Ndikọ Ifiọk Idahaemi ye ke Nsinsi

ULRICH STRUNZ, eyen Germany emi edide abiausọbọ ama ewet udịm udịm n̄wed oro ẹkotde Forever Young. Enye ekewet ke mme n̄wed oro ete ke edieke owo esịn̄erede idem, adiade nti udia, onyụn̄ odude eti uwem, ke enye ekeme ndinen̄ede n̄kop nsọn̄idem, ndien ke oro ekeme ndinam enye odu uwem ebịghi. Edi enye idọhọke ke mme andikot n̄wed imọ ẹkeme ndinen̄ede ndu uwem ke nsinsi edieke mmọ ẹnamde se imọ iwetde.

Nte ededi, odu orụk ifiọk oro asan̄ade ye un̄wọn̄ọ nsinsi uwem. Ke okpụhọrede ye ekikere ediwak owo, edieke afo odude uwem ke nsinsi, afo emekeme ndikọ nti ifiọk ke nsinsi. Jesus ọkọdọhọ ke akam oro enye ọkọbọn̄de ọnọ Abasi ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Ẹyak nnyịn ibem iso itịn̄ se “nsinsi uwem” edide, ndien ekem itịn̄ se ifiọk emi abuanade, mbemiso inemede nte afo ekemede ndinyene enye.

Bible ọdọhọ ke Andibot ọyọsọp anam isọn̄ emi akabade edi ata Paradise, emi owo edikemede ndidu uwem mbịghi. Oyoyom ẹnam se ibietde Ukwọ oro eketịbede ke eyo Noah man ẹda Paradise oro ẹdi. Matthew ibuot 24, ufan̄ikọ 37 esịm 39 owụt ke Jesus akada eyo nnyịn odomo ye “mme usen Noah,” emi mme owo ‘mîkọfiọkke’ nsobo oro ekekperede ndisịm mmọ. Mmọ n̄ko ikakpan̄ke utọn̄ ke etop oro Noah ọkọkwọrọde. “Usen emi Noah odụkde ke ubom” ama edisịm, ndien Ukwọ ama osobo  kpukpru mbon oro mîkamaha ifiọk emi. Noah ye mbon oro ẹkedude ye enye ke ubom ẹkebọhọ.

Jesus ọkọdọhọ ke mbiet “usen” Noah eyedi ke eyo nnyịn. Mbon oro ẹnyịmede ndikọ ifiọk emi nnyụn̄ n̄kop item ẹyebọhọ ẹnyụn̄ ẹnyene idotenyịn ndidu nsinsi uwem. Ke adianade do, mme akpan̄kpa oro Abasi editide ẹyeset ẹnyụn̄ ẹnyene idotenyịn ndidu uwem ke nsinsi. (John 5:28, 29) Se nte Jesus eketịn̄de ekikere mbiba emi. Ke ini enye ekenemede ediset ke n̄kpa ọnọ Martha, enye ọkọdọhọ ete: “Owo eke ọbuọtde idem ye ami, idem ọkpọkọm enye akpakpa, oyodu uwem; ndien kpukpru owo eke ẹdude uwem ẹnyụn̄ ẹbuọtde idem ye ami idikpaha tutu amama.” Mme uyarade ẹnen̄ede ẹwụt ke “usen” oro afo ‘mûdukpaha tutu amama’ ke enen̄ede asan̄a ekpere.—John 11:25-27.

Ekem Jesus ama obụp Martha ete: “Nte afo emenịm emi ke akpanikọ?” Martha ama ọbọrọ ete: “Ih, Ọbọn̄.” Edieke Jesus okpobụpde fi mbụme oro mfịn, afo ọkpọbọrọ didie? Ekeme ndidi ọkpọsọn̄ fi ndinịm ke owo ekeme ndidu uwem inyụn̄ ikpaha tutu amama. Idem edieke ekpekerede ntre, eyịghe idụhe nte ke afo akpama ndinịm ke owo ekeme ndidu ke nsinsi. Kere adan̄a ifiọk oro afo ọkpọkọde edieke afo okpodude uwem unyụn̄ ‘ukpaha tutu amama!’ Kere nte ekpekpepde onyụn̄ anamde kpukpru n̄kpọ oro esiyomde ndinam idahaemi, edi ini mîdụhe ndinam mmọ. Kere n̄ko nte afiakde osobo ye mbonima fo oro ẹkekpan̄ade! Ewe ifiọk ikeme ndinam fi anam kpukpru emi, ndien didie ke ekeme ndikọ ifiọk emi?

