Ediset ke N̄kpa—Ukpepn̄kpọ Oro Ebehede Fi
Ediset ke N̄kpa—Ukpepn̄kpọ Oro Ebehede Fi
“Mmenyene idotenyịn ke Abasi . . . nte ke ndinen owo ye mme anam ukwan̄n̄kpọ ẹyeset ke n̄kpa.”—UTOM 24:15.
1. Ediset ke n̄kpa akasan̄a didie edi n̄kpọ eneni ke esop Sanhedrin?
APOSTLE PAUL okodu ke Jerusalem ke utịt isan̄ utom isụn̄utom esie ọyọhọ ita ke isua 56 E.N. Ke mbon Rome ẹma ẹkemụm enye, ẹma ẹda enye ẹka iso Sanhedrin, kpa akwa esop mme Jew. (Utom 22:29, 30) Paul ama ese mbon esop oro onyụn̄ okụt ke ndusụk mmọ ẹkedi mme Sadducee ndien mmọ eken ẹdi mme Pharisee. Otu iba emi ẹma ẹkpụhọde ẹkpọn̄ kiet eken ke se mmọ ẹnịmde ke akpanikọ ẹban̄a ediset ke n̄kpa. Mme Sadducee ikenịmke ediset ke n̄kpa ke akpanikọ; edi mme Pharisee ẹma ẹnịm. Ke ndiwụt ke imenịm ediset ke n̄kpa ke akpanikọ, Paul ama ọdọhọ ete: “Nditọete, ami ndi Pharisee, eyen Pharisee. Ẹkot mi ikpe ẹban̄a idotenyịn ediset mme akpan̄kpa.” Ke nditịn̄ ntem, enye ama esịn ofụri esop ke ndutịme.—Utom 23:6-9.
2. Ntak emi Paul okodude ke mben̄eidem ndiwụt ntak emi imọ ikenịmde ediset ke n̄kpa ke akpanikọ?
2 Ediwak isua ke edem, ke ini Paul akakade Damascus, enye ama okop nte Jesus etịn̄de ikọ ke n̄kukụt oro enye okokụtde. Paul ama obụp Jesus ete: “Nnyene ndinam nso, Ọbọn̄?” Jesus ama ọbọrọ enye ete: “Daha ke enyọn̄, dụk ke Damascus, ndien do ẹyesian fi kpukpru n̄kpọ eke ẹmekde ẹnịm ẹte anam.” Ke ini Paul ekesịmde Damascus, Ananias emi ekedide Christian oro esituade owo mbọm ama okụt Paul onyụn̄ ọdọhọ ete: “Abasi mme ete ete nnyịn ememek fi ete edifiọk uduak imọ onyụn̄ okụt Enye emi enende [kpa Jesus emi ẹnamde eset] onyụn̄ okop ikọ eke otode enye ke inua.” (Utom 22:6-16) Do, an̄wan̄a ntak emi Paul okodude ke mben̄eidem ndiwụt ntak emi imọ inịmde ediset ke n̄kpa ke akpanikọ.—1 Peter 3:15.
Nditan̄a Idotenyịn Ediset ke N̄kpa An̄wan̄wa
3, 4. Didie ke Paul okowụt ke imọ idi owo emi enen̄erede atan̄a ediset ke n̄kpa, ndien nso ke nnyịn ikeme ndikpep nto uwụtn̄kpọ esie?
3 Ekem, ẹma ẹnọ Paul aka iso Felix Andikara. Ke ini oro, Tertullus, “owo udọnikọ,” oro ekemende ikọ mme Jew etịn̄ ọnọ andikara ama odori Paul ikọ ete ke enye edi adaiso isio n̄ka ye nte ke enye edi owo ndutịme. Ye unana ubiatini, Paul ama ọbọrọ ete: “Mmenyịme ke iso fo, nte, amaedi usụn̄ emi mmọ ẹkotde ‘n̄ka,’ kpa ke usụn̄ emi ke ami nnam edisana utom nnọ Abasi mme ete ete mi.” Ndien, ke etịn̄de ata akpan ntak oro anamde ẹdori enye ikọ, enye ama aka iso ete: “Mmenyene idotenyịn ke Abasi, kpa idotenyịn emi mme owo emi ke idemmọ nde ẹnyenede, nte ke ndinen owo ye mme anam ukwan̄n̄kpọ ẹyeset ke n̄kpa.”—Utom 23:23, 24; 24:1-8, 14, 15.
