Mme Ete ye Eka, Ẹkpeme Ọsọn̄urua Udeme Mbufo

‘Eti ibuot edi se ikpemede owo, enye ayanam mme andinyene enye ẹdu uwem.’—ECCLESIASTES 7:12.

1. Ntak emi mme ete ye eka ẹkpedade nditọ mmọ nte enọ?

 MME ete ye eka ẹda obufa owo oro ebietde mmọ ẹdi ererimbot. Bible okot utọ n̄kpri owo oro “udeme Jehovah.” (Psalm 127:3) Sia enye edide ata Andinọ Uwem, Jehovah enen̄ede ayak ata inyene esie esịn mme ete ye eka ke ubọk. (Psalm 36:9) Mme ete ye eka, esitie mbufo didie ke idem ke ini ẹsibọde utọ ọsọn̄urua enọ Abasi emi?

2. Nso ke Manoah akanam ke ini enye okokopde ke imọn̄ ibon eyen?

² Ke akpanikọ, ẹkpenyene ndida nsụhọdeidem oro asan̄ade ye esịtekọm mbọ utọ enọ oro. Ntre ke eketie Manoah, kpa eyen Israel, ke idem, ke se ikande isua 3,000 emi ẹkebede, ke ini angel akasiande n̄wan esie ke enye ayaman eyen. Ke ama okokop eti mbụk emi, Manoah ama ọbọn̄ akam ete: “O Ọbọn̄ mi, mbọk, yak owo Abasi oro afo ọkọdọn̄de utom, ọtọn̄ọ ntak edi ke ọtọ nnyịn, editeme nnyịn se nnyịn idinamde ye eyen emi edimanade.” (Judges 13:8) Mme ete ye eka, nso ke mbufo ẹkeme ndikpep nto Manoah?

Ntak Ẹyomde Un̄wam Abasi Idahaemi

3. Ntak emi mme ete ye eka ẹkpenen̄erede ẹyom un̄wam Abasi ke nte ẹkpebọkde nditọ mmọ mfịn?

³ Mme ete ye eka ẹnen̄ede ẹyom un̄wam Jehovah ẹkan nte akanam ẹyomde man ẹbọk nditọ mmọ. Ntak-a? Ẹma ẹsio Satan kpa Devil ye mme angel esie ke heaven ẹduọn̄ọ ke isọn̄. Bible ọtọt isọn̄ ete: “Mbọm isọn̄ ye inyan̄, koro Devil omosụhọde etiene mbufo, asan̄ade ye akwa iyatesịt, sia ọfiọkde ete ini imọ edi ibio.” (Ediyarade 12:7-9, 12) Bible anam an̄wan̄a ke  Satan etie nte “ekpe eke okụnide, oyom owo eke enye editade.” (1 Peter 5:8) Ekpe esiwak ndimụm unam oro mîtịmke inyene odudu, utọ nte nsek m̀mê n̄kpri unam. Ntre, mme ete ye eka oro ẹdide Christian ẹkpenyene ndibọ ndausụn̄ nto Jehovah ke nte ẹkpekpemede nditọ mmọ. Nso ukeme ke mbufo ẹsịn man ẹnam oro?

4. (a) Nso ke mme ete ye eka ẹkpenam edieke mmọ ẹfiọkde ke ekpe ke oyo ke mbọhọ mmọ? (b) Nso ke nditọwọn̄ ẹyom man ẹnyene ukpeme?

⁴ Edieke afo ọfiọkde ke ekpe ke oyo ke mbọhọ mbufo, afo akpayak kpukpru se anamde enịm man ekpeme nditọ fo. Satan etie nte ekpe oro. Enye oyom ndibiat ikọt Abasi mbak Abasi edima mmọ. (Job 2:1-7; 1 John 5:19) Nditọwọn̄ ke enye esisọp omụm. Ana nditọwọn̄ ẹfiọk ẹnyụn̄ ẹkpan̄ utọn̄ ẹnọ Jehovah man ẹkeme ndibọhọ afia Devil. Ntre, oyom mmọ ẹfiọk Bible. Jesus ọkọdọhọ ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Ke adianade do, oyom nditọwọn̄ ẹnyene eti ibuot—oro edi ukeme ndifiọk nnyụn̄ nda se mmọ ẹkpepde nsịn ke edinam. Koro “eti ibuot ayanam mme andinyene enye ẹdu uwem,” ntre mbufo mme ete ye eka ẹnyene ndinam akpanikọ ebe odụk esịt nditọ mbufo. (Ecclesiastes 7:12) Didie ke mbufo ẹkeme ndinam emi?

