Jehovah Esikpeme Mbon Oro Ẹbetde Enye
Jehovah Esikpeme Mbon Oro Ẹbetde Enye
“Ima fo ye akpanikọ fo ẹyekpeme mi kpukpru ini.”—PSALM 40:11.
1. Nso ke Edidem David ekeben̄e Jehovah, ndien didie ke Jehovah ọbọrọ akam oro kan̄a ke emi?
EDIDEM DAVID eke Israel eset ‘eketie ebet Jehovah,’ ndien emi ama anam enye ọdọhọ ke Jehovah “onụhọ ese [imọ] onyụn̄ okop eseme [imọ].” (Psalm 40:1) Enye ama esiwak ndikụt nte Jehovah ekpemede mbon oro ẹmade Enye. Oro akanam David eben̄e Jehovah ete ekpeme imọ kpukpru ini. (Psalm 40:11) Sia David esịnede ke otu mme anam-akpanikọ iren ye iban oro ẹken̄wọn̄ọde “ediset ke n̄kpa eke ọfọnde akan” ẹnọ, Jehovah enen̄ede eti enye nte owo oro imọ idinamde eset. (Mme Hebrew 11:32-35) Ke ntem, ini iso esie enen̄ede enyene nsọn̄ọ. Ẹwet enyịn̄ esie ẹsịn ke “n̄wed editi” Jehovah.—Malachi 3:16.
2. Didie ke N̄wed Abasi anam nnyịn ifiọk se Jehovah ndikpeme nnyịn ọwọrọde?
2 Okposụkedi mme anam-akpanikọ oro ẹtịn̄de ẹban̄a ke Mme Hebrew 11 ẹkedude uwem mbemiso Jesus Christ ekedide isọn̄, mmọ ẹma ẹdu uwem ekekem ye se Jesus ekekpepde ete: “Owo eke amade ukpọn̄ esie osobo enye, edi owo eke asuade ukpọn̄ esie ke ererimbot emi eyekpeme enye enịm ọnọ nsinsi uwem.” (John 12:25) Ntre, Jehovah ndikpeme nnyịn iwọrọke ke nnyịn iyọbọhọ ndutụhọ m̀mê ukọbọ. Edi enye ekpeme nnyịn ke n̄kan̄ eke spirit man ikeme ndinyene eti idaha ke iso Abasi.
3. Nso iwụt ke Jehovah ama ekpeme Christ Jesus, ndien nso ikedi utịp?
3 Ẹma ẹnen̄ede ẹkọbọ ẹnyụn̄ ẹsuene Jesus, ndien mme asua esie ẹma ẹwot enye ke akpatre ke ata enyene-ndịk usụn̄ oro ekenen̄erede akama esuene ye ubiak. Edi oro ikọwọrọke ke Abasi ikosụhu un̄wọn̄ọ oro Enye ọkọn̄wọn̄ọde ke iyekpeme Messiah. (Isaiah 42:1-6) Jesus ndikeset ke ọyọhọ usen ita ke ẹma ẹkewot enye ke esuene esuene usụn̄, owụt ke kpa nte Jehovah okokopde eseme David, ke Enye n̄ko ama okop eseme Jesus onyụn̄ ọnọ enye ukeme ndisọn̄ọ nda. (Matthew 26:39) Ndikekpeme Jesus ntem ama anam enye enyene uwem oro mîkemeke ndikpa ke heaven, ndien ediwak miliọn owo oro ẹbuọtde idem ke ufak oro ẹnyene idotenyịn edidu nsinsi uwem.