4 N̄kpọ nte isua iba ke ukperedem, Porcius Festus emi akadade itie Felix ama okot Edidem Herod Agrippa editiene imọ odụn̄ọde Paul emi ekedide owo n̄kpọkọbi. Festus ama anam an̄wan̄a ke mme andidori Paul ikọ ẹkeneni se enye akatan̄ade ete ke “owo kiet emi ẹkotde Jesus emi ama akakpa . . . ke odu uwem.” Ke ndikan̄ idem, Paul ama obụp ete: “Ntak emi ọsọn̄de mbufo ndinịm ke akpanikọ nte ke Abasi anam mme akpan̄kpa ẹset?” Ekem enye ama ọdọhọ ete: “Sia mbọde un̄wam emi otode Abasi n̄ka iso ndu uwem tutu esịm mfịn emi ntịn̄ ikọ nte ntiense nnọ n̄kpri ye ikpọ, edi ntịn̄ke n̄kpọ ndomokiet ke mîbọhọke mme n̄kpọ emi mme Prọfet ọkọrọ ye Moses ẹkedọhọde ẹte ẹyeda itie, nte ke Christ enyene ndikụt ukụt, ndien nte akpa owo ndiset ke otu mme akpan̄kpa, enye enyene ndikwọrọ un̄wana nnọ mbio obio emi ye mme idụt.” (Utom 24:27; 25:13-22; 26:8, 22, 23) Ke akpanikọ, Paul ekedi owo emi ekenen̄erede atan̄a ediset ke n̄kpa! Ukem nte Paul, nnyịn n̄ko imekeme nditan̄a uko uko nte ke mme akpan̄kpa ẹyeset. Edi nnyịn ikpodori enyịn mme owo ndinam n̄kpọ didie? Ekeme ndidi nte ẹkenamde ye Paul.
5, 6. (a) Didie ke mme owo ẹkenam n̄kpọ ke ini apostle Paul akatan̄ade ediset ke n̄kpa? (b) Nso idi akpan n̄kpọ oro ikpanamde nte nnyịn ikwọrọde idotenyịn ediset ke n̄kpa?
5 Da ke uwụtn̄kpọ, se iketịbede inọ Paul ke ọyọhọ isan̄ isụn̄utom esie iba (ke n̄kpọ nte 49-52 E.N.) ke ini enye akakade Athens. Enye ama ọkọk ibuot ye mme okpono ndem onyụn̄ anam mmọ ẹdiọn̄ọ ke Abasi aduak ndibiere ikpe nnọ ererimbot ke edinen ido ebe ke owo emi Enye emekde. Owo emi edi Jesus. Paul ama anam an̄wan̄a nte ke Abasi ọnọ nsọn̄ọ ke emi enye akanamde Jesus eset ke n̄kpa. Mme owo oro ẹkenam n̄kpọ didie? Nnyịn ikot ite: “Edi, ke ini mmọ ẹkopde ẹban̄a ediset mme akpan̄kpa, ndusụk mmọ ẹtọn̄ọ ndisak nsahi, ke adan̄aemi mmọ eken ẹdọhọde ẹte: ‘Nnyịn iyokop se afo editịn̄de aban̄a emi ini en̄wen.’”—Utom 17:29-32.