5. (a) Didie ke ẹkeme ndinam owo enyene eti ibuot? (b) Didie ke Mme N̄ke owụt ufọn eti ibuot?

⁵ Afo ekpenyene ndikot Ikọ Abasi nnọ nditọ fo. Edi oyom n̄kpọ akan oro edieke oyomde mmọ ẹma ẹnyụn̄ ẹkop uyo Jehovah—oyom n̄kpọ enen̄ede an̄wan̄a mmọ. Ke uwụtn̄kpọ: Ẹkeme ndidọhọ eyenọwọn̄ ese usụn̄ ọfọn mbemiso enye ebede usụn̄ mbakara. Edi ndusụk nditọwọn̄ isinamke oro. Ntak-a? Ekeme ndidi owo iketịmke inam an̄wan̄a mmọ nte ke ubomisọn̄ ekeme nditọ mmọ, emi akpan̄wam mmọ ẹtre “ndisịme” mbre oro ekemede ndisụn̄ọ ke mbabuat n̄kpọntịbe. Esida ini ye anyanime ndinam owo enyene eti ibuot. Edi ufọn eti ibuot enen̄ede okpon! Bible ọdọhọ ke “usụn̄ esie edi usụn̄ inemesịt, kpukpru ọkpọ-usụn̄ esie ẹnyụn̄ ẹdi ifụre. Enye edi eto uwem mmọ eke ẹmụmde enye ẹkama: onyụn̄ ọfọn ye mmọ eke ẹfatde enye.”—Mme N̄ke 3:13-18; 22:15.

Ukpep Oro Anamde Owo Enyene Eti Ibuot

6. (a) Ntak emi nditọwọn̄ ẹsiwakde ndinam n̄kpọ nte mîwụtke eti ibuot? (b) Nso en̄wan ke Satan an̄wana ye nditọwọn̄?

⁶ Ediwak ini, ntak oro nditọwọn̄ ẹsinamde idiọk isidịghe sia owo mîkekpepke mmọ ndinam se ifọnde, edi sia se ẹkekpepde mmọ mîkesịmke mmọ esịt. Devil ke an̄wana ọkpọsọn̄ man enyene esịt nditọwọn̄. Enye ke esịn ukeme ndisio mmọ nnyan nnọ idiọk odudu ererimbot emi. Enye ke odomo n̄ko ndidia ndụk ndammana unana mfọnmma mmọ man ada oro onụk mmọ ẹnam ndiọi n̄kpọ. (Genesis 8:21; Psalm 51:5) Mme ete ye eka ẹnyene ndifiọk ke Satan ke an̄wana ọkpọsọn̄ en̄wan man enyene esịt nditọ mmọ.

7. Ntak emi mîkemke nditeme nditọwọn̄ se ifọnde m̀mê se mîfọnke?

⁷ Mme ete ye eka ẹsiwak nditetịn̄ nnọ nditọ mmọ se inende ye se mînenke, ẹkerede ke imekpep mmọ nti ido uwem. Mmọ ẹkeme ndidọhọ eyenọwọn̄ ke ifọnke ndisu nsu, ndiyịp inọ, m̀mê ndinyene ebuana idan̄ ye owo oro mîdịghe nsan̄a ndọ mmọ. Nte ededi, oyom ẹnọ nditọwọn̄ ata ntak emi edinamde mmọ ẹkop item oro, idịghe n̄kukụre sia edide ete ye eka mmọ ẹnọ item oro. Jehovah ọnọ ibet emi. Nditọwọn̄ ẹkpenyene ndifiọk ke ọfọn ndinịm ibet Abasi.—Mme N̄ke 6:16-19; Mme Hebrew 13:4.

