Ẹkûkpa Mba ke Edinam Se Ifọnde

APOSTLE PETER ọkọnọ item ete: “Ẹnyene eti edu uwem ke otu mme idụt.” (1 Peter 2:12) Ikọ Greek oro ẹkabarede “se ifọnde” ada aban̄a n̄kpọ oro “eyede, enyenede uku, odotde ukpono, onyụn̄ edide ata eti.” Mfịn, etie nte ufọn idụhe ndidori enyịn mme owo ke ofụri ofụri ndidu uwem oro enyenede uku onyụn̄ odotde ukpono. Nte ededi, ikọt Jehovah mfịn nte otu ẹnam item Peter emi. Ke nditịm ntịn̄, eti edu uwem mmọ anam ẹdiọn̄ọ mmọ ke ofụri ererimbot.

Emi enen̄ede odot akpan akpan ke ini ikerede iban̄a mme mfịghe ye nsịn̄ede oro nnyịn isobode ke “ndiọkeyo” emi. (2 Timothy 3:1) Nnyịn imesisobo idomo ke usen ke usen, ndien idịghe esen n̄kpọ ndisobo ubiọn̄ọ ke usụn̄ uwem Christian. Ke adianade do, ke adan̄aemi ndusụk idomo mîsibịghike, mbon eken ẹsibịghi, idem ẹtịmde-tịm ẹsọn̄ ubọk. Kpa ye oro, apostle Paul ọkọnọ item ete: “Ẹyak nnyịn ikûkpa mba ke edinam se ifọnde, koro ke edikem ini nnyịn iyọdọk edieke nnyịn mîkpaha mba.” (Galatia 6:9) Didie ke ikeme ndinam se ifọnde—nnyụn̄ n̄ka iso nnam enye—ke ini isobode ọkpọsọn̄ idomo ẹnyụn̄ ẹsuade nnyịn idiọk idiọk?

Un̄wam Ndinam Se Ifọnde

Ana in̄wan̄-in̄wan̄ nte ke “ndinyene uku, ndidot ukpono, ndinyụn̄ ndi ata eti,” enyene n̄kpọ ndinam ye se owo edide ke esịtidem, oro edi nte esịt owo etiede. Ke ntre, ndinyene eti edu uwem ke ini isobode idomo ye n̄kpọsọn̄ idaha idịghe n̄kpọ oro ẹnamde ke mbuari, edi oto editiene mme edumbet Bible nnyụn̄ nnam enye kpukpru usen ke ofụri ikpehe uwem nnyịn. Nso idi ndusụk n̄kpọ oro ẹkemede ndin̄wam nnyịn ke afan̄ emi? Kere ban̄a se itienede mi.

Nyene edu ukere n̄kpọ Christ. Oyom nsụhọdeidem man iyọ se mînenke. Itiehe nte ke owo oro adade idemesie ke n̄kpọ akaha eyekeme ndiyọ ke ini ẹnamde n̄kpọ ye enye ke idiọk usụn̄. Nte ededi, Jesus ama “osụhọde idem onyụn̄ akabade osụk ibuot tutu osụn̄ọ ke n̄kpa.” (Philippi 2:5, 8) Ke ikpebede enye, nnyịn ‘idikpaha mba idinyụn̄ ikopke mmemidem’ ke edisana utom oro nnyịn inamde. (Mme Hebrew 12:2, 3) Kpep ndisụhọde idem n̄kop item ebe ke ndinyịme ndidiana kiet ye mbon oro ẹdade usụn̄ ke esop mbufo. (Mme Hebrew 13:17) Kpep ndibat ke mbon efen “ẹfọn ẹkan” fi, ebemde iso ese aban̄a mbubehe mmọ mbemiso okwommọ.—Philippi 2:3, 4.

Ti ete ke Jehovah ama fi. Ana nnyịn isọn̄ọ inịm nte ke Jehovah “odu ye nte ke enye edi andinọ mmọ eke ẹsịnde ifịk ẹyom enye utịp.” (Mme Hebrew 11:6) Enye enen̄ede ekere aban̄a nnyịn onyụn̄ oyom nnyịn inyene nsinsi uwem. (1 Timothy 2:4; 1 Peter 5:7) Nditi nte ke n̄kpọ baba kiet ikemeke ndibiat ima oro Abasi amade nnyịn ayan̄wam nnyịn ikûkpa mba ke ini isobode idomo.—Rome 8:38, 39.