4. Nso un̄wọn̄ọ ke ẹn̄wọn̄ọ ẹnọ mme Christian oro ẹyetde aran ye “mme erọn̄ en̄wen”?
4 Nnyịn imekeme ndinyene mbuọtidem ke ọdọn̄ Jehovah ndien ke enye onyụn̄ ekeme ndikpeme mme asan̄autom esie idahaemi kpa nte enye ekekpemede ke eyo David ye Jesus. (James 1:17) Ibat ibat nditọete Jesus oro ẹsụhọde ke isọn̄ mfịn ẹkeme ndinyene mbuọtidem ke un̄wọn̄ọ Jehovah emi: ‘Ẹnịm udeme eke mîkemeke ndibiara mînyụn̄ isabakede mînyụn̄ ikemeke ndibe mfep, ke heaven ẹnọ mbufo, emi ẹdade odudu Abasi ẹkpeme ebe ke mbuọtidem kaban̄a edinyan̄a eke ẹdiyararede ke akpatre ini.’ (1 Peter 1:4, 5) “Mme erọn̄ en̄wen” oro ẹdoride enyịn ndidu ke isọn̄ ẹkeme n̄ko ndibuọt idem ke Abasi ye ke mme un̄wọn̄ọ esie oro enye akadade andiwet psalm ọn̄wọn̄ọ ete: “O, mbufo ẹma Jehovah, kpukpru mbon-ima esie: Jehovah ekpeme mbon-akpanikọ.”—John 10:16; Psalm 31:23.
Ukpeme eke Spirit
5, 6. (a) Didie ke ẹkpeme ikọt Abasi ke eyomfịn? (b) Nso itie ebuana ke mbon oro ẹyetde aran ẹnyene ye Jehovah, ndien nso kaban̄a mbon oro ẹdoride enyịn ndidu ke isọn̄?
5 Mfịn, Jehovah amanam ndutịm man ọnọ ikọt esie ukpeme eke spirit. Okposụkedi enye mîsikpemeke mmọ ibiọn̄ọ ukọbọ m̀mê nsọn̄ọn̄kpọ ye mme nnama oro ẹdide ọsọ ke uwem, enye esida ima ọnọ mmọ un̄wam ye nsịnudọn̄ oro mmọ ẹyomde man ẹkeme ndika iso nnyene n̄kpet n̄kpet itie ebuana ye enye. Mbuọtidem oro mmọ ẹnyenede ke ima ima ndutịm ufak oro Abasi anamde edi itiat idakisọn̄ itie ebuana emi. Ẹma ẹda spirit Abasi ẹyet ndusụk mme anam-akpanikọ Christian aran man ẹtiene Christ ẹkara ke heaven. Ẹbat mmọ ke edinen nte nditọ Abasi ke spirit, ndien ikọ emi aban̄a mmọ: “Enye ama anyan̄a nnyịn osio ke odudu ekịm onyụn̄ esịn nnyịn ke obio ubọn̄ Eyen ima esie, emi otode ke enye ẹsio nnyịn ke ufụn ebe ke ufak, kpa edifen mme idiọkn̄kpọ nnyịn.”—Colossae 1:13, 14.
6 Ẹn̄wọn̄ọ ẹnọ ata ediwak mme anam-akpanikọ Christian eken ke mmọ n̄ko ẹkeme ndibọ ufọn nto ndutịm ufak oro Abasi anamde. Nnyịn ikot ite: “Eyen owo ikedịghe man ẹnam n̄kpọ ẹnọ enye, edi man enye anam n̄kpọ ọnọ owo onyụn̄ ọnọ ukpọn̄ esie nte ufak ke ibuot ediwak owo.” (Mark 10:45) Mme Christian emi ẹdori enyịn ndinyene “ubọn̄ ubọn̄ ifụre eke nditọ Abasi” ke edikem ini. (Rome 8:21) Kan̄a ke emi, mmọ ẹma ọkpọkpọ itie ebuana oro mmọ ẹnyenede ye Abasi ẹnyụn̄ ẹnen̄ede ẹsịn ukeme ndisọn̄ọ itie ebuana oro.
7. Nso ke Jehovah ada ekpeme nsọn̄ọidem eke spirit ikọt esie mfịn?
7 Usụn̄ kiet oro Jehovah ekpemede nsọn̄ọidem eke spirit ikọt esie edi ndinam ndutịm man mmọ ẹka iso ẹbọ ukpep. Emi anam mmọ ẹnen̄ede ẹfiọk akpanikọ. Jehovah aka iso ada n̄ko Ikọ, esop, ye edisana spirit esie ọnọ ikọt esie ndausụn̄. Nditiene ndausụn̄ oro “ofụn emi anamde akpanikọ onyụn̄ enyenede ọniọn̄” ọnọde anam ikọt Abasi ke ofụri ererimbot ẹtie nte ubon kiet. Ofụn emi ese aban̄a se ubon Jehovah oyomde ke n̄kan̄ eke spirit ye ke n̄kan̄ eke obụk ke ini oyomde ẹnam oro—inamke n̄kpọ m̀mê mmọ ẹto m̀mọ̀n̄ m̀mê nso idi idaha mmọ ke ererimbot.—Matthew 24:45.