8. Nso ukpep ikeme ndinam nditọwọn̄ ẹnam n̄kpọ ye eti ibuot?

⁸ Awak-n̄kukọhọ ekondo, nsio nsio uduot odu-uwem n̄kpọ, ndaeyo ye ukwọedịm—kpukpru emi ẹkeme ndinam eyenọwọn̄ okụt ke Andibot oro enyenede akakan ọniọn̄ odu. (Rome 1:20; Mme Hebrew 3:4) Ke adianade do, ẹkpenyene ndikpep eyen ke Abasi ama enye, ye nte ke Enye anam ndutịm ọnọ enye ndinyene nsinsi uwem ebe ke ufak Eyen esie, ndien ke enye ekeme ndinem Abasi esịt ke ndikop uyo Esie. Do, eyen oro ekeme ndiyom ndinam n̄kpọ Jehovah kpa ye ukeme oro Devil  esịnde nditre enye.—Mme N̄ke 22:6; 27:11; John 3:16.

9. (a) Nso ke ukpep oro ọnọde owo uwem abuana? (b) Nso ke ẹteme mme ete ẹnam, ndien nso ke emi abuana?

⁹ Esida ini, ntịn̄enyịn, ye ntịmidem mbemiso ẹkemede ndinọ eyen ukpep oro edikpemede inyụn̄ inam enye anam se inende. Emi oyom mme ete ye eka ẹtiene ndausụn̄ Abasi. Bible ọdọhọ ete: “Mme ete, . . . ẹka iso ẹkama [nditọ mbufo] ke ntụnọ ye ke usụn̄ ukere n̄kpọ Jehovah.” (Ephesus 6:4) Nso ke oro ọwọrọ? Akpasarade ikọ Greek oro ẹkabarede “usụn̄ ukere n̄kpọ” ọwọrọ “ndisịn ekikere ke n̄kpọ.” Ntre, ke nditịm ntịn̄, ẹyom mme ete ẹsịn ekikere Jehovah ke esịt nditọ mmọ. Nso ukpeme ke oro edidi ntem ọnọ nditọ! Edieke ẹsịnde ekikere Abasi ke esịt nditọ, emi eyekpeme mmọ osio ke idiọk.

Nam ke Ntak Ima

10. Nso ke oyom ọfiọk man ekeme ndinọ eyen fo ukpep uforo uforo?

¹⁰ Nte ededi, man ekeme ndibọk nditọ fo uforo uforo nte oyomde, ana anam oro ke ntak ima. Nneme enen̄ede edi ata akpan n̄kpọ. Domo ndifiọk se itịbede inọ eyen fo ye se enye ekerede. Da mbufiọk nam enye etịn̄ se isịnede enye ke esịt ke ini oro enen̄erede ọfọn. Ndusụk ini, se enye etịn̄de ekeme ndikpa fi idem. Kûnam nte idem enen̄ede akpa fi. Utu ke oro, nen̄ede kpan̄ utọn̄ nọ enye.

11. Didie ke ete m̀mê eka ekeme ndinam eyen esie enyene ekikere Jehovah?

¹¹ Edi akpanikọ, ekeme ndidi afo ama okot ibet Abasi ke Bible oro akpande oburobụt ido idan̄ ọnọ eyen fo, anamde oro ediwak ini. (1 Corinth 6:18; Ephesus 5:5) Ekeme ndidi emi ama anam nditọ fo ẹfiọk se Jehovah amade ye se enye mîmaha. Nte ededi, ndinam eyen fo enyene ekikere Jehovah oyom n̄kpọ akan oro. Oyom ẹn̄wam nditọwọn̄ man mmọ ẹfiọk ufọn ibet Jehovah. Ana mmọ ẹnen̄ede ẹfiọk ke ibet Abasi ẹnen ẹnyụn̄ ẹfọn, ye nte ke enen̄ede ọfọn ndinịm mmọ. N̄kukụre usụn̄ oro ekemede ndisịn ekikere Abasi ke esịt mmọ edi ndida N̄wed Abasi n̄kọk ibuot ye mmọ tutu mmọ ẹnyịme ekikere Abasi kaban̄a mme n̄kpọ.

