Odudu Oro Jesus Enyenede ke Ofụri Ererimbot

EDGAR GOODSPEED, andikabade Bible ekewet ete: ‘Ofụri n̄kpọ oro Jesus eketịn̄de, edide ke ndịbe m̀mê ke eferife, emi mme gospel ẹbụkde, ikpakadaha Jesus ibe hour iba. Edi ekpri se enye eketịn̄de oro ama enen̄ede edemede owo udọn̄, enen̄ede otụk owo onyụn̄ esịn udọn̄ ọnọ owo tutu enen ndidọhọ ke idụhe owo efen ekededi oro akanam enyenede odudu ntre ke ererimbot.’

Ke ini Jesus Christ okokụrede utom esie eke isọn̄ ke isua 33 E.N., mme anditiene enye ẹma ẹwak ẹsịm n̄kpọ nte irenowo ye iban 120 ke nsụhọde n̄kaha. (Utom 1:15) Mfịn, se ibede owo biliọn iba ẹdọhọ ke mmimọ idi Christian. Ata ediwak miliọn efen efen ẹdiọn̄ọ Jesus nte prọfet. Ke akpanikọ mme n̄kpọ oro enye ekekpepde ẹmetụk ubonowo ke n̄wọrọnda usụn̄.

Idem mme adausụn̄ oro mîdịghe mme Christian ẹnyịme ke Jesus enyene odudu ke idem mme owo ke ofụri ererimbot. Ke uwụtn̄kpọ, andikpep Jew oro Hyman Enelow ekewet ete: “Jesus amakabade edi owo emi ọwọrọde etop akan, owo emi ẹkpepde n̄kpọ ẹban̄a ẹkan, owo emi enyenede odudu akan ke mbụk ido ukpono.” Enelow ama ọdọhọ n̄ko ete: “Anie ekeme ndifiọk udomo odudu oro Jesus enyenede ke idem ubonowo? Ima emi enye anamde mme owo ẹnyene, ndọn̄esịt emi enye ọnọde, nti n̄kpọ oro enye anamde mme  owo ẹnam, idotenyịn ye idatesịt oro enye ọnọde—kpukpru emi inyeneke mbiet ke mbụk ubonowo. Idụhe ọwọrọetop m̀mê eti owo oro ẹmade, emi onyụn̄ enyenede odudu ntre ke ofụri ererimbot nte Jesus. Enye edi owo oro ẹmade ẹkan ke mbụk.” N̄ko-n̄ko, adaiso Ido Ukpono Hindu oro Mohandas K. Gandhi ọkọdọhọ ete: “Idụhe owo oro anamde n̄kpọ ọnọ ubonowo akan Jesus. Ke akpanikọ, Ido Ukpono Christ inyeneke mfịna ndomokiet.” Nte ededi, enye ama adian do ete: “Mbufo mme Christian ẹnyene mfịna. Mbufo ikpetke-kpet ndidu uwem ekekem ye mme n̄kpọ oro mbufo ẹkpepde.”

Christendom omokpu ke ata anyan ini ndidu uwem ekekem ye mme n̄kpọ oro Jesus ekekpepde. Cecil John Cadoux, ewetmbụk Ido Ukpono Christ, ọkọdọhọ ke ‘toto ke 140 E.N., ke mme adaiso Ido Ukpono Christ ẹma ẹkụt ke ofụri Ufọkabasi ama ọtọn̄ọ ndimem sụn̄sụn̄ ke ido uwem.’ Enye ọkọdọhọ ete: “Mmeme emi ama anam mbon ufọkabasi ẹdu uwem nte mbon ererimbot.”

Mmeme emi ekenen̄ede ọsọn̄ ubọk ke ọyọhọ isua ikie inan̄, ke ini Akwa Edidem Constantine eke Rome okodụkde Ido Ukpono Christ. Cadoux ekewet ete: “Mme ewetmbụk ẹmekụt mmeme emi, ndusụk mmọ ẹmenyụn̄ ẹseme ẹban̄a akwa ndudue oro Ufọkabasi akanamde ke enye ndikadian idem ye Constantinus,” m̀mê Constantine. Ediwak isua ikie toto ke ini oro, mme inua-okot Christian ẹmenam ediwak n̄kpọ bụt oro ẹsuenede enyịn̄ Christ.

Mmọdo, mme mbụme emi nnyịn ikpobụpde ẹdi: Nso ke Jesus ekenen̄erede ekpep? Ndien didie ke mme n̄kpọ oro enye ekekpepde ẹkpetụk nnyịn?

[Ndise ke page 3]

“Idụhe owo oro anamde n̄kpọ ọnọ ubonowo akan Jesus.”—Mohandas K. Gandhi

[Ndise ke page 3]

‘Idụhe owo efen ekededi oro akanam enyenede odudu ntre ke ererimbot.’—Edgar Goodspeed

[Ebiet Ẹdade N̄kpọ Ẹto]

Ndise Culver