“Un̄wam Mi Oto Jehovah”

Ifiọk Abasi Adian Ubon Ọtọkiet

“IBIBENE BERLIN.” Oro edi enyịn̄ emi ebe ye n̄wan ke Argentina ẹkekotde ata ata ibibene oro mmọ ẹkebọpde man ẹbaharede ufọk mmọ ke itie iba! Mmọ ẹma ẹnyene utọk oro owo mîkekemeke ndikpe; mmọ ikamaha kiet eken.

Edi n̄kpọ mfụhọ nditịn̄ ke mfịna ebe ye n̄wan oro idịghe esen n̄kpọ. Utọk, unana edinam akpanikọ, ye ata ata usua ẹnọmọ ediwak ubon. Emi ọdiọk etieti koro Abasi ke idemesie ọkọtọn̄ọ ubon. (Genesis 1:27, 28; 2:23, 24) Sia ubon edide enọ Abasi, enye edi nnennen itie ndiwụt ntotụn̄ọ ima. (Ruth 1:9) Edieke mbonubon ẹnamde utom oro Abasi ọnọde mmọ, mmọ ẹkeme ndikpono Jehovah ẹnyụn̄ ẹdat kiet eken esịt. *

Sia edide Abasi ọkọtọn̄ọ ndutịm ubon, oyom nnyịn itiene mme edumbet esie man ifiọk nte ẹkpenamde n̄kpọ ke ubon. Ikọ esie ọdọn̄ọ nti item oro ẹwetde man ẹn̄wam mme ubon ẹkụt unen, akpan akpan ke ini mme mfịna ẹdemerede. Amaedi mme ebe, Bible ọdọhọ ete: “Mme ebe ẹkpema iban mmọ nte idem mmọ.” Ke ini ebe amade n̄wan esie ntem, enenem n̄wan esie ‘ndinyene ntotụn̄ọ ukpono nnọ ebe esie.’—Ephesus 5:25-29, 33.

Apostle Paul ekewet aban̄a itie ebuana oro odude ke ufọt ete ye eka ye nditọ, ete: “Mme ete, ẹkûfiomo nditọ mbufo, edi ẹka iso ẹkama mmọ ke ntụnọ ye ke usụn̄ ukere n̄kpọ Jehovah.” (Ephesus 6:4) Emi n̄ko anam ima odu ke ubon, anamde edi mmemmem n̄kpọ ọnọ nditọ ndikop uyo nnọ mme ete ye eka mmọ.—Ephesus 6:1.

Itien̄wed ifan̄ oro ẹsiakde do ẹdi uwụtn̄kpọ nti item oro Bible ọnọde kaban̄a uwem ubon. Mbon oro ẹdade mme edumbet Abasi ẹsịn ke edinam ẹkop inemesịt ke ubon mmọ. Da ebe ye n̄wan ẹtode Argentina, oro iketịn̄de iban̄a ke ntọn̄ọ, nte uwụtn̄kpọ. Ke mmọ ẹma ẹkekpep Bible ye Mme Ntiense Jehovah ke ọfiọn̄ ita, mmọ mbiba ẹma ẹtọn̄ọ ndida ọniọn̄ ọniọn̄ item Bible aban̄ade ndọ nsịn ke edinam. Mmọ ẹma ẹsịn ofụri ukeme ndifori usọ unyene nneme mmọ, ndiwụt kiet eken mbọm, ndinyụn̄ mfen kiet eken. (Mme N̄ke 15:22; 1 Peter 3:7; 4:8) Mmọ ẹma ẹkpep ndikara iyatesịt mmọ nnyụn̄ nyom un̄wam nto Abasi ke ini etiede nte ke mfịna ọmọn̄ akan mmọ ubọk. (Colossae 3:19) Ikebịghike “Ibibene Berlin” oro ama ọduọ!

Abasi Ekeme Ndinam Ubon Adiana Kiet

Ndifiọk mme edumbet Abasi nnyụn̄ nda mmọ nsịn ke edinam ẹkeme ndin̄wam ubon akan mme mfịna. Emi edi akpan n̄kpọ, koro ẹma ẹtịn̄ ke ntịn̄nnịm ikọ ẹte ke ubon oyosobo ata idiọk idomo ke eyo nnyịn. Paul ama ebem iso etịn̄ aban̄a mbiara ido uwem ye n̄wụre ke n̄kaowo oro ikụtde mfịn. Enye ọkọdọhọ ke ẹdida unana edinam akpanikọ, unana “ndammana ima” ye edisọn̄ ibuot ye ete ye eka, idem ke otu mbon oro “ẹnyenede enyọn̄ enyọn̄ ido uten̄e Abasi,” ẹdiọn̄ọ “mme akpatre usen.”—2 Timothy 3:1-5.