12. Didie ke ete m̀mê eka ekeme ndin̄wam eyen esie enyene nnennen ekikere aban̄a idan̄?

¹² Ke ini etịn̄de n̄kpọ aban̄a idan̄, afo emekeme ndibụp ete, “Ndi afo ekere ke ndinịm ibet oro Jehovah ọnọde ete owo okûnam idan̄ ke owo mîdọhọ ndọ iyakke owo okop inemesịt?” Sịn udọn̄ nọ eyen fo anam ibọrọ esie an̄wan̄a. Ke ama akanam utịbe utịbe usụn̄ oro Abasi esinamde eyen edimana an̄wan̄a, afo emekeme ndibụp eyen fo ete: “Ndi afo ekere ke edima Abasi nnyịn akpanam ibet oro mîdiyakke nnyịn ikop inemesịt? Ndi afo ukereke ke ibet esie akam ananam nnyịn ikop inemesịt onyụn̄ ekpeme nnyịn?” (Psalm 119:1, 2; Isaiah 48:17) Domo ndifiọk ekikere eyen fo kaban̄a mme n̄kpọ emi. Ekem, afo emekeme ndinọ enye mme uwụtn̄kpọ oro ẹwụtde nte oburobụt ido idan̄ okosụn̄ọde  ke afanikọn̄ ye iduọesịt. (2 Samuel 13:1-33) Afo ndikọk ibuot ye eyen fo tutu enye ọfiọk onyụn̄ enyịme ekikere Abasi owụt ke amanam ekese ndisịn ekikere Abasi ke esịt esie. Nte ededi, odu n̄kpọ efen oro ekemede ndinam.

13. Eyenọwọn̄ ndifiọk nso mban̄a Jehovah edinen̄ede esịn udọn̄ ọnọ enye okop uyo Esie?

¹³ Ke adianade ye ndinam eyen fo ọfiọk ndiọi utịp oro edisọn̄ ibuot ye Jehovah ekemede ndida ndi, owụt eti ibuot ndinam enye ọfiọk n̄ko nte edinam nnyịn esitụkde Jehovah. Wụt eyen fo ke Bible ke nnyịn imekeme ndinam Jehovah ayat esịt ke ini itrede ndinam uduak esie. (Psalm 78:40) Afo emekeme ndibụp enye ete, “Ntak emi mûkpoyomke ndiyat Jehovah esịt?” onyụn̄ anam enye ọfiọk ke “asua Abasi, Satan ọdọhọ ke nnyịn inam n̄kpọ Jehovah ke ntak ibụk, idịghe ke ntak oro imade enye.” Ekem, nam an̄wan̄a nte Job ọkọsọn̄ọde ada anam Abasi enem esịt, ntre owụtde ke Satan okososu. (Job 1:9-11; 27:5) Ana anam eyen fo ọfiọk ke enye ekeme ndinam Jehovah enem esịt m̀mê ofụhọ, etiene nte enye anamde n̄kpọ. (Mme N̄ke 27:11) Ẹkeme ndida emi ye ekese ukpepn̄kpọ eken ke n̄wed Kpep N̄kpọ to Akwa Andikpep * n̄kpep nditọwọn̄.

Nti Utịp

14, 15. (a) Ewe ukpepn̄kpọ ke n̄wed Andikpep esịn udọn̄ ọnọ nditọwọn̄ ẹnam n̄kpọ? (b) Nso nti utịp ke afo enyene ke ndida n̄wed oro nnam n̄kpọ? (Se ekebe n̄ko ke page 18-19.)