Buọt idem ọyọhọ ọyọhọ ye Jehovah. Enen̄ede oyom ibuọt idem ye Jehovah akpan akpan ke ini etiede nte ke idomo inyeneke adan̄a m̀mê ke ini esịnde uwem nnyịn ke itiendịk. Ana nnyịn inyene ọyọhọ mbuọtidem ke Jehovah idiyakke idomo ekededi oro ‘ebede se nnyịn ikemede ndiyọ’ esịm nnyịn, ye nte ke kpukpru ini  enye “oyosio usụn̄ ubọhọ ke ufọt idomo.” (1 Corinth 10:13) Ke ini ibuọtde idem ye Jehovah, nnyịn imekeme ndinam n̄kpọ uko uko idem ke ini ẹdọhọde ke ẹmọn̄ ẹwọt nnyịn.—2 Corinth 1:8, 9.

Ẹkọbọ ke akam. Oyom ibọn̄ akam ke ofụri esịt. (Rome 12:12) Usụn̄ kiet oro nnyịn isan̄ade ikpere Jehovah edi ndibọn̄ akam ke ofụri esịt nnọ enye. (James 4:8) Otode ọkpọkpọ ifiọk eyouwem nnyịn, nnyịn imọfiọk ke “se ededi oro nnyịn iben̄ede . . . , enye ọbiọn̄ utọn̄ ke eben̄e nnyịn.” (1 John 5:14) Edieke Jehovah ayakde idomo aka iso man ẹdomo nsọn̄ọnda nnyịn ẹse, ana nnyịn ibọn̄ akam iben̄e enye an̄wam nnyịn ndiyọ. (Luke 22:41-43) Ndibọn̄ akam an̄wam nnyịn ndifiọk nte ke nnyịn inanake un̄wam, ye nte ke sia Jehovah odude ye nnyịn, nnyịn iyakan kpukpru ini.—Rome 8:31, 37.

Nti Utom—‘N̄kpọ Itoro ye Ukpono’

Ke ini ke ini, ‘nsio nsio idomo ẹsinam’ kpukpru mme Christian ‘ẹfụhọ.’ Kpa ye oro, inaha nnyịn ‘ikpa mba ke edinam se ifọnde.’ Ke ini odude ke mfịghe, yak ifiọk oro afo enyenede nte ke edinam akpanikọ fo iditreke ndidi “n̄kpọ itoro ye ubọn̄ ye ukpono” ọsọn̄ọ fi idem. (1 Peter 1:6, 7) Bọ ufọn ọyọhọ ọyọhọ to ndutịm eke spirit oro Jehovah anamde man ọsọn̄ọ mbuọtidem fo. Ke ini afo oyomde ẹnọ fi ọkpọkpọ ntịn̄enyịn, ka bịne mbon oro ẹnamde utom nte mme ekpemerọn̄, mme andikpep, ye mme ọnọ-item ke esop Christian. (Utom 20:28) Dụk mme mbono esop kpukpru ini sia emi ‘edemerede nnyịn ọnọ ima ye nti utom.’ (Mme Hebrew 10:24) Ndutịm edikot Bible eke usen ke usen ye ọkpọkpọ ukpepn̄kpọ ayan̄wam fi odu ke edidemede onyụn̄ ọsọn̄ idem ke n̄kan̄ eke spirit; kpa ntre n̄ko ke edibuana kpukpru ini ke utom ukwọrọikọ Christian edin̄wam fi.—Psalm 1:1-3; Matthew 24:14.

Adan̄a nte afo ọbọde ufọn oto ima ye ukpeme Jehovah, kpa ntre ke edinen̄ede idọn̄ fi ‘ndisịn ifịk nnam nti utom.’ (Titus 2:14) Ti ete ke ‘ẹdinyan̄a owo eke ediyọde tutu esịm utịt.’ (Matthew 24:13) Ih, biere ke ‘udukpaha mba ke edinam se ifọnde’!

[Se Ẹwetde ke Ikpọ Abisi ke page 29]

Ana nnyịn inyene ọyọhọ mbuọtidem nte ke Jehovah idiyakke idomo ekededi oro ‘ebede se nnyịn ikemede ndiyọ’ esịm nnyịn, ye nte ke kpukpru ini enye “oyosio usụn̄ ubọhọ ke ufọt idomo” oro

[Mme ndise ke page 30]

Ndiyọhọ ye mme edinam ukara Abasi ekeme nditịm nnyịn idem nnọ ediyọ mme idomo