Ndammana Ifiọk​—Ntak Emi Enye Ananade Ntem-e?

EREN kiet obụp ete: “Nso ifịna enye? Idịghe enye akpanam orụk n̄kpọ oro.” Owo en̄wen ofụn̄ ibuot ke ntak emi enye mînịmke se enye okụtde, onyụn̄ ọdọhọ ete: “Edieke enye ekpenyenede ndammana ifiọk, enye ikpedehede inam utọ n̄kpọ oro.” Ndi akanam afo omokop mme utọ ikọ oro? Nte ededi, nso idi “ndammana ifiọk”?

Ẹkabade ikọ emi “ifiọk” nte “edinen̄ede mfiọk n̄kpọ,” “mbufiọk,” ye “ọniọn̄ m̀mê eti ubiere.” Emi ọwọrọ ke owo enyene ukeme ndida mbufiọk mbiere n̄kpọ ọniọn̄ ọniọn̄. Do, ndammana ifiọk abuana ndikeme ndikere n̄kpọ. Ediwak owo ẹsima mbon efen ẹkere n̄kpọ ẹnọ mmimọ. Mmọ ẹyak ndutịm usuanetop, ubọkn̄ka, m̀mê ọsọ ekikere ebiere se anade mmọ ẹnam.

Etie nte ndammana ifiọk enen̄ede anana ke ererimbot mfịn esịm udomo oro eren kiet ọkọdọhọde ete: ‘Ke nditịm ntịn̄, ndammana ifiọk anana etieti.’ Nnyịn ikeme ndisan̄a didie mfori ndammana ifiọk? Nso idi ufọn esie?

Didie ke Ẹkeme Ndifori Ndammana Ifiọk?

Okposụkedi oyomde ini, ata eti n̄kọkibuot, ye ukeme ofụri ini man ẹfori ndammana ifiọk, ke akpanikọ, kpukpru owo ẹkeme ndifori ndammana ifiọk mmọ. Kere ban̄a n̄kpọ ita oro ẹkemede ndin̄wam nnyịn ifori ndammana ifiọk.

Kpep Bible nyụn̄ kop item. Bible, oro ẹdade ata ndinem ikọ ye n̄kọkibuot oro an̄wan̄ade owo ẹwet, edi ata eti n̄wed oro an̄wamde nnyịn ndinyene ọniọn̄ ye asian. (Ephesus 1:8) Ke uwụtn̄kpọ, apostle Paul esịn udọn̄ ọnọ mme Christian ete: “N̄kpọ ekededi eke ẹdide akpanikọ, n̄kpọ ekededi eke ẹdotde ẹtịm ẹkere, n̄kpọ ekededi eke ẹnende, n̄kpọ ekededi eke ẹsanade, n̄kpọ ekededi eke ẹmade, n̄kpọ ekededi eke ẹwọrọde eti etop, n̄kpọ ekededi eke eti ido odude ye n̄kpọ ekededi eke itoro odude, ẹka iso ẹkere mme n̄kpọ emi.” (Philippi 4:8) Edieke nnyịn inamde item emi kpukpru ini, nnyịn iyenyene ukeme ndinam nti ubiere inyụn̄ inyene eti ibuot.

Kpep n̄kpọ to ifiọk eyouwem. Ke abuande ndammana ifiọk ye ifiọk eyouwem, ewet uto owo Switzerland kiet ekewet ete: “Ndammana ifiọk . . . abuana ifiọk eyouwem ye edida n̄kụt n̄kpọ anyan usụn̄ [ikike].” Ke akpanikọ, “ọkọi ese kpukpru ikọ ke akpanikọ: edi ọniọn̄ etịm ese ikpat isan̄ esiemmọ.” (Mme N̄ke 14:15) Ifiọk eyouwem, ukpepn̄kpọ, ye editịm nse n̄kpọ ẹkeme ndinam owo ofori ndammana ifiọk. Nnyịn imekeme ndinam mme n̄kpọ ke usụn̄ oro ọfọnde akan nte ini ebede. Nte ededi, ndikpep n̄kpọ nto ndudue  nnyịn oyom nsụhọdeidem ye sụn̄sụn̄ ido. Edu mbon n̄wụtidem, ntan̄idem, ye nsọn̄ibuot ke mme akpatre usen emi iwụtke ke mmọ ẹnyene ndammana ifiọk.—2 Timothy 3:1-5.

