Ndika N̄kan̄wam ke Macedonia

“BE DI ke Macedonia din̄wam nnyịn.” (Utom 16:9) Ikọ emi owo oro apostle Paul okokụtde ke n̄kukụt eketịn̄de mi okowụt ke ama oyom ẹtan̄a eti mbụk Obio Ubọn̄ Abasi ke obufa efakutom, ke mme obio oro ẹdude mfịn ke Greece.

Ke ẹbaharede ukem ukem, owo kiet ke otu owo 1,840 oro ẹdude ke Macedonia eyomfịn, edi Ntiense Jehovah. Akanam ediwak ke otu owo emi ikopke n̄kpọ iban̄a Jehovah Abasi. Ke akpanikọ, enen̄ede oyom mbon idụt emi ẹkop etop emem.—Matthew 24:14.

Abasi ama eberede usụn̄ man ẹkpen̄wam mbon Macedonia. Usen kiet ke November 2003, ekpri ọfis Mme Ntiense Jehovah ke Skopje ama ọbọ ikot urụk ukopikọ oro owo mîkodorike enyịn. Ikot oro okoto N̄ka Uforo Macedonia, emi ọkọdọhọde Mme Ntiense ẹdibọp ataya ke ebiet oro ẹkenamde edinam ediwụt n̄kpọurua ke usen ita, man ẹnam mme owo ẹfiọk se mmọ ẹnịmde ke akpanikọ. Edinam emi ọkọtọn̄ọ ke November 20, 2003. Nso akwa ifet ke ekedi ntem ndida eti mbụk Obio Ubọn̄ nsọk ediwak tọsịn owo oro akanam mîkopke etop emi!

Ediwak Ntiense ẹma ẹnọ idem unyịme unyịme ndibon nsio nsio n̄wed Mme Ntiense Jehovah ke usem Macedonian. Ẹkebon mme n̄wed emi man owo ekededi oro oyomde ọkpọbọ esie. Edinam emi ama ọnọ ediwak owo ifet ndin̄wọn̄ ata mbịtmbịt mmọn̄ eke spirit ke mfọn.—Ediyarade 22:17.

Mme owo ẹkenen̄ede ẹyom mme n̄wed oro ẹtụkde uwem mmọ, utọ nte Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn ye Ukpọhọde Inemesịt Ubon. * Owo 98 ẹma ẹnọ adres mmọ ẹte Mme Ntiense Jehovah ẹdi ẹbịne mmimọ. Ediwak owo ẹma ẹtịn̄ nti ikọ ẹban̄a utom Mme Ntiense Jehovah ẹnyụn̄ ẹdọhọ ke n̄wed mmọ ẹfọn etieti.

Ete kiet ama omụm ekpri eyen esie ubọk edi ataya oro. Enye ama obụp m̀mê ẹnyene n̄wed nditọwọn̄. Mme Ntiense ẹma ẹwụt enye N̄wed Mi eke Mme Mbụk Bible. * Enye ama ọsọsọp okụbọde ese onyụn̄ obụp ye nduaidem m̀mê akpa okụk ifan̄. Ke ini okokopde ke ẹda enọ unyịmesịt  ẹn̄wam utom unọ ukpep oro Mme Ntiense Jehovah ẹnamde, idem ama akam enen̄ede aduai enye. (Matthew 10:8) Enye ama owụt eyen esie n̄wed oro onyụn̄ ọdọhọ ete: “Sese nte n̄wed emi eyede! Nyesikot mbụk kiet nnọ fi kpukpru usen!”

Prọfesọ ukpepn̄kpọ akwaifiọk ama edi ataya oro. Enye ama enen̄ede ama ido ukpono ke ofụri ofụri, edi enye ekenen̄ede ama se Mme Ntiense Jehovah ẹnịmde ke akpanikọ. Ke ini ekesede n̄wed Mankind’s Search for God, * prọfesọ emi ama ọdọhọ ete: “Ke akpanikọ, ẹwet n̄wed emi ke usụn̄ oro etịmde owụt ifiọk! Nte ẹkpewetde n̄wed edi emi.” Ekem, ndusụk nditọ ufọkn̄wed esie ẹma ẹdi ataya oro ẹdidọhọ ẹnọ mmimọ n̄wed oro prọfesọ oro ọkọbọde. Mmọ ẹkeyom ndikpep n̄wed oro. Mmọ ẹkekere ke enye ayada n̄wed oro ekpep mmimọ n̄kpọ.