Nnyịn Imekeme Ndikọ Ifiọk Oro Ọnọde Uwem

Ndi nnyịn imekeme ndikọ ifiọk mban̄a Abasi ye Christ? Ih, imekeme. Edi akpanikọ ke ifiọk aban̄ade utom Andibot inyeneke utịt. Kpa ye oro, ke ini Jesus ọkọdọhọde ke “ifiọk” ye “nsinsi uwem” ẹsan̄a kiet, idịghe ifiọk aban̄ade ikpaenyọn̄ m̀mê ifiọk ntaifiọk eken ke enye eketịn̄ aban̄a. Mme N̄ke ibuot 2, ufan̄ikọ 1 ye 5 owụt ke “ikọ” ye “mbet” oro ẹkụtde ke Bible ẹdi akpan n̄kpọ oro ẹkemede ndin̄wam owo esịme “ifiọk Abasi.” Ndien kaban̄a ndikọ ifiọk mban̄a Jesus, John 20:30, 31 owụt ke mme n̄kpọ oro ẹwetde ẹnịm ke Bible ẹkem ndinọ nnyịn “uwem.”

Mmọdo, ifiọk aban̄ade Jehovah ye Jesus Christ oro ẹkụtde ke Bible ẹkem ndiwụt fi se akpanamde man enyene nsinsi uwem. Bible inyeneke mbiet. Ima akanam Andibot ọnọ mme owo spirit esie ẹda ẹwet Bible ke usụn̄ oro idem mbon oro mîkaha n̄wed ẹkemede ndikpep nnyụn̄ nnyene ifiọk oro ekemde ndinọ mmọ nsinsi uwem. Kpasụk ntre, owo emi n̄kpọ esisọpde an̄wan̄a oro enen̄erede enyene ini ye mme n̄kpọ eken idinanake obufa n̄kpọ ndikpep ini ekededi oro enye emende N̄wed Abasi eke odudu spirit ndikpep. Afo ndikam n̄keme ndikot ibuotikọ emi owụt ke afo emenyene ukeme ndikpep n̄kpọ, edi didie ke akpada ukeme emi anam n̄kpọ?

Ke ofụri ererimbot, uwụtn̄kpọ ediwak owo owụt ke mfọnn̄kan usụn̄ ndinyene ifiọk emi edi ndinam owo oro ama ekenyenyene ifiọk emi ekpep Bible ye afo ọkpọkpọ. Kpa nte Noah okodomode ndikpep mbon eyo esie se enye ọkọfiọkde, Mme Ntiense Jehovah ẹnyịme ndidi ufọk fo ndineme Bible ye afo. Mmọ ẹkeme ndida ediye uduot ekpri n̄wed Nso ke Abasi Oyom Oto Nnyịn? m̀mê n̄wed oro  ẹkotde Ifiọk Oro Adade Osịm Nsinsi Uwem. * Idem edieke ọsọn̄de fi ndinịm ke mbon oro ẹnamde akpanikọ “idikpaha tutu amama” ke Paradise isọn̄, nneme Bible emi ayan̄wam fi enyene mbuọtidem ke un̄wọn̄ọ emi. Ntre, edieke afo oyomde ndidu uwem ke nsinsi mîdịghe edieke oyomde ndikụt ke idemfo m̀mê owụt ifiọk ndinịm ke afo emekeme ndidu uwem ke nsinsi, nso ke akpanam? Kûyak ifet ukpepn̄kpọ Bible emi ebe fi.