6 Oro edi ukem se iketịbede inọ Peter ye John esisịt ini ke Pentecost 33 E.N. ama ekebe. Mme Sadducee ẹkesụk ẹda iso ke eneni oro. Utom 4:1-4 etịn̄ se iketịbede, ete: “Ekem ke adan̄aemi mmọ mbiba ẹsụk ẹtịn̄de ikọ ẹnọ mbio obio, mbọn̄ oku ye etubom temple ye mme Sadducee ẹdi ẹdisịm mmọ, ẹnyụn̄ ẹyat esịt koro mmọ ẹkpepde mbio obio n̄kpọ ẹnyụn̄ ẹtan̄ade ediset Jesus ke n̄kpa in̄wan̄-in̄wan̄.” Nte ededi, mbon eken ẹma ẹnam n̄kpọ nte ọfọnde. “Ediwak mbon emi ẹkekpan̄de utọn̄ ẹnọ utịn̄ikọ oro ẹnịm ke akpanikọ, ndien ibat mbon emi edi n̄kpọ nte tọsịn ition.” Nte an̄wan̄ade, nnyịn imekeme ndidori enyịn ndikụt mme owo ẹnamde n̄kpọ ke nsio nsio usụn̄ ke ini ikwọrọde idotenyịn ediset ke n̄kpa. Ke ikerede iban̄a oro, edi akpan n̄kpọ ndida ukpepn̄kpọ emi nsọn̄ọ mbuọtidem nnyịn.
Mbuọtidem ye Ediset ke N̄kpa
7, 8. (a) Nte leta oro ẹkewetde ẹnọ ẹsọk esop Corinth akpa isua ikie owụtde, didie ke mbuọtidem Christian ekeme ndiwọrọ ikpîkpu? (b) Didie ke edinyene nnennen ifiọk mban̄a ediset ke n̄kpa anam ata mme Christian ẹda san̄asan̄a ẹkpọn̄ mme nsunsu Christian?
7 Idịghe kpukpru mbon oro ẹkekabarede ẹdi Christian ke akpa isua ikie E.N. ẹkesọp ẹnịm ediset ke n̄kpa ke akpanikọ. Ndusụk ke otu mmọ ẹkedu ke esop Corinth. Paul ekewet ọnọ mmọ ete: “Ke akpa itie, mma nyak se n̄konyụn̄ mbọde nnọ mbufo, nte ke Christ ama akpa kaban̄a mme idiọkn̄kpọ nnyịn nte N̄wed Abasi ọdọhọde; ye nte ke ẹma ẹbụk enye, ih, ye nte ke ẹma ẹnam enye eset ke ọyọhọ usen ita nte N̄wed Abasi ọdọhọde.” Ekem Paul ama ọsọn̄ọ ikọ emi ke ndidọhọ ke Christ oro ẹkenamde eset ama “owụt nditọete emi ẹwakde ẹbe owo ikie ition idem,” onyụn̄ adian do ete ke ndusụk mmọ ke ẹdodu uwem. (1 Corinth 15:3-8) Enye ama aka iso ọkọk ibuot ye mmọ ete: “Edieke ẹkwọrọde ẹte ke ẹma ẹnam Christ eset ke n̄kpa, ndusụk owo ke otu mbufo ẹsan̄a didie ẹdọhọ ẹte ediset mme akpan̄kpa idụhe? Ke akpanikọ, edieke ediset mme akpan̄kpa mîdụhe, owo ikonyụn̄ inamke Christ eset. Edi edieke owo mîkanamke Christ eset, ukwọrọikọ nnyịn ke akpanikọ ọwọrọ ikpîkpu, mbuọtidem nnyịn onyụn̄ ọwọrọ ikpîkpu.”—1 Corinth 15:12-14.
8 Ih, ukpepn̄kpọ ediset ke n̄kpa edi akpan n̄kpọ tutu mbuọtidem Christian ọwọrọ ikpîkpu ke owo mînịmke enye ke akpanikọ. Ke akpanikọ, nnennen ifiọk aban̄ade ediset ke n̄kpa anam ata mme Christian ẹkpụhọde ye mme nsunsu Christian. (Genesis 3:4; Ezekiel 18:4) Mmọdo, Paul esịn ukpepn̄kpọ ediset ke n̄kpa ke otu “akpa ukpepn̄kpọ” Ido Ukpono Christ. Nnyịn ikpakam ibiere ‘ndisịn ifịk n̄kọri nsịm ọyọhọ idaha.’ Paul eteme ete: “Nnyịn iyanam emi, edieke Abasi enyịmede.”—Mme Hebrew 6:1-3.
