Mme Mbụme Ẹtode Mme Andikot

Ntak emi owo mîkowotke David ye Bath-sheba ke ntak emi mmọ ẹkesịnde efịbe, ke adan̄aemi nsekeyen mmọ akakpade?

Ibet Moses okowụk ete: “Ke adan̄aemi ẹkụtde owo nte okotde n̄wan eke enyenede ebe, mmọ mbiba ẹnyene ndikpa, eren eke okotde n̄wan oro, ye n̄wan n̄ko: ke ntre ke afo edisio idiọk ido ke Israel efep.” (Deuteronomy 22:22) Edieke Jehovah Abasi akpakayakde mme ebiereikpe ke idak Ibet ẹkpe ikpe idiọkn̄kpọ David ye Bath-sheba, ẹkpekewot mme esịn efịbe emi. Sia mme ebiereikpe ẹdide owo mîkekemeke ndifiọk se idude owo ke esịt, mmọ ẹkesibiere ikpe ẹtiene ido mme anamidiọk nte nsọn̄ọ oro ẹkụtde owụtde. Ibet ọkọdọhọ ẹwot mme esịn efịbe. Mme ebiereikpe Israel ikenyeneke unen ndidahado nnọ owo ke utọ idiọkn̄kpọ oro.

Ke n̄kan̄ eken, ata Abasi ọfiọk se idude owo ke esịt onyụn̄ efen ọnọ owo edieke enye okụtde ntak ndifen nnọ. Sia mfịna emi akabuanade David, oro enye akadade anam ediomi Obio Ubọn̄, Jehovah ama emek ndibiere ikpe oro san̄asan̄a ke idemesie. (2 Samuel 7:12-16) “Ebiereikpe ofụri ererimbot” enyene unen ndinam utọ ubiere oro.—Genesis 18:25.

Nso ke Jehovah okokụt ke ini okodụn̄ọrede David esịt? Ikọ enyọn̄ ibuot Psalm 51 ọdọhọ ke psalm emi ayarade ekikere David “ke ini Nathan prophet edide ke ọtọ esie, ke enye ama okokot Bath-sheba.” Psalm 51:1-4 ọdọhọ ete: “O Abasi, tua mi mbọm, nte ima fo edide: sọhi ndudue mi fep ke ediwak mbọm fo. Diọn̄ yet mme ukwan̄-n̄kpọ mi fep, nyụn̄ sio mi mme idiọk ido ke idem fep, nam ndi edisana. Koro mmọfiọk ndudue mi: idiọk ido mi onyụn̄ odu mi ke iso kpukpru ini. Mmedue fi, kpa fi ikpọn̄, mmonyụn̄ nnam idiọk ke iso fo.” Anaedi Jehovah ama okụt ke n̄kpọfiọk ofụri esịt oro David akatuade okowụt ke enye ama enen̄ede akabade esịt ye nte ke ntak ama odu nditua enye ye Bath-sheba mbọm. Ke akande oro, David ke idemesie ekedi owo oro esituade owo mbọm, ndien mbon oro ẹsituade owo mbọm ke Jehovah esitua mbọm. (1 Samuel 24:4-7; Matthew 5:7; James 2:13) Ntem, ke ini David ekenyịmede idiọkn̄kpọ esie, Nathan ama ọdọhọ enye ete: “Jehovah omonyụn̄ adahado ke idiọk ido oro ọnọ fi; afo udukpaha.”—2 Samuel 12:13.

David ye Bath-sheba ikọbọhọke mme utịp idiọkn̄kpọ mmọ. Nathan ọkọdọhọ David ete: “Koro afo amada n̄kpọ emi esịn mme asua Jehovah ẹtịn̄ idiọk ikọ, eyen emi amanade ọnọ fi n̄ko iditreke ndikpa.” Kpa ye oro David eketiede utre udia okonyụn̄ ofụhọde ke usen itiaba, eyen oro ama ọdọn̄ọ akpa.—2 Samuel 12:14-18.

Ntak emi eyen oro akakpade in̄wan̄ake ndusụk owo sia Deuteronomy 24:16 ọdọhọ ete: “Nditọ ẹkûnyụn̄ ẹkpa ẹban̄a mme ete.” Edi ana iti ke edieke ekpedide mme ebiereikpe ẹdide owo ẹkekpe ikpe oro, ete ye eka ye nsekeyen oro mîkamanake do ẹkpekekpan̄a. Ekeme ndidi David ndikataba eyen oro ama an̄wam enye ndinen̄ede mfiọk nte idiọkn̄kpọ esie ye Bath-sheba akayatde Jehovah esịt. Nnyịn imekeme nditịm nnịm ke Jehovah ama enen ke ikpe oro koro “usụn̄ esie ọfọn ama.”—2 Samuel 22:31.

[Ndise ke page 31]

David ama enen̄erede akabade esịt