¹⁴ Ete kiet ke Croatia emi okokotde n̄wed Andikpep ọnọ eyeyen esie emi edide isua itiaba, ekewet ete ke ekpri eyen emi ọkọdọhọ imọ ete: “Mama ama ọdọn̄ mi utom, edi n̄koyomke ndika utom oro. Ekem, mma nti ibuotikọ oro, ‘N̄kopitem Ekpeme Fi,’ ntre mma mfiak mbịne enye n̄kọdọhọ ke nyanam se enye ọkọdọn̄de mi.” Ebe ye n̄wan ke Florida, U.S.A., ẹtịn̄ ẹban̄a ibuotikọ oro ọdọhọde, “Ntak Emi Nnyịn Mîkposụhu Nsu,” ẹte: “Enye ọdọn̄ọ mme mbụme emi ẹsịnde udọn̄ ẹnọ nditọwọn̄ nditịn̄ se isịnede mmọ ke esịt nnyụn̄ nnyịme mme ndudue oro mmọ mîkpenyịmeke.”

¹⁵ N̄wed Andikpep enyene se iwakde ibe ndise 230. Enye enyene n̄ko uwetn̄kpọ oro ẹnamde mme ndise oro ẹn̄wan̄a. Eka kiet oro enen̄erede ama n̄wed emi ọkọdọhọ ete: ‘Eyen mi isimaha ndikụbi page oro ndise odude. Ke adianade ye mme ndise oro ndiye, mmọ n̄ko ẹkpep owo n̄kpọ, mîdịghe, ke nsụhọde n̄kaha mmọ ẹsinam nditọwọn̄ ẹbụp mbụme. Ke osụk esede ndise oro owụtde eyenọwọn̄ oro esịnede ke n̄kịmn̄kịm ubet ese ekebe ndise, eyen mi ama obụp mi ete: “Mama, nso ke eyen emi  anam?” etịn̄de ke uyo oro owụtde ke enye ọfiọk ke eyen oro anam se mînenke.’ Se ẹwetde ẹdian ke ndise oro okot ntem: “Anie ekeme ndikụt kpukpru se nnyịn inamde?”

Ukpepn̄kpọ Oro Enyenede Ufọn Mfịn

16. Nso idi akpan n̄kpọ oro anade ẹkpep nditọwọn̄ mfịn, ndien ntak-a?

¹⁶ Oyom ẹnam nditọwọn̄ ẹfiọk eti ye idiọk usụn̄ oro ẹkemede ndida ndido idan̄ nnam n̄kpọ. Edi, isimemke utom ndineme emi. N̄wan kiet oro esiwetde n̄wedmbụk n̄kpọntịbe ọdọhọ ke imọ ikọkọri ke eyo oro ẹkedade editịn̄ ikọ mban̄a ndido idan̄ nte ata idiọkn̄kpọ. Enye ekewet ntem aban̄a edinọ nditọ esie ukpep mban̄a idan̄: ‘Ndiyakke bụt akpan mi ndinọ nditọ mi ukpep mban̄a idan̄.’ Ke akpanikọ, edieke bụt mîyakke mme ete ye eka ẹneme n̄kpọ ẹban̄ade idan̄ ye nditọ mmọ, nditọ mmọ idinyeneke ukpeme. Mbon oro ẹsisabarede nditọwọn̄ ẹsiwak ndibịne nditọwọn̄ oro mînyeneke ifiọk. Kpep N̄kpọ to Akwa Andikpep eneme n̄kpọ emi ke eti usụn̄ oro enyenede uku. Ndinam nditọwọn̄ ẹfiọk se idan̄ edide inamke mmọ ẹdi ndiọi nditọwọn̄, edi nditre ndikpep mmọ ekeme ndikam nnam mmọ ẹnam idiọkn̄kpọ.