Ukpepn̄kpọ emi edibịghi adan̄a didie? Ediye uduot ekpri n̄wed oro ẹsụk ẹsiakde mi odu ke ediwak usem, enyene page 32, onyụn̄ ọdọn̄ọ mbio mbio ukpepn̄kpọ 16 kpọt. Mîdịghe edieke ekemede ndisio n̄kpọ nte hour kiet kpọt nnịm kpukpru urua, edida fi n̄kpasịp ọfiọn̄ ifan̄ ndida n̄wed Ifiọk Oro Adade Osịm Nsinsi Uwem n̄kpep mme akpan ukpepn̄kpọ Bible. Mme n̄wed emi ẹn̄wam ediwak owo ẹnyene ekese ifiọk ẹnyụn̄ ẹnen̄ede ẹma Abasi. Andibot ọyọnọ mbon oro ẹnen̄erede ẹma enye utịp, anamde mmọ ẹnyene nsinsi uwem.

Ke akpanikọ, nnyịn imekeme ndinyene ifiọk oro ọnọde uwem, ndien enye isọn̄ke ndinyene. Ẹkabade Bible, ofụri ofụri m̀mê ubak ubak, ke se iwakde ibe usem 2,000. Mme Ntiense Jehovah oro ẹdude ke idụt 235 ẹkop inemesịt ndin̄wam fi ọkpọkpọ nnyụn̄ nnọ fi mme n̄wed ẹkọn̄ọde ke Bible man afo ekeme nditat ifiọk fo.

Ọkpọkpọ Ukpepn̄kpọ

Ndinyene itie ebuana ye Abasi edi ọkpọkpọ mbubehe fo ye Andibot. Afo ikpọn̄ ekeme ndinam itie ebuana oro aka iso ọsọn̄, ndien Abasi ikpọn̄ ekeme ndinọ fi nsinsi uwem. Ke ntre, afo ekpenyene ndika iso n̄kpep Bible. Edieke enyịmede owo esidi edinịm ukpepn̄kpọ emi ye afo ke ufọk fo kpukpru ini, afo oyokụt ke idisọn̄ke fi ndisio ini nnịm nnọ ukpepn̄kpọ emi.

Sia Bible ye mme n̄wed un̄wam ukpep Bible ẹdọn̄ọde “ifiọk Abasi,” enen̄ede ọfọn etịm mme n̄wed emi enịm. (Mme N̄ke 2:5) Ke anamde emi, mmọ ẹyedu ẹbịghi. Edieke odụn̄de ke idụt oro ẹtọn̄ọde-tọn̄ọ uforo, ekeme ndidi ukenyeneke ediwak n̄wed ke ini akakade n̄wed, sia ekesikpepde n̄kpọ akpan akpan ke ndikpan̄ utọn̄ nnọ andikpep nnyụn̄ nse se ẹnamde. Yak ida idụt emi ekerede Benin, oro ẹsemde se iwakde ibe usem 50, ke uwụtn̄kpọ. Edi ọsọ n̄kpọ ndikụt mme owo ẹsemde usem inan̄ m̀mê ition udọn udọn, okposụkedi akanam mmọ mînyeneke n̄wed ke mme usem emi. Abasi ọnọ fi ukeme ndida enyịn ye utọn̄ n̄kpep n̄kpọ. Kpa ye oro, n̄wed ekeme ndinen̄ede n̄n̄wam fi ekpep n̄kpọ.

Idem edieke ufan̄ mîkponke ke ufọk mbufo, domo ndinyene eti itie unịm Bible ye mme n̄wed Bible. Bon mmọ ke itie oro edisọpde okụt ye itie oro n̄kpọ mîdibiatke mmọ.

Ukpepn̄kpọ Ubon

Edieke afo edide ete m̀mê eka, afo ekpenyene ndikere nte akpan̄wamde nditọ fo ẹtiene ẹkpep se afo ekpepde. Ke mme idụt oro ẹtọn̄ọde-tọn̄ọ uforo, mme ete ye eka ẹsiwak ndikpep nditọ mmọ ediwak usọ oro nditọ ẹdidade ẹdu uwem. Emi ekeme ndisịne utemudia, utọin̄wan̄, ukọiyak, uka ifia, uka mmọn̄, ye unyamurua. Emi edi ata ukpep oro ekemede ndinịm owo uwem. Nte ededi, ediwak ete ye eka isitieneke ikpep nditọ mmọ ifiọk oro ekemede ndida nsịm nsinsi uwem.

