enye enịmde ke akpanikọ, oro ọkọn̄ọde ke Bible. Ifet ama ebererede ke ini andikpep okobụpde Stephanie ekikere esie. Okposụkedi idem ekenyekde enye ke ntọn̄ọ ntọn̄ọ, Stephanie ama ada ifet oro etịn̄ ekikere N̄wed Abasi. Enye ama okot oto Exodus 21:22-24 onyụn̄ anam an̄wan̄a ke edieke akwan̄ade ndinọ eyen oro mîmanake kan̄a unan, oro owụt ke usion̄o idịbi atuaha ye uduak Abasi.

Akanam andikpep oro, emi edide ọkwọrọ ederi, ikotke mme ufan̄ikọ emi. Uko uko ikọ ntiense Stephanie ama anam enye eneme n̄kpọ ke nsio nsio ibuotikọ ye otu ubet ukpepn̄kpọ esie. Idahaemi n̄kaiferi kiet ke otu mmọ esibọ mbufa nsiondi Enyọn̄-Ukpeme ye Awake! kpukpru ini, n̄kaiferi iba en̄wen ẹma ẹdụk mbono district eke Mme Ntiense Jehovah man ẹkụt nte Stephanie anade baptism nte idiọn̄ọ ediyak idem esie nnọ Abasi.

Vareta, eyen an̄wan isua itiokiet emi odụn̄de ke Suriname, Edem Usụk America, ama ada ini oro andikpep esie okoyomde ndọn̄esịt otode N̄wed Abasi otoro Abasi. Ke andikpep ama akafiak n̄wed usen ita, enye ama obụp nditọ ufọkn̄wed ke usen oro enye akafiakde ọtọn̄ọ n̄wed m̀mê mmọ ẹdiọn̄ọ se ikanamde imọ ifiak n̄wed.  Mmọ ẹma ẹbọrọ ẹte: “N̄kọ ọkọdọdọn̄ọ?” Andikpep oro ama ọbọrọ ete, “Baba. Adiahaeka mi akakpa, ndien ami mmokop mfụhọ etieti. Ntre mbufo ẹkûnam uyom.”

Ke adan̄aemi eka esie akanade ede idap uwemeyo usen oro, Vareta ama odụn̄ọde n̄kani magazine okot mme ibuotikọ mmọ. Enye ama okụt Enyọn̄-Ukpeme eke July 15, 2001, emi ibuotikọ edide “Ndi Uwem Odu ke N̄kpa Ebede?” Sia okokopde nduaidem etieti, enye ama edemede eka esie ke idap onyụn̄ ọdọhọ enye ete, “Mama, Mama, sese! Mmokụt magazine oro aban̄ade n̄kpa emi ndinọde andikpep nnyịn!” Ẹma ẹnọ magazine oro ye leta emi Vareta ekewetde ẹsọk andikpep oro. Enye ekewet ete: “Afo enyene magazine emi. Afo ayafiak okụt adiahaeka fo ke Paradise koro akananam Jehovah isụho nsu. Enye ọmọn̄wọn̄ọ ndida Paradise ndi; idịghe ke heaven, edi ke isọn̄.” Andikpep oro ama enen̄ede owụt esịtekọm aban̄a ndọn̄esịt otode Bible mi, oro mme ibuotikọ magazine emi ẹnọde.

Nditịm Idem Nnọ Ini Iso

Jehovah edi “Abasi inemesịt,” enye onyụn̄ oyom mme uyen ẹkop inemesịt. (1 Timothy 1:11) Ikọ esie ọdọhọ ete: “Dara ke uyen fo; yak esịt fo onyụn̄ enem fi ke usen emi afo edide akparawa.” (Ecclesiastes 11:9) Jehovah okụt n̄kpọ ebe idahaemi onyụn̄ ọfiọk mme utịp ini iso oro nti ye ndiọi edinam ẹdidade ẹdi. Ntak edi oro Ikọ esie etemede n̄kparawa owo ete: “Nyụn̄ ti Andibot fi ke ini afo edide akparawa, ke ini ukụt mîka-idịghe kan̄a, ke mme isua eke afo edidọhọde ete, N̄kwe inem ke esịt, mîka-isịmke (fi).”—Ecclesiastes 12:1.

Ih, Jehovah oyom mme uyen ẹnen̄ede ẹdara uwem. N̄kparawa ẹkeme ndidu uwem oro ọnọde uyụhọ ye utịp ebe ke nditi nnyụn̄ ntoro Abasi. Idem ke ini ẹsobode mme mfịna, mmọ ẹkeme nditịn̄ uko uko ẹte: “Un̄wam mi oto Jehovah.”—Psalm 121:2, NW.

[Ikọ idakisọn̄]

[Se ẹwetde ke ikpọ abisi ke page 9]

“Ẹtie ke enyọn̄ ẹtoro Jehovah, . . . n̄kparawa ye nditọ-iban.”—PSALM 148:7, 12

[Ekebe ke page 8]

JEHOVAH ỌNỌ N̄KPARAWA OWO IBETEDEM

“Koro afo, O Ọbọn̄ Jehovah, edide idotenyịn mi; ye ibetedem mi, ọtọn̄ọde ke ini uyen mi.”—Psalm 71:5.

[Abasi] emi adade eti n̄kpọ oyụhọ uyai fo; onyụn̄ ọdiọn̄ uyen fo nte ntrukpom.”—Psalm 103:5.