8. Nso mbuọtidem ke Jehovah enyene ke idem mbonima esie, ndien nso nsọn̄ọ ke emi ọnọ mmọ?
8 Kpa nte Jehovah mîkekpemeke Jesus isio ke ubọk mme asua, Enye ikpemeke mme Christian ntre mfịn. Edi emi iwọrọke ke Abasi imaha mmọ. N̄wan̄ansa-o! Utu ke oro, enye owụt ke Abasi enyene mbuọtidem ke mmọ ẹyesọn̄ọ ẹda ke n̄kan̄ imọ ke akwa eneni oro abuanade ofụri ererimbot. (Job 1:8-12; Mme N̄ke 27:11) Jehovah idifreke mbon oro ẹmade enye tutu amama, “koro Jehovah amade edinen ikpe, ndien ikpọn̄ke mbon-ima esie; eyekpeme mmọ ke nsinsi.”—Psalm 37:28.
Ada Ima ye Akpanikọ Ekpeme Mmọ
9, 10. (a) Didie ke akpanikọ Jehovah ekpeme ikọt esie? (b) Didie ke Bible owụt ke Jehovah ada ima ekpeme mbonima esie?
9 Ke akam esie oro ewetde ke Psalm 40, David ama eben̄e Jehovah ada ima ye akpanikọ Esie ekpeme imọ. Sia Jehovah edide Abasi akpanikọ oro amade edinen ido, enye esitịn̄ in̄wan̄-in̄wan̄ se enye amade. Ẹkpeme mbon oro ẹnamde se enye amade ẹbiọn̄ọ ndusụk nnanenyịn, ndịk, ye mme mfịna oro mbon oro ẹfụmide mme idaha Abasi ẹnyenede. Ke uwụtn̄kpọ, nnyịn imekeme ndikpeme idem nnyịn ye mbonima nnyịn mbiọn̄ọ afanikọn̄ oro ẹkamade iduọesịt edieke nnyịn ifepde edida n̄kpọsọn̄ ibọk ke idiọk usụn̄, edin̄wọn̄ n̄kpọsọn̄ mmịn mbe ubọk, etịme etịme ido idan̄, ye uwem afai. Ndien idem mbon oro ẹyode ẹkpọn̄ usụn̄ akpanikọ Jehovah—nte David okoyode ndusụk ini—ẹkpenyene nditịm mfiọk ke Abasi ke ededi “ebiet udịbe” ọnọ mme anamidiọk oro ẹkabarede esịt. Utọ mbon oro ẹkeme ndikwọ ke idatesịt ẹte: “Afo . . . eyekpeme mi abak nnanenyịn.” (Psalm 32:7) Nso ima ke Abasi ama nnyịn ntem!
10 Usụn̄ efen oro owụtde ke Abasi ama nnyịn edi enye ndidụri mme asan̄autom esie utọn̄ ete ẹda san̄asan̄a ẹkpọn̄ idiọk ererimbot emi enye oyomde ndisọp nsobo mi. Nnyịn ikot ite: “Ẹkûma ererimbot m̀mê se idude ke ererimbot. Edieke owo ekededi amade ererimbot, ima Ete idụhe enye ke esịt; koro kpukpru se idude ke ererimbot—mbumek obụkidem ye mbumek enyịn ye n̄wụtidem ke n̄kpọ eke owo adade odu uwem—itọn̄ọke ito Ete, edi ọtọn̄ọ oto ererimbot.” Edieke inamde item emi inyụn̄ idude uwem nte ọfọnde, nnyịn imekeme ndinen̄ede n̄kpeme uwem nnyịn ke nsinsi nsinsi, koro itien̄wed oro aka iso ete: “N̄ko-n̄ko, ererimbot ke ebebe efep kpasụk ntre n̄ko ye mbumek esie, edi owo eke anamde uduak Abasi ododu ke nsinsi.”—1 John 2:15-17.