Edinam emi ama ọnọ ndusụk owo ifet ndikop akpanikọ N̄wed Abasi oro akanam mmọ mîkopke. Otu uyen emi ẹdide inan ẹma ẹdi n̄ko. Ntiense kiet ama enyene ibio ibio nneme ye mmọ, ndien n̄kaiferi kiet ama an̄wam ndikabade se ẹtịn̄de nsịn ke usem idiọn̄ọ. Ntiense oro ama ada mme ndise ke n̄wed Akakan Owo Oro Akanam Odude Uwem * anam mmọ ẹfiọk ke Jesus ama anam mbon udọn̄ọ, esịnede mme inan, ẹkop nsọn̄idem. Esịt ama ẹnem mmọ “ndikop” ke Bible ọn̄wọn̄ọ nte ke Jesus ọyọsọp anam ukem n̄kpọ oro ọnọ mme owo oro ẹdụn̄ọde ke isọn̄ mfịn. Ediwak mmọ ẹma ẹnem esịt ndibọ mme n̄wed ẹkọn̄ọde ke Bible, ndien ẹma ẹnam ndutịm man Ntiense oro ọfiọkde usem idiọn̄ọ akpaka ebịne mmọ.

Ke adianade ye eke usem Macedonian, ẹma ẹnyene mme n̄wed n̄ko ke usem Albanian, Ikọmbakara, ye usem Turkish. Eren kiet oro mîfiọkke usem Macedonian ama ọdọhọ ẹnọ imọ n̄wed ke Ikọmbakara. Ke ama ọkọbọ Enyọn̄-Ukpeme ye Awake!, enye ama ọdọhọ ke imọ isisem usem Turkish. Ke ini ẹkewụtde enye mme n̄wed ke usem esie, usem ama akak enye inua! Enye ama okụt ke Mme Ntiense Jehovah ẹyom ndin̄wam kpukpru owo.

Nso eti ikọ ntiense ke ẹkenọ ntem ke ini edinam oro, ndien ekedi n̄kpọ nsịnudọn̄ didie ntem ndikụt nte ata ediwak owo ẹyomde ndifiọk akpanikọ Bible! Ih, Jehovah ekebererede usụn̄ emi man ẹsuan eti mbụk Obio Ubọn̄ ẹnọ ediwak owo ke Macedonia.

[Ikọ idakisọn̄]

[Ekebe/Mme ndise ke page 9]

AKPAN EDINAM!

Ke May 17, 2003, ẹma ẹnam akpan edinam oro edin̄wamde ẹtetịm ẹsuan eti mbụk Obio Ubọn̄ Abasi ke Macedonia. Ẹma ẹyak obufa ọfis Mme Ntiense Jehovah ẹnọ ke Skopje. Ẹkeda isua iba ẹbọp ọfis emi, oro okponde utịm ikanan̄ akan enye oro okodude mbemiso.

Ọfis emi edi ufọk ita, esịnede itie utịmutom ye itie ukabade n̄wed, ọkọrọ ye ufọkidụn̄, itie utem udia ye itie uyetọfọn̄. Guy Pierce, emi edide owo Otu Ukara Mme Ntiense Jehovah, ọkọnọ utịn̄ikọ ediyak nnọ. Mme owo ẹma ẹto idụt duop ẹdidụk edinam ediyak nnọ oro. Ama enem kpukpru mmọ ndikụt ndiye ufọk emi.

[Ndise obio ke page 8, 9]

(Ama oyom ndikụt nte enye enen̄erede etie, se n̄wed)

BULGARIA

MACEDONIA

Skopje

ALBANIA

GREECE

[Ndise ke page 8]

Skopje, Macedonia