Idotenyịn Ediset ke N̄kpa
9, 10. Nso ke ikọ emi “ediset ke n̄kpa” ọwọrọ ke Bible?
9 Man ika iso ida idotenyịn ediset ke n̄kpa isọn̄ọ mbuọtidem nnyịn, ẹyak nnyịn idụn̄ọde mme utọ mbụme nte: Nso ke ikọ oro ediset ke n̄kpa ọwọrọ ke Bible? Didie ke ukpepn̄kpọ ediset ke n̄kpa owụt ima Jehovah? Ibọrọ mbụme emi ẹyenam nnyịn inen̄ede isan̄a ikpere Abasi onyụn̄ an̄wam nnyịn ikpep mbon efen iban̄a ediset ke n̄kpa.—2 Timothy 2:2; James 4:8.
10 Ẹkabade ikọ emi “ediset ke n̄kpa” ẹto ikọ Greek oro ke ata ata usụn̄ ọwọrọde “edifiak ndaha nda.” Nso ke ikọ oro abuana? Nte Bible owụtde, idotenyịn ediset ke n̄kpa edi ndinịm ke akpanikọ ke owo oro akpade ekeme ndifiak ndu uwem. Bible aka iso owụt ke ẹnam owo oro eset ke idem eke obụk edieke enye enyenede idotenyịn edidu uwem ke isọn̄, m̀mê ke idem eke spirit edieke enye enyenede idotenyịn edidu uwem ke heaven. Idem esikpa nnyịn aban̄a ima, ọniọn̄, ye odudu Jehovah oro ẹkụtde ke utịbe utịbe idotenyịn ediset ke n̄kpa oro enye ọnọde.
11. Nso idotenyịn ediset ke n̄kpa odu ọnọ mme asan̄autom Abasi oro ẹyetde aran?
11 Edinam Jesus ye nditọete esie oro ẹyetde aran ẹset ke idem eke spirit anam mmọ ẹdot ndinam utom ke heaven. (1 Corinth 15:35-38, 42-53) Mmọ ẹyediana kiet ẹnam utom nte mme andikara ke Obio Ubọn̄ Messiah, oro edinamde isọn̄ akabade Paradise. Mbon oro ẹyetde aran ẹnam otu mme oku emi ẹdade ubọn̄, ke idak Jesus nte Akwa Oku. Mmọ ẹyenam ubonowo ọbọ ufọn oto uwa ufak Christ ke edinen obufa ererimbot. (Mme Hebrew 7:25, 26; 9:24; 1 Peter 2:9; Ediyarade 22:1, 2) Kan̄a ke emi, mbon oro ẹyetde aran oro ẹsụk ẹdude ke isọn̄ ẹyom ndika iso nnam se inemde Abasi esịt. Ke ini mmọ ẹkpade, “utịp” mmọ edidi ndiset ke n̄kpa n̄ka heaven n̄kenyene uwem eke spirit oro mîkemeke ndikpa. (2 Corinth 5:1-3, 6-8, 10; 1 Corinth 15:51, 52; Ediyarade 14:13) Paul ekewet ete: “Edieke nnyịn idianade kiet ye enye ke se ibietde n̄kpa esie, nnyịn ke akpanikọ iyadiana n̄ko ye enye ke se ibietde ediset ke n̄kpa esie.” (Rome 6:5) Edi nso kaban̄a mbon oro ẹdinamde ẹset ẹfiak ẹdidu uwem mi ke isọn̄? Didie ke idotenyịn ediset ke n̄kpa ekeme ndinam mmọ ẹnen̄ede ẹsan̄a ẹkpere Abasi? Nnyịn imekeme ndikpep ekese nto uwụtn̄kpọ Abraham.
