Ntọt Mme Anditan̄a Obio Ubọn̄

Mbon Oro Ẹnamde Akpanikọ Ẹda Itoro Ẹsọk Jehovah

ẸDIỌN̄Ọ Mme Ntiense Jehovah—n̄kpri ye ikpọ—ke ofụri ererimbot nte mbon oro ẹnamde akpanikọ. Kere ban̄a uwụtn̄kpọ emi ẹtode nsio nsio idụt ita mi.

Nte Olusola emi edide isua 17 onyụn̄ odụn̄de ke Nigeria ọkọnyọn̄de ufọkn̄wed usen kiet, enye ama okụt ekpri ekpatokụk anade ke isọn̄. Eyenan̄wan emi ama emen ekpatokụk emi ọsọk etubom ufọkn̄wed mmọ, ndien etubom ama abat okụk oro onyụn̄ okụt ke edi ₦6,200. Etubom ama ayak ekpatokụk oro ọnọ andikpep emi ekpat emi ọkọbọhọde osop. Esịt ama enem andikpep emi tutu enye osio ₦1,000 ọnọ Olusola ọdọhọ ada ekekpe okụk ufọkn̄wed esie. Nditọ ufọkn̄wed eken ẹma ẹsak Olusola ke ini mmọ ẹkekopde emi. Ke urua ifan̄ ẹbede, eyen ufọkn̄wed kiet ama ọdọhọ ke ẹyịp okụk imọ, ndien ẹma ẹdọhọ mme andikpep ẹdụn̄ọde kpukpru nditọ ufọkn̄wed m̀mê ẹyekụt okụk oro. Andikpep oro ama ọdọhọ Olusola ete: “Afo, wọrọ da ko. Mmọfiọk ke sia edide kiet ke otu Mme Ntiense Jehovah ke afo ukemeke ndiyịp inọ.” Ẹma ẹkụt okụk oro ke ekpat nditọ ufọkn̄wed iba emi ẹketienede ẹsak Olusola ndien ẹma ẹnọ mmọ ufen etieti. Olusola ekewet ete: “Enem mi esịt etieti nte ke ẹdiọn̄ọ mi nte kiet ke otu Mme Ntiense Jehovah emi mîdiyịpke inọ tutu amama, ndien emi ada itoro ọsọk Jehovah.”

Usen kiet ke ini Marcelo emi otode Argentina ọkọkpọn̄de ufọk esie, enye ama okụt ekpatubọk anade ekpere enyịnusụn̄ edemesa ufọk esie. Enye ama emen ekpatubọk emi odụk ufọk, ndien enye ye n̄wan esie ẹma ẹkụbọde ẹse se isịnede. Idem ama akpa mmọ etieti ndikụt ata ediwak okụk, mme kad udep n̄kpọ ke isọn, ye ediwak babru okụk bank oro ẹma ẹkesịn ubọk, emi kiet ekesịnede pesos miliọn kiet ke okụk Argentina (n̄kpọ nte ₦5,000,000). Mmọ ẹma ẹkụt nọmba urụk ukopikọ ke babru ekọmurua n̄kpọ emi ekesịnede ke ekpat oro. Ndien mmọ ẹma ẹda nọmba urụk ukopikọ emi ẹkot andinyene ekpat oro ẹdọhọ enye edi itieutom Marcelo edibọ ekpat esie ye se ikọdọn̄ọde ke esịt. Ke ini andinyene ekpat oro ekedide edisịm, enye eketie ndịk ndịk. Eteutom Marcelo ama ọdọhọ enye okûkop ndịk koro Marcelo edide kiet ke otu Mme Ntiense Jehovah. N̄kukụre se andinyene ekpat emi ọkọnọde Marcelo nte utịp ke ndikụt ekpat oro ekedi pesos 20 (n̄kpọ nte ₦800) kpọt. Utọ efam emi ama enen̄ede ayat eteutom Marcelo esịt koro edinam akpanikọ Marcelo ama enen̄ede otụk enye. Emi ama ọnọ Marcelo ifet ndinam an̄wan̄a nte ke sia imọ idide kiet ke otu Mme Ntiense Jehovah, imọ iyom ndinam akpanikọ kpukpru ini.

N̄kpọntịbe enye emi oto Kyrgyzstan. Eyeneren emi edide isua itiokiet emi ekerede Rinat ama okụt ekpri ekpatokụk emi ekenyenede okụne-ọfọn̄ an̄wan kiet emi okodụn̄de ekpere mmọ. Som 1,100 (n̄kpọ nte ₦3,200) ke okụk Kyrgyzstan ekesịne ke ekpat oro. Ke ini Rinat akayakde ekpat oro ọnọ n̄wan oro, enye ama abat okụk oro ese onyụn̄ ọdọhọ eka Rinat ke som 200 (n̄kpọ nte ₦640) osop ke otu okụk oro. Rinat ama ọdọhọ ke idịghe imọ ikosio okụk oro. Do kpukpru mmọ ẹma ẹdaha ẹka ndiyom okụk oro okosopde ndien mmọ ẹma ẹkụt enye ẹkpere ebiet emi ẹkekụtde ekpatokụk oro. Idem ama akpa n̄wan oro. Enye ama ọkọm Rinat ye eka esie, akpa, ke ndikemen okụk oro okosopde nsọk imọ, ọyọhọ iba, ke ukpep oro eka esie ọnọde enye nte Christian.