Yak Ekikere, Mbufiọk, ye Eti Ibuot Ẹkpeme Fi
11, 12. Tịn̄ nte ekikere, mbufiọk, ye eti ibuot ẹkpemede nnyịn.
11 Solomon eyen David ama ewet ke ndausụn̄ odudu spirit aban̄a mbon oro ẹyomde ndinyene mfọn Abasi ete: “Ekikere eyetie ekpeme fi, mbufiọk eyenịm fi.” Enye ama onyụn̄ eteme ete: “Nyene eti ibuot, . . . Kûkpọn̄ enye, ndien enye eyekpeme fi: ma enye, ndien enye ayakama fi.”—Mme N̄ke 2:11; 4:5, 6.
12 Nnyịn iwụt ke imenyene ukeme ukere n̄kpọ ke ini itiede ikere se nnyịn ikpepde ke Ikọ Abasi. Editie n̄kere se ikpepde anam nnyịn inen̄ede inyene mbufiọk oro an̄wamde nnyịn ndifiọk se idide ata akpan n̄kpọ ke uwem. Emi edi akpan n̄kpọ koro ata ediwak nnyịn imọfiọk—eyedi ke ntak se iketịbede inọ nnyịn—nte ke afanikọn̄ esitịbe ke ini owo okoide-koi m̀mê eduede-due ebịne se mîdịghe akpan n̄kpọ ke uwem. Ererimbot Satan oyom nnyịn ibịne inyene, uwọrọiso, ye odudu, ke adan̄aemi Jehovah enen̄erede esịn udọn̄ ọnọ nnyịn ete ibịne mme n̄kpọ eke spirit. Edieke owo ayakde n̄kpọ eke obụk edi ebeiso ke uwem esie utu ke mme n̄kpọ eke spirit, emi ekeme ndibiat ubon, abiat mme ufan, inyụn̄ iyakke owo eti aba mme utịtmbuba eke spirit. Utịp utọ owo oro edi ukem ukem ye idiọk idaha oro Jesus eketịn̄de aban̄a ke ini enye okobụpde ete: “Nso udori ke owo edidia edieke enye enyenede ofụri ererimbot ndien ataba ukpọn̄ esie?” (Mark 8:36) Eti ibuot ayanam nnyịn ikop item Jesus emi: “Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ eken ẹnọ mbufo.”—Matthew 6:33.
N̄kpọndịk Oro Ibụk Akamade
13, 14. Nso idi ibụk, ndien ntak emi mîfọnke ndidi ibụk?
13 Edi ndammana n̄kpọ ndikere mban̄a idem nnyịn. Edi ke ini owo ayakde se enye amade akabade edi ata akpan n̄kpọ ke uwem esie, afanikọn̄ edi oro. Ke ntre, man ika iso idi ufan Jehovah, enye ọdọhọ ikûdi ibụk. Ibụk edi owo emi ekerede ufọn idemesie, se enye oyomde, m̀mê se enye amade kpọt. Ndi idịghe nte ediwak owo ẹtiede mfịn edi oro? Bible etịn̄ ntịn̄nnịm ikọ ete ke “mme owo ẹyedi mme ama idem” m̀mê ibụk ke “mme akpatre usen” idiọk editịm n̄kpọ Satan emi.—2 Timothy 3:1, 2.
14 Mme Christian ẹfiọk ke ọfọn ndinam ewụhọ Bible oro ọdọhọde ikere iban̄a mbon en̄wen, ima mmọ nte imade idem nnyịn. (Luke 10:27; Philippi 2:4) Ediwak owo ẹkere ke emi inyeneke ufọn, edi emi edi akpan n̄kpọ edieke iyomde ndọ nnyịn ọfọn, iyomde ndinyene inem inem itie ebuana ke ubon, inyụn̄ iyomde ndinyene mme ufan oro ẹnọde nnyịn inemesịt. Ntre, ata asan̄autom Jehovah ikpedehede iyak ndammana udọn̄ esie akara enye tutu enye efre enyịn aban̄a se idide ata akpan n̄kpọ. Ndien ata akpan n̄kpọ oro aban̄a Jehovah, kpa Abasi oro enye atuakde ibuot ọnọ.