Da eti ibuot mek mme ufan. Mme ufan nnyịn ẹkeme ndin̄wam nnyịn m̀mê ndibiọn̄ọ nnyịn ndinyene ọniọn̄ nnyụn̄ mfori ndammana ifiọk. Mme N̄ke 13:20 ọdọhọ ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” Inaha nnyịn inyịme ekikere mbon oro ẹsọn̄de ibuot ye Abasi ẹnyụn̄ ẹsịnde Ikọ esie. Mme N̄ke 17:12 ọdọhọ ntem: “Ọfọn bear eke ẹwotde nditọ esie, osobo ye owo, akan ndisịme owo ke ebiọ esie.”

Nso Idi Ufọn Ndammana Ifiọk?

Ọfọn ndinyene ndammana ifiọk. Enye anam uwem etetịm enem onyụn̄ ekeme ndikpan ubiatini. Ndammana ifiọk akam ekeme ndikpan edikpu oro esitode edinam n̄kpọ ye unana edikekere. Mbon oro mînyeneke ukeme ndinam nti ubiere ẹsinam n̄kpọ ọsọn̄ ye idemmọ. Bible ọdọhọ ete: “Utom ndisịme owo oyụhọ enye.” (Ecclesiastes 10:15) Utọ mbon oro ẹkeme ndinen̄ede nnam utom n̄kpa mba, edi ibọhọ akpan utịp ndomokiet.

Bible ọnọ akpakịp nti item ẹban̄ade usanaidem, nneme, nsịnifịk, ediyọ unana, ye ediwak n̄kpọ eken ẹban̄ade uwem. Ata ediwak owo ẹkeme ndisọn̄ọ ke ukpụhọde oro odude ke ufọt edikụt unen ye edikpu ke uwem mmimọ ẹkọn̄ọ ke udomo oro mmimọ idade mme edumbet Bible oro ẹnamde mmimọ inyene ọniọn̄, isịn ke edinam.

Ndammana ifiọk an̄wam nnyịn ndinam n̄kpọ mbe item m̀mê mbet oro ẹnọde. Enye an̄wam nnyịn inam mme utom nnyịn. Nte ededi, nnyịn ndinyene ndammana ifiọk iwọrọke ke inaha ikọ ifiọk. Mme N̄ke 1:5 ọdọhọ ete: “Enyene-ibuot owo oyokop, onyụn̄ ọkọrọ ke se ekpepde.” Ana nnyịn ikpep n̄ko ndidụn̄ọde ifiọk oro nnyịn ikọde, man inen̄ede idiọn̄ọ se enye ọwọrọde. Emi ayan̄wam nnyịn ‘ndisan̄a ke ifiọk.’—Mme N̄ke 28:26.

Nsụkidem ye ndammana ifiọk ẹdi itai ye aban̄. Okposụkedi ekemede ndidọn̄ nnyịn ndikama ediwak ifetutom, oyom nnyịn ida eti ibuot ibiere ndinam utom ntre ke ebiet oro ukeme nnyịn ayakde. Edi akpanikọ, apostle Paul ọdọhọ nnyịn inyene “ekese ndinam ke utom Ọbọn̄.” (1 Corinth 15:58) Kpa ye oro, ana inam item emi odude ke n̄kemuyo ye edumbet oro ẹwetde ke Ecclesiastes 9:4, oro ọdọhọde ete: “Ebua eke odude uwem ọfọn akan okpo lion.” Ndise mban̄a nsọn̄idem nnyịn ke adan̄aemi inamde n̄kpọ Jehovah ekeme ndinam nnyịn idu uwem ibịghi inyụn̄ ika iso inam utom Ọbọn̄. Ndammana ifiọk ekeme ndin̄wam nnyịn ida ukem ukem ke usụn̄ oro ayakde nnyịn inam mme n̄kpọ oro anade inam ye unana editaba idatesịt nnyịn. Ih, ndammana ifiọk enyene ediwak ufọn.

[Ndise ke page 14]

Ẹkụt akpakịp nti item ke Bible

[Ndise ke page 15]

Ifiọk eyouwem, ukpepn̄kpọ, ye editịm nse n̄kpọ ẹnam owo ofori ndammana ifiọk