Ediset ke N̄kpa ye Edidi Ufan Jehovah
12, 13. Nso akwa ntak akanam Abraham enyene mbuọtidem ke ediset ke n̄kpa?
12 Abraham oro ẹkekotde “ufan Jehovah,” ekedi owo oro ekenen̄erede enyene mbuọtidem. (James 2:23) Paul ama etịn̄ aban̄a mbuọtidem Abraham utịm ikata ke ini enye akasiakde iren ye iban mbuọtidem ke Mme Hebrew ibuot 11. (Mme Hebrew 11:8, 9, 17) Ọyọhọ utịm ikata akaban̄a mbuọtidem oro Abraham ekenyenede ke ini enye okokopde uyo Abasi oyom ndiwa Isaac eyen esie. Abraham ama enyene mbuọtidem ke Jehovah oyosu un̄wọn̄ọ oro Enye ọkọn̄wọn̄ọde ke mfri edito ubon Isaac. Idem edieke enye akpakawade Isaac, Abraham “akabat ete Abasi ekeme ndinam enye eset ọwọrọ ke otu mme akpan̄kpa.”
13 Ke akpatre, ke ini Jehovah okokụtde udomo mbuọtidem oro Abraham ekenyenede, enye ama ọnọ unam ndida n̄kpụhọ ke ibuot Isaac. Kpa ye oro, se iketịbede inọ Isaac ekedi uwụtn̄kpọ ediset ke n̄kpa, nte Paul akanamde an̄wan̄a ete: “Ke ndamban̄a usụn̄ enye [Abraham] ọkọtọn̄ọ ntak ọbọ enye [Isaac] ke n̄kpa ada.” (Mme Hebrew 11:19) Ke akande oro, Abraham ama enyenyene akwa ntak oro akanamde enye enyene mbuọtidem ke ediset ke n̄kpa. Nte idịghe Jehovah akafiak ọnọ enye ukeme ubon eyen ke ini enye ye Sarah n̄wan esie ẹkenyenede Isaac ke ini usọn̄?—Genesis 18:10-14; 21:1-3; Rome 4:19-21.
14. (a) Nte Mme Hebrew 11:9, 10 ọdọhọde, nso ke Abraham eketie ebet? (b) Man Abraham ọbọ edidiọn̄ Obio Ubọn̄ ke obufa ererimbot, nso inyene nditịbe nnọ enye? (c) Didie ke nnyịn ikeme ndibọ mme edidiọn̄ Obio Ubọn̄?
14 Paul ọkọdọhọ ke Abraham okodụn̄ nte esenowo, okonyụn̄ odụn̄ ke ataya “[etie] ebet obio emi enyenede ata itiat idakisọn̄, emi andibọp ye andinam enye edide Abasi.” (Mme Hebrew 11:9, 10) Emi ikedịghe ata obio nte Jerusalem, oro temple Abasi okodude. Utu ke oro, emi ekedi ndamban̄a obio. Enye ekedi Obio Ubọn̄ Abasi eke heaven oro abuanade Christ Jesus ye nsan̄a mme andikara esie 144,000. Ke ini owo 144,000 ẹdade ubọn̄ ke heaven, ẹkot mmọ n̄ko “edisana obio, Obufa Jerusalem,” “n̄wanndọ” Christ. (Ediyarade 21:2) Ke 1914, Jehovah ama ayari Jesus ntinya ndikara nte Edidem Messiah ke Obio Ubọn̄ eke heaven onyụn̄ ọdọhọ enye akara ke otu mme asua esie. (Psalm 110:1, 2; Ediyarade 11:15) Man ọbọ edidiọn̄ ukara Obio Ubọn̄, ana Abraham, “ufan Jehovah” eset ke n̄kpa. Kpasụk ntre, man ibọ edidiọn̄ Obio Ubọn̄, ana nnyịn idu uwem ke obufa ererimbot Abasi nte akwa otuowo oro ẹbọhọde Armageddon m̀mê nte mbon oro ẹnamde ẹset ke n̄kpa. (Ediyarade 7:9, 14) Nte ededi, nso idi ntak idotenyịn ediset ke n̄kpa?
