Nte Akpabatde Usen Kiet Kiet

“NAM nnyịn ifiọk ndibat usen nnyịn ntem, man nnyịn ida esịt ifiọk idi.” (Psalm 90:12) Moses, emi eketienede ewet Bible, ọkọbọn̄ akam ofụri esịt emi. Nso ke enye ekenen̄ede eben̄e? Ndi akpana itiene ibọn̄ utọ akam ofụri esịt oro?

Ke Psalm 90:10, Moses ama eseme aban̄a nte uwem owo omụhọde. Ke idaha efen, enye ama ewet se Job eketịn̄de, ete: “Owo eke n̄wan amande omụhọ usen, onyụn̄ oyụhọ ukụt.” (Job 14:1) Ana in̄wan̄-in̄wan̄ ke ama abiak Moses ndikụt nte uwem anana-mfọnmma owo omụhọde. Ntre, enye akada usen kiet kiet oro enye okodude uwem nte ata ọsọn̄urua enọ. Moses ekeben̄e Abasi ke iyom ndida usen ifan̄ oro okosụhọde ọnọ imọ ndu uwem nte ọfọnde, ke usụn̄ oro edinemde Andibot imọ esịt. Nte nnyịn n̄ko ikpadaha usen ifan̄ oro inyenede idu uwem nte ọfọnde? Se nnyịn ikpodomode ndinam edi oro edieke iyomde mfọn Abasi idahaemi.

Odu akpan n̄kpọ en̄wen oro akanamde Moses ye Job ẹdu uwem ntre, ndien n̄kpọ oro ekpenyene ndinam nnyịn idu uwem ntre n̄ko. Iren iba emi ẹkedide mme eten̄e Abasi mi ẹkesak iso ẹse utịp ini iso mmọ—kpa uwem ke isọn̄ oro ọfọnde. (Job 14:14, 15; Mme Hebrew 11:26) Ini oro, n̄kpa idinamke owo baba kiet etre nti utom esie. Andibot oyom mbon oro ẹnamde akpanikọ ẹdu uwem ke nsinsi ke Paradise isọn̄. (Isaiah 65:21-24; Ediyarade 21:3, 4) Afo emekeme nditiene ndu uwem ke nsinsi ke Paradise isọn̄ edieke ‘abatde usen fo man ada esịt ifiọk edi.’