Se ededi oro idaha afo edide, afo emekeme ndikere ke unyeneke ini ndida nnam n̄kpọ efen. Andibot ọfiọk emi n̄ko. Kaban̄a nte ẹkpekpepde nditọ usụn̄ esie, enye ọkọdọhọ anyan ini ko ete: “Dọdiọn̄ siak mmọ nọ nditọ fo, nyụn̄ kama mmọ ke inua fo ke ini afo etiede ke ufọk fo, ye ini afo asan̄ade ke usụn̄, ye ke ini afo anade ke isọn̄, ye ke ini afo adahade ke enyọn̄.” (Deuteronomy 6:7) Ke ekerede se itien̄wed emi etịn̄de, domo ndinam ndutịm ukpepn̄kpọ nte mbon oro ẹwụtde mi:

1. “Ke ini afo etiede ke ufọk fo”: Domo ndikpep Bible ke ufọk ye nditọ fo kpukpru ini,  eyedi ke urua ke urua, kpa nte enyenede ndidi ẹkekpep fi ntre. Mme Ntiense Jehovah ẹsio mme n̄wed Bible oro ẹfọnde ndida n̄kpep nditọwọn̄ inamke n̄kpọ m̀mê isua ifan̄ ke mmọ ẹdi.

2. Ke “ini afo asan̄ade ke usụn̄”: Da ido ufan neme nneme ye nditọ fo ban̄a Jehovah, kpa nte esidade ido ufan ekpep mmọ mme n̄kpọ eken m̀mê ọnọ mmọ ndausụn̄.

3. “Ke ini afo anade ke isọn̄”: Bọn̄ akam ye nditọ fo kpukpru okoneyo.

4. “Ke ini afo adahade ke enyọn̄”: Ediwak ubon ẹnyene nti utịp ke ndineme itien̄wed Bible kiet kpukpru usenubọk. Mme Ntiense Jehovah ẹsida ekpri n̄wed Ẹdụn̄ọde N̄wed Abasi ke Usen ke Usen * ẹnam emi.

Ke mme idụt oro ẹtọn̄ọde-tọn̄ọ uforo, ediwak ete ye eka ẹsinen̄ede ẹsịn ukeme man ẹkụt ke eyen mmimọ kiet aka ufọkn̄wed ntaifiọk. Emi ayanam eyen oro ekeme ndise mban̄a ete ye eka esie ke mmọ ẹma ẹsọn̄. Edi edieke ekpepde Bible onyụn̄ an̄wamde nditọ fo ẹtiene fi ẹkpep Bible, afo eyenyene ifiọk oro edinọde fi ye ofụri ubon fo nsinsi uwem.

Ndi tutu amama oyodu ini oro nnyịn idifiọkde kpukpru n̄kpọ? Baba. Nte isọn̄ nnyịn akade iso ndisan̄a n̄kanade akaka ekondo oro mînyeneke utịt mi, nnyịn iyaka iso ndikọ ifiọk. Ke akpanikọ, Ecclesiastes 3:11 ọdọhọ ete: “[Abasi] ama anam kpukpru n̄kpọ eye ke ini mmọ: ama onyụn̄ esịn mmọ asian ke esịt, koro edieke asian mîdụhe, owo ikemeke ndikụt n̄kpọ emi Abasi anamde, ọtọn̄ọde ke ibuot tutu esịm utịt.” Ukọ ifiọk edi inem inem n̄kpọ oro mîditreke tutu amama.

[Mme Ikọ idakisọn̄]

[Se Ẹwetde ke Ikpọ Abisi ke page 5]

“Nsinsi uwem ọwọrọ mmọ ndinyene ifiọk mban̄a fi . . . ”

[Mme ndise ke page 7]

N̄wam ubon fo ọkọ ifiọk idahaemi ye ke nsinsi