Ima Abasi Edi Ntak Idotenyịn Ediset ke N̄kpa
15, 16. (a) Didie ke akpa ntịn̄nnịm ikọ ke Bible ọnọ ntak ndinyene idotenyịn ke ediset n̄kpa? (b) Didie ke mbuọtidem ke ediset ke n̄kpa anam nnyịn isan̄a ikpere Jehovah?
15 N̄kpet n̄kpet itie ebuana oro inyenede ye edima Ete nnyịn eke heaven, ọkpọsọn̄ mbuọtidem oro inyenede nte Abraham, ye nnyịn ndikop uyo nnọ Abasi ẹnam Jehovah abat nnyịn nte edinen onyụn̄ abat nnyịn nte mme ufan Esie. Emi anam nnyịn idori enyịn nditiene mbọ mme edidiọn̄ Obio Ubọn̄. Ke akpanikọ, ata akpa ntịn̄nnịm ikọ oro ẹwetde ke Ikọ Abasi, ke Genesis 3:15, ọnọ ntak ndinyene idotenyịn ke ediset ke n̄kpa ye edidi ufan Abasi. Enye itịn̄ke iban̄a edinuak Satan ibuot kpọt, edi etịn̄ n̄ko ete ke ẹyenuak Mfri n̄wan Abasi nditịn̄ikpat. N̄kpa Jesus ke eto akada aban̄a edinuak enye nditịn̄ikpat. Enye ndiset ke n̄kpa ke ọyọhọ usen ita ama ọkọk unan oro onyụn̄ anam edi mmemmem ndisobo “enye emi ekemede ndida n̄kpa ndi, oro edi, Devil.”—Mme Hebrew 2:14.
16 Paul eti nnyịn ete ke “Abasi owụt ima eke enye amade nnyịn ke emi Christ akakpade ke ibuot nnyịn ke adan̄aemi nnyịn isụk idide mme anamidiọk.” (Rome 5:8) Ndiwụt esịtekọm mban̄a ima-mfọnido oro owo mîdotke mi anam nnyịn inen̄ede isan̄a ikpere Jesus ye edima Ete nnyịn eke heaven.—2 Corinth 5:14, 15.
17. (a) Nso idotenyịn ke Job ekenyene? (b) Nso ke Job 14:15 ayararede aban̄a Jehovah, ndien didie ke emi otụk fi?
17 Job, anam-akpanikọ owo emi okodude uwem mbemiso eyo mme Christian, ama odori enyịn ke imọ iyeset ke n̄kpa n̄ko. Satan ama otụhọrede enye idiọk idiọk. Sia mîkebietke mme ufan abian̄a esie, oro mîkedehede itịn̄ iban̄a ediset ke n̄kpa, idotenyịn ediset ke n̄kpa ama ọdọn̄ Job esịt anamde enye obụp ete: “Ke owo akpade, nte enye ediset?” Job ama ọbọrọ ke idemesie ete: “Nyebet ke ofụri ini utom mi, tutu edikpụhọde itie mi edi.” Enye ama ọdọhọ Jehovah, Abasi esie, ete: “Afo okpokot, ndien ami n̄kpeyere fi.” Ke etịn̄de aban̄a nte etiede edima Andibot nnyịn ke idem, Job ọkọdọhọ ete: “Utom ubọk fo ọkpọdọn̄ fi.” (Job 14:14, 15) Ih, enen̄ede ọdọn̄ Jehovah ndikụt ini oro kpukpru mbon oro ẹnamde akpanikọ ẹdisetde ẹfiak ẹdidu uwem. Emi anam nnyịn inen̄ede isan̄a ikpere enye didie ntem nte itiede ikere ima-mfọnido oro owo mîdotke emi enye owụtde nnyịn okposụkedi nnyịn idide mme anana-mfọnmma owo!—Rome 5:21; James 4:8.