15, 16. (a) Nso ke edu ibụk ekeme ndida n̄kesịm, ndien uwụtn̄kpọ anie owụt emi? (b) Ke nditịm ntịn̄, edieke owo ọsọpde okụt ndudue ọnọ owo, nso ke enye anam oro?
15 Edu ibụk ekeme ndinam owo okụt idem ke edinen ndien emi ekeme ndikpan owo ndinyene in̄wan̄-in̄wan̄ ekikere, onyụn̄ anam enye anam n̄kpọ iseri iseri. Bible ọdọhọ nte enende ete: “Afo O owo, inamke n̄kpọ m̀mê afo edi anie, unyeneke n̄kpọ nditịn̄ nnyan̄a idem, edieke afo ekpede ikpe; koro afo omobiom idemfo ikpe ke n̄kpọ eke adade ekpe ikpe ọnọ owo efen, adan̄a nte afo emi ekpede ikpe anamde kpa mme n̄kpọ emi.” (Rome 2:1; 14:4, 10) Mme adaiso ido ukpono eyo Jesus ẹkenen̄ede ẹda idem ke edinen tutu mmọ ẹkere ke imodot ndisua nnọ Jesus ye mme anditiene enye. Ke ndinam emi, mmọ ẹkenịm idem ke mme ebiereikpe. Edi sia mmọ mîkekemeke ndikụt mme ndudue idemmọ, mmọ ke akpanikọ ẹkekam ẹbiom idemmọ ikpe.
16 Judas, kpa anditiene Jesus emi akadade Jesus ọnọ, ekedi owo emi esikụtde ndudue ọnọ mbon en̄wen. Ke ini Mary eyeneka Lazarus ekeyetde Jesus enem-utebe aran ke Bethany, Judas ama ọsọn̄ọ ọdọhọ ke inenke ndinam oro. Judas ama ayat esịt obụp ete: “Ntak emi owo mîkanyamke enem-utebe aran emi ke denarius ikie ita inyụn̄ ida inọ mme ubuene?” Edi itien̄wed oro anam n̄kpọ emi an̄wan̄a ke ndika iso ete: “Edi enye itịn̄ke emi koro enye ekerede aban̄a mme ubuene, edi koro enye edide inọ onyụn̄ akamade ekebe okụk ndien esision̄o okụk oro ẹsịnde ke esịt.” (John 12:1-6) Ẹyak nnyịn ikûbiet Judas m̀mê mme adaiso ido ukpono oro ẹkesisọpde ẹkụt ndudue ẹnọ mbon en̄wen, edi ẹkabarede ẹbiom idemmọ ikpe.
17. Wụt n̄kpọndịk oro asan̄ade ye n̄wụtidem m̀mê ọkpọsọn̄ nnam-inua.
17 Edi n̄kpọ mfụhọ ke okposụkedi ndusụk akpa mme Christian mîkedịghe inọ nte Judas, mmọ ẹkedi mbon iseri ye mbon n̄wụtidem. James ekewet aban̄a mmọ ete: “Mbufo ke emi ẹbụre mbụre ke nnam-inua mbufo.” Ekem enye ama adian do ete: “Kpukpru mbụre eke ẹtiede ntre ẹdiọk.” (James 4:16) Edieke nnyịn inamde inua iban̄a se nnyịn inamde m̀mê ifetutom oro inyenede ke esop Jehovah, oro idiyakke nnyịn inam n̄kọri. (Mme N̄ke 14:16) Imeti se iketịbede inọ apostle Peter, emi akanamde inua ke ekpri ibio ini ete: “Kpukpru owo eken ẹkpetatuak ukot ẹduọn̄ọ kaban̄a fi, ami ndituakke ukot nduọ tutu amama! . . . Idem akpana nte n̄kpa ye afo, ndidehede n̄kan̄ fi.” Ke akpanikọ, nnyịn inyeneke n̄kpọ ndomokiet oro akpanamde nnyịn inam inua. Ima-mfọnido Jehovah anam inyene se ededi oro inyenede. Nditi emi idiyakke nnyịn iwụt idem.—Matthew 26:33-35, 69-75.