17. Didie ke n̄wed Andikpep an̄wam mme ete ye eka ndikpep nditọ mmọ n̄kpọ mban̄a idan̄?

¹⁷ Ke ini enemede ke ibuot 10 nte ndiọi angel ẹkedide ẹdibon nditọ ke isọn̄, n̄wed oro obụp eyenọwọn̄ ete, “Nso ke afo ọfiọk aban̄a ebuana idan̄?” N̄wed oro ọnọ mmemmem ibọrọ oro enyenede uku. Ekem, ibuot 32 anam an̄wan̄a nte ẹkemede ndikpeme nditọwọn̄ nsio ke ubọk mbon oro ẹsisabarede nditọwọn̄. Ediwak leta oro ibọde ẹwụt ke oyom ẹnọ nditọwọn̄ utọ ukpep oro. Leta kiet okokot ete: “Ke ini n̄kadade Javan eyen mi mbịne abiausọbọ nditọwọn̄ urua oko, abiausọbọ emi ama obụp m̀mê nnyịn ima inam enye ọfiọk nnennen usụn̄ oro ẹkpedade ndido idan̄ ẹnam n̄kpọ. Esịt ama enen̄ede enem enye ndifiọk ke nnyịn ima idada obufa n̄wed nnyịn emi inam oro.”

18. Didie ke n̄wed Andikpep eneme aban̄a edituak ibuot nnọ ọfọn̄ etakubom?

¹⁸ Ibuotikọ efen eneme mbụk aban̄ade uyen  Hebrew ita, Shadrach, Meshach, ye Abednego, oro mîkamaha ndituak ibuot nnọ mbiet oro akadade aban̄a Ukara Babylon. (Daniel 3:1-30) Ekeme ndidi ndusụk owo idikwe ke edituak ibuot nnọ mbiet edi ukem ye edikpono ọfọn̄ etakubom nte n̄wed Andikpep owụtde. Nte ededi, kop se Edward Gaffney emi edide ewet n̄wed ọkọdọhọde ke ndụn̄ọde oro mme andiwet magazine U.S. Catholic ẹkenamde ye enye. Enye ọkọdọhọ ke ini eyenan̄wan imọ ọkọdọhọde ke imekpep “obufa akam ke ufọkn̄wed” ke ata akpa usen oro enye akakade n̄wed, ke imọ ima idọhọ enye afiak ọbọn̄ akam oro ọnọ imọ. Gaffney ọkọdọhọ ete: “Enye ama emen ubọk adian ke ikpanesịt, onyụn̄ ọtọn̄ọ nditịn̄ uko uko ete, ‘Mmọn̄wọn̄ọ ndikpono ọfọn̄ etakubom. . .’” Gaffney aka iso ete: “Do ke n̄kedifiọk ke se Mme Ntiense Jehovah ẹsitịn̄de edi akpanikọ. Oro ọwọrọ ke idụt enyene edinam ido ukpono oro ẹsikpepde ata n̄kpri nditọwọn̄ ke kpukpru ufọkn̄wed nnyịn—kpa ido ukpono oro oyomde akakan edinam akpanikọ nnọ idụt.”

Ofụri Ukeme Oro Ẹsịnde Odot

19. Nso utịp ke edinọ nditọ ukpep ekeme ndida ndi?

¹⁹ Ke akpanikọ, odot esịn ofụri ukeme ekpep nditọ fo n̄kpọ. Mmọn̄eyet ama asiaha eka kiet ke Kansas, U.S.A., ke ini enye ọkọbọde leta oro eyen esie ekewetde enye. Eyen esie ekewet ete: “Esịt enen̄ede enem mi sia usụn̄ oro mbufo ẹkebọkde mi anamde mi ndi owo oro enyenede  iwụk ye nsọn̄ọnda. Abasi akpakam enen̄ede ọdiọn̄ fi ye Papa.” (Mme N̄ke 31:28) Kpep N̄kpọ to Akwa Andikpep ekeme ndin̄wam ediwak ete ye eka ẹnọ nditọ mmọ ukpep man otodo ẹkpekpeme ọsọn̄urua udeme emi.

