Mme Mbụme Ẹtode Mme Andikot

Ndi apostle Paul ikakan̄ke mbuọtidem esie nte Christian ke ini enye ọkọdọhọde esop Sanhedrin ete: “Ami ndi Pharisee”?

Man itịm ifiọk se ikọ Paul oro ẹkụtde ke Utom 23:6 ọwọrọde, ana ikere iban̄a udọn̄ikọ itien̄wed oro.

Ke otu mbon ntịme oro ẹdide mme Jew ẹma ẹkesịn ntịme ye Paul ke Jerusalem, Paul ama ọdọhọ otuowo oro ete: “N̄kọbọ ukpep ke [Jerusalem] ke ukot Gamaliel, ẹteme mi nditiene Ibet mme ete ete ketket.” Okposụkedi otuowo oro ẹkekpan̄de utọn̄ ẹnọ enye ke esisịt ini, ke mmọ ẹma ẹketọn̄ọ ntịme, akwa owoekọn̄ oro ekekpemede Paul ama ada enye aka ebietidụn̄ mbonekọn̄. Ke ini ẹkeyomde ndimia Paul, Paul ama obụp ete: “Nte ibet enyịme mbufo ẹmia owo emi edide eyen Rome emi ikpe mîbiomke?”—Utom 21:27–22:29.

Ke ndan̄nsiere, akwa owoekọn̄ oro ama ada Paul aka iso Sanhedrin, kpa akwa esop mme Jew. Paul ama etịn̄ enyịn ese esop oro onyụn̄ okụt ke mme Sadducee ye mme Pharisee ẹkenam esop oro. Do, enye ama ọdọhọ ete: “Nditọete, ami ndi Pharisee, eyen Pharisee. Ẹkot mi ikpe ẹban̄a idotenyịn ediset mme akpan̄kpa.” Oro ama anam utọk asiaha ke ufọt mme Pharisee ye mme Sadducee, “koro mme Sadducee ẹdọhọde ẹte ediset ke n̄kpa idụhe, angel m̀mê spirit inyụn̄ idụhe, edi mme Pharisee ẹtan̄a an̄wan̄wa ẹte mmọ kpukpru ẹdu.” Ndusụk mbon n̄ka Pharisee ẹma ẹneni ọkpọsọn̄ ọkpọsọn̄ ẹte: “Nnyịn ikwe idiọk ndomokiet ke idem owo emi.”—Utom 23:6-10.

Sia ẹma ẹketịm ẹdiọn̄ọ Paul nte enyene-ifịk Christian, enye ikpekekemeke ndinam esop Sanhedrin enịm ke imọ ikedi ata owo Pharisee. Mme Pharisee oro ẹkedude do ikpokonyụn̄ inyịmeke owo ndomokiet oro ọkọdọhọde ke imọ idi Pharisee, edi oro mîkenịmke ofụri se mmọ ẹkenịmde ke akpanikọ. Mmọdo, Paul ndikọdọhọ ke imọ ikedi Pharisee ikọwọrọke ke enye ekedi ata Pharisee, ndien enyene ndidi mme Pharisee oro ẹkedude do ẹma ẹfiọk se ikọ esie ọkọwọrọde.

Ke ndidọhọ ke ẹkekot imọ ikpe ke ntak idotenyịn ediset ke n̄kpa, Paul okowụt in̄wan̄-in̄wan̄ ke imọ ikebiet mme Pharisee ke afan̄ enye emi. Ke eneni ekededi oro akaban̄ade ediset ke n̄kpa, se Paul ekenịmde ke akpanikọ ekedi ukem ye se mme Pharisee ẹkenịmde, utu ke mme Sadducee, emi mîkenịmke ke ediset ke n̄kpa odu.

Ke se iban̄ade ediset ke n̄kpa, mme angel, ye ndusụk n̄kpọ ke Ibet, se Paul ekenịmde ke akpanikọ nte Christian ikatuahake ye se mme Pharisee ẹkenịmde. (Philippi 3:5) Ntre, mme n̄kpọ emi kpọt ẹkenam Paul ọdọhọ ke imọ idi Pharisee, ndien nte ikọ esie akan̄wan̄ade mbon oro ẹkedude ke esop Sanhedrin ekedi oro. Mmọdo, Paul akada idaha esie nte Jew ndinyan̄a idem ke akwa esop mme Jew oro akanamde n̄kpọ asari asari.

Nte ededi, n̄kponn̄kan uyarade oro owụtde ke Paul ikakan̄ke mbuọtidem edi sia enye akakade iso enyene mfọn Jehovah. Jesus ama asian Paul ke okoneyo oro etienede usen oro Paul ọkọdọhọde ke imọ idi Pharisee, ete: “Nen̄ede nyene uko! Koro kpa nte afo ọkọnọde ọyọhọ ikọ ntiense ke mme n̄kpọ oro ẹban̄ade mi ke Jerusalem, ntre ke ana afo ọnọ ikọ ntiense ke Rome n̄ko.” Sia Paul akakade iso enyene mfọn Abasi, nnyịn inyene ndinyịme ke Paul ikakan̄ke mbuọtidem esie nte Christian.—Utom 23:11.