18. Didie ke Jehovah ese iseri?
18 Ẹsian nnyịn ẹte: “Iseri ebem nsobo iso: n̄kpon-esịt onyụn̄ ebem iduọ iso.” Ntak-a? Jehovah ọbọrọ ete ke imọ isasua “iseri, ye isen̄,” oro edi, nnam-inua. (Mme N̄ke 8:13; 16:18) Eyịghe idụhe Jehovah akayatde esịt aban̄a “iseri esịt edidem Assyria, ye ubọn̄ mmenede iso esie”! (Isaiah 10:12) Jehovah ama okot enye edinam ibat. Ke mîbịghike, ẹyenyụn̄ ẹsobo ofụri ererimbot Satan, ọkọrọ ye mme eseri-iseri andikara esie oro ẹkụtde ke enyịn ye oro enyịn mîkwe. Akpakam nnyịn idehede idi mbon itụn nte mme asua Jehovah!
19. Ikọt Abasi ẹbụre mbụre ẹban̄a nso okposụkedi mmọ ẹsụhọrede idem?
19 Ata mme Christian ẹnen̄ede ẹnyene ntak ndibụre mbụre mban̄a idaha mmọ nte mme asan̄autom Jehovah. (Jeremiah 9:24) Mmọ ẹnen̄ede ẹnyene ntak n̄ko ndisụhọde idem. Ntak-a? “Koro kpukpru owo ẹma ẹnam idiọkn̄kpọ ẹnyụn̄ ẹtaba ubọn̄ Abasi.” (Rome 3:23) Mmọdo, man ikpeme idaha nnyịn nte mme asan̄autom Jehovah, ana nnyịn inyene ukem edu apostle Paul, emi ọkọdọhọde ke “Christ Jesus ekedi ke ererimbot ndinyan̄a mme anamidiọk,” ekem adian do ete: “Ami ndi akakan ke otu mmọ emi.”—1 Timothy 1:15.
20. Didie ke Jehovah ekpeme ikọt esie idahaemi, ndien didie ke enye edikpeme mmọ ke ini iso?
20 Sia ikọt Jehovah ẹmade ndisịk udọn̄ idemmọ nnịm n̄kan̄ kiet man ẹkeme ndinịm n̄kpọ Abasi akpa, nnyịn imenen̄ede inịm ke Jehovah ayaka iso ekpeme mmọ ke n̄kan̄ eke spirit. Nnyịn imenen̄ede inịm n̄ko ke Jehovah eyekpeme ikọt esie ke ini akwa ukụt editọn̄ọde. Ke ikọt Jehovah ẹma ẹkebọhọ ẹdụk obufa ererimbot Abasi, mmọ ẹyekwọ ke idatesịt ẹte: “Sese, Abasi nnyịn edi emi; nnyịn imebet enye, ndien enye anyan̄a nnyịn: Jehovah edi emi; nnyịn imebet enye: iyadara inyụn̄ ibre mbre iban̄a edinyan̄a esie.”—Isaiah 25:9.
Nte Afo Emeti?
• Didie ke ẹkekpeme Edidem David ye Jesus Christ?
• Didie ke ẹkpeme ikọt Jehovah mfịn?
• Ntak emi nnyịn ikpefepde ibụk?
• Ntak emi nnyịn ikemede ndibụre mbụre okposụkedi isụhọrede idem?
[Mme Mbụme Ukpepn̄kpọ]
[Mme ndise ke page 9]
Didie ke Jehovah ekekpeme David ye Jesus?
[Mme ndise ke page 10, 11]
Ke mme usụn̄ ewe ke ẹkpeme ikọt Abasi ke n̄kan̄ eke spirit mfịn?
[Mme ndise ke page 12]
Okposụkedi ibụrede mbụre ke ntak oro inamde n̄kpọ Jehovah, ana nnyịn ika iso isụhọde idem