20. Nso ke mme ete ye eka ẹkpeti kpukpru ini, ndien emi akpanam mmọ ẹnam n̄kpọ didie?

²⁰ Odot inọ nditọ nnyịn ofụri ini ye ntịn̄enyịn oro ikemede ndinọ mmọ, inyụn̄ isịn ofụri ukeme ndin̄wam mmọ. Esisịt ini, mmọ ididịghe aba nditọwọn̄. Mmọdo, ẹda kpukpru ifet oro ẹnyenede ẹdu ye mmọ ẹnyụn̄ ẹn̄wam mmọ. Mbufo idituaha n̄kpọfiọk tutu amama. Mmọ ẹyedi ẹdima mbufo. Ẹti kpukpru ini ẹte ke nditọ mbufo ẹdi enọ emi Abasi ọnọde mbufo. Nso ọsọn̄urua udeme ke mmọ ẹdi ntem! (Psalm 127:3-5) Ntre ẹkama mmọ nte ọsọn̄urua udeme, nte n̄kpọ eke mbufo ẹnyenede ndinam ibat nnọ Abasi ke nte ẹbọkde mmọ—koro ke akpanikọ, mbufo iditreke ndinam ibat!

[Ikọ idakisọn̄]

Didie ke Afo Ọkpọbọrọ?

• Ntak emi mme ete ye eka ẹkpenen̄erede ẹkpeme nditọ mmọ idahaemi?

• Nso orụk ukpep anam owo enyene eti ibuot?

• Nso idi mme akpan n̄kpọ oro ekpenemede ye nditọ fo idahaemi?

• Didie ke n̄wed Andikpep an̄wam mme ete ye eka ndinọ nditọ mmọ ukpep?

[Mme Mbụme Ukpepn̄kpọ]

[Ekebe/Mme ndise ke page 18, 19]

N̄wed Ofụri Owo

Ẹkewet Kpep N̄kpọ to Akwa Andikpep man an̄wam mme ete ye eka m̀mê ikpọ owo eken ndikot nnyụn̄ nneme mme n̄kpọ oro Jesus Christ ekekpepde ye nditọwọn̄. Kpa ye oro, ikpọ owo oro ẹma ẹkekot n̄wed emi ke idemmọ ẹnen̄ede ẹwụt esịtekọm ẹban̄a se mmọ ẹkpepde ẹto enye.

Eren kiet ke Texas, U.S.A., ọkọdọhọ ete: “Kpep N̄kpọ to Akwa Andikpep etịn̄ n̄kpọ in̄wan̄-in̄wan̄ ke ata mmemmem usụn̄, esịn udọn̄ ọnọ nnyịn ọkpọkọm idi isua ifan̄—idem nte ami emi ndide isua 76 mi. Ami mmanam n̄kpọ Jehovah toto ke uyen, ndien mmọkọm mbufo etieti.”

N̄wan kiet ke London, England, oro okokotde n̄wed emi, ọdọhọ ete: “Ke akpanikọ, ndiye ndise esie ẹyedemede udọn̄ mme ete ye eka ye nditọ. Mme mbụme oro ẹbụpde ye nte ẹtịmde n̄wed emi enyene ndyọ, ndien eye didie ntem ndikụt nte ẹnemede n̄kpọ oro ẹtiede etikwo etikwo ke ata inem inem usụn̄. Uwụtn̄kpọ edi ibuot 32, emi ọdọhọde ete, ‘Nte Ẹkekpemede Jesus.’ ” N̄wan oro eberi ete: “Nte eyịghe mîdụhe, okposụkedi ẹkewetde n̄wed emi akpan akpan ẹnọ nditọ Mme Ntiense Jehovah, edi mmenịm ke mme andikpep ye mbon en̄wen ẹyenen̄ede ẹma ndinyene n̄wed emi n̄ko. Ntetie mbet ndida enye nnam n̄kpọ ke ini iso.”

N̄wan kiet ke Massachusetts, U.S.A., ama ewet n̄kpọ aban̄a “ediwak ndiye ndise oro ẹtịn̄de enyịn ẹwet.” Enye ekewet ete: “Se n̄kụtde edi ke okposụkedi ẹkewetde n̄wed emi ẹnọ nditọwọn̄, mme n̄kpọ oro ẹnemede ẹkeme ndin̄wam nnyịn ikpọ owo n̄ko ikere iban̄a itie ebuana nnyịn ye Jehovah.”

N̄wan kiet ke Maine, U.S.A. okofiori ete: ‘Nte fi! N̄wed emi edi utịbe! Enye idịghe n̄wed nditọwọn̄ kpọt edi edi n̄wed kpukpru nnyịn emi idide nditọ Abasi. Enye omotụk ata owo emi ndide ke esịtidem onyụn̄ edemede mme ntụk mi ndien ekem osụk mmọ, ke ntem anamde mi nnyene emem. Mmenen̄ede nsan̄a n̄kpere Jehovah nte Ete mi. Jehovah ememen ubiak eke ntụk oro n̄kenyenede ke ediwak isua efep, onyụn̄ anam uduak esie enen̄ede an̄wan̄a.” Enye ekeberi ete: “Se nsiande kpukpru owo edi, ‘Mbọk ẹkot n̄wed emi.’”

N̄wan kiet ke Kyoto, Japan, ama ọtọt ete ke ini imọ ikokotde n̄wed emi inọ nditọ nditọ imọ, ke mmọ ẹma ẹbụp mme utọ mbụme nte: “‘Nso ke eyeneren emi anam? Ntak emi ẹtụnọde eyenan̄wan emi? Nso ke eka nditọ emi anam? Nso ke ekpe emi anam?’ Enye ekpep mme n̄kpọ oro nnyịn imade, ntre mmama enye n̄kan n̄wed en̄wen ekededi.”

Ete kiet ke Calgary, Canada, ọdọhọ ke ndondo oro imọ ikọbọde n̄wed oro, ke ima itọn̄ọ ndikot enye nnọ eyenan̄wan imọ oro edide isua itiokiet ye eyeneren imọ oro edide isua usụkkiet. Enye ọdọhọ ete: ‘Nditọ mi ikabiatke ini ndima n̄wed oro. Mmọ ẹma ẹnen̄ede ẹkpan̄ utọn̄ ẹnyụn̄ ẹbọrọ mme mbụme ke ofụri esịt. Mmọ ẹma ẹkụt ke mmimọ inyene nditịp n̄kpọ nsịn ke ukpepn̄kpọ oro, ndien emi ama ọnọ mmọ ifet nditịn̄ ikọ idemmọ. Mmọ ẹnen̄ede ẹkop nduaidem, ndien adiaha mi ọdọhọ ke imọ iyom ẹsikpep n̄wed emi kpukpru mbubịteyo.’

Ke ẹma ẹkekụre ukpepn̄kpọ usen kiet, ete mmọ ọkọdọhọ ete: “Ami ye akpan mi ima ineme nneme ke ediwak hour iban̄a Jehovah ye mme uduak esie. Enye ama obụp ata ediwak mbụme ke n̄wed oro. Mmọn̄eyet ama asiaha mi ke ini enye ọkọkọmde mi ete esiere-o, onyụn̄ obụp ete, ‘Papa, nte nnyịn imekeme ndifiak nneme nneme ntem? Mmenyene ekese mbụme, nnyụn̄ nyom ndifiọk kpukpru n̄kpọ mban̄a Jehovah’”

[Ndise ke page 15]

Mme ete ye eka, nso ke mbufo ẹkpekpep ẹto uwụtn̄kpọ Manoah?

[Ndise ke page 16]

Mme uyen, nso ke mbufo ẹkeme ndikpep nto uwụtn̄kpọ nditọ Hebrew ita?

[Mme ndise ke page 17]

Mme ndise ke n̄wed “Andikpep” ọkọrọ ye mme ikọ oro ẹnamde ndise ẹn̄wan̄a ẹnen̄ede ẹdi okopodudu n̄kpọ ukpepn̄kpọ

Nso nsu ke Ananias osụk osu ọnọ Peter?

Anie ekeme ndikụt kpukpru se nnyịn inamde?