Edidomo ndinem Abasi esịt ekeme ndin̄wam nnyịn ibiọn̄ọ mme utọ n̄kpọ oro ẹkamade  n̄kpọndịk do ke ubon. Ediwak ubon ẹkụt ke imoyom usọbọ eke spirit man ikeme ndikan idomo oro mmimọ isobode. Edieke mme andibuana ke ubon ẹyomde ndinyene eti itie ebuana ye Abasi, ke akande kpukpru n̄kpọ, ana mmọ ẹda mme edumbet Bible ẹsịn ke edinam ẹnyụn̄ ẹdiọn̄ọ “ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt.” (Psalm 127:1) Edinyene inemesịt ke ubon ọkọn̄ọ ke edinịm Abasi akpa ke uwem ubon nnyịn.—Ephesus 3:14, 15.

Ete kiet ke Hawaii oro ekerede Dennis ama okụt nte oro edide akpanikọ. Okposụkedi enye ọkọdọhọde ke idi Christian, enye ama esima ndisụn̄i isụn̄i nnyụn̄ n̄n̄wana en̄wan. Ke ama okodụk ekọn̄, enye ama etetịm etie afai afai ye utọk utọk. Enye ọdọhọ ete: “N̄kesin̄wana en̄wan kpukpru ini. N̄kọdọn̄ke utọn̄ ke se iketịbede inọ mi, n̄konyụn̄ mfeheke n̄kpa. Mma n̄ka iso ndisụn̄i owo nnyụn̄ n̄n̄wana en̄wan. N̄wan mi oro ekedide kiet ke otu Mme Ntiense Jehovah ama esịn udọn̄ ọnọ mi ete n̄kpep Bible.”

Dennis ama ọbiọn̄ọ ukeme oro n̄wan esie ekesịnde. Nte ededi, nti edu Christian oro n̄wan esie ekenyenede ama anam Dennis okpụhọde ndiọi edu esie. Ke akpatre, Dennis ama asan̄a ye n̄wan ye nditọ esie aka mbono esop Christian. Ke oro ebede, ẹma ẹtọn̄ọ ukpepn̄kpọ Bible ye Dennis, enye ama onyụn̄ enen̄ede anam n̄kọri. Enye ama etre ndin̄wọn̄ sika oro enye ọkọn̄wọn̄de ke isua 28 onyụn̄ etre ndụk ye mme ufan esie oro ẹkenamde kpukpru se enye okodomode nditre. Dennis ama ọkọm Jehovah onyụn̄ ọdọhọ ete: “Uwem ubon mi ama ọfọn akan nte eketiede ke mbemiso. Nnyịn ikesisan̄a nte ubon ika mme mbono esop ye ukwọrọikọ. Akpan ye udọ mi ikesifeheke-fehe mi aba, sia mma n̄kpep ndikara iyatesịt mi nnyụn̄ ntre isụn̄i. Nnyịn ima isinyene nneme inyụn̄ isineme Bible ọtọkiet. Mîkpedịghe akpanikọ Bible, n̄kpodụhe uwem mfịn emi; mma nsisọp iyatesịt etieti.”

Mme ubon ẹkeme ndinyene inemesịt ke ini mmọ ẹsịnde ọkpọsọn̄ ukeme ndinam uduak Jehovah. Ifiọk n̄kpọntịbe owụt ke ọkpọkọm owo kiet kpọt ada mme edumbet Bible esịn ke edinam ke ubon, n̄kpọ esifọn akan edieke owo ndomokiet mîdaha isịn. Ndibọp ubon Christian edi ọkpọsọn̄ utom oro oyomde usọ ye ini. Edi mme andibuana ke mme utọ ubon oro ẹtịm ẹfiọk ke Jehovah ayanam ukeme mmọ okụt unen. Mmọ ẹkeme nditiene ntịn̄ mme ikọ andiwet psalm emi: “Un̄wam mi oto Jehovah.”—Psalm 121:2, NW.

[Ikọ idakisọn̄]

[Se Ẹwetde ke Ikpọ Abisi ke page 9]

‘Kpukpru ubon ke heaven ye ke isọn̄ ẹkere enyịn̄ ẹnọ Abasi.’—EPHESUS 3:15

[Ekebe ke page 8]

JEHOVAH ENEN̄EDE AMA UBON

“Abasi ọdiọn̄ mmọ, Abasi onyụn̄ ọdọhọ mmọ ete, Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄.”—Genesis 1:28.

“Ọfọfọn ọnọ kpukpru owo eke ẹbakde Jehovah . . . N̄wan fo eyebiet vine eke on̄wụmde mfri ke n̄kan̄ ufọk fo.”—Psalm 128:1, 3.