18, 19. (a) Nso idotenyịn edifiak ndu uwem ke Daniel enyene? (b) Nso ke nnyịn ididụn̄ọde ke ibuotikọ oro etienede?
18 Prọfet Daniel, oro angel Abasi okokotde “owo emi enemde Abasi esịt,” ama odu uwem ebịghi onyụn̄ ọsọn̄ọ ada anam utom Abasi. (Daniel 10:11, 19) Nsọn̄ọnda esie ye Jehovah ikesehekede tọn̄ọ ke ini ntan̄mfep ke 617 M.E.N. tutu esịm ini oro enye akakpade ke ama okokụt n̄kukụt ke 536 M.E.N., ke ọyọhọ isua ita tọn̄ọ Cyrus, edidem Persia akada ubọn̄. (Daniel 1:1; 10:1) Nte ini akakade ke isua oro, Daniel ama okụt n̄kukụt udịm udịm ukara ererimbot oro ẹdisịmde utịt ke akwa ukụt. (Daniel 11:1–12:13) Sia n̄kukụt oro mîketịmke in̄wan̄a Daniel, enye ama obụp angel oro okowụtde enye n̄kukụt emi ete: “Ọbọn̄ mi, utịt n̄kpọ emi edidi didie?” Angel oro ama ọbọrọ ke ndinyan ubọk n̄wụt “utịt ini,” oro ‘mmọ eke ẹnyenede eti ibuot ẹdidide asian.’ Amaedi Daniel ke idemesie, nso ikedi idotenyịn esie? Angel oro ọkọdọhọ ete: “Afo ọyọduọk odudu, onyụn̄ ada ke udeme fo ke utịt mme usen.” (Daniel 12:8-10, 13) Daniel eyeset “ke ini ediset ndinen owo” ke Tọsịn Isua Ukara Christ.—Luke 14:14.
19 Nnyịn idu uwem ke akpatre ikpehe utịt ini, emi onyụn̄ enen̄erede ekpere ntọn̄ọ Tọsịn Isua Ukara Christ akan ini emi ikakabarede idi mme andinịm ke akpanikọ. Mmọdo, ana ibụp idem nnyịn ite, ‘Ndi ami nyodu ke obufa ererimbot oro man nsan̄a ye Abraham, Job, Daniel, ye mme anam-akpanikọ iren ye iban eken?’ Nnyịn iyodu edieke isọn̄ọde isan̄a ye Jehovah inyụn̄ inịmde mbet esie. Ke ibuotikọ oro etienede, nnyịn iyodụn̄ọde idotenyịn ediset ke n̄kpa ntotụn̄ọ ntotụn̄ọ man idiọn̄ọ mbon emi ẹdinamde ẹset.
Nte Afo Emeti?
• Mme owo ẹkenam n̄kpọ didie ke ini Paul akatan̄ade idotenyịn ediset ke n̄kpa?
• Ntak emi idotenyịn ediset ke n̄kpa anamde ata mme Christian ẹda san̄asan̄a ẹkpọn̄ mme nsunsu Christian?
• Nnyịn isan̄a didie ifiọk ke Abraham, Job, ye Daniel ẹma ẹnyene mbuọtidem ke mme owo ẹyeset ke n̄kpa?
[Mme Mbụme Ukpepn̄kpọ]
[Ndise ke page 8]
Ke ini Paul akadade ke iso Felix Andikara, enye ama atan̄a idotenyịn ediset ke n̄kpa uko uko
[Ndise ke page 10]
Ntak emi Abraham ekenyenede mbuọtidem ke ediset ke n̄kpa?
[Ndise ke page 12]
Idotenyịn ediset ke n̄kpa ama ọdọn̄ Job esịt
[Ndise ke page 12]
Daniel eyeset ke ini ediset ndinen owo