Mme Mbụme Ẹtode Mme Andikot

Ndi odot Christian ọnọ anamutom ukara okụk m̀mê enọ ke ntak utom oro enye anamde, mîdịghe nte ẹdise oro nte ubọkedem?

Mme Christian ẹsida ọniọn̄ ẹnam n̄kpọ ẹtiene mme idaha n̄kann̄kụk ke ebiet ekededi oro mmọ ẹdụn̄de, ẹfiọkde ke se ẹnyịmede onyụn̄ enende ke idụt kiet ekeme ndinen̄ede ndi ubiatibet ke idụt efen. (Mme N̄ke 2:6-9) Nte ededi, akpana Christian eti kpukpru ini nte ke owo ekededi oro oyomde ‘ndidụn̄ ke tent Jehovah’ ana efep “enọ utụk,” m̀mê ubọkedem.—Psalm 15:1, 5; Mme N̄ke 17:23.

Nso idi ubọkedem? Nte The World Book Encyclopedia ọdọhọde, “ubọkedem ọwọrọ ndinọ . . . owo emi odude ke akwa itie ọsọn̄urua n̄kpọ, man enye abiat ibet utom esie m̀mê abiat ibet oro ẹnịmde man ọfọn mfọn ye andinọ enọ oro.” Do, ọkpọkọm owo odụn̄ ke m̀mọ̀n̄, ndinọ ebiereikpe m̀mê bodisi okụk m̀mê enọ man akwan̄a ikpe, m̀mê ndinọ anam ndụn̄ọde enọ man efre enyịn aban̄a ndudue m̀mê ubiatibet, edi ubọkedem. Edida enọ mbọ akpa itie n̄ko, utọ nte edinịm enyịn̄ fo akpa ke udịm mbon oro ẹbetde n̄kpọ m̀mê man ebe mbon en̄wen ke udịm, edi ubọkedem n̄ko. Utọ edinam oro owụt unana ima n̄ko.—Matthew 7:12; 22:39.

Edi ndi edinọ owo, yak idọhọ anamutom ukara, enọ m̀mê okụk man anam nnennen utom esie ọnọ nnyịn, mîdịghe mbak owo edinam n̄kpọ ye nnyịn ke ukwan̄ usụn̄, edi ubọkedem? Ke uwụtn̄kpọ, ke ndusụk idụt, mbonutom ẹkeme ndimen̄e ndida nditọwọn̄ ke ufọkn̄wed, ndibọ owo udọn̄ọ ke ufọkibọk, m̀mê ndinọ n̄wedisan̄ ibọhọke mmọ ẹbọ enọ. Mîdịghe mmọ ẹkeme ndimen̄e ndinam n̄kpọ mban̄a eben̄e edifiak mbọ n̄wed unyịme.

Edinọ enọ ye nte ẹsede enye okpụhọde ke idụt kiet esịm eken. Ke ebiet emi utọ enọ okụk oro edide ido m̀mê se ẹkerede ke ẹyenọ, ndusụk mme Christian ẹkeme ndikere ke ama akam edi mmimọ ibiatke ibet, ke mmimọ ibiatke edumbet Bible ke ini mmimọ inọde anamutom okụk ndinam utom esie. Ke ndusụk idụt, mme owo ẹkam ẹkeme ndise utọ enọ okụk oro nte n̄kpọ ndida n̄n̄wam mbonutom oro okụkọfiọn̄ mmọ mîwakke. Akpan n̄kpọ oro anade ẹti edi ke ukpụhọde odu ke ufọt enọ oro ẹnọde owo man anam nnennen utom esie ye edinọ ubọkedem man ẹfọn mfọn ke ukwan̄ usụn̄.

Ke n̄kan̄ eken, ndusụk Mme Ntiense Jehovah ẹsisịn ndinọ mme anam ndụn̄ọde, mme ekpeme n̄kpọmbet, m̀mê mbon eken, okụk man ẹnam nnennen utom mmọ, idem ke itie oro utọ enọ oro edide ido. Ke ntak oro ẹtịmde ẹdiọn̄ọ Mme Ntiense nte mbon oro ẹsinen̄erede ẹnam n̄kpọ ẹtiene ubieresịt ẹsinyụn̄ ẹnen̄erede ẹnam akpanikọ, ndusụk ini ẹsinam n̄kpọ ẹnọ mmọ ke mfọn, ke adan̄aemi mbon en̄wen ẹsikpede okụk man ẹnam ukem n̄kpọ oro ẹnọ mmọ.—Mme N̄ke 10:9; Matthew 5:16.

Ke nditịn̄ ibio ibio, asan̄autom Jehovah kiet kiet enyene ndibiere ke idemesie m̀mê imọ iyọnọ okụk man ẹnam nnennen utom ẹnọ imọ m̀mê mbak ẹdinam n̄kpọ ye imọ ke ukwan̄ usụn̄. Ke akande kpukpru, enye ekpenyene ndinam n̄kpọ oro mîdifịnake eti ubieresịt esie, emi mîdidaha esuene isọk enyịn̄ Jehovah, emi mîdinyụn̄ inamke mbon en̄wen ẹtuak ukot ẹduọn̄ọ.—Matthew 6:9; 1 Corinth 10:31-33; 2 Corinth 6:3; 